(ئۆزھال) ناخشا تېكسىتلىرى ھەققىدە [ئۇلانما كۆچۈرۈش]

ﺳﯧﻨﯩﯔ ﯪﻫﯩﯔﯪﻟﻪﻣﻨﯩﯔ ﯪﻫى
ئۈمىدى

كېسەل چىرماپ ئالدى جىسمىڭنى،

بەخت ئۇنتۇپ قالدى ئىسمىڭنى.

ياشاپ كەلدىڭ بەختىمىز ئۈچۈن،

جۇت سوقسىمۇ ئاجىز جىسمىڭنى.



سېنىڭ ئورۇق، زەئىپ جىسمىڭدا،

مىڭ قۇياشنىڭ تەپتى بار ئانا.

سەن بولغاچقا تومۇزمۇ باھار،

ئوغلۇڭ تاغدەك ياشنايدۇ يانا.



بەختىمىزنىڭ تەۋەللۇتگاھى،

تەختىمىزنىڭ ھەم قارارگاھى.

ۋەزنىڭدىن ئوت ئالىمەن ھەردەم،

ﺳﯧﻨﯩﯔ ﯪھﯩﯔ ﯪﻟﻪﻣﻨﯩﯔ ﯪھﻰ.



تاغدەك مەزمۇت تۆت ئەزىمەتنى،

يېتىلدۈردۈڭ يىقىلدىڭ تاغدەك.

سېنىڭ ئۈچۈن بىز مۇنبەت تۇپراق،

ياشنا ئانا، مەڭگۈلۈك باغدەك.


2008 - يىل 8 - دېكابىر، ئۈرۈمچىدە يېزىلدى.


ئۆزھال بۇرادەر، بۇ شېئىرىم ناخشا تېكىستى بولۇشقا ماس

كېلەمدۇ - يوق، كۆرۈپ باقارسىز.

بۇ يازمىنى ئاخىرىدا   ئۈمىدى تەھرىرلىگەن. ۋاقتى  2012-7-13 23:19  

ئانا ھەققىدە ئەسەر يازماق تەس ،چۈنكى ئانىنىڭ ئەجىر مېھنىتى ئالدىدا تىلىمىز كەمتۈك كىلىدۇ . ئەمدى بۇ ئەسەرگە پىكىر . جىسمىڭىز دىگەن بىر جۈملە بىر شېئىردا ئۈچ قىتم تەكرارلانماسلىغى كىرەك . بۇ بەلكىم  تەپەككۇر بىلەن تىل ئىشلىتىش ۋە ھىسياتنىڭ بىر يۈرگە جەم بۇلالمىغانلىغىدىن بولسا كىرەك .

قىز ئالداندى

پەريادىدىن دۇنيا ھازىدار ،
باغرى لەختە يىغلايدۇ زار زار ،
بەرگى قات قات سۇلدى بىر گۈلنىڭ
مۇزلىغاندەك جۇدۇندا باھار .

كۆككە قاراپ خىيال سۈرەر ئۇ ،
ئۆز ئۈزىدىن سۇئال سورار ئۇ ،
تاشلار ئىرىپ سۇ بولدى ھەتتا ،
كۆزىدە ياش دەرىتلىك كۈلەر ئۇ ،

ۋەدە بەرگەن يىگىتى كەتتى ،
ئارمانلارنىڭ سۆلكىتى كەتتى ،
ۋاپاسىزلىق پىتىپ باغرىغا ،
چىھرىدىن نۇر بەركىتى كەتتى ،

ھەسىرەت بىلەن يۇلار چاچىنى ،
ھىچكىم سۈرىتمەس ئاققان ياشىنى ،
ۋەدە قىلغان قەسەمخور يىگىت ،
باشقا قىزنىڭ سىلار باشىنى ،

ناخشا تېكىستلىرى

ئەركىن مۇھەممەت

سەپەر ناخشىسى

بىر ئۇزۇن يولدىمەن ، يالغۇز ئاياقمەن ،
گاھ بوران ئۇچۇرغان سەرسان ياپراقمەن .
جىلۋىسى باھارنىڭ سېھرىڭدە گۈلۈم ،
مەن ئەجەپ كۆكلەمدىن ، گۈلدىن يىراقمەن .

بىر ئۇزۇن يولدىمەن ماڭسام تۈگىمەس ،
مەنزىلسىز سەپەرنىڭ كارۋانىمەن ، بەس .
ئۈنلەيدۇ ۋەسلىڭ دەپ ئاينىغان ھەۋەس ،
ئىشقنىڭ چۆلىدە تەنھا چىراقمەن .

بىر ئۇزۇن يولدىمەن داۋانلىرى كۆپ ،
گاھ يەنە ئولجىمەن قاۋانلىرى كۆپ .
كىملەر بار مەن كەبى ھېجرانلىرى كۆپ ،
مەجنۇننىڭ كۆزىدە كۆيگەن پىراقمەن .

نەقىرات : مەجنۇننىڭ كۆزىدە كۆيگەن پىراقمەن ،
ئىشقنىڭ چۆلىدە تەنھا چىراقمەن .
جىلۋىسى باھارنىڭ سېھرىڭدە گۈلۈم ،
مەن نىچۈن كۆكلەمدىن ، گۈلدىن يىراقمەن .

قارىمىساڭ بوپتىكەن ئەسلى

دەريا قىلىپ غەملەرنى ، دەرتنى ،
قارىمىساڭ بوپتىكەن ئەسلى  .
زىدە قىلىپ يەنە يۈرەكنى ،
قارىمىساڭ بوپتىكەن ئەسلى  .

ئارزۇ دىگەن ئاتماس تاڭ ئىكەن ،
گۈل شاخىدا تۈمەنلەپ تىكەن ،
ياكى شۇمۇ مۇھەببەت دىگەن ،
قارىمىساڭ بوپتىكەن ئەسلى  .

گاھى بارسەن ، گاھ يوق دەرياسەن ،
گاھى داغدام ، گاھ بىر قىياسەن .
پەريادىمدىن كەتمەس دۇنياسەن ،
قارىمىساڭ بوپتىكەن ئەسلى.

بىدارىڭمەن تۈندە يىگانە ،
زىلتارىڭمەن كۈيدىن بىگانە .
گۈلزارىمدىن  ۋەسلى پىنھانە ،
قارىمىساڭ بوپتىكەن ئەسلى .

بىلەلمىدىم دۇنيا سىرىڭنى

بىردە گويا سالقىن ھاۋاسەن ،
بىردە ئەجەپ پۈتمەس جاپاسەن .
گاھى شۇنداق مۇڭلۇق ناۋاسەن ،
كىمگە رىيا ، كىمگە راۋاسەن ،
بىلەلمىدىم دۇنيا سىرىڭنى .

تاشلاپ بىرنى تۆھمەت چۆلىگە ،
زورلاپ بىرنى يالغان كۈلكىگە ،
تارازاڭدىن شەيتان مارايدۇ ،
مۇھتاج قىلىپ بىرنى تۈلكىگە ،
بىلەلمىدىم دۇنيا سىرىڭنى .

كىملەر ئۈچۈن بولدۇڭ تۇتىيا ،
كىملەر ساڭا شۇنچە خار دۇنيا ،
تەنھالىقتا كۆيدۈرۈپ قويۇپ ،
ئۆزۈڭ ئەجەپ بەرمىدىڭ زىيا ،
بىلەلمىدىم دۇنيا سىرىڭنى .

ئاتا دىسەم تاغلار قارايدۇ ،
ئانا دىسەم باغلار قارايدۇ .
يار – يار دىسەم يەنە ئاھ ئۇرۇپ ،
سابالاردىن ھېجران مارايدۇ .
بىلەلمىدىم دۇنيا سىرىڭنى .


نىچۈن يالغۇز ، مۇنچە غېرىپمەن

ئايۋانلەرىڭ كىملەرگە قەسىر ،
بىدارىمەن تۈنلەرگە ئەسىر ،
نە كويلارغا تاشلىدى تەقدىر،
نىچۈن يالغۇز ، مۇنچە غېرىپمەن .

باغلىرىڭغا ئىدىم مەستانە ،
كۈيلىرىمگە ئۆزۈڭ ئاستانە .
يۇلتۇزلىرىڭ ئەجەپ پىنھانە ،
نىچۈن يالغۇز ، مۇنچە غېرىپمەن .

