(ئۆزھال) ناخشا تېكسىتلىرى ھەققىدە [ئۇلانما كۆچۈرۈش]

مېنى ئېلىپ كەت

ئاسمىنىڭدا ئاي بوپ ئەزىزىم ،
نۇر چاچقۇم بار سېنىڭ  كىچەڭگە.
مېنى ئېلىپ كەت!..
ئاق ئېتىڭغا مىندۈرۈپ بۈگۈن ،
يىراقتىكى  پىنھان كۈلبەڭگە.

ساھىللارنى كەزمىگىن يالغۇز،
ناخشىلارنى ئاڭلىما تەنھا.
ھەمراھ بولاي ناشتىدا ئۆزۈم،
مېنى ئېلىپ كەت!..
غېرىپلىقنى بىلدۈرمەي ساڭا.

نىسىپ بولسۇن قۇياشلىق سەھەر،
نىسىپ بولسۇن چاڭقاق چىڭقى چۈش.
ھېچنىمىگە قىلمىغىن پەرۋا
مېنى ئېلىپ كەت!...
توزۇپ كەتسۇن  سارغايغان كۈتۈش.

مېنى ئېلىپ كەت!...
شەھەر ئالغان جەڭچىگە ئوخشاش
غەلبە بىلەن كېلىپ باستۇرۇپ.
مېنى ئېلىپ كەت!...
قۇياش سۆيگەن ئۇپۇققا ئوخشاش
شۇ باغرىڭغا نۇردەك  چۆكتۈرۈپ.
كەل ئەزىزىم ....
مېنى ئېلىپ كەت

2008-يىلى3-ئاي

بىر تال يوپۇرماققا ئىسمىڭنى يازدىم

مەن ساڭا ئاسىيلىق قىلىشنى ئويلاپ،
ئالدىدىم ئۆزۈمنى مىڭ قېتىم ئەي يار.
ئەتتىر گۈل بەرگىنى تىتىپ ئولتۇرۇپ،
ھەم سېنى ئۆلتۈردۈم تەكرار ۋە تەكرار.

ئاپتاپلىق يوللاردا يۈردۈم نىشانسىز،
دەريادا بېلىققا تۆكۈپ بەردىم دەرت.
يامغۇرغا نىشانلاپ تۇتتۇم يۈرەكنى،
يامغۇردەك تۆكۈلۈپ كەتسۇن دەپ ھەسرەت.

بىر تال يوپۇرماققا ئىسمىڭنى يىزىپ،
دەرياغا تاشلىسام ئاقتى تاھىردەك.
سەن تاھىر بولۇشنى خىيال قىلمىغان،
بولمىغاچ سېنىڭدە تاھىردەك يۈرەك.

مەن ساڭا ئاسىيلىق قىلىشنى ئويلاپ،
ئۆزۈمنى مىڭ قېتىم ئۆلتۈردۈم ئەي يار.
يىپيىڭى كۈيلەرگە چالاي دەپ بارسام،
بارمىقىم تەگمەستە ئۈزۈلۈپتۇ تار.

كۈيلەرگە قارىدىم كۈينىڭ كۆزىدە،
تىلىدىم يامانلار ئامان بولسۇن دەپ.
يار دەردىڭ ياماننى توۋلايدۇ كاككۇك،
دۈشمەننىڭ ئاغزىدا يەنە كونا گەپ.

شال ئۆسكەن ئېتىزنىڭ قىرىدا تۇرسام،
يىڭناغۇچ تۇتقىنىڭ ئېسىمدىن كەچتى.
ئۈژمىدەك ئېرغىتسام خىياللىرىمنى،
بىلمىدىم ئېھ، كىملەر مۇراتقا يەتتى.

2009.7.26

كىم

چۆل تۈنىدەك تىمتاس قەلبىمگە
،تاڭ نۇرىدەك سېڭىپ كىرگەن كىم؟
ئاي نۇرىدەك رۇجەكلىرىمدىن،
شەپىسىزلا شۇڭغۇپ كىرگەن كىم؟
يۈرۈگۈمنى ئېلىپ قولىغا،
ئۆرۈپ- چۆرۈپ ئويناپ يۈرگەن كىم؟
خىيالىمنى توۋلاپ يېنىغا،
ئۇنىڭ بىلەن پەيزى سۈرگەن كىم؟
چۈشلىرىمگە كىرىپ تىۋىشسىز،
ئەقىدەمنى ئوۋلاپ يۈرگەن كىم؟
كۆل سۈيىدەك تىنىچ قەلبىمنى،
شوخ شامالدەك سىپاپ يۈرگەن كىم؟
سەبىي كۆزدەك سۈزۈك دىلىمنى،
ئىشقى بىلەن ئوۋلاپ يۈرگەن كىم؟
ئۇسسۇلغا سېپ توكۇرنى بۇند،
ا تىلسىز ناخشا توۋلاپ يۈرگەن كىم؟
ئوتقا چۈشكەن قىلدەك تولغۇنۇپ،
ئۆز-ئۆزىنى قىيناپ يۈرگەن كىم؟

2003-يىلى3-ئاي

قەشقەرلىق ئايال

چايدەك ئىسسىق كۆزۈڭگە قاراپ،
ئۇنتۇپ قالار ھەممىنى دۇنيا.
بويۇڭ ئۈچۈن قىلىشىپ ھەسەت،
تاراشلايدۇ ئۆزىنى قىيا.

شاخلىرىڭدا ياسايدۇ ئۇۋا،
ئورمىنىدىن قايتىشىپ قۇشلار.
ئېزىپ كەتتى يولىدىن چوقۇم،
سەن سەھەردە سۈپۈرگەن يوللار.

كىرپىكلىرىڭ ھەر سىلكىنگەندە،
ئاسمىنىدىن تۆكۈلەر يۇلتۇز.
چاچلىرىڭنى يايما دېڭىزدەك،
ھەسرەت چېكىپ ئۆلىدۇ قۇندۇز.

ھايا تولغان چېھرىڭگە قاراپ،
قېزىرىدۇ گۈللەر ئۆزىچە.
ھايات تولغان ئالقانلىرىڭدا،
كۈلەر تۇرمۇش... كۈلەر قەشقەرچە.

خۇلقۇڭ پەقەت ئۆزۈڭگىلا خاس،
تۇرقۇڭ پەقەت ئۆزۈڭگىلا خاس.
مۇزىيسەن بىر ساقلانغان تېرىك،
يۈرەكتىكى ئارمانغا ئوخشاش.

‹‹جان قورغان››دا جاندەك ئەزىزسەن،
‹‹ئەبرىشىمكار››دا ئەبرىشىم قېزسەن.
‹‹جانان كوچىسىدا›› جانانسەن يەكتا،
سەن ھىيىتگاھتا يۈتمىگەن ئىزسەن.

تۇمارىسسەن ئاتسىز...قېلىچسىز.
نۇزۇگۇمسەن كەلسە  نۆۋىتى.
رومالىڭدا ساقلىنار مەخپىي،
ئۇيغۇرغا خاس ئانا ھۆرمىتى.

بېر پىيالە چايسەن ھارغاندا،
بەرىكەتسەن مۇشۇ ماكانغا.
جەڭلەر قىلغان ئايالسەن ئۇلۇق،
سەن ئىككىنچى ۋەتەن ئىنسانغا.

سەن بىر مىللەتنىڭ غۇرۇرىدۇرسەن،
بىر ئەركەك قەۋمنىڭ ئانىسىدۇرسەن.
سەندىن چېقىپ ساڭىلا پاتقان،
قەشقەرلىق ئەرلەرنىڭ ئاسمىنىدۇرسەن.

2010يىلى-10ئاينىڭ 22-كۈنى

ئاي چىققاندا ئەسلەپ قالسىڭىز
مېنى بۇندا دەرتكە تاشلاپ كەتتىڭىز،
كەتتىڭىز، ئەغيارنى خۇشھال ئەتتىڭىز.
كۈلكىگە پىخسىق پەلەكنى كۈلدۈرۈپ ،
سۆيگۈنى ھىجراندا پايخان ئەتتىڭىز؟

كەتتىڭىز، بەلكىم مۇرادقا يەتتىڭىز،
بىمۇراتلىقنى ماڭا يار  ئەتتىڭىز.
كۈلۈشۈپ يۈرگەن بىلەن نە كۈلكە ئۇ،
يۈرەگىمنى ياش بىلەن لەيلەتتىڭىز.

كەتكىلى كەلگەنمىدۇق ھېچ بىلمىدىم،
سىز كېتىپ يا ئېچىلىپ بىر كۈلمىدىم.
كەتتى دەپ يار  بولمىدى تەڭ كەتكىلى،
بولمىد يا جان –جاھاندىن كەچكىلى.

كەتتىڭىز،كەتمەڭ جېنىم دەپ باقمىدىم،
ياد ئېتىپ قايتىپ كېلەر دەپ بىر كۈنى.
كۆزلىرىم يولدا نىھايەت،جانۇ -جان،
ئاي كۆرۈنگەندە كېلەر دەپ بىر كۈنى.

2011-يىلى1-ئاينىڭ 1- كۈنى

دۇنيا كۈلەر بالىلار كۈلسە

بالىلارغا بەخت يار بولسۇن،
قەلبى چوغدەك نۇرلاغا تولسۇن،
كۈلسۇن ئۇلار، تېلىقىپ كۈلسۇن،
دۇنيا كۈلەر بالىلار كۈلسە.

تاڭلىرىنى باسمىسۇن زۈلمەت،
يىراق بولسۇن بېشىدىن كۈلپەت،
قايغۇ ئاڭا بولمىسۇن ئۈلپەت،
دۇنيا كۈلەر بالىلار كۈلسە.

سۆيگۈ ئاقسۇن ئېرىقلىرىدىن،
گۈللەر ئۈنسۇن تېرىقلىرىدىن،
دىل ئۆرتىنەر سېرىقلىرىدىن،
دۇنيا كۈلەر بالىلار كۈلسە.

ئامان بولسۇن ئالدامچىلاردىن،
يىراق تۇرسۇن يالغانچىلاردىن،
بوپ قالمىسۇن ئاق نانچىلاردىن،
دۇنيا كۈلەر بالىلار كۈلسە.

سايە بولسۇن سۆيگۈ دەرىخى،
تايدەك چاپچىپ تۇرسۇن يۈرىكى،

چېچەك ئاچسۇن ئارزۇ-تىلىكى،
دۇنيا كۈلەر بالىلار كۈلسە.

ئەھمەد يۈسۈپ سەرداھى

ئاقسۇ كەلپىن ناھىيە چىلان يېزا مەركىزى مەكتەپ

18997665818

15609975818

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-6-29 00:42  

مانا ئېسىل دوردانىلەر تۈكۈلگىلى تۇرۇپتۇ .

كۈتىمەن جانان           

كۈتىمەن جانان كەتتىڭ يىراقلارغا ،  
سېغىنىش ئوتىڭنى ماڭا قالدۇرۇپ .  
سەن كېلەرسەنمۇ ، قاچان كېلەرسەن ؟
يۈرەرمەنمۇ ۋەسلىڭ ئۈچۈم ئاھ ئۇرۇپ .

كۈتىمەن جانان سەن كەتتىڭ يىراققا ،  
پىراقىڭدا كۆزۈمدىن ياشلار تۆكۈلدى .  
گاھى كۆكمۇ كۆزلىرىمدىن دەرت ئېلىپ ،
  يامغۇر بولۇپ ئازابلىق سىم _ سىم تۆكۈلدى .

كۈتىمەن جانان سەن كەتسەڭمۇ يىراق ،
ئوتۇڭنى قەلبىمدە قالدۇرۇپ كەتتىڭ .
شۇ نۇرلۇق كۆزۈڭنى ، گۈزەل چېھرىڭنى ،
دىلىمغا نەقىش كەبىي ئويۇپ كەتتىڭ .

كۈتمەن جانان ئاھ  ،كەلسەڭچۇ يېنىپ ،
تەشنا بوپ يولۇڭغا قارايمەن كۈندە .   
مەن سېنىڭ ئاشىقىڭ سۆيگەن ئەبەدى ،
مەن سېنى ساقلايمەن مەڭگۈ قەلبىمدە .

گۈل بەرگىدەك لېۋىڭگە سۆيسەم

گۈل بەرگىدەك لېۋىڭگە سۆيسەم ،
شىرىن تۈيغۇ تارار قەلبىمگە .   
سىرلار چاقناپ خۇما كۆزۈڭدىن ،
قېتىلغايسەن مەڭگۈ چۈشۈمگە .  

گۈل بەرگىدەك لېۋىڭگە سۆيسەم ،
ئېرىپ كېتەر تەنلىرىم شامچە .  
سۆيگەنسىرى يەنە كۆزۈڭگە ،   
مۇھاببىتىم ئاشىدۇ شۇنچە .     

گۈل بەرگىدەك لېۋىڭگە سۆيسەم ،
ئۇيقۇم تۈگىمەس كۈندۈز _ كېچە .
چۈشلىرىم ئۆتەر زەنجىرسىمان ،   
چۈشۈمدىمۇ سۆيدۈم قانغۇچە .     

گۈل بەرگىدەك لېۋىڭگە سۆيسەم ،
ئىشەنگىنسەن ئاشىقلىغىمغا .     
ۋاپادارلىق ئەھدىمنى بىرەي ،   
جۈر بولالامسەن قىزغىنلىقىمغا ؟

شاماللار

ئۇچقۇر شامال ئۇچۇپ كەلگىن قېشىمغا ،
قانداق خەۋەر ئېلىپ كەلدىڭ يارىمدىن ؟
شىپا بولغىن بۇندا كۆيگەن يۈرەككە ،   
سېغىنىپمۇ سوراپ كەلگىن ئايىمدىن .     

سېغىندىم جاناننى ئۇچقۇر شاماللار ،   
ئېلىپ بارغىن مەندىن مۇنۇ سۆزلەرنى :
« يارنى سېغىنىپ بولدۇم مەن سەۋدايى ،
كەلمىسىمۇ بەرسۇن شىرىن سۆزلەرنى »   

ئۇزىتاي سېنى : خوش، ئۇچقۇر شاماللار !
يار جامالىنى ھەم سىپاپ ئۆتۈڭلار .   
كېلەلمەي قالسىمۇ يارىمنىڭ ئۆزى ،   
خۇشپۇراقلىرىنى ئالغاچ كېلىڭلار .

ئىزلە

سەن ئۇچقان شامال بولساڭ ،
مېنى تاغلاردىن ئىزلە .      
سەن ئوتلۇق سۆيگۈ بولساڭ ،
مېنى قەلبىڭدىن ئىزلە .     

سەن كەۋسەر يامغۇر بولساڭ ،
مېنى چۆللەردىن ئىزلە .   
ناخشىچى بۇلبۇل بولساڭ ،
مېنى بوستاندىن ئىزلە .   

سەن قارا زامان بولساڭ ،
مېنى چاقماقتىن ئىزلە .  
سەن چىلىشقۇچى بولساڭ ،
مېنى جەڭگاھتىن ئىزلە .

خەيرلىشىش

كېتىمەن بىركۈنى مەنمۇ قېشىڭدىن ،  
ھېچكىشى قالمايدۇ-كېتىدۇ ھەممە .  
شامالغا ئوقۇپ بەر مۇڭلۇق ناخشاڭنى ،
بۇ دىلىم قۇرىغان ئەمدى غەم يېمە .   

ناخشاڭنىڭ ئەكسىنى قايتۇرسا تاغلار ،
بورانلار يىراققا ئېلىپ قاچىدۇ .        
ئۈمىدسىز ھەسرەتلەر قېتىلىپ شۇدەم ،  
ناخشاڭدىن كاككۇكلار ئۈركۈپ قاچىدۇ .

تۇرساڭمۇ كۆكلەرگە يىگانە بېقىپ ،   
يۇلتۇزلار پىچىرلىشىپ قىسمايدۇ كۆز .  
سايرىماس قۇشلارمۇ مۇڭلىنىپ ھەتتا ،
ئەسلىمەڭ بولغۇسى شۇنچىلىك ئەزىز .  

تۆكۈلۈپ ياشلىرىڭ قۇملارغا سىڭسە ،   
گۈل تىرىپ ئۆستۈرگىن ئاشۇ يېشىڭدىن .
چۈشلىرىڭدە پۇرايسەن پۇراقىنى ،      
توزۇغان بەرگىلەر ئۇچسا ئېسىڭدىن  .  

ئورماندىن چىققاندا كىيىك بالىسى ،  
دوست  بولۇپ قارىغىن ئۇنىڭ كۆزىگە .
لېۋىڭدە سۈرتكىنسەن ئۇنىڭ يېشىنى ،   
ھېكايە سۆزلەپ بەر ئۇنىڭ ئۆزىگە .     

ئوقۇپ بەر ناخشاڭنى غەمكىن ئاۋازدا ،  
ئاڭلىسۇن قۇشلار ھەم ئاڭلىسۇن ئورمان .
بەك گۈزەل ئارزۇلار بولغاندا بەربات ،   
يۈرەكتە قالىدۇ ھەسرەتلىك ئارمان .

كۆرۇشىمىز قايسى بىر كۈنى      

خەير خوش دەپ بىز خوشلاشقان چاغلار  ،
كۆز ئالدىمدىن كەتمەيدۇ ھەر ۋاق .     
لىغىلدايتتى كۆزلىرىڭدە ياش  ،         
سۆيگەن قىزىم دىلدارىم ئوماق .         

ھەسرەت بىلەن ئايرىلدۇق شۇنداق ،     
كاج تەلەيلىك بوپ قالغاچقا بىز .      
بولساقمۇ بىز سەرسان _ سەرگەندان ،      
بىر- بىرىمىزنى ئۇنتۇمايمىز  .            

تىلىمەيمىز تەقدىردىن شەپقەت ،         
بىزنى دەسلەپ ئايرىغان ئۆزى .         
ئۈمىدلىنىپ تۇرىمىز مەڭگۇ ،            
كۆرۇشىمىز قايسى بىر كۈنى .
   
ئاق يول تىلەش     

خەير خوش! ئامان بول سەن بېرىپ يىراققا ،
قانىتىڭ سۇنمىسۇن سوقۇپ بورانلار .        
قورۇقما _ باتۇر بول مۈشكۈل سەپەردە    ،
ئاق يول تىلەيمىز ساڭا دوست _ يارانلار .   

دوستۇڭ ، قىرىنداشلار كۈتىمىز سېنى ،      
سالامەت قايتىپ كەل ياقا يۇرتلاردىن .                       
  ئېسىڭدىن چىقمىسۇن ئېيىتقان ناخشىمىز ،                     
رىشتىمىزنى بىلىسەن ناخشىلاردىن.            

ھەر چامداپ ماڭغاندا قىلغىن ئىھتىيات ،   
ياخشىلىق قىلغىنسەن ھەر بىر كىشىگە  .     
دۈشمىنىڭ ئازايسۇن دوستۇڭ كۆپىيىپ ،      
كۆپ گۈزەل ئىز قالدۇر يۇرتلار بېتىگە .      

سەن قايتساڭ ئىچىمىز ئۈزۈم ھارىغى ،      
ساق _ سالامەت كەلسەڭ سېنى تەبرىكلەپ .
ھەممىمىز جەم بولىمىز شۇ كۈن خۇشال ،   
ھازىر ئۇزاتتۇق سېنى ئاق يول تىلەