ئەردەشىر ۋە گۈلنار ھەققىدە قىسسە (‹‹شاھنامە›› توققۇزىنچى بۆلۈم) [ئۇلانما كۆچۈرۈش]

ساندۇقلاردىن دىنار ۋە زەرلەرنى ئېلىپ چاچقۇ قىلدى.داستىخان سالدۇرۇپ نېمەتلەرنى كەڭرى قويۇپ قەلئەدىكىلەرنى مېھمان قىلدى.ئۆزىنى خوجايىن ئەمەس ئاددى خىزمەتكار سۈپىتىدە كۆرسۈتۈپ باشقىلارنىڭ دىققەت نەزىرىدىن ساقلاندى.ئوتتۇرىدا تۇرغان بىر ساندۇقنى ئېچىپ ئۇنىڭدىكى شاراپ كوزىسىنى ئېلىپ شاراپلارنى ۋە ھېقىقلارنى  قەدەھلەرگە قۇيدى.سۈت ۋە گۈرۈچتىن پايدىلىنىپ تاماق ئېتىپ تاماقنى لەشكەرلەرگە بەردى.لەشكەرلەر تاماق يەپ شاراپ ئىچىپ خۇشال -خورام ھالدا ئارام ئالدى.لەشكەرلەر تاماقنى تويغۇچە يېيىشتى.لېكىن ئىش ۋاقتىدا شاراپ ئىچىپ ئىشقا تەسىر يەتكزۈپ قويۇشتىن قورقۇپ شاراپنى ئىچمىدى. ئەردەشىر بۇ ئەھۋالنى كۈزۈتۈپ بېقىپ باشقىچە يول تۇتۇشنى راۋا كۆردى شۇڭا لەشكەرلەرگە قاراپ مۇنداق دېدى:
-بىزنىڭ بۇ يەرگە كېلىش مەقسىدىمىز خاسىيەتلىك قۇرۇتنى كۆرۈپ تاۋاپ قىلىش ۋە ئۇنىڭ ئۈچۈن خىزمەت قىلىۋېلىش ئېدى.شۇڭا بىزگە رۇخسەت قىلغان بولساڭلار.بىزدە گۈرۈچ بىلەن سۈت بەكمۇ كۆپ.سىلەردىن ئۆتۈنۈپ قالايلى،بىز سىلەرنىڭ ئورنۇڭلاردا ئۈچ كۈن ئىسىل تاماقلارنى ئېتىپ بېرىپ ئىلاھىي قۇرۇتنىڭ ھالىدىن خەۋەر ئېلىۋالايلى.پەرۋىشلەپ ئوبدان كۈتەيلى.

بۇ شەرەپلىك خىزمىتىم ئارقىلىق مەنمۇ ئامەتكە يېقىن بولۇۋالسام،جاھاندا ياخشى نام قازىنىپ شەرەپكە نائىل بولسام دەيمەن!شۇندىلا مەن ئۆزۈمنى تولىمۇ بەختىيار ھېس قىلغان بولاتتىم.
لەشكەرلەر بۇ تەكلىپكە قوشۇلدى.ئەردەشىر ئىككىنچى ھىيلە مىكىرگە ئۆتتى:
-مۇنداق بولسۇن،سىلەرنىڭ ئورنۇڭلاردا بىز ئىلاھىي قۇرۇتنىڭ ھالىدىن خەۋەر ئېلىۋاتقان بۇ ئۈچ كۈن ئىچىدە سىلەر بىزنىڭ ئىسىل تائاملىرىمىزدىن يەپ،ئالى شاراپلىرىمىزدىن ئىچىپ راسا ئويناپ-كۈلۈپ يايرىۋېلىڭلار.بۇ سىلەرنىڭ بىزگە شەرەپلىك خىزمەت ئۈچۈن پۇرسەت يارىتىپ بەرگىنىڭلارغا قايتۇرغان كۆڭۈل سوغىمىز بولۇپ قالسۇن.تۆتۈنچى كۈن يېتپ كېلىپ ئاپتاپ چىققانغا قەدەر  بۇ يەردە مەن شۇنداق بىر بۇنياد بىنا قىلايكى دۇكىنىم ھەم ئېگىز،ھەم كەڭرى، ھەم ئاۋات بولسۇن.مەن سودا قىلىدىغان ئادەم بولغاچقا خېرىدارلىرىمنىڭ كۆپ بولۇشىنى ئارزۇ قىلىمەن.

پاسىبانلار بۇ سۆزلەرنى ئاڭلاپ خۇشال بولدى ۋە‹‹بوپتۇ،سەن قۇرۇتتتىن خەۋەر ئال››دېيىشىپ ئارام ئالماقچى بولۇشتى.ئەردەشىر ئۇلارنىڭ مەنپەتكە قىزىقتۇرۇپ تېخىمۇ بىخۇدلاشتۇرۇش ئۈچۈن ئۇلارغا ناھايىتى كۆپ مال- دۇنيا ئىنئام قىلدى.ئۇلارنى ئىسىل بىر قەسىرگە باشلاپ ئالدىلىرىغا مول داستىخان سېلىپ نازۇ -نېمەتلەرنى تۆكمە قىلىۋېتىپلا قالماي يەنە ساقىلارنى تەيىنلەپ، شاراپ جاملىرىنى تەقلەپ بارلىق پاسىبان لەشكەرلەرگە شاراپ سۇندى.قەدەھلەر ئىككى- ئۈچ ئايلىنىۋىدى، زىياپەت ئەھلى سۇۋارى مەست بولۇشۇپ كەتتى.مەينىڭ شىددىتىدىن تىلى تۇتۇلۇپ بارا -بارا خۇدىنىمۇ بىلمىگىلى تۇردى.
ئادىل شاھ كۈتكەن بۇ قىممەتلىك پۇرسەت ئاخىر يېتپ كەلدى.ئادەملىرى قازاننى ئېسىپ ئۇنىڭغا ئېلىپ كەلگەن مەدەنلەرنى تولدۇردى.ئوچاققا ئوت يېقىپ ئوتۇنلارنى بېسىپ قالىدى.قۇرۇتنىڭ چۈشلۈك غىزا يەيدىغان ۋاقتى يەتكەندە قازاندىكى مەدەنلەرمۇ ئېرىپ سۇغا ئايلاندى.قۇرۇت قورسىقى بەكلا  ئېچىپ كەتكەن بولغاچقا ئاغزىنى كاپىلدىتىپ ئۇلاردىن غىزا تەلەپ قىلىپ تەلپۈندى.خىزمەتكارلار ئېرىگەن چوغ رەڭلىك مەدەنلەرنى چوڭ ساپلىق بىلەن ئېلىپ ئارقىمۇ ئارقا  ئۇنىڭ يوغان ئېچىپ تۇرغان ئاغزىغا قۇيۇۋەتتى.ئېرىگەن مەدەن ئۇنىڭ ئىچىگە كىرىپلا بەدىنىنى قاتۇرۇۋەتتى.

شۇڭا ئۇ قىمىر قىلالماي قالدى.مەدەنلەر قۇرساقتا لەرزىگە كېلىپ بوغۇزىدىن ئاچچىق بۇس كۆتۈرۈلۈپ چىقتى.ئۇنىڭ لەھەڭدەك يوغىناپ كەتكەن پالاكەت گەۋدىسى تامامەن ئۆرتەندى.ئەردەشىر قۇرۇت ئۆلگەندىن كېيىن ئەردەشىر يېنىدىكى يىگىتلەر بىلەن  گۈرزە-شەمشەرلىرىنى كۆتۈرۈپ زىياپەت زالىغا بۆسۈپ كىرىپ مەست –ئەلەس يېتىشىپ كەتكەن ھېلىقى‹‹پاسىبان››لارنى قىرغىن قىلدى.
قەلئە تېمىدىن قارا ئىس –دۇت كۆتۈرۈلدى.بۇ سىرتتىكى بۆكتۈرمە لەشكەرلەرگە بېرىلگەن بەلگە ئېدى.ئۇلار بەلگىنى كۆرگەن ھامان تېزلىكتە قەلئەگە بېسىپ كىردى.
قۇرۇتنىڭ ئۆلتۈرۈلۈپ قەلئەنىڭ قولدىن كەتكەنلىك  خەۋىرى تېزلا ھەفتۋادقا يەتتى.ئۇ قاتتىق غەزەپلىنىپ ئەردەشردىن ئۆچ ئالماق بولۇپ بارلىق لەشكەرلىرى بىلەن ھۇجۇم قىلىپ كەلدى.

ھەفتۋادتىن ئەمدى ئامەت كەتكەن ئېدى.ئۇ ئەردەشرنىڭكىدىن كۆپ لەشكەر بىلەن كېلېپ قەلئەنى قورشۇۋالغان بارلىق تىرىشچانلىقلىرىنى كۆرسۈتۈپ باققان بولسىمۇ لېكىن ئۇرۇنۇشلىرى بىكار كەتتى.چۈنكى قەلئە شىرنىڭ قولىغا ئۆتكەن ئېدى.
ئەردەشىر شەھىرگىرگە بۇيرۇدى:
-ئەي شەھىرگىر،  قوشۇننى باشلاپ چىقىپ دۈشمەن بىلەن باتۇرلارچە جەڭ قىل.دۈشمەننى شىرنىڭ ئالدىدىكى قوي پادىسىنىڭ ئەھۋلىغا چۈشۈرۈپ ھالىنى ھەر لەھزە  يەر قىل.ئەگەر سەن بۇ جەڭدە ھەفتۋادنى ئارىدىن يوق قىلىۋەتسەڭ تارتىدىغان رەنجىمىز تۈگەپ، زەپەر بىزگە كۈلۈپ باقىدۇ.خاتىرجەم بول مەن ئۇنىڭ مەدەتكارى بولغان سېھرىگەر قۇرۇتقا مەدەن ئىچۈرۈۋەتتىم.ئەمدى ئۇ يۇرتقا ئاپەت بولۇپ داغدۇغا سالالمايدۇ.
لەشكەرلەر شاھنىڭ سۆزىنى ئاڭلاپ روھلۇنۇپ جەڭ كىيىملىرنى كېيىشتى.دۈشمەندىن ئالدىنقى ئككى قېتىملىق مەغلۇبىيەت ئۈچۈن قىساس ئالماق بولۇپ بەل باغلىشىپ دۈشمەنگە قارىتىپ ئاتلىرىنى قۇيۇندەك چاپتۇرۇشتى.

بۇ جەڭدە ھەفتۋادنىڭ لەشكەرلىرىنىڭ روھى چۈشكەن بولۇپ بۇرۇنقىدەك ئۈستۈن كۈچ قاسارىتى يوق ئېدى.چۈنكى ئۇلارنىڭ ئىشىنىدىغان قۇرۇتى ئۆلۈپ روھ قەسىرىنىڭ تۈۋرۈكى غۇلاپ چۈشكەن ئېدى.چۈشكۈنلەشكەن ئادەم ئاسانلا ھالاكەت يولىغا مېڭىپ قالاتتى.بۇ جەڭدە دۈشمەن لەشكەرلىرى ھەددى-ھېساپسىز قىرىلىپ ساينىڭ تاشلىرىدەك يېتىشىپ كەتتى.نۇرغۇنلىرى جەڭ قىلىشنى خالىماي قېچىپمۇ كېتىشتى. شەھىرگىر جەڭ قىلىپ يۈرۈپ ھەفتۋادنى تۇتۇۋالدى.شۇقاتاردا  ئۇنىڭ جېنى ھېساپلىنىدىغانھەييار لەشكەر بېشى چوڭ ئوغلى شەھرۈيمۇ قولغا چۈشتى.ئۇ ئەبلەخلەر  ئەسىر ئېلىنغان ھامان قالغان لەشكەرلىرىمۇ دەرھال قۇرال تاشلاپ ئەل بولۇشتى.ئاڭغىچە ئەردەشىرمۇ ئالتۇن يوپۇق يېپىلغان تۇلپار ئاتقا مىنىپ سكلەت بىلەن  سەرەپراز بولۇپ قەلئەدىن سىرتقا چىقتى.ئۇنىڭ پەرمانى بىلەن دەريا ساھىلىدا ئىككى ئىگىز دار تىكلەندى.ھەفتۋاد ئاتا-بالا ئىككىسى ئۇ دارلارغا پۈتى يەرگە تەككۈزۈلمەي تىرىك پېتى ئېسلدى.يۈز نەپەر  ئوقياچى مەرگەن جاللاتلىققا تەيىنلەندى.ئۇلار  بۇ ئىككى تىرىك مۇردىغا ئوق ياغدۇرۇپ بەدىنىنى ئۆتمىتۆشۈك قىلىپ جىڭ مۇردىغا ئايلاندۇرۇۋەتتى.كېيىن يەنە قىلىچ بىلەن پارە-پارە قىلىنىپ ئوت يېقىپ كۆيدۈرۈۋېتىلدى.ئۇلارنىڭ روھى  ئۇ دۇنيادىكى دەۋزەخ ئازابىنىڭ بىشارىتىنى پاسىق تەنلىرى ئارقىلىق بىلدى.شەھەرگە كىرگەندىن كېيىن ئۇنىڭ پۈتكۈل ئۇرۇق ئەۋلادى قىرىپ تاشلاندى.كېيىن ھەفتۋادنىڭ  بارلىق مال- مۈلكى لەشكەرلەرگە تالان-تاراج قىلىشقا قويۇپ بېرىلدى.ئەسىر ئېلىنغان لەشكەرلىرىمۇ قۇل قىلىنىپ لەشكەرلەرگە تەقسىملەپ بېرىلدى.تاغدىكى قەلئەگە ئەسلىدىكىدىنمۇ چوڭ ۋە ھەيۋەتلىك بىر ئاتەشخانا(بۇ ئاتەشپەرەسلىك دىنى ئەۋج ئالغان زامانلار ئىكەن) ياساتتى.كېيىن قىشلاقتا قوشۇلغان ئىككى يىگىتنىڭ بىرىنى قەلئەگە،يەنە بىرىنى ھەفتۋادنىڭ شەھىرىگە شاھ قىلىپ تەيىنلەپ تەختكە چىقاردى.

كېيىن ھەفتۋادنىڭ غەزىنىسىدىكى بارلىق بايلىقلارنىڭ يېرىمى  ئېلىپ كېتىشكە تەييارلاندى. ئۇ بايلىقلارنى ساندۇقلارغا قاچىلاپ ئۈچمىڭ تۆگىلىك زور كارۋان تەشكىللەپ ئۆز شەھىرىگە پارس مەملىكىتى ئىرانغا ئېلىپ كەتتى.
ئەردەشر دۈشمەنلىرىنى يوقۇتۇپ بولغاندىن كېيىن ئىران تەختىگە چىقىپ ئەجداتلىرىدەك چوڭ شاھىنشاھقا ئايلاندى.ئادالەتلىك قانۇنلارنى تۈزۈپ يولغا قويۇپ ئەل-ئاۋامنى بەختىيار قىلدى. كېيىن زور شەھىرىگە لەشكەر تارتتى.كىرمانغا بىرنەچچە سىپاھلىرىنى ئەۋەتىپ ئۇ يەرنىڭ مەردلىرىدىن بىرىنى شاھ قىلىپ تىكلىدى.
ئاندىن كېيىن ئۇنىڭ لەشكەرلىرى تەيسەفۇن تەرەپكە ئات سېلىپ بېرىپ ئۇ ئەلنىڭ ياۋۇزلىرىنى يوقۇتۇپ تەختىنى تۇپراققا كۆمدى.جاھان شاھلىرىنىڭ جاھاندارچىلىق  رەسمى شۇنداق ئېدى.يامانلارنى يوقۇتۇپ ياخشىلارنى يۆلەيتتى.

ساسانىيلار پادىشاھلىقى
(قىرىق يىل ئىككى ئاي داۋام قىلغان)
ئەردەشىر باغداتنى پايتەخت قىلىپ شۇ يەردە ھەقىقى يوسۇندىكى پادىشاھلىق تەختىگە چىقتى.بېشىغا گۆھەر قاپلانغان ناھايىتى ئىسىل تاج كىيدى.بەلدە كەمەر،قولىدا شاھانە گۈرزە تۇتۇپ گۈزەل ۋە كاشانە قارارگاھقا جايلىشىپ ئولتۇردى.ئەل ئۇنى ‹‹شاھىنشاھ›› دەپ رەسمى تەن ئېلىشتى.لېكىن گۇشتەسىپ جەمەتىدىكىلەردىن بىرىمۇ ئېتىراپ قىلمىدى.ئەردەشىر ئالتۇن تەختكە چىقىپ شاھلىق تاجىنى كىيگەن كۈنى مۇراسىمىدا سۆز قىلىپ مۇنداق دېدى:
-مېنىڭ ئالەم خەلقىگە سوغۋا قىلىدىغان بايلىقىم ئادالەت بولىدۇ.مەن ئومۇمى خەلق بىلەن تەقدىرداش بولۇپ جاپادىمۇ،ھالاۋەتتتىمۇ  بىرگە بولىمەن.مەندىن بۇ بايلىقلارنى ھېچكىم تارتىۋالالمايدۇ.يامانلىق قىلغانلاردىن قىلغان يامانلىقى ۋە يامان نامى قالىدۇ.ئۇلار مەڭگۈ ئەلنىڭ نەپرەت نەزىرىدە بولىدۇ.ئەدلى -ئادالەت بولسا ئەلنى شاد قىلىدۇ.دۆلەتنى قۇدرەت تاپقۇزىدۇ.ئادىل شاھلار ئەلدىن ھىچنىمىنى ئايىمايدۇ.بۇ جاھان مېنىڭ باشتىن ئاياغ باش پاناھىمدۇر.ئادالەت مۈلكى بولسا دائىملىق دەرگاھىمدۇر.مەن شۇنى تەلەپ قىلىمەنكى،ھۆكمىمدىكى سەردارلىرىمدىن،لەشكەر بېشى،جەڭچى ۋە نۆكەرلىرىمدىن ھچكىم دىلدىكى نىيىتىنى مەندىن يوشۇرماي سەمىمىيىتىنى ئەلگە بېغىشلىسۇن.دەرگاھىم ئىشىكى ئەل-ئاۋام ئۈچۈن ھەر ۋاقىت ئوچۇق.كىمنىڭ قانداق ئارزۇ تەلەپلىرى،ئەرىز-شىكايەتلىرى بولسا قاچانلا كېلىپ مەن بىلەن كۆرۈشسە دادىغا يېتىمەن.
بارچە ئەل ئەردەشىرغا ئاپىرىن ئوقۇدى.‹‹خەيىرلىك بولغىن،خەيرى ئېھسانىڭدىن زىمىن گۈللىسۇن!- دېيىشتى.
ئەردەشىر ھەر تەرەپلەرگە لەشكەر ئەۋەتتى.ئۇلارغا شۇنداق تاپىلىدى:
-قەيەردە بىزگە قارشى كۈچلەر بايقالسا شۇ زامات ئۇرۇش قىلىپ يوقۇتۇۋېتىڭلار! ھۆكمىرانلىق قۇدرىتىمىزنى ۋە تىغىمىزنىڭ كۈچىنى كۆرسۈتۈپ قويۇڭلار.

ئەردەشىر ئەرداۋاننى ئۆلتۈرگەندىن كېيىن ئۇنىڭ سۈر- ھەيۋىسى جاھانغا بىر كەلدى.شاھلار ئۇنىڭدىن چۆچىدى.شۇنىڭ كۈچىدىن ئەردەشىر نۇرغۇن پادىشاھلارنى ئۆزىگە بويسۇندۇرۇپ جاھان خوجىسى بولۇپ قالدى.كېيىن كاتتا توي مۇراسىمى ئۆتكۈزۈپ ئەردەۋاننىڭ  قىزىنى نىكاھىغا ئېلىپ خانىش قىلدى.نۇلار بۇرۇندىن بىر-بىرىنى ياخشى كۆرۈشۈپ توي قىلغان ئاشىق مەشۇقلار بولغاچقا ئۇلار خۇددى ‹‹ئالتۇن ئۈزۈككە ياقۇت كۆز››دېگەندەك بىر-بىرىگە ماسلاشقان ئاشىق -مەشۇقلار بولغان ئېدى.لېكىن لەنىتى شەيتان مەلىكە گۈلنارنى قايمۇقتۇرۇپ ئېغىر خاتالىق ئۆتكۈزۈشكە  كۈشكۈرتۈپ ھاياتىدىكى بىر قېتىملىق پاجىئەگە سەۋەپ بولدى.
ئۇنى قايمۇقتۇرغان شەيتان باشقا بىرلىرى ئەمەس دەل ئاتىسى ئۆلتۈرۈلگەندە ھىندىستانغا قېچىپ كەتكەن چوڭ ئاكىسى بەھمەن  ئېدى.ئۇ ئاتىسىنىڭ قىساسىنى ئۇنتۇمىغان ئېدى.كېچە-كۈندۈز شۇنىڭ غېمىدە يۈرەتتى.ئەردەشىر ئۇنىڭ ھاياتلىقىنى، قېچىپ يۈرۈۋاتقانلىقنى بىلسىمۇ تۇققانچىلىق مۇناسىۋىتى تۈپەيلى مەيلىگە قويۇۋەتكەن ئېدى.ئۇ قىساس ئېلىشتا سىڭلىسىدىن پايدىلىنىپ رەزىل ئۇسۇل بىلەن قول سالماقچى بولۇپ كۆپتىن بېرى دانا بىر ئەلچى ئىزدەپ يۈرگەن ئېدى.ئەلچىمۇ ئاخىر تېپىلدى.بەھمەن دەرھال مەىپى مەكتۈپ پۈتۈپ يەنە ئۇنىڭغا ئۆتكۈر زەھەر يانداپ ئەلچىدىن گۈلنارغا ئەۋەتتى.ئۇ ئەلچى ئارقىلىق شۇنداق گەپ ئەۋەتتى:

-سەن بۇ مەكتۇپ بىلەن دورىنى سىڭلىمغا تېز يەتكۈزۈپ بەرگىن.ئۇ ئەمدى ئەردەشىردىن شەپقەت كۈتمىسۇن.يەنىلا بىزنىڭ قېرىندىشىمىز ۋە ئاتامنىڭ قىزى بولسا بىزگە ياردەم بېرىپ ئاتامنىڭ قىساسىنى ئالسۇن.ئەمدى ھىچكىمىم قالمىدى دەپ زار-زار يىغلاپ يۈرمىسۇن.ھىندىستاندا ئىككى ئاكىسى بار ئىكەنلىكىنى،ئەردەشىرنىڭ زۇلمىدىن ماكانسىز قېلىپ ئازاپ چېكىۋاتقانلىقىنى، ھەرۋاقىت سىڭلىسىنى سېغىنىپ ياد ئېتىپ تۇرغانلىقنى ئۇنتۇمىسۇن.ئەگەر ئىرانغا بانۇ ياكى شاھ بولۇشنى خالىسا ،قىساس ئېلىپ ئاتامنىڭ روھىنى خۇش قىلىشنى ئويلسا بۇ ھىندى زەھىرىنى پەيت تېپىپ ئەردەشىرگە ئىچكۈزۈپ  جېنىنى ئالسۇن.بۇ ئارقىلىق بىزگە مېھرى بارلىقنى،قەمەتىەە ئاسىيلىق قىلمىغانلىقنى ئىسپاتلىسۇن!
قەستچى ئەلچى بىر كۈنى كەچ باغداتقا يېتىپ كېلىپ ئەردەشىرنىڭ يوق ۋاقتىدىن پايدىلىنىپ مەلىكە بىلەن كۆرۈشتى.دەيدىغاننى دەپ،بېرىدىغاننى بېرىپ قايتىپ كەتتى.
ئاكىلىرىنىڭ ھالىنى ئاڭلاپ مەلىكىنىڭ دىلى كۆيدى.باغرى ئاتەش كەبى ياندى.ئېرىنى قەستلەپ ئۆلتۈرۈپ ئاكىلىرىنىڭ ئارمانىنى ئەمەلگە ئاشۇرۇش مەقسىدىدە زەھەرنى ئەپلىك جايغا يوشۇرۇپ قويۇپ پەيت كۈتتى.بۇ چاغدا ئەردەشىر سىرتقا شىكارغا چىقىپ كەتكەن ئېدى.

ئەتىسى كەچ ئەردەشىر شىكاردىن قايتىپ كېلىپ شېرىن دۈشمەنگە قەست قىلىش پۇرسىتى كەلدى.ئەردەشىر ھەرقاچان سىرتتىن قايتسا ئالدى بىلەن مەلىكنىڭ يېنىغا كىرىپ ئۇنىڭ بىلەن دىدارلىشاتتى.ئۇنىڭ قولىدىن شاراپ ياكى ئۇسسۇلۇق ئىچىپ ئارام ئالاتتى. ئاندىن باشقا ئىشلار بىلەن شۇغۇللىناتتى.بۇ قېتىممۇ ئۇ ئوۋدىن يېنىپلا ئايالى بىلەن كۆرۈشۈش ئۈچۈن ھەرەمخانىسىغا قاراپ ماڭدى.گۈلنار ئۇنىڭ قايتىپ كەلگەنلىك خەۋىرىنى ئاڭلاپ يوشۇرۇپ قويغان زەھەرنى ئالدى.ھىچبىر ئاقىۋىتىنى ئويلىمايلا ئۇنى ئەردەشىر دائىم شاراپ ئىچىدىغان، ئالتۇن،گۆھەر، ياقۇتلار بىلەن ئالاھىدە زىننەتلەپ ياسالغان شاراپ جامىغا سالدى.ئۈستىگە شاھ ئامراق شاراپتىن قۇيۇپ ئۇنىڭ كېلىشىنى ساقلاپ تۇردى.ئەردەشىر قەسىر ئالدىغا كەلدى ،مەلىكە ئاپتاپتەك كۈلۈپ ئالدىغا چىقىپ، مىڭ بىر نازۇ كەرەشمىلەر بىلەن قارشى ئېلىپ ھوجرىسىغا ئېلىپ كىردى.تەييارلپ قويغان شاراپنى ئېلىپ قىلچە چاندۇرماي ئەردەشىرنىڭ قولىغا تۇتقۇزدى.

ئەردەشىر شاراپنى ئېلىپلا ئىچىۋەكەن بولسا ھەممە ئىش سۈيىقەستچىلەرنىڭ ئويلىغىنىدەك بولۇپ شاھنىڭ ھاياتى ئېچىنىشىلىق ئاخىرلاشقان بولاتتى.كونىلارنىڭ‹‹ئىنساننىڭ ھايات-ماماتى تەڭرىنىڭ قولىدا، تەڭرىنىڭ ئەمرى بىلەن ئەجەل كەلمىسە بىراۋنى پۈتكۈل ئىنسانلارمۇ بىرلىشىپ قەستلەپ ئۆلتۈرەلمەس››دېگەن گېپى بىكارغا ئېيتىلمىغان ئىكەن.شاھ جامنى قولىغا ئېلىۋاتقاندا نىىمىگىدۇر بىرنىمىگە پۇتلىشىپ كېتىپ دەلدۈگۈنۈپ كەتتى.شۇنىڭ بىلەن جام قولىدىن ئاجراپ كېتىپ يەرگە چۈشتى.چۈشتىيۇ ھەممسى تۆكۈلۈپ كەتتى.گۈلنار باشتىكىدەك ئۆزىنى خۇشخۇي تۇتۇپ چىرايىنى قىلچە ئۆزگەرتمىگەن بولسا بۇ ئىش ئەنە شۇنداق ئاددىيلا بىر ۋەقە بولۇپ چانماي  ئۆتۈپ كەتكەن بولاتتى.لېكىن جام يەرگە چۈشكەن ھامان گۈلنار قاتتىق چۆچۈپ كەتتى.چىرايىمۇ ئىتتىك سارغىيىپ جالاقلاپ تىترەپ كەتتى.بۇ ھال ئەردەشىرنى قاتتىق گۇمانغا سېلىپ قويدى.شاھ دەرھال خىزمەتكارنى چاقىرىپ تېزلىكتە بىرنەچچە توخۇ تېپىپ كىرىشنى ئېيتتى.توخۇلار كەلتۈرۈلدى.ئۇلار تۆكۈلگەن شاراپ يۇقىنى ئىچكەن ھامان يىقىلىپ چۈشۈپ بىردەمدىلا ئۆلدى.شاھنىڭ گۇمانى ئىسپاتلاندى.ئۇ دەھشەت غەزەپلەندى.ئايالىنى بۇ قىلمىشى ئۈچۈن ئۆلتۈرمەك بولۇپ مۇبەد ۋەزىرى پەررۇخنى چاقىرتتى.

ۋەزىر  ھايال بولمايلا كىردى.شاھ ئۇنىڭدىن سورىدى:
-ئەي ۋەزىر،بىر بەدنىيەتنى قەدىرلەپ تەختكە چىقارساڭ،ئۇ بۇ ئىلتىپاتىڭدىن مەست بولۇپ خۇدىنى يوقاتسا،كېيىن ۋاپاغا- جاپا قىلىپ سېنى ئۆلتۈرمەك بولسا، سەن بۇنداق ئادەمنى قانداق جازالاش كېرەك؟
-ئەگەر سەردار- سەركەردىلەر ياخشى نەسىھەتكە قۇلاق سالماي جاھاندارنىڭ جېنىغا قەست قىلماق بولسا، شۇئان بۇنداق زور گۇناھنى سادىر قىلىشقا جۈرئەت قىلغان كىشىنىڭ كاللىسىنى كەسمەك كېرەك.
-ئەردەۋاننىڭ قىزى شۇنداق گۇناھنى سادىر  قىلدى.دەرھال ئېلىپ چىقىپ پارە-پارە قىلىپ ئۆلتۈرۈلسۇن.ئۇنىڭدىن نىشانە بولغۇدەك ھېچنىمە قالمىسۇن!بۇ ئىشنى جاللاتقا تاپشۇرماي ئۆزۈڭ بىر قوللۇق بېجىرگىن.
ۋەزىر مەلىكنى ئېلىپ چىقىپ كەتتى.ھەممە گۇناھ ئۆزىدە بولغاچقا مەلىكە تەقدىرگە تەن بېرىپ دات -پەرياد كۆتۈرۈپ يۈرمىدى.لېكىن جازا مەيدانىغا بارغاندىن كېيىن ۋەزىردىن ئامانلىق تىلىدى:
-ئەي دانا ۋەزىر،مېنى ئۆلتۈرمىكىڭ بەرھەق،مەن ھەم شۇ جازاغا لايىقمەن.بۇ جەھەتتە مېنىڭ ھىچقانداق پىكرىم يوق.لېكىن سەن شۇ تاپتا مېنى ئۆلتۈرسەڭ بىر ئەمەس ئىككى كىشىنى ئۆلتۈرگەن بولىسەن.بۇنىڭ ىىرسى گۇناھسىز ئېدى.
-ئەي مەلىكە بۇ نىمە دېگىنىڭ؟ گەپنى ئوچۇق قىل!

-ئەي ۋەزىر،مەن ھازىر ھامىلدارمەن.قۇرسىقىمدا پادىشاھنىڭ پۇشتى بار.ئەگەر مېنى ئۆلتۈرسەڭ ئۇنىمۇ قوشۇپ ئۆلتۈرگەن بولىسەن.شۇڭا سەندىن ئۆتۈنەي،مېنى ۋاقتىنچە ئۆلتۈرمىسەڭ.مەن بالامنى ساق-سالامەت يەڭگىۋالغاندىن كېيىن ئاندىن ئۆلتۈرسەڭ.بالام بۇ دۇنياغا كۆز ئاچماي تۇرۇپلا ناھەق ئۆلۈپ كەتمىسۇن.
-بۇ ئىشنى شاھىم بىلەمدۇ؟
-تېخى ئېيتمىغان ئېدىم.
-ئۇنداق بولسا مەن شاھىمغا ئىلتىجا قىلىپ كۆرەي.
ۋەزىر  شاھنىڭ يېنىغا قايتا كىرىپ ئەھۋالنى چۈشەندۈردى ھەمدە  مەلىكىنى ۋاقتىنچە ئۆلتۈرمەي زىىندانغا  سېلىپ تۇرۇشنى ئۆتۈندى.شاھنىڭ غەزىپى تېخىچە يانمىغان ئېدى.شۇڭا ئۇ گۈلنارنىڭ تېزرەك ئۆلۈشىنى خالايتتى. ھەتتا ئۇنىڭغا مۇناسىۋەتلىك بىرەر نەرسىنىڭمۇ قېلىشىنى ياقتۇرمايتتى.شۇڭا كەسكىن رەت قىلدى:

-ئۇنىڭ قۇرۇق گەپلىرىگە قۇلاق سالمىغىن.بوينىغا كەمەند سېلىپ بۇيرۇقۇمنى تېز ئىجرا قىلغىن!
پەررۇخ قايتىپ چىقىۋېتىپ ئويلىنىپ قالدى:‹‹بۇنداق قىلسام ناھەق قان تۆككەن، بىگۇناھ نارىسىدىنىڭ جېنىغا زامىن بولغان بولىمەن.شاھ ھازىر قاتتىق غەزەپلىنىپ تۇرغان چاغدا شۇنداق دېگەن بىلەن بۇ بۇيرۇقىغا ھامان پۇشايمان قىلىدۇ.پەرزەنتىنى ناھەق ئۆلتۈرگىنىگە ئازاپلىنىدۇ.ئادەم دېگەن دۇنياغا تۆت كۈنلۈك مېھمان.ھامان قېرىيمىز،ئۆلىمىز.بىز ئۆلسەك بارلىق گەنجىمىز پەرزەنتلىرىمىزگە قالىدۇ.ئۇلار بىزنىڭ چىرىقىمىزنى يېقىپ ئىشلىرىمىزغا ۋارىسلىق قىلىدۇ.پادىشاھ كۈنلەردىن بىر كۈن قېرىپ ئۆلۈپ كېتىپ قالسا،ئۇنىڭ تەختىگە ۋارىس بولغۇدەك بىرەرمۇ پەرزەنتى بولمىسا تەختى –دۆلىتى خەقلەرنىڭ قولىغا قېلىپ ئۆمۈر بويى تارتقان جاپالىرى بىكار بولمامدۇ؟ ياخشىسى مەن پەرماننى ئالدىراپ ئورۇندىماي خاتالاشمايدىغان بىرەر ئامال تاپاي.شاھمۇ مەندىن رەنجىمىسۇن.شۇنداقلا پەرزەنتسىز ئەۋلاتسزمۇ قالمىسۇن.›› ۋەزىر كۆپ ئويلاندى، ئاخىر بۇ ئىشقا بىر ئامال تېپىپ شۇ بويىچە ئىش قىلدى.يەنى شەھەر چېتىدىكى قىشلاقتىكى  ئۆز قەسىرىدىن مەلۇم بىر جاينى تەيىن قىلىپ شۇ يەردە خانىشنى يوشۇرۇنچە ساقلىماقچى،خانىش ئوڭۇشلۇق يەڭگىپ بولغاندىن كېيىن ئاندىن ئۇنى ئۆلتۈرۈپ شاھنىڭ پەرمانىنى ئادا قىلماقچى،شاھنىمۇ پەرزەنتسىزلىك بالاسىدىن قۇتۇلدۇرۇپ قالماقچى بولدى.بۇ ئامالغۇ توغرا ئامال ئېدى،لېكىن خەتىرىمۇ بار ئېدى.چۈنكى شاھ يېنىدا خىزمەت قىلىدىغان ۋەزىر –ئۇمەرالار ھەرقاچان بىر-بىرىگە يوشۇرۇن دۈشمەن ئېدى.