قەددىم يادەك ئېگىلدى ئەي يار ،
يۈرەكىمنى جام ئەتتى ئەغيار .
ئەي ، بىۋاپا ئۆزۈڭ ئەت ئىقرار ،
نىچۈن يالغۇز ، مۇنچە غېرىپمەن .


غەملەر يەيدۇ ئەمدى بارىمنى ،
دوستلار بىلمەس ھېچبىر ئارىمنى .
كىمدىن سوراي ئېتىبارىمنى ،
نىچۈن يالغۇز ، مۇنچە غېرىپمەن .

كېتەرسەنمۇ

تۈنلەر مېنى بىدار ئەتتى خېياللەر ،
تاڭلەرىگە خۇمار ئەتتى زىيالەر .
غەليان قىلار يۈرەكىمدە نىدالەر ،
تەنھالىققا تاشلاپ مېنى كېتەرسەنمۇ .

قول ئۇزاتسام قولۇم يەتمەس چاچلەرىگە ،
ئاشىق ئىدىم زىبا بوينىڭ قاشلەرىگە .
باغرىم يارا بولدى تۆھمەت تاشلەرىدە ،
چۆللەرىڭگە مېنى تاشلاپ كېتەرسەنمۇ ؟

تەشنالىقتا خاراپ بولدى باغلىرىم ھەم ،
ھېچ بىر سادا بەرمەس ئەمدى تاغلىرىم ھەم .
كۈيلىرىدىن ئادا بولدى چاغلىرىم ھەم ،
شۇل تەقدىرگە مېنى تاشلاپ كېتەرسەنمۇ ؟

سىز بولسىڭىز

يارىيار دەپ يىغلارمىدىم سىز بولسىڭىز ،
يۈرەكنى خار قىلارمىدىم سىز بولسىڭىز .
پەسىللەردىن سوراپ نەچچە ئىزىڭىزنى ،
غەملەردىن تار تىلارمىدىم سىز بولسىڭىز .

ھېجرانىڭىز شاراپ ئەتتى ياشلىرىمنى ،
ئاتام كېتىپ غېرىپ ئەتتى باشلىرىمنى .
ئانام ئاھلەر ئېتەر ئەمدى ئاھلىرىمنى ،
ئاھلار ئۇرۇپ قالارمىدىم سىز بولسىڭىز .

نامەرتلەرگە بولدى ماكان باغى - ئېرەم ،
كۆڭۈل غېرىپ سىزسىز بۈگۈن ئەي گۈل سەنەم .
كۈيلىرىڭىز دىل ئازارغا بولسا مەلھەم ،
ئۇلۇق -كىچىك تىنارمىدىم سىز بولسىڭىز .

تۈنلەر ماڭا ھەمرا بولدى كېچە ياتسام ،
كىملەر كېلىپ ئاڭلار ئەمدى كۈيلەر قاتسام .
مەن تىلەيمەن دىلداردىن بىر خەۋەر تاپسام ،
قاناتىمدىن سۇنارمىدىم سىز بولسىڭىز .


كەلمەيدۇ خۇشۋاق يار ئەجەپ

گۈلگە ئامراق يار ئەجەپ ،
گۈلزارغا ئامراق يار ئەجەپ .
مەن غېرىپ خەندانىنى ،
قىينارغا ئامراق يار ئەجەپ !

كۈي ئېتىپ ئازارىنى ،
ھەم توي ئېتىپ بازارىنى .
سالدى ئوت ، دىشۋارىنى ،
ھېجرانغا قوشماق يار ئەجەپ ؟

بىر پىيالە چاي سۇنۇپ ،
ئىككى پىيالە چاي سۇنۇپ .
لەۋلىرىمنى قاخشىتىپ ،
سالدى سىرتماق يار ئەجەپ !

مەن ئۆزۈم بىر دانىمەن ،
غەمدىن ئېشىلگەن تارىمەن .
كەلسە يار مىڭ پارىمەن ،
كەلمەيدۇ خۇشۋاق يار ئەجەپ !

بۇ يازمىنى ئاخىرىدا   مەشرەپ تەھرىرلىگەن. ۋاقتى  2012-7-18 01:00  

ناخشا تېكىستلىرى

ئەمەتجان يۈسۈپ                                                  

                                                   

قىزلار

قىزلار گۇزەل، قىزلار چىرايلىق،
بۇ جاھاننىڭ زىننىتى قىزلار.
قىزلار گۇزەل، قىزلار زىبالىق،
گۈل ھاياتنىڭ ئىززىتى قىزلار.

قىزلار گۇزەل، قىزلار چىرايلىق،
گۇزەللىكنىڭ ئەندىزى قىزلار.
يىگىتلەرنىڭ قەلبىدە چاقنار،
نورلۇق يۇلتۇز ئەختىرى قىزلار.

قىزلار گۇزەل، قىزلار چىرايلىق،
گۇزەللىكتە يوقتۇر باھاسى.
قىزلار گۇزەل قىزلار ھايالىق،
تاجىسىدۇر شەرمى ھاياسى.




قىزلار گۇزەل، قىزلار چىرايلىق،
كۈلكىسىدۇر تاڭنىڭ ساباسى.
ھەر نەپەستە مەستخۇش يىگىتلەر،
شۇ كۈلكۈلەر دىلنىڭ داۋاسى.

قايتۇرما:

گۇزەللىكنىڭ ئەندىزى قىزلار،
يىگىتلەرنىڭ ئەختىرى قىزلار.

يارالغان ئەر-ئايال بىر جۈپ

(ناخشا تېكىستى)

ئۆزۈڭنى ماختىدىڭ ئەر دەپ،
ئاياللار خارمىكەن ئويلا.
ساڭا يايراش ئۈچۈن كەڭرى،
ئۇلارغا تارمىكەن دۇنيا.

ئاناڭ كەلمەمدۇ يادىڭغا،
ئايالنى پەس،چاكار كۆرسەڭ.
قىزىڭ پاتسۇنمۇ ھەسرەتكە،
ئۇلارنى خەس-چاۋار كۆرسەڭ.

دىلى نازۇك،ئازار قىلما،
ئاتالساڭمۇ بولۇپ ھاتەم.
يارالغان ئەر-ئايال بىر جۈپ،
گۈزەلدۇر شۇ سەۋەپ ئالەم.

سېنى ئەسلەپ

(ناخشا تېكىستى)

سېنى ئىزدەپ گۈزەل باغلار
ئارا گۈللەرگە ئوخشاتتىم.
خىيال ئىچرە بۇلاقلارنى،
قارا كۆزلەرگە ئوخشاتتىم.

سابا بىرلە سالام يوللاپ،
پىراقىڭدا سېنى ئويلاپ.
يىراقتىن سايرىسا كاككۇك،
داۋا سۆزلەرگە ئوخشاتتىم.

سېنى ھەر ئەسلىسەم دىلدار،
يۈرەكىم دەرت بىلەن يىغلار.
سېنىڭسىز باغۇ-بوستاننى،
گۇيا چۆللەرگە ئوخشاتتىم.

1993-يىل5-ئىيۇل

تەنھالىق كۈيى

(ناخشا تېكىستى)

دىلىم يىغلايدۇ ھەسرەتتە،
پىغانلىق كۈنلىرىم تەنھا.
غېرىپلىق ئېلكىدە كۆڭلۈم،
جۇدالىق تۈنلىرىم تەنھا.

سېنى كۈتتۈم بىتاقەتتە،
يولۇڭدا تەلمۈرۈپ تەنھا.
ئۈمىد ئۈزمەي خىيال ئىچرە،
سېنى مىڭ كەلتۇرۇپ تەنھا.

مۇڭۇمغا جۆر بولۇپ كاككۇك،
تۆكۈپ ياش سايرىدى تەنھا.
بىلەمسەن باغرى قان يارىڭ،
ئاراملىق تاپمىدى تەنھا.

1993-يىل9-ئاۋغۇست

گۈل مىھرى

(ناخشا تېكىستى)

گۈل مىھرى گۈلۈم مىھرى،
ئەۋرىشىم زىبا مىھرى.
ئويغا مۇپتىلا قىلدىڭ،
بىر بېقىپ قىيا مىھرى.

كۆزلىرىڭ بۇلاق مىھرى،
كىرپىكىڭ قىياق مىھرى.
كۆڭلۈمنىڭ ئارامىدۇر،
مەڭزىڭدە زىناق مىھرى.

گۈل مىھرى قوياش مىھرى،
قەلبىمگە زىيا مىھرى.
مىھرىڭنى ماڭا بەرگىن،
دەردىمگە داۋا مىھرى.

1993-يىل15-ئاۋغۇست

كۆڭلۈم

گۈزەل قامەتكە ئالدانما،
كۆزۈمنى ياشلىما كۆڭلۈم.
يۈرەكتىن ئۆچمىدى داغلار،
ئازاپقا تاشلىما كۆڭلۈم.

                              قايتۇرما: ھەۋەسكە باشلىما كۆڭلۈم،
                                    ئازاپقا تاشلىما كۆڭلۈم.

رىيازەت چەكتى بۇ قەلبىم،
كىرىپ كەينىڭگە غەپلەتتە.
پۇشايماندا چىكىپ پەرياد،
دىىلىم يىغلايدۇ ھەسرەتتە.

ۋىسالنى ئىزدىمەك بولساڭ،
ئۆزەڭنى ئالدىما كۆڭلۈم.
تۇمار قىلغىن ساداقەتنى،
يۈگەنسىز قاترىما كۆڭلۈم.

1993-يىل17-ئاۋغۇست

كاككۇك

(ناخشا تېكىستى)

ئەجەپمۇ سايرىدىڭ مۇڭلۇق،
نىگارىم بېغىدا كاككۇك.
ماڭا سىرداش بولۇپ قالدىڭ،
جۇدالىق تېغىدا كاككۇك.

ئۈنىڭنى ئاڭلىسا يارىم،
سەھەردە ئويغۇنار كاككۇك.
ۋىسالغا ئىنتىزار كۆڭلى،
ئازاپتا تولغۇنار كاككۇك.

خەۋەر بەرگىن نىگارىمغا،
ئېچىلغان گۈل بولۇپ چىقسۇن.
رىيازەت چەكمىسۇن قەلبى،
تولۇن ئايدەك كۈلۈپ چىقسۇن.

1993-يىل18-ئاۋغۇست


                                 
گۈلۈم قايدا

(ناخشا تېكىستى)

ئەجەپ بىر كۈنگە مەن قالدىم،
ۋاپادار ئۇز گۈلۈم قايدا.
جۇدالىق دەشتىدە ئەمدى،
مېنىڭ ئىزدەر يولۇم قايدا.

ئازاپسىز ئۇيقۇغا كۆندۈڭ،
سېنى ھېچ ئويغۇتالمايمەن.
جۇدۇنلۇق قىش زىمىستاندا،
باھارنى ئۇنتۇيالمايمەن.

شىرىن چۈش كۆرمىگىن لالەم،
يۈرەكنى تىلغىماي ئەمدى.
جىمى ئىنسانغا كەڭ ئالەم،
ماڭا تار يىغلىماي ئەمدى.

1994-يىل 24-ئاۋغۇست

دوستۇم دېمە

(ناخشا تېكىستى)

دېمە دوستۇم كۆرەلمەسنى،
ۋاپا ئەھلىنى سۆيمەسنى.
ساڭا ئامەت بەخىت كەلسە،
دىلىدىن شاد كۈلەلمەسنى.

ھەسەتخوردىن ۋاپا كۈتمە،
تەمەخوردىن ھايا كۈتمە.
مۇشاققەت كۆۋرىكى بىرلە،
ساڭا يانداش ئۆتەلمەسنى.

قارا چاپلانسىمۇ مەيلى،
ۋە يا ئاقلانسىمۇ مەيلى.
شۈكىرگە قۈل غېرىپ بەندە،
كۈنىدىن ھېچ ئۇيالماسنى.

1996-يىل10-ئىيۇل

ئۇيغۇرۇم

پەسلى گۈل كۆكلەم باھار كۈلگەن شاھانە ئۇيغۇرۇم،
ئەل ئارا نامى ئولۇغ ئۆتكەن يىگانە ئۇيغۇرۇم.

بىر زامان قالدىڭ جۇدۇنلاردا يۈرەك چەكتى پىغان،
ھەسرىتىڭگە تاغۇ-تاش بولغان قىيانە ئۇيغۇرۇم.

ئەل ئۇچۇن مەردلىك يولىدا جان تەسەددۇق ئەيلىمەك،
*ئابدۇخالىق قەلبىدە يانغان نۇرانە ئۇيغۇرۇم.

تەرك ئېتىپ غەپلەتنى *«ئويغانغان زىمىن»نىڭ كۆزى ياش،
قالدى ئۆتكۈر*« ئىز»لىرى سۇنماس ئىرادە ئۇيغۇرۇم.

تاپ كامال ئەجداتلىرىم كۈتكەن ۋەتەن ۋارىسلىرى،
ئەجرىدىن بەختى يورۇق كۈلگەن زامانە ئۇيغۇرۇم.

1996-يىل 30-ئىيۇل

*ئابدۇخالىق ئۇيغۇرنى كۆرسىتىدۇ
*ئابدۇرېھىم ئۆتكۈرنىڭ شۇ ناملىق رومانلىرى كۆزدە تۇتۇلىدۇ.

كەل ئوماق

(ناخشا تېكىستى)

ئۆتتى تەشنالىق جېنىمدىن ئىشتىياقىڭ كەل ئوماق،
مۇپتىلا قىلدى بۇ دەرتكە گۈل سىياقىڭ كەل ئوماق.

بىر قىيا باقتىڭ، مېنى سەرسانە مەجنۇن ئەيلىدىڭ،
رازىمەن كۆيدۈرسىمۇ ئاتەش پىراقىڭ كەل ئوماق.

بولدى قەلبىم پارە-پارە بۇ جۇنۇنلۇق دەشتىدە،
ئارمىنىم ئايسىز كېچە بولسام چىراقىڭ كەل ئوماق.

مەن سېنى سۆيمەكنى دىلدىن ئىختىيار قىلدىم نىگار،
بىر ئۆمۈر ئەھدى ۋاپا بولسۇن سىناقىڭ كەل ئوماق.


1996-يىل 2-ئاۋغۇست



خەلقىم

(ناخشا تېكىستى)

ئانامسەن جانىجان خەلقىم،
مېنى باغرىڭدا كۆكلەتكەن.
تۈمەن پەرزەنتلىرىڭ ئوخشاش،
ئىگىز ئاسمانغا ئۆرلەتكەن.

                          قايتارما: ئانامسەن جانىجان خەلقىم،
                                 ئۆمۈرلۈك ئىپتىخار پەخرىم.

كۈيۈمنىڭ ئەۋجىدە نامىڭ،
سېنى ھەر پەللىدە يادلاپ.
ياشايمىز بەختىيار مەڭگۈ،
نۇرانە چىھرىمىز پارلاپ.

بېغىڭدا قۇشلىرىڭ سايراپ،
ئېتىزدا ناخشىمىز ياڭراپ.
كەبىئى جەننەت قۇچاقىڭنى،
ئۆتەرمەن بىر ئۆمۈر داڭلاپ.

1996-يىل 8-ئاۋغۇست

تۇيۇق يول

(ناخشا تېكىستى)


بولۇپ قالدۇق مەيگە مەستانە،
بۇ كوچىدا سېخى مەردانە.
كۆنۈپ قالدۇق كېزىپ مەيخانە،
ئۆزىمىزنى قىلىپ ۋەيرانە.


بوۋىلاردىن قالمىغان ئۇدۇم،
ئاتىلارمۇ دېمىگەن يولۇم.
بىز كىملەرنى دورىدۇق بۈگۈن،
قالدى بىزدىن ئۇلار ھەيرانە.


                          قايتارما: بولۇپ قالدۇق مەيگە مەستانە،
                                   كۆنۈپ قالدۇق كېزىپ مەيخانە.



ئەقلىمىزنى مەي بىلەن بۇلغاپ،
ئۆتەرمىزمۇ باقمىدۇق ئويلاپ.
ھەسرەت يۈتۈپ قالارمىز بىر كۈن،
پۇشايماندا بولۇپ غەمخانە.


                   قايتارما:
                           قاترىمايلى ئىزدەپ مەيخانە،
                           تاپماي ئىجاد ئاتلىق جانانە.

1996-يىل 15-ئاۋغۇست




ئانام

ماڭا ئاغزىدا سۇ بەرگەن ،
لىۋى شەربەت ئانام نەدە.
ماڭا ئاغزىدا دان بەرگەن،
قولى بەركەت ئانام نەدە.

ماڭا بەش ۋاخ نامازىدا،
دۇئا ئەيلەپ مۇرادىمغا.
ۋېسال ئارزۇسىدا يۈرگەن،
ئۆزى ئامەت ئانام نەدە.

يېنىدا بولمىسام بىر كۈن،
بۇ دۇنيا بىر قاراڭغۇ تۈن.
كېلەر دەپ يولىغا تەلمۇرگەن،
دىلى ھەسرەت ئانام نەدە.

مېنى تاشلاپ ئۆزۈڭ كەتتىڭ،
دىلىمنى قان-يارا ئەتتىڭ.
جىمى ئىنساننى كۆندۈرگەن،
ئەجەپ قىسمەت ئانام نەدە.

قويدۇم ھومۇيۇپ


سەن كۆرمىدىڭ ئادەملەر قاتارى مېنى،
قاراڭغۇدا يىراقتىن قويدۇم ھومۇيۇپ.
ئۇچراشقاندا ئىگىلدىم كۆرسۈن دەپ سىنى،
ئۆتۈپ كەتسەڭ ئارقاڭدىن قويدۇم ھومۇيۇپ.

شۆھرەت تاپساڭ ماختايمەن تىلىم بال-شىكەر،
ئەمما ئىچىم ئېچىشار يۈرەك دەرت چېكەر.
مەن مۇشۇنداق ئادەممەن دىلىمدا زەھەر،،
قاراڭغۇدا كۆرمەستە شىردەك ھومۇيۇپ.

بىلەلمىدىم بىزدىكى بۇ قانداق ئادەت،
ئۆزىمىزگە ئۆزىمىز قىلىپ ھاقارەت،
كۆرەلمەيمىز بىرىمىزگە كەلسە قۇت-ئامەت،
ئۆز-ئۆزۈمگە نەپرەتتە قويدۇم ھومۇيۇپ.

1996-يىل 25-نويابىر



ئاپتاپ بولۇپ كەل يارىم

(ناخشا تېكىستى)


ئاپتاپ بولۇپ كەل يارىم،
ئازاپ بولۇپ كەل يارىم.
كۆرۈۋالاي قەلبىڭنى،
جاۋاپ بولۇپ كەل يارىم.

مەن سېغىندىم پىراقتا،
يۈردۈڭ بىغەم يىراقتا.
بولدى كۈلبەم مەيخانە،
ئۆزۈڭ تونۇپ كەل يارىم.

ئۆتەرمىزمۇ غەپلەتتە،
تاپماي ۋېسال، ھەسرەتتە.
شىرىن تاتلىق ئۇيقۇڭنى،
تاشلاپ قويۇپ كەل يارىم.

بۇلبۇلىڭمەن باغرى قان،
يۈرىكىدە دەرت پىغان.
قىزىل گۈلدەك لېۋىڭدە
شاراپ تۇتۇپ كەل يارىم.

1998-يىل14-ئاپرېل



ئوغلۇم
(ناخشا تېكىستى)

بۇدۇنيادا پەخرىمسەن ئوغلۇم،
ئىززىتىمسەن،قەدرىمسەن ئوغلۇم.
ھاياتلىقتا شادلىقىم،قايغۇم،
راھىتىمسەن،جەبرىمسەن ئوغلۇم.


ئاتاڭ رازى، ئەجدادىڭ رازى،
ئاناڭ رازى، ئەۋلادىڭ رازى.
خەلقىڭ ئۈچۈن جان پىدا ئەيلە،
ئەل ئالدىدا لەۋزىمسەن ئوغلۇم.


ئۈمىدى سەن ئاتاڭنىڭ شۇنداق،
نادانلىقتىن بولغىن سەن يىراق.
ھىكمەت بىلەن ئۆرلە پەللىگە،
غورۇرىمسەن،بەختىمسەن ئوغلۇم.

1997-يىل27-فېۋرال

مەشرەپ ھىكمىتى

مەشرەپ دېسە ئۇرغۇيدۇ قانلار،
مەشرەپ بىلەن ياشاردى جانلار.
ياشاپ كەلدى سەن بىلەن ئۇيغۇر،
بىرگە ئاتلاپ سانسىز داۋانلار.

بۆشۈكى سەن شەرمى ھايانىڭ،
لەززىتى ھەم گۇزەل ھاياتنىڭ.
ئۆتكىلى سەن ئادىمىيلىكنىڭ،
ھەيۋىتى ھەم بارچە پاراتنىڭ.

سەن تەۋەللۇت ئەيلىگەن مۇقام،
قانىتىنى يايدى جاھانغا.
ئەجدات روھى ياشاردى بۇدەم،
يەتكەن كەبئى بۈيۈك ئارمانغا.

سەندە ئايان ئەجدات خىسلىتى،
شۇ خىسلەتتە ئەۋلاد قىممىتى،
مەيلى تاتلىق ۋە ياكى ئاچچىق،
چېيىڭدا بار جاھان ھىكمىتى.

مەكتەپ مارشى

مەكتىپىم سەن ئانىمىز، بىلىم كانىمىز،
ھىكمىتىڭدىن شان قۇچۇپ نۇسرەت تاپىمىز.
مەڭگۇلۇك بىر ئابىدە سەن باسقان تارىخ،
زەپەر بويلاپ شۇ يولدا مەغرۇر ماڭىمىز.

يۇرتۇم ھۆسنى گۇل بولدى مىھرىڭ تۇتىيا،
سەنسىز كۈلمەس، كۆكلىمەس ھەر بىر گۈل-گىياھ.
قاناتلاندۇق، ئاتلاندۇق مەنزىللەر تامان،
مەدەتكارسەن، توسالماس بىزنى تىك قىيا.

لاۋۇلداتتىڭ ھەرقاچان ئىلم مەشئىلى،
ئاپتاپ بولۇپ يورىدى، نادانلار دىلى.
سەندە ئايان قوياشتەك ھايات ھېكمىتى،
ئۈمىدىڭدەك نۇرانە كېلەچەك يولى.

قايتارما:
قاناتلاندۇق ئاتلاندۇق مەنزىللەر تامان،
مىھرىڭ بىلەن مەڭگۈگە يولىمىز راۋان.

2009-يىلى7-فېۋرال

ئۇستاز مىھرى

(ناخشا تېكىستى)

دىلغا ئاپتاپ مىھرىڭىز ئۇستاز،
ئەۋلادلارغا چىھرىڭىز باھار،
سۇلتانى سىز ئەجىر-تۆھپىنىڭ،
سىزگە ھۆرمەت ئالقىشلار ياغار.

بارىڭىزنى ئەلگە ئاتىغان،
قەلىبلەرگە بەلگە قادىغان.
خىسلەتلەر كۆپ ۋۇجۇدىڭىزدا،
مۇشكۇللەردىن زىنھار يانمىغان.

سىز بەردىڭىز ئادىمىيلىكنى،
تونۇتتىڭىز بىزگە ھاياتنى.
قەلبىمىزدە ئۈمىد يېلىنجاپ،
مەنزىل تامان قاقتۇق قاناتنى.

قايتارما:
سىز پاسىبان ئەۋلاد بەختىگە،
سىز ھەر قاچان ھۆرمەت تەختىدە.

                          2009-يىل 9-مارت

ۋەتىنىم

(ناخشا تېكىستى)

ئانا يۇرتۇم گۇلىستانىم ئۆزۈڭ ۋەتىنىم،
ماڭا پەرمان سېنىڭ ھەربىر سۆزۈڭ ۋەتىنىم.
بەردىڭ ئەقىل، غورۇر، ۋىجدان پىداكارىڭمەن،
ساداقەتتە يورۇق ھامان يۈزۇڭ ۋەتىنىم.


قامەت ئاتا قىلدى بوغدا، تەڭرى تاغلىرى،
ئىلى، تارىم ئۆركەشلىرى كۆيۈڭ ۋەتىنىم.
جانغا راھەت ساپ ھاۋالىق گۇلشەن باغلىرى،
شۇ گۇلشەندە قىز-ئوغۇللار گۇلۇڭ ۋەتىنىم.


توغراقلاردا بار ئىجادكار ئەجدات سىماسى،
باھادىرلار باسقان ئىزدا يالقۇن لاۋاسى.
شانلىق تارىخ تۇپرىقىڭنىڭ ھەر بىر گىياسى،
ئاسايىشلىق مەنزىلىدۇر يولۇڭ ۋەتىنىم.


شاد بەختىيار كۈلدى خەلقىڭ ئىناق زاماندىن،
مەئىشەتكە تولغان گۇزەل ئىللىق ماكاندىن.
ئاتلاندى ئەل ئاشماق ئۇچۇن پەللە-داۋاندىن،
زەپەرلەردە ھەر كۈن يەنە تويۇڭ ۋەتىنىم.

2010يىلى4-ئاينىڭ26-كۈنى


سېنى ئەسلىدىم

ئۆتتى كۆپ يىللار،ئۆچمىدى پىراق،
شىكەستە دىللار،ئۈمىدتىن يىراق،
ساداقەت دېمەك مەڭگۈلۈك  بايراق،
قىرىق يېشىمدا سېنى ئەسلىدىم.


كونا خاتىرە،سارغايغان ۋاراق،
ئېزگۈ ئەسلىمە،ياشارغان قىياق،
كۆزۈم ئۆڭىدە شۇ گۈلگۈن زىناق،
ھەربىر تېڭىمدا سېنى ئەسلىدىم.


ئىشىكىڭ ئالدىدىن ئۆتەلمىسەممۇ،
كۈلسەڭ قوشۇلۇپ كۈلەلمىسەممۇ،
بۇنداق ھاياتقا كۆنەلمىسەممۇ،
بار دەپ يېنىمدا سېنى ئەسلىدىم.

خىلۋەت بېغىڭدا كۈتەلمىسەممۇ،
سېغىنغىنىمدا   كۆرەلمىسەممۇ،
بېسىپ باغرىمغا سۆيەلمىسەممۇ،
يۈرەك قېتىمدا سېنى ئەسلىدىم.

تەنلىرىم سىماب كۈيلەر ئەۋجىدە،
سۆيگۈ ھىدى بار قانلار مەۋجىدە،
چاڭقاق سەيياھمەن ھىجران دەشتىدە،
چىققان تېغىمدا سېنى ئەسلىدىم.

ئۆتتى ئالدىراش تىنىمسىز ھايات،
دىلىمدا سۆيگۈ،ئىمان- ئىتىقاد.
تۇرمۇش دەرسىدىن ئالغاندا ساۋاد،
قىرانلىقىمدا سېنى ئەسلىدىم.

ھايات شۇنداقكەن قىسمەتلەرگە باي،
بىرى خارۇ-خەس،بىرى كۆكتە ئاي،
ۋېسالسىز ئۆتكەن ئاشىقلار تالاي،
يادلاپ دىلىمدا سېنى ئەسلىدىم.


2011-يىل12-ئاينىڭ 26-كۈنى

ئايگۈلۈم

(ناخشا تېكىستى)

ئايگۈلۈم،ئايدەك گۈلۈم،
شوخلىقى تايدەك گۈلۈم.
كۈلكىسى كۈلگەن بۇلاق،
چاڭقىدىم سايدەك،گۈلۈم.


ئايگۈلۈم ئايدەك گۈلۈم،
بىر ئوتلام چايدەك گۈلۈم،
مېھرى ئوت ئاتەش نەپەس،
سۆزلىرى مايدەك گۈلۈم.


ئايگۈلۈم قىينالدى جان،
بولدى دىل ھىجرىڭدە قان.
كاككۇكىڭ بولدۇم غېرىپ،
باغدا يالغۇز سايرىغان.


ئايگۈلۈم كەلگىن كۈلۈپ،
باقتىم يولۇڭغا ئىنتىزار.
شۇ ئەمەسمۇ ئىككىمىز،
زارىقىپ كۈتكەن باھار.



                  2012-يىل باھار.

ھاۋالە :
خەلقىمىز سەنئىتى ئۈچۈن خالىس تەر تۆكۈپ ھەممىمىزنىڭ  ھۆرمىتىگە ئىرىشىپ كېلىۋاتقان ھۆرمەتلىك ئۆزھال ئەپەندى، ئالدىراشلىق ئىچىدە  كېتىۋاتقان بارلىق ئىشلىرىڭىزغا ۋە ئىجادىيەتلىرىڭىزگە چەكسىز ئۇتۇقلار تىلەيمەن.  خىزمىتىڭىزنى قوللاش ۋە ئۆزۈمنىڭ ناخشا تېكىستى يازالايدىغان،يازالمايدىغانلىقىمنى سىناپ بېقىش ئۈچۈن بىرقانچە تېكىستنى يوللىدىم، ئىرىنمەي كۆرۈپ باقارسىز.

ئۇنىڭدىن باشقا كونا مۇنبەرگە يوللاپ، ئىمكانىيەت بولسا ئاتاقلىق ناخشچىمىز سەنۇبەر تۇرسۇنغا يەتكۈزۈپ قويۇشنى ئۆزىڭىزدىن ئۆتۈنگەن تۆۋەندىكى مۇۋەھششەنى يەنە يوللاپ قويدۇم.پۇرسەتلەر بولۇپ قالسا،سەنۇبەر خانىمغا يەتكۈزۈپ قويسىڭىز، ئاۋارە قىلدىم.


سېنىڭ ناخشاڭ

(مۇۋەششەھ)


سەنەملەر جىلۋىسى بالقىپ سېنىڭ گۈلگۈن جامالىڭدىن،
ئەنە **مەشرەپ كېلەر مەستخۇش *«ۋېسال» ئىزدەپ ئاۋازىڭدىن.


ناۋا بىرلە غېرىپ *«كاككۇك»، ئۈچۈن زەينەپ تۆكەر قان-ياش،
ئۇنىڭ كۆڭلى تاپار تەسكىن *«سېنىڭ ناخشاڭ»-دۇتارىڭدىن.


بېرىپ ئوتلۇق سالامىڭنى،دېدىڭ ئەلگە*«سالام خەلقىم»
ئەشۇ دەم ئىرىدى بۇ تەن مۇھەببەتلىك جاۋابىڭدىن.


رىزا ئەيلەپ ئىجادىڭدىن *«ئانا يۇرت» كۈلدى ئەجرىڭدىن،
تۇرار*«ئوتلۇق كېچە»چاقناپ،گويا يۇلتۇز نىگاھىڭدىن.


ئۇلۇغلۇقنى تاپار ئىنسان،ئەجىر-مېھنەتتە،پاكلىقتا،
راۋان بولغاي يولۇڭ ھەردەم گۈزەل ئارزۇ-قارارىڭدىن.


سەير ئەتسەم سەنئەت گۈلشەنىنىڭ ھەغدا قىزىكەنسەن،
ئۇرۇپ بۇلبۇل كەبئى خەندان كۈلۈپ ئۆتكەن باھارىڭدىن.


ناۋا قىلساڭ بولۇپ تەڭكەش ***«ھەسەن-ھۈسەن» جۇلاسى بار
نىسىپ بولغاي ساڭا ئاتەش نەپەسلەر دىل ئارامىڭدىن.



2011-يىل 17-سىنتەبىر

*قوش تىرناققا ئېلىنغانلىرى:  پەخىرلىك ناخشىچىمىز،كومپۇزىتور   سەنۇبەر تۇرسۇننىڭ ئىجادىيەتلىرى ۋە ئېيتقان ناخشىللىرىنى كۆرسىتىدۇ.

** كىلاسسىك شائىر مەشرەپنى كۆرسىتىدۇ.

*** ھەسەنجان تۇرسۇن ۋە ھۈسەنجان تۇرسۇنلارنى دېمەكچى.

ئاپتور : ئەمەتجان يۈسۈپ

(قەشقەر يوپۇرغا ناھىيە يەكشەنبەبازار ئوتتۇرا مەكتەپتە)
تېلفۇن:   13899141090                                                                                                               

بۇ يازمىنى ئاخىرىدا   ئەمەتجان يۈسۈپ تەھرىرلىگەن. ۋاقتى  2012-7-23 13:42  

تاغلىقلار
قاردەك كۆڭلى تاغ سۇيىدەك بىغۇبار،
ناخشا كۈيى تاغ شامىلى مىسالى.
ئۇسۇللىرى ئەسلىتىدۇ تاغلارنى،
قامىتىدۇر ئىگىز تاغلار سىماسى.

ئالتۇن، يامبۇ تىلىمەيدۇ ئاسماندىن،
ئاسمان يىغىپ،يەر ياشارسا كۈلىدۇ.
دەرت كەلسە گەر قوشنىسىنىڭ بېشىغا،
تەڭ تارتقىلى داۋا بولۇپ ئۈنىدۇ.

قولى ئوچۇق يايلاق كەبى مىھماندوست،
كىيىكتەك شوخ ئىشچان ئوغۇل قىزلىرى.
جاپالارنى يىڭىپ ،ئاشار داۋاندىن،
چوققىلاردا مەڭگۇ ئۆڭمەس ئىزلىرى.

نەقرات:
تالاي ئىشلار شۇ تاغلاردىن باشلانغان،
تاغلىقلار بار -بۆرە كۆزى ياشلانغان.
ئەي تاغلىقلار ،تاغدەك قامەتلەر،
ئەي تاغلىقلار چىدام - تاقەتلەر.

ئۆزبىكچە ناخشا تېكىسىتلىرى

پەرزەنتىم

ناخشىدا؛ گۈلسەنەم

بۇنچە نازۇك بولمىساڭ،
گۈلگە ئورايمۇ بالام؟
يىغا تولا، ئەلەم بار
ئېيتىپ بېرەيمۇ بالام؟

يەتتە دەريا يۇيسا ھەم
كەتمەس داغىم بار مېنىڭ.
ناكەس ئاتقان تاشلارغا
تولغان باغىم بار مېنىڭ.

مۆلدۈرلىمە كۆزۈمگە،
بولدى كۆڭلۈم ئەزمىگىن.
مەن سەن ئۈچۈن تاش چىشلەي
سەن ئارامىڭ بۇزمىغىن.

گۇناھ نەدۇر؟ تۆكۈلگەن
يۈرەگى بار ئاناڭمەن.
سەندىن باشقا كىمگە ھەم
كېرەگى بار ئاناڭمەن؟

يالغۇزلۇق بۇ جانىمنى
يەنە ئوتقا ئاتتى يەي.
ياخشى يارىم دېگەنى
يامان كۈنگە ساتتى يەي.

ئاتاڭ ئۆزۈم مانا مەن
ئاناڭ ئۆزۈم مانا مەن.
سەن سەن ئۆزۈڭ رەيھانىم
سايەڭ ئۆزۈم مانا مەن.

نەقىرات:
گۇناھ نەدۇر؟ تۆكۈلگەن
يۈرەگى بار ئاناڭمەن.
سەندىن باشقا كىمگە ھەم
كېرەگى بار ئاناڭمەن؟

سۆيۈنگىنىم سەن بالام
ئىشەنگىنىم سەن بالام.
بۇنچە نازۇك بولمىساڭ
گۈلگە ئورايمۇ بالام؟

يىغا تولا، ئەلەم بار
ئېيتىپ بېرېيمۇ بالام؟
سۆيۈنگىنىم سەن بالام
ئىشەنگەنىم سەن بالام....

بىلسەڭ ئىدى...

ئىقبال مىرزا

كەل دېگەندە ناز قىلماستىن كەلسەڭ ئىدىڭ،

گۈل بەرگەندە قايرىلماستىن ئالساڭ ئىدىڭ،

ئۆزۈڭ قانداق ياخشىلىقىڭ بىلسەنۇ-،

سېنى قانداق سۆيۈشىمنى بىلسەڭ ئىدىڭ!

بۇ دۇنياغا ئېزىپ-تېزىپ بىر بار كېلىپ،

ناھات، ئۆتسەم ھېجرانلاردا باغرىم تىلىپ،

سەن يۈرەرسەن دەردىم بىلمەي، قەدرىڭبىلىپ-

سېنى قانداق سۆيۈشىمنى بىلسەڭ ئىدىڭ!

مۇزنى قانداق كۆيدۈرۈشنى بىلىسەن-ھە؟

سۆيمىگەننى سۆيدۈرۈشنى بىلىسەن-ھە؟

لەيلىلەردىن قالغان ئىشىقنى بىلىسەن-ھە؟

سېنى قانداق سۆيۈشىمنى بىلسەڭ ئىدىڭ!

چارە ئىستەپ بىچارىمەن، مەن چارىسىز،

خۇيۇڭ سەۋەپ ئىككىمىز ھەم ئاۋارىمىز.

ئىچى قارا قىز ئىكەنسەن! ئەي قارە قىز،

سېنى قانداق سۆيۈشىمنى بىلسەڭ ئىدىڭ!

يەتتە ئىقلىم سۇ، ھاۋانى بىلىسەنۇ،

بەش قىتئە، يەرشارىنى بىلىسەنۇ،

ماڭا قارا، ھەر بالانى بىلىسەنۇ،

سېنى قانداق سۆيۈشىمنى بىلسەڭ ئىدىڭ!

ئىزاھات: يۇقارقىلار ناخشا تېكىسىتى يازغۇچىلارغا ئۆرنەك ئۈچۈن بېرىلدى.

بۇ يازمىنى ئاخىرىدا   owchi تەھرىرلىگەن. ۋاقتى  2012-7-25 00:43  

دىلىمنى ئاغرىتتى دىلىمدىكىلەر

زۇلەيخا بايخانۇۋا دېكلىماتسىيەسى، ناخشىسى

دىلىمنى ئاغرىتتى دىلىمدىكىلەر،
كېچە ۋە كۈندۈزدە تىلىمدىكىلەر.
ئاپتابىم، شامالىم، سېلىمدىكىلەر،
مەن ئۇلارنى كەچۈرەي، بىر قۇدرەت بەرگىن،
ئاللاھىم مېھرىڭدىن بىر خىلۋەت بەرگىن.

زەھەرلەر كەلتۈردى شارابلەر تۇتتۇم،
غەيۋەتلەر كۆيدۈردى ئىتابلەر تۇتتۇم،
قەسەملەر ئىچتىلەر، ساۋاپلەر تۇتتۇم،
مەن ئۇلارنى كەچۈرەي، بىر قۇدرەت بەرگىن،
ئاللاھىم مېھرىڭدىن بىر خىلۋەت بەرگىن.

دەستۇرخان تۆرۈمدە شەربەت تاپتىلەر
ئۆرگۈلدۈم، ئارقامدىن غەيۋەت ئاتتىلەر،
ئىۋا، مېنى ئۇلار بۇنچە ئاسان ساتتىلەر،
مەن ئۇلارنى كەچۈرەي، بىر قۇدرەت بەرگىن،
ئاللاھىم مېھرىڭدىن بىر خىلۋەت بەرگىن.

دۈشمىنىم ئەيياردۇر، پەيتلەر پايلايدۇ،
دوستۇم بولسا نادان، سۇنى لايلايدۇ،
ئىككىسى بىر بولۇپ كۆزۈم پايلايدۇ،
مەن ئۇلارنى كەچۈرەي، بىر قۇدرەت بەرگىن،
ئاللاھىم مېھرىڭدىن بىر خىلۋەت بەرگىن.

جانىمغا جازادۇر جانىمدىكىلەر،
كۆزۈمنىڭ قاراغى، قانىمدىكىلەر،
ئېيۋاھ، بىگانىدۇر يانىمدىكىلەر،
مەن ئۇلارنى كەچۈرەي، بىر قۇدرەت بەرگىن،
ئاللاھىم مېھرىڭدىن بىر خىلۋەت بەرگىن.

ئەسلىدە،
ئەسىلدە دوسىت ھەم بىر ، دۈشمەننىڭ تۈرى،
دۈشمەننىڭ ئەڭ زورى دۈشمەننىڭ شىرى،
چۈنكى قولىدىدۇر كۆڭلۈڭنىڭ سىرى،
مەن ئۇلارنى كەچۈرەي، بىر قۇدرەت بەرگىن،
ئاللاھىم مېھرىڭدىن بىر خىلۋەت بەرگىن.

باشىمغا بالادۇر، بالادۇر كۆڭلۈم،
بىر سۆزنىڭ تىغىدىن يارادۇر كۆڭلۈم،
دوسىتۇھەم، دۈشمەندىن ئادادۇر كۆڭلۈم،
مەن ئۇلارنى كەچۈرەي، بىر قۇدرەت بەرگىن،
ئاللاھىم مېھرىڭدىن بىر خىلۋەت بەرگىن.

ئۆزۈڭدىن يوق ئۆزگە مەھرىمى جانىم،
ئۆزۈڭسەن سۇلتانىم، ئۆزۈڭ خاقانىم،
ئوتتا كۆيدۈرمىگىن ئىككى جاھانىم،
مەن ئۇلارنى كەچۈرەي، بىر قۇدرەت بەرگىن،
ئاللاھىم مېھرىڭدىن بىر خىلۋەت بەرگىن.

بۇ يازمىنى ئاخىرىدا   owchi تەھرىرلىگەن. ۋاقتى  2012-7-25 01:29  

ئالەم

ئەمەتجان قۇربان

                                   ئالەم...تىلسىماتلىق  ئالەم                                   ،
قوينۇڭ  خۇددى ھېكمەت دۇنياسى.
چۇشمىدى تېخى خېلۋەتلىرىڭگە،
ئاي ،قۇياشنىڭ يارقىن زىياسى.

شۇنچە گۈزەل بىر  ئوماق قىز سەن،
بىلىپ  قويغىن بارچە كۆز  سەندە.
يىشىلىدۇ  سەندىكى  تۈگۈن ،
بوش  چاغلىما  قۇدرەت  چوڭ  ئەلدە.

ئالەم...تىلسىماتلىق ئالەم،
ئىنسانلارغا  سىر  بولدۇڭ ھەردەم.
كۆرەڭلىمە،  بىر  كۈنى  چوقۇم،
بويسۇندۇرار سىنى...ئادەم.

نەقرات:                                                         
ئالەم..تىلسىماتلىق ئالەم.
بويسۇندۇرار سىنى  ئادەم.

بۇ يازمىنى ئاخىرىدا   ئەمەتجان قۇربان تەھرىرلىگەن. ۋاقتى  2012-7-27 12:51  

ئاتا
ئەركىن مۇھەممەت
مۇقەددەس تاغ ئىدىڭ مەن ئۈچۈن ئاتا ،
بىر بېھىش باغ ئىدىڭ مەن ئۈچۈن ئاتا .
جۇدۇنلار سوزالماس ئىدى قولىنى ،
يۈرەككە ياغ ئىدىڭ مەن ئۈچۈن ئاتا .

مېھرىڭدە مىڭ باھار ۋەسلى بار ئىدى ،
ھەر باسقان قەدىمىڭ بىر گۈلزار ئىدى .
سەن بولغاچ داسقانغا بەركەت يار ئىدى ،
سەن ئىدىڭ بارىمسەن بىر پۈتۈن ئاتا .

بالا دەپ بالالار بىلەن ئېلىشىپ ،
ئۆتتۈڭ نى قىسمەتلەر بىلەن چېلىشىپ .
باغلاردا كۈلمەستىن تېخى قېنىشىپ ،
زەپ سايە تاشلىدى قارا تۈن ، ئاتا .

ھەر باقسام كۆزۈڭگە ئاغرىيدۇ يۈرەك ،
چىمەنلەر ۋەسلىنى  قايرىپتۇ پەلەك .
ئەي تەقدىر ،چاقچىقىڭ يوقمىدى بۆلەك ،
پىغانىم ،ھەسرىتىم سەن بۈگۈن ئاتا .

پىغان
ئەجەپمۇ قاتىدۇ باشىم ،
يۈرەكتىن ئاقىدۇ ياشىم .
پەلەككە نىمە دەي ئەمدى ،
بېغىدىن كەتتى بەرداشىم .

ئاتامنى كەتمىسە دەيمەن ،
ئانامنى كەتمىسە دەيمەن .
چىمەنلەر ۋەسلىگە ،كەچكۈز
قولىنى يەتمىسە دەيمەن .

ئەزەلدىن كاج ئىكەن تەقدىر ،
ۋاپاسىز تاج ئىكەن تەقدىر .
جۇدالىق دەشتىدە سۇلتان ،
قارارسىز ئاچ ئىكەن تەقدىر .

ئاتامنىڭ بىر كۆزىدۇرمەن ،
ئانامنىڭ بىر كۆزىدۇرمەن .
بۈگۈن تەقدىر كوچاسىدا ،
بىتەلەينىڭ ئۆزىدۇرمەن .

كەلسىڭىز
ئاخشامدا ئايدىڭ مەلىڭىز ،
كىملەرگە رۇخسار بەردىڭىز ؟
گاھ ئۆچۈپ ، گاھ چوغ بولۇپ ،
قىينايدۇ جاننى دەردىڭىز .

ئاھ ئۇرۇپ ، ئاھلەر ئۇرۇپ ،
كۆزلەر خۇنۈك بولدى قۇرۇپ .
نە ئېتەي ، تاڭدەك يورۇپ ،
روھى زۇلالىم كەلسىڭىز .

زەپ ئۇزۇن يارنىڭ كوچاسى ،
يوقمۇ ئاشىقنىڭ خۇداسى ؟
كۈيلىرىم مەجنۇن نىداسى ،
جانۇ جاھانىم كەلسىڭىز .

ئېيتىمەن شېرىن زەبانىم ،
ۋەسلى قۇت ماھى تابانىم ،
يايرىغاي كۆڭۈل خۇمارىم ،
لەۋزى ھالالىم كەلسىڭىز .

بۇ يازمىنى ئاخىرىدا   مەشرەپ تەھرىرلىگەن. ۋاقتى  2012-9-14 17:48  

نورۇز مەشرىپى
ئەركىن مۇھەممەت


(قىسقا مەشرەپ)


سەھنە :مەلۇم بىر جاينىڭ كەڭرى پائالىيەت سەيناسى.مەيداننىڭ ئوتتۇرىسىغا گۈلخان يېقىلغان.يان تەرەپتە نورۇز ئېشى ئۈچۈن ئېسىلغان چوڭ داش قازان.
قاتناشقۇچىلار:يۇرت چوڭلىرى ،ئەر-ئايال،قېرى-ياش دېھقان كادىرلار، ھەم نورۇز ئېشى ئۈچۈن جىددى تەييارلىق قىلىۋاتقان ئەر-ئاياللار.ھەرخىل ئويۇنلارنى ئويناۋاتقان ئۇششاق بالىلار...
سورۇن ئەھلى ئەلنەغمىچى،سەنئەتكارلارنى چۆرىدەپ ئولتۇرىدۇ.يان تەرەپتىن مىرشاپ سەھنىگە چىقىپ كېلىدۇ ۋە نورۇز ئەھلىگە قاراپ،-ئەسسالامۇ ئەلەيكۇم نورۇز ئەھلى!نورۇز بايرىمىڭلارغا مۇبارەك بولسۇن،-دەيدۇ سالام قىلىپ.نورۇز ئەھلى گۈلدىراس ئالقىش،چاۋاكلار بىلەن تەنتەنە قىلىدۇ .مىرشاپ دەرھال يىگىت بېشىغا：
ئەسسالامۇ ئەلەيكۇم يىگىت بېشى،
قايناپ كەتتى داش قازاندا نورۇز ئېشى.
سەنئەتكارلار تەييارلىقنى ئەتتى تامام،
شۇڭا سىزدىن پەرمان كۈتۈپ قىلدىم سالام!-دەيدۇ ،يۇمۇرلۇق قىلىپ.
يىگىت بېشى:تەييارلىقلار پۈتكەن بولسا باشلاڭ بالام،-دەيدۇ جاۋابەن .
مىرشاپ:مانا مەشرەپ باشلاندى ئەھلى ئاۋام!-دەيدۇ يۇقۇرى ئاۋاز بىلەن.نورۇزلۇق سەنئەت رەسمى باشلىنىدۇ.
بىرىنچى ناخشا(مۇقەددىمە)

مۇبارەك، ئەي ئەزىز يۇرتۇم،بۈگۈن نورۇزغا،بايرامغا ،
سالام كۈي-نەغمىدە ھەرئان،بۈيۈك تارىمغا،سايرامغا .

ئەقىل ئەجرىدە كۆكلەتكەن قىلىپ ئاۋات بازارىنى ،
ئىلىمدە شۆھرىتى چەكسىز،چىۋەر ئوغلانغا،پالۋانغا .

بۈگۈن ئايەم،قەدەملەر قۇت، بىھۇش ئەيلەر ۋىسال جامى،
جۇلاسى جاندا مەشرەپنىڭ ،گويا ئوخشايدۇ گۈلخانغا .

ئىككىنچى ناخشا
مۇقەددىمە ئاساسىدا كوللىكتىپ شوخ ئۇسۇللۇق ناخشا باشلىنىدۇ.سەنئەتكار قىز-يىگىتلەر بىر-بىرىگە بېقىشىپ ئۇسۇلغا چۈشىدۇ.
چۆمدى يۇرت ھەم تاغ-دالا،كۆكلەم ساباسى پەيزىگە،
مەشرىپى،ئەلنەغمىسى،گۈلخان لاۋاسى پەيزىگە .

كۆكتە پەرۋاز ئەيلىگەن شۇڭقارلىرى باتۇر يۈرەك ،
زەپ ياراشقان قىزلىرى، ئەمگەك ناۋاسى پەيزىگە .

سال نەزەر بوستانىغا، ئاسمانىغا چىن سۆيگۈنىڭ ،
جانغا جان شەرمى-ھايا،ئەھدۇ-ۋاپاسى پەيزىگە ،

كۈلدى تارىم ۋادىسى، ئوغۇز خاقان ئەۋلادى ھەم ،
بۇ مىراس دۇردانىسى، سەنئەت ھاۋاسى پەيزىگە .

ئەل سۆيەر مەردانىلەر تاپقاي قەدىر بوستانىنى ،
ياڭرىتىپ ئوتلۇق مۇقام، مېھنەت ساماسى پەيزىگە .

ئۈچىنچى ناخشا
(لەپەر)
ناخشا ئاخىرلىشىپ،ئۇسۇلچىلار سەھنىدىن ئاستا چېكىنىدۇ. سەھنىدە مەيدىسى ئوچۇق،شاپ بۇرۇت بىر يىگىت پەيدا بولىدۇ.ۋە ئۆز-ئۆزىگە،-كەلدى،كەلدى .بۈگۈن يۈرىكىگە بىر ئوت ياقاي، بۇ جاناننىڭ.-دەيدۇ،ئالدىراپ. دەل شۇچاغدا،سەھنىنىڭ يان تەرىپىدىن بىر قىز چىقىپ كېلىدۇ.يىگىت كۆڭۈل ئىزھارنى باشلايدۇ .قىزمۇ بىر خىل ھەيرانلىق ئىلكىدە يىگىتنىڭ ناخشىسىغا قۇلاق سالىدۇ .

يىگىت :    دىكىلىڭە ئامرىقىم،دىكىلىڭە ،  
              لالە رەيھان غۇنچىسىدەك ئىگىلىڭە .
              تېڭىۋالاي يۈرىكىمنىڭ  بېغىشىغا ،
              يۆگىمەچتەك چىرمىشىڭە، يۆرگىلىڭە .


قىز:     نىمە دەيسىز ھوي يىگىت،نىمە دەيسىز ،
         گەپ قىلمىسام ئەدەپ بىلەن سۆزلىمەيسىز.
         مۇھەببەتلىك باغلىرىمدا يۈرەلمەيسىز ،
         ياخشىلىقچە ئارقىڭىزغا ئۆرىلىڭە .

يىگىت:    بېغىڭىزنى شورا ئەتتىم كاما قىلىپ ،
             تەلمۈرىمەن سىزدىن سۆيگۈ تاما قىلىپ،
             يۈرىۋەرمەي ئوتىڭىزنى لاۋا قىلىپ ،
             سەنەم سېلىپ بۇ يۈرەكتە چۆرگىلىڭە.

قىز:     كېپىنەكتەك خۇيىڭىزدىن ئۆرگىلەيمۇ ؟
         ئۈژمە كۆڭۈل بويىڭىزدىن چۆرگىلەيمۇ؟

يىگىت:    ئىشقىڭىزدا كۆيۈپ كۈلگە ئۆرىلەيمۇ ؟
            جان يەيدىغان چېچىڭىزغا يۆرگىلەيمۇ؟

   قىز:      پاك مۇھەببەت گۈل-غۇنچىنى قايرىمايدۇ ،
              شاختىن شاخقا قونۇپ قۇشتەك سايرىمايدۇ .
              كۆڭۈل دىگەن ئىشرەت بىلەن يايرىمايدۇ ،
              ئەقىدەمنى پايخان قىلىپ جۆيلىمىڭە !

قىز سەل خاپا بولغان قىياپەتتە يولىغا راۋان بولىدۇ .يىگىت گەپتە كەتكۈزۈپ قويغىنىغا يەنە تەن بەرمەي ،-ئەجەپ زۇۋاندار قىزكىنا،ماۋۇ!ئاستا-ئاستا قاملىشىپ قالامىزمىكىن دىسەم....-دەيدۇ دۇدۇقلاپ.ئۇ ئۆزىنى ئوڭشاپ بولغىچە،مىرشاپ ئىككى نەپەر پاششاپنى باشلاپ كىرىپ كېلىدۇ ۋە،-باغلا مۇنۇ مەشرەپ كۆرمىگەن بىئەدەپنى،-دەيدۇ پاششاپقا بۇيرۇق قىلىپ.ھەم يىگىت بېشىغا قاراپ،-ھۆرمەتلىك يىگىت بېشى!-دەيدۇ.
يىگىت بېشى:خوش نىمە گەپ، مىرشاپ؟!
مىرشاپ: مەشرىپىمىزگە شەيتان ئارلىشىپ،ئەھلى جامائەتنىڭ كۆڭلىنى غەش قىلدى.گۈزەل ئەخلاق پەزىلىتىمىزگە ھاقارەت،قىز چوكانلىرىمىزغا ھاياسىزلىق بىلەن پەش قىلدى.-دەيدۇ.
يىگىت بېشى:ئۇنداق بولسا،بۇ مەشرەپ كۆرمىگەن ھاياسىزغا تۇماقنى تەتۇر كەيدۈرۈپ،يۈزىگە يېڭى كالا تېزىكى بىلەن گىرىم قىلىپ،خەلقى ئالەم ئالدىدا سازايى قىلىش جازاسى بىرىلسۇن!
مىرشاپ:بەجا كەلتۈرۈلسۇن!-پەششاپلار دەرھال ئىشقا كىرىشىپ كېتىدۇ.يۈز-كۆزلىرىگە كالا تېزىكى سۈرتۈلگەن يىگىت سەھنىنى بىر – ئىككى ئايلاندۇرىلىدۇ.ئاخىرى ئىزاغا چىدىيالماي،- ھۆرمەتلىك جامائەت،يۇرت چوڭلىرى،يىگىت بېشى ھەربىرلىرىدىن گۇناھىمنى تىلەيمەن،-دەيدۇ يالۋۇرۇپ،تىزلىنىپ تۇرۇپ.
يىگىت بېشى ئەتىراپىدىكى يۇرت چوڭلىرى بىلەن ئازىراق باش قوشۇشىۋالغاندىن كېيىن،- ئۇنداق بولسا ،گۇناھىڭدىن كەچتۇق.لېكىن كېلەر يىلى مۇشۇ يەردە بۈگۈنكى مۇشۇ بارىلىق نورۇز ئەھلىگە ئۆز نامىڭدىن نورۇز چېيى تۇتۇپ،جامائەتنىڭ قاتارىدىن ئورۇن ئالىسەن.-دەيدۇ.
يىگىت:جېنىم بىلەن بەجا كەلتۈرىمەن،يىگىت بېشى.سالپى-ساياق ئىشلىرىمنى تاشلاپ،يېڭىچە تۇرمۇشۇمنى باشلاپ،گۇناھىمنى يۇيىمەن .ئەھلى جامائەتنىڭ كەڭ قورساقلىقىغا رەھمەت!-دەيدۇ.جامائەت رازىمەنلىك بىلەن باش لىڭشىتىشىدۇ.يىگىتنى سەھنىدىن ئېلىپ چىقىپ كېتىدۇ.
تۆتىنچى ناخشا
سەنئەتكارلار كوللىكتىپ ھالدا، جازالانغان يىگىتكەقارىتىپ،ھەم مەشرەپنىڭ خۇلاسىسى شەكلىدە تۆۋەندىكى ناخشىنى ئوقۇيدۇ .
ئەلگە زىيا مەشرەپ دىگەن ،
شەرمى ھايا مەشرەپ دىگەن .
ئاچچىق تاياق،تاتلىق چېيى ،
زەمزەم گويا مەشرەپ دىگەن .

   مەشرەپ بىلىم، مەشرەپ كىتاپ ،
  مەشرەپ مىراس، مەشرەپ خىتاپ.
مەشرەپ بىلەن كۈلسۇن ئالەم ،
پاكلاپ تۇرار مەشرەپ دىگەن .

ناخشىنىڭ ئاخىرلىشىشىغا ئەگىشىپ، پەردە ئاستا-ئاستا يېپىلىدۇ.

ئۆزھال ئەپەندىم سىزگە بىر تەكىلۋىم: مۈمكىن بولسا مۇنبەرگە يوللانغان تېكىسىتلەردىن بىر توپلام قىلىپ نەشىرگە تەييارلىغان بولسىڭىز

دىلداش مەنمۇ شۇنداق ئويلاۋاتىمەن . ئاۋال كىتاپ بولغىدەك توپلانسۇن .

ياخشى ئويلاپسىز قۇلۇمدىن كىلىشچە قوللايمەن سىزنى