لۇشۇن ئەدەبىيات ئىنىستىتۇتى 5- قېتىملىق ئاز سانلىق مىللەت ...   [ئۇلانما كۆچۈرۈش]

                                         
                             ياشلىق دىگەن دەسمايە
                                        (نەسىر)

       <<ياشلىق دىگەن دەسمايە>> دېدى ئۇ، ياشلىق دىگەن شاش، شوخ، ئوينايدىغان،  خالىساڭ كۈن – تۈن ئۇخلاپ، خالىساڭ يەپ – ئىچىپ، خالىساڭ بۇزۇپ – چېچىپ، كەيىپ-ساپا سۈرىدىغان، خالىساڭ  يېپىپ كىيىپ، خالىمىساڭ ئۇچۇق قويۇپ، خالىساڭ تۈننى كۈنگە ، خالىمىساڭ  كۈننى تۈنگە ئۇلاپ  ئويناپ يايرايدىغان، توسۇن ئاتتەك ھەريان چاپىدىغان، خالىساڭ ھاتەم، ۋە ياكى رۇستەم، خالىمىساڭ ئۆكتەم بولۇپ كوچا سورايدىغان غېنىمەت دەۋرى بۇ. سەت – چىرايلىق بىلەن نىمە ئىشىم، ياشلىق دىگەن تەبىئى جەزبىدار، جەلىپكار، ئالداپ ئۆتسەڭ ھەممە يار، بېزەڭ بولساڭ ھەممە بار، شادىمان دەۋرى بۇ دەيتتى ئۇ.  ياشلىق، ئاھ...  ياشلىق! دەيدۇ مەيدىسىگە پەنجىلەپ. بېشىنى چايقىغانلارغا  ھومۇيۇپ قاراپ، ئۆچكىدەك مەرەپ، ئەتە بىلەن نىمە ئىشىم، بۈگۈن پىشسىلا بولدى ئېشىم دەپ قاقاھلاپ كۈلۈپ. ياشلىق ئۆتكۈنچى دەۋىر، ھامان بىزدىن يىراقلاپ كىتىدۇ، ئەتە ئۆگۈن ياشلىق دەۋرى ئۇزاپ،  يادنامىلەر قالغاندا  شۇ شاشلىقلىرىغا، شۇ جگلىپكارلىقىغا ، شۇ باياشادلىقىغا ئىمكان بولسىدى، ئاتا – ئاناسىنىڭ بۈگۈن ئاڭا ئىچى ئاچچىق بولماس ئىدى. ئەپسۇس، بىھۇدە ئۈتىۋاتقان كەلگۈسى  كۆز ئالدىغا  كەلمەيدىغان  بەڭۋاش ياشلىقىغا تېڭىرقاپ تۇرمىسا بولاتتى. <<ئاتالمىساڭ ئوقۇڭدىن>>  دىگەندەك، ئەتىلا ھەممە بىخوتلىقىنى  ياشلىققا ھاپاشلىتىپ  قويار بەلكىم. يۈگەنسىز ياشلىق ھەر كويلارغا سالدى دەپ  ئۇھ تاتۇر.
<<ياشلىق دىگەن دەسمايە>> دېدىڭ سەن، قولۇڭدىكى كىتاپنى پۇلاڭلىتىپ ، ياشلىق دىگەن ئىلىم، بىلىم ئۆگىنىدىغان، ئەقىل ، ھۆنەر ئىگەللەيدىغان، ماددى ۋە مەنىۋى جەھەتتە  ساغلاملىقنى قوغدايدىغان، ئەخلاق ئىچىدە  ئەتىنى ئويلايدىغان قىممەتلىك دەۋىر بۇ دەيسەن. ياشلىقتا كىتاپ ئوقۇساڭمۇ بولىدۇ، كېچە – كېچىلەپ ئۆگەنسەڭمۇ بولىدۇ. كۆزۈڭ روشەن، زېھنىڭ بوشەن، نەلەرگە بېرىپ ئىزدەنسەڭ بولىدۇ، ئايىقىڭ تېمەن. ھۆنەر، كەسىپ ئىگەللىسەڭ بولىدۇ، تەپەككۇر قىلساڭ بولىدۇ، پىكىرىڭ بىلەن ھەر تۈردە  ھەر كۈندە، ھەر سۆزدە يازساڭ بولىدۇ، كۆزلەپ ئوقۇرمەن. راست ئەمەسمۇ <<ياشلىقتا ئۆگەنگەن تاشقا مۆھۈر ئويغاندەك>> دىگەن . ئۇلاپلا دېگۈم  كېلىدۇ <<ياشلىقتا تىكلەنگەن ئىرادە مۇستەھكەم بولۇر، تاغلار قەد كۆتۈرگەندەك، ياشلىقتا قىلىنغان نىيەت پارلاقتۇر، قوياش پارلىغاندەك>>.
ياشلىق سۇ كەبى ئاقماستا توغان بولۇپ توسۇۋال، ئوق بۇلۇپ ئېتىلماستا  ئەقلىڭ بىلەن تۇتىۋال،  قوياش بولۇپ پاتماستا  ئاپتىپىنى سۇنىۋال، يامغۇر بولۇپ سىڭمەستە  چۆللەر تامان قويۇۋال، گۈل بولۇپ تۇزۇپ كەتمەستە  گۈل رەڭگىدە بويىۋال.  توسۇن ئات بولۇپ  قاشقىچە  چەۋەنداز بولۇپ مىنىۋال، راھىتىنى ھالاللاپ  ھوزۇرلىنىپ سۈرىۋال. ياشلىق ئۇ سېنىڭ بارلىق جەريانىڭ ئەمەس، ئەمما گۈل چېغىڭ، ئۇ ھامان كۈلۈپ ياشنىسۇن.
<<ياشلىق دىگەن دەسمايە>> دېدىم مەن، ياشلىق دىگەن  نىمە ئىش قىلاي دېسەڭ قىلالايدىغان، ئۈمۈت، ئىشەنچ، ئىرادە  ئەقىل پاراسەت، غەيرەت شىجائەت... ئۇرغۇپ  تۇرىدىغان  سېھرىلىك دەۋىر. ئاجايىپ  مۆجىزىلەرنى ياراتقىلى، مول نەتىجىلەرنى ۋۇجۇۇتقا چىقارغىلى بولىدۇ. كۆڭۈلگە پۈككەن ، خاتىرىگە پۈتكەن، خەلق كۈتكەن ئۇلۇغۋار ئارزۇلارنى رېئاللىققا ئايلاندۇرغىلى، ئارمان گۈللىرىنى  كۈلدۈرگىلى بولىدۇ. ياشلىق كۆزى بارنى كۆيدۈرىدىغان ، يۈرىكى ساقنى كۆكلىتىدىغان، مېھرى بارنى سۆيدۈرىدىغان، ۋاپادارنى كۈلدۇردىغان يالقۇنلۇق دەۋىر، ئاتەش سېھىر. ياشلىق مېھرى مۇھەببەتكە باي، ھەممە كۈرۈنىدىغان ئاي، ئاتا – ئانىغا، قېرىنداش،  بۇرادەرلىرىگە سۇنىدىغان ماي  ، ئاجىز، مېيىپ، قېرىلارغا تۇتىدىغان قەنت چاي ، ئەۋلاتلارغا مىندۈرىدىغان  تاي، تۈگىمەس  غەزىنە جاي، ئۇنى قانداقمۇ قەدىرلىمەي تۇراي.
<<ياشلىق دىگەن دەسمايە>>. ئۇ، قەدىرلىگەننى بىلىدۇ، ياشلىق دىگەننىڭ قەدرىگە يەتسە تاپقىلى، قىزغىلىقىنى ئوت قىلىپ ياققىلى، گاھ كاۋاپ سېتىپ، گاھ تاغنى تېشىپ، گاھ باغنى ئېچىپ ، گاھىدا يەر شارىنى قۇياشقا ئېسىپ تەرەققىياتقا ماسلىشىپ تۆھپە قاتقىلى، يېقىلغاننى يۆلەپ ساۋاپ تاپقىلى، بەختىيار  تۇرمۇشقا  ساليۇت ئاتقىلى، مويسىپىت بولۇپ ھۆرمەت تاپقىلى، تارىخ بېتىدە ئۆچمەي يانغىلى بولىدۇ.  ياشلىقنى  بۈگۈننىڭ ئەركىن ھوزۇرىنى سۈرۈش ئۈچۈن ئەمەس  ئۆگۈننىڭ كۇزۇرى قىلالىساڭ  ھاياتىڭغا مەنا جوغلىنىپ قىلغان ئىشىڭ قۇت يۇلۇپ، ئىسمىڭ كەينىگگە دانا قوشۇلۇپ، يوللىرىڭدا  رەنا جۆر بولۇپ، كەلگۈسى تارىختا سىنى ياد ئېتىشكە بانا  كۆپىيىدۇ.
<<ياشلىق دىگەن دەسمايە>> دېيىشمەكتە ئېرىقتىكى سۇلارمۇ كۈلۈشۈپ،  ياشلىق دىگەن قالتىس دېيىشمەكتە  كۆكتە قۇشلارمۇ  چۇقۇرۇشۇپ، ياشلىق دىگەن  ياخشى نىيەتكە ياخشى دەسمايە دىيىشمەكتە زىمىندىكى گىيالار كۇسۇرلۇشۇپ. ياشلىق دىگەن ئالتۇن دەسمايە دەپ جار سالماقتا  ياپراقلارمۇ چاۋاك ئۇرۇپ.  يەنە كىملەردۇر، يەنە نىمىلەردۇر، ياشلىق دىگەن  ........ دەپ دەۋراڭ قىلماقتا. راست،  ياشلىق دىگەن سېھىرلىك دەۋران، مېھرىلىك غەليان، تېپىلغۇسىز دەسمايە-دە، ئەلۋەتتە.

بۇ يازمىنى ئاخىرىدا   ئىزىقۇتلۇق تەھرىرلىگەن. ۋاقتى  2013-7-3 22:23  

       ئىككى شېئىر
          ئابدۇراخمان ئېلىنىياز

  يارنى ئۇزىتىش

ئادەم دېڭىزىغا ئايلانغان ۋوگزال ،
مۇڭسىراپ تۇرماقتا ۋە لېكىن قەلبىم  .
ھېجراننىڭ شەمشىرى تىلىپ دەممۇ دەم    ،
مىڭ پارە بولماقتا شۇ تاپتا روھىم .   

بىر يىرتقۇچ ھايۋاندەك ھۇۋلىغان پويىز  ،
ئايرىلىش پەيتىگە بەردى ئاھ   سىگنال  .
ئۇزاتتىم يار سېنى يىراق شەھەرگە ،
قەلبىمگە بىر دەريا ئاقتى ئېھتىمال  .      

كۆڭۈللەر گوياكى ئاي كۆيگەن كېچە ،
كۆزلەردىن تاراملاپ تۆكۈلمەكتە ياش .
بوشلۇقتا نامايان قوللار پەرۋازى   ،
ئاھ ، بىر جۈپ يۈرەككە ئېتىلماقتا تاش  .

           بىز دائىم مۇڭداشقان ئاشۇ  ئۈجمىلىك ،
        پىچىرلاپ تۇرماقتا شېرىن چۈشۈمدە .
        كۈي بولۇپ ياڭرايدۇ نۇرانە تىلەك ،
        ئامان بول ئەزىزىم يىراق شەھەردە .

باغچىدىكى خىلۋەت ئورۇندۇق

خۇشپۇراق گۈللەرگە تولغان  باغچىدا   ،
كەلمەكتە يانمۇيان بىر جۈپ قىز-يىگىت .
يېقىملىق كۈي كەبى سوقۇپ يۈرەكلەر ،
بەختلىك ھېسلارغا بولماقتا شاھىد .

        باغچىنىڭ ئەڭ خىلۋەت يېرىدە ئەنە ،
        بارماقتا داۋام قىپ تاتلىق پىچىرلاش .
        چىن سۆيگۈ قەسرىنى نۇرغا تولدۇرۇپ ،
        ۋاپادار دىللاردا چاقنىغان قۇياش .


ئۆچمەس بىر يېزىقتا يېزىلدى شۇ تاپ ،
مۇھەببەت ھەققىدە گۈزەل ھېكايە .
گۇۋاھدۇر خىلۋەتتە تەنھا ئورۇندۇق ،
مەڭگۈلۈك چېگىلگەن ئىككى يۈرەككە  .

بۇ يازمىنى ئاخىرىدا   سەرقۇت تەھرىرلىگەن. ۋاقتى  2013-7-4 00:44  

قەلب تەنتەنىسى

( نەسىر )

ئابدۇراخمان ئېلىنىياز

     سۆيۈملۈك بالام ، بۈگۈن - سەن بالىلىق قەلبىڭدە شادلىق ناۋالىرىنى ياڭرىتىپ ،  بالىلىق دۇنيايىڭدا  بارچە  غەم - ئەندىشىلەرنى چۆرىۋېتىپ ، بالىلىق تۇيغۇلىرىڭغا قانغۇچە چۆمۈلۈۋېلىپ  ، بالىلارچە بەخت ھوزۇرىغا قېنىۋېلىپ ئۆتىدىغان قۇتلۇق كۈن ! بۈگۈن -  سەن ئۈچۈن ئۇنتۇلماس ، سەن ئۈچۈن قەدىرلىك  ، سەن ئۈچۈن يېپيېڭى بىر مەنا ، يېپيېڭى بىر ئىز  قالىدىغان  تولىمۇ ئەھمىيەتلىك كۈن ! بۈگۈن - سېنىڭ  ئۇلۇغ بايرام كۈنۈڭ  بالام !

      مانا ،  قەلبىڭدەك سۈپسۈزۈك ، تىلەكلىرىڭدەك ئاپئاق سەھەردە ئويغۇنۇپ ، گەرچە يېنىمدا بولمىساڭمۇ سېنىڭ  بايرام كۈنۈڭنى قەلبىمدىن تاراۋاتقان ئىللىق تۇيغۇ ۋە ئېھتىراملىرىم بىلەن تەبرىكلىمەكتىمەن !  سەھەردىكى شۇنچە يېقىملىق سەلكىن تاتلىق پىچىرلاشلىرى بىلەن ماڭا جۆر بولماقتا . دەرەخ شاخلىرىغا قۇنۇۋېلىشقان قۇشقاچلار لىرىك مۇزىكىدەك يېقىملىق ۋىچىرلاشلىرى بىلەن ماڭا جۆر بولماقتا . ئەتراپتىكى بارچە يېشىللىق دۇنياسى سەھەردىكى ئۆزگىچە چاقناشلىرى بىلەن ماڭا جۆر بولماقتا.خىلۋەتلەردىكى ئېقىن ، بۇلاقلارمۇ ئۈزۈلمەس كۈيلەردەك شىلدىرلاشلىرى بىلەن ماڭا جۆر بولماقتا .دېمەك ، مەنلا ئەمەس ، سېنىڭ ئىللىق ئۇۋاڭ بولغان ئانا تەبىئەتمۇ بۈگۈنكى قۇتلۇق كۈننى مۇبارەكلەۋاتىدۇ . چۈنكى ، بۈگۈن - سېنىڭ ئۇلۇغ بايرام كۈنۈڭ بالام !

     مانا ، مەھەللىنىڭ قاتار - قاتار ئۈجمە دەرەخلىرى بىلەن ئورالغان تارغىنە يولىدا بىر - بىرى بىلەن قېرىنداشلارچە قول تۇتۇشۇپ ، بالىلارچە شوخلۇقلارغا شۇڭغۇشۇپ، بالىلىق چېھرىگە قوۋناق كۈلكىلەرنى قوندۇرۇشۇپ كېتىۋاتقان بالىلارغا قاراپ سېنى ياد ئەتكىنىمچە ئاجايىپ بىر تەسۋىرلىگۈسىز  سېغىنىش تۇيغۇلىرىغا چۆمۈلمەكتىمەن ! ئاشۇ بالىلار ئارىسىدا سەنمۇ بولغان بولساڭ - ھە ! ئالتۇن بۆشۈك بولغان ئانا مەكتىپىگە – نۇرلۇق ئىستىقبال ئوردىسىغا قاراپ كېتىۋاتقان ئاشۇ بالىلارنىڭ ئۇچىسىدا يېپيېڭى كىيىم ئۇلارغا شۇ قەدەر ياراشقان . ئۇلارنىڭ جىسمىدىكى پاكىزلىق ، روھىدىكى جۇشقۇنلۇق ئۇلارغا ھۆسۈن قوشقان .ئۇلار شۇ تاپتا خۇشاللىقنىڭ پەرۋازىدا ، بەختىيار تۇيغۇلارنىڭ خۇش نازىدا ، بالىلىق كۈيلىرىنىڭ تەڭكەش سازىدا ئەللەيلىنىپ ، قۇش بالىلىرىدەك چۇرۇقلىشىپ مېڭىشقان.  ئۇلار شۇنچە خۇشال ، شۇنچە تاتلىق ، شۇنچە ئۇنتۇلغۇسىز ھاياجانغا ئەسىر بولۇشقان  . توغرا  ، بۈگۈن - سېنىڭ  ، ئۇلارنىڭ  ، دۇنيادىكى بارچە بالىلارنىڭ ئۇلۇغ بايرام كۈنۈڭلار ئەمەسمۇ بالام ؟! شۇڭا سىلەر بۈگۈن خۇشال بولۇشقا  ، غەم - ئەندىشىسىز ياشاشقا  ، بالىلىق قەلبىڭلارغا توسالغۇسىز قايتىشقا  ، بالىلارچە ئويۇنلىرىڭلارغا  قېنىۋېلىشقا  پۈتۈنلەي ھەقلىق  بالام !

ئەنە ، گۈلزارلىق باغچىدەك ھۆسۈن تۈزگەن ، مېھرىبان ئانىدەك خۇشخۇي كۈلگەن ، ئىلىم -پەن گۈللىرىنىڭ خۇشپۇرىقى سىڭگەن  مەكتەپ قوينى قاينام - تاشقىنلىققا چۆمگەن  . بارچە بالىلار شۇنچە خۇشال ، گويا خۇشاللىق پىرى سېھىرلىۋەتكەندەك  ؛ بارچە بالىلار شۇنچە جۇشقۇن ، گويا  تەسەۋۋۇرىدىكى مەنزىلىگە يەتكەندەك  .  ئۇلار  بايراملىق كىيىملىرىنى كىيىشىپ  ، چىرايلىق ئاققۇلاردەك ياسىنىشىپ  ،  ئۆزلىرى تەييارلىغان  ناخشا - ئۇسۇللىرى بىلەن  مەيداننى قىزىتىپ  ، بۈگۈنكى قۇتلۇق بايرام كۈنىنى بالىلىق قەلبىدىن تەنتەنە قىلىۋاتىدۇ  . بالىلارغا خاس ئەنئەنىۋى ئويۇنلار بىلەن روھىنى قىزىتىپ ، بۈگۈنكى ئۇلۇغ بايرام كۈنىنى ئۇنتۇلماس كارتىنا  قىلىپ  سىزىۋاتىدۇ  .  شۇ تاپتا  بالىلىق دۇنياسىغا  خۇشاللىق ، ھاياجان ، تەنتەنىلەر گويا باھار يامغۇرىدەك يېغىۋاتقان ئاشۇ  بالىلار ئارىسىدا سەن بولغان بولساڭ - ھە !

     جېنىم بالام !بۈگۈنكى قۇتلۇق كۈندە ئىلىم - پەن دېڭىزىدىن مەرۋايىت سۈزۈشتەك مۇقەددەس ۋەزىپە سەۋەبىدىن يېنىمدا بولالمىغان بولساڭمۇ  ئۇلۇغ بايرىمىڭنى  قەلبىمدىكى ئەڭ تاتلىق تىلەكلەر بىلەن تەنتەنە قىلماقتىمەن !  مەيلى سەن قەيەردە بول  ، بۈگۈن ھامان  ئاشۇ بالىلاردەك يېپيېڭى كىيىملىرىڭنى كىيىپ  ، بالىلىق قەلبىڭنى خۇشالىق ، ھاياجان نۇرلىرىغا تولدۇرۇپ ، ئۇنتۇلغۇسىز بالىلىق تۇيغۇلىرىغا چۆمۈلۈپ ، بالىلارچە ئويۇنلار بىلەن قەلبىڭنى ئاۋۇندۇرۇپ ، بالىلىق دۇنيايىڭدا كۈي ياڭرىتىپ ئۆتۈشۈڭگە تىلەكداشمەن !  چۈنكى ، بۈگۈن - سېنىڭ ئۇلۇغ بايرام كۈنۈڭ  !

      خەيرى ، سۆيۈملۈك  بالام !  سېنىڭ كېلەچىكىڭ  بۈگۈنكى ئۇلۇغ بايرام كۈنۈڭدەك بەختكە ، خۇشاللىققا ، يۈكسەكلىككە تولغاي ...

               (  مەنبە :  « تۇرپان گېزىتى » نىڭ  2013 -يىلى  5-ئاينىڭ 30 -كۈنىدىكى سانىدىن ئېلىندى )

بۇ يازمىنى ئاخىرىدا   سەرقۇت تەھرىرلىگەن. ۋاقتى  2013-7-4 01:10  

ئابدۇراخمان بۇرادەر،زاۋۇت بوپ كەتمەڭ يانا!.(چاخچاق)ھەممىڭلارغا سالامەتلىك يار بولسۇن!.

بارلىق كۇرسانتلارنىڭ بۇ پۇرسەتنى غەنىيمەت بىلىپ، ئىجادىيەت ئىشلىرىدا تېخىمۇ يۈكسېلىش ھاسىل قىلىشىنى ئۈمىد قىلىمەن.
سالامەت بولۇڭلار ئەزىزلەر!

رەھمەت قېرىندىشىم !  كۇرس  باشلانغىلى  بىر ھەپتە  بولغان بولسىمۇ  خاتىرە سۈرەتلەرلا  يوللىنىپ ، بىرەر پارچىمۇ ئەسەر يوللانمىغاچقا ھەر قايسى قېرىنداشلار بىزنى خاتا چۈشىنىپ قالمىسۇن دەپ ، ئالدىراپلا  قاملاشمىغان يازمىلىرىمنى قېرىنداشلارنىڭ ھوزۇرىغا سۇندۇم .  ئەپۇ قىلارسىلەر  قېرىنداشلىرىم !

مەن سەن ئۈچۈن ئۇنتىلغان ناخشا

گۈزەلنۇر مۇتەللىپ

                                                                               (1)

يەنە كەلدىم دەريا بويىغا،

قۇلىقىمدا ھېلىقى ناخشا.

پادىچى ئۇ باقار  قويىنى

توقۇمچى قىز زادى قاياقتا؟

(2)

                                         ئۆزگەمەپتۇ ھېچقانداق نەرسە،

                            تاغۇ-دەريا ھەتتا يايلاقلار.

                            دەريادا سۇ شاۋقۇن ياساپتۇ

                          يۇلتۇزلارمۇ كۆكتە ۋىلىقلار.

(3)                        

                 ئۆزگەرمەپتۇ چىغىر يوللارمۇ.                                                        

           ئۆزگەرمەپتۇ ھەتتا گىياھلار،                                                

           ئۆزگەرگىنى پەقەت شۇ كۆڭۈل،                                               

   سېنىڭدىكى نادان خىياللار.                                          

(4)

مەن سەن ئۈچۈن ئۇنتۇلغان ناخشا،

ئۇنىڭدا  يوق قىلچە لېرىكا.

ساراڭ كۆڭۈل ئۇنتالماي سېنى،

مېنى قويدى چەكسىز ئازاپقا.

                               (5)

                                                    ھايات ئەسلى ئۆزى بىر ناخشا،

                                              بۇ ناخشىدا ھەر ئىككىمىز بار.

                                        مىسرالارغا سىڭدى پىراقلار،

                                            تەڭكەش يەنە مىسكىن مۇزىكا.

(6)                                    

قەلەم ئالدىم قايتا قولۇمغا،                                                      

يازماق بولۇپ يېڭى بىر ناخشا.                                                         

يازالمدىم ھەتتا بىر مىسرا،                                                            

قۇياش پاتتى تاغنىڭ قوينىغا.                                                      

(7)

مەن سەن ئۈچۈن ئۇنتۇلغان ناخشا،

بۇ ناخشىنى ئېيىتمەن تەنھا،

پاتقان قۇياش چىقدۇ ھامان،

گىياھلارمۇ كۈلىدۇ شۇندا.

بۇ يازمىنى ئاخىرىدا   guzalnur تەھرىرلىگەن. ۋاقتى  2013-7-10 18:33  

ئابلىتىپ ، ئابدۇراھمان ، گۈزەلنۇر ... قاتارلىق لۈشۈن كۇرسانتلىرىنىڭ يېڭىچە مۇھىتتا يېڭىچە ئىلھاملارغا چۆمۈلۈپ يازغان تاتلىق يازمىلىرىدىن تولۇمۇ خۇرسەنمەن. بەدىئى بالاغىتىڭلەرگە كۆزتەگمىسۇن، قەدىردانلىرىم.

سۇ سيغا ئاقا ئەمەللەر ئەمەلدارغا ئاقار دەپ، يۇسۇپجان ئۇ يەردىمۇ باشلىق بولۇپتۇ،-دە. مۇبارەك بولسۇن!

تەربىيىلىنىشكە قاتناشقانلارنىڭ تېنىگە سالامەتلىك تىلەش بىلەن بىر ۋاقىتتا ۋاقىتنى چىڭ تۇتۇپ، ئاز سانلىق مىللەتلەر ئارا چۈشىنىشنى تېخىمۇ ئىلگىرى سۈرۈپ، ئەدەبىيات سەنئەت ئىشلىرىنىڭ ساغلام تېز يۈكسىلىشى ئۈچۈن ئاساس سېلىشىڭلارنى ئۈمۈد قىلىمەن. مۇشۇنداق كىشىگە ئەمەلىي نەپ ئېلىپ كېلىدىغان پائالىيەتلەرنىڭ كۆپلەپ ئېلىپ بېرىلىشىنى ئۈمۈد قىلىمەن.

مەن سەن ئۈچۈن ئۇنتۇلغان ناخشا،

بۇ ناخشىنى ئېيىتمەن تەنھا،

پاتقان قۇياش چىقدۇ ھامان،

گىياھلارمۇ كۈلىدۇ شۇندا.
______________________________________________
شۇ قۇياش...

   بۇ قېتىمقى «لۇشۇن ئەدەبىيات ئىنىستىتۇتى 5- قېتىملىق ئاز سانلىق مىللەت يازغۇچىلىرى تەربىيەلەش كۇرسى»دا جەمىي 19نۆۋەت دەرس ۋە ئەدەبىي پائالىيەتلەر ئورۇنلاشتۇرۇلغان بولۇپ ئۇلار تۆۋەندىكىچە:

1.كۇرۇسنىڭ ئېچىلىش مۇراسىمى

2.«بۈگۈنكى دەۋىر مىللىي مەدەنىيەت تارىخى ۋە نەزەرىيەۋىي تەپەككۈر»
دەرس سۆزلىگۈچى: ياڭ شېڭمىڭ ــ مەركىزى مىللەتلەر ئۇنۋېرسىتىتىنىڭ پىرافىسسورى، دوكتور يېتەكچىسى.

3.«يېڭى تاراتقۇلار دەۋرىدىكى ئەدەبىياتنىڭ خاراكتىرى»
دەرس سۆزلىگۈچى: بەي مىياۋ ــ لۈشۈن ئەدەبىيات ئىنىستىتۇتىنىڭ سابىق دائىمىي مۇئاۋىن مۇدىرى، يازغۇچى.

4.«ئەدەبىياتتا توقۇلما ۋە چىنلىق»
دەرس سۆزلىگۈچى: دوڭ لىبو ــ شىنجاڭ يازغۇچىلار جەمئىيىتىنىڭ دائىمىي مۇئاۋىن رەئىسى، باش كاتىپى.

5.«سىنارىيەدىن كېنو - تېلۋىزىيەگىچە ـــ كېنو سىنارىيەسى ئىجادىيىتىنىڭ تۈرلىرى ھەققىدە تەھلىل»
دەرس سۆزلىگۈچى: رەن پىڭ ــ يازغۇچى، سىنارىست.

6.«نۆۋەتتىكى جۇڭگو ئەدەبىياتىنىڭ ئىجادىيەت ئەندىزىسى»
دەرس سۆزلىگۈچى: بەي يې ــ جۇڭگو ئىجدىمائىي پەنلەر ئاكادىمىيەسى ئەدەبىيات تەتقىقات ئورنىنىڭ تەتقىقاتچىسى، دوكتۇر يېتەكچىسى.

7.«مىللەتلەر ئىتتىپاقلىقىنى ئىلگىرى يەنىمۇ سۈرۈش ھەققىدىكى بىرقانچە مۇلاھىزە»
دەرس سۆزلىگۈچى: ماۋ گوڭنىڭ ــ دۆلەت مىللەتلەر ئىشلىرى كومىتىتى سىياسەت، قانۇن-نىزام مەھكىمىسىنىڭ سابىق باشلىقى.

8.«ئەدەبىي ژۇرنال مەسئۇللىرى بىلەن سۆھبەت»
قاتناشقۇچىلار: چېن دوڭجې ــ «ئۆكتەبىر» ژۇرنىلىنىڭ باش مۇھەرىرى.
                  نىڭ شاۋلىڭ ــ «خەلق ئەدەبىياتى» ژۇرنىلىنىڭ مۇئاۋىن باش مۇھەررىرى.

9.«چەتئەل ئەدەبىياتى تەرجىمىچىلىكى ۋە جۇڭگو ھازىرقى زامان ئەدەبىياتىنىڭ بارلىققا كېلىشى»
دەرس سۆزلىگۈچى: لۇ جەندې ــ  جۇڭگو ئىجدىمائىي پەنلەر ئاكادىمىيەسى ئەدەبىيات تەتقىقات ئورنىنىڭ باشلىقى، دوكتۇر يېتەكچىسى.

10.«ئەدەبىي تەرجىمە ۋە مەدەنىيەت ئالماشتۇرۇش»
دەرس سۆزلىگۈچى: ئىمىن ئەخمىدى ــ شىنجاڭ سەنئەت ئىنىستىتۇتىنىڭ سابىق باشلىقى، شائىر، ئەدەبىي تەرجىمان.

11..«ئەدەبىي ژۇرنال مەسئۇللىرى بىلەن سۆھبەت»
قاتناشقۇچىلار: شېن ۋېي ــ «غەرىب» ژۇرنىلىنىڭ باش مۇھەرىرى.
                  پولات ھېۋىزۇللا ــ «تەڭرىتاغ» باش مۇھەررىرى.

12.«بۈگۈنكى دەۋىر جۇڭگو ئەدەبىياتىغا قانداق باھا بېرىش كېرەك؟»
دەرس سۆزلىگۈچى: چېن شاۋمىڭ ــ بېيجىڭ ئۇنۋېرسىتىتىنىڭ پىراففىسورى، دوكتۇر يېتەكچىسى.

13.«نەسر ئىجادىيىتىنىڭ باشلىنىشى ۋە يۈزلىنىشى»
دەرس سۆزلىگۈچى: ۋاڭ بىڭ ــ  لۈشۈن ئەدەبىيات ئىنىستىتۇتى تەربىيەلەش مەركىزىنىڭ مۇئاۋىن مۇدىرى، كاندىدات تەتقىقاتچى.

14.«جۇڭگو يازغۇچىلىرى» ژۇرنىلىنىڭ باش مۇھەررىرى ــ ئەكبەر مىجىتنىڭ لېكسىيەسى

15.«شىئېر تۇرمۇشنى يورىتىدۇ»
دەرس سۆزلىگۈچى: لى چى ــ خېلوڭجاڭ ئۆلكىلىك ئەدەبىيات ئىنىستىتۇتىنىڭ باشلىقى، شائىر.

16.«ئەدەبىياتنىڭ كەچۈرمىشى»
دەرس سۆزلىگۈچى: چېڭ زېڭيۈ ــ لۈشۈن ئەدەبىيات ئىنىستىتۇتىنىڭ دائىمىي مۇئاۋىن مۇدىرى، يازغۇچى.

17.ئاپتونوم رايۇنلۇق ئەدەبىيات - سەنئەتچىلەر بىرلەشمىسى، يازغۇچىلار جەمئىيىتىنىڭ رەئىسى، ئەدەبىيات تەتقىقاتچىسى ئازات سۇلتاننىڭ لېكسىيەسى.

18.ئارىلىقتا 7-ئاينىڭ 13-كۈنىدىن 15-كۈنىگىچە ئېلىنىڭ نارات يايلىقى، كۈنەس ناھىيەسى، غۇلجا شەھىرى قاتارلىق جايلاردا ئېكىسكۇرسىيە، زىيارەت پائالىيىتى ئورۇنلاشتۇرىلىدۇ.

19.كۇرۇسنى تاماملاش مۇراسىمى.

بۈگۈن 7-ئاينىڭ 4-كۈنى چۈشتىن كېيىن دەرىس يوق ئىدى. لۈشۈن ئەدەبىيات ئىنىستىتۇدىن كەلگەن ۋاڭ بىڭ، نې مېڭ، ۋاڭ يەندىڭ قاتارلىق مۇئەللىملەر ئون كۈندىن بۇيان مېھمانخانىدىن ئايرىلماي خىزمەت بىلەن بولدى. ئازراق پۇرسەتتىن پايدىلىنىپ دىلمۇرات بىلەن مەسلىھەت قىلىپ ئۇلارنى دەم ئالدۇرۇش ئۈچۈن يېقىن ئەتىراپتىكى بىر - ئىككى نۇقتىنى تاللىدۇق.

تەنەپۇسلۇق دەقىقىلەر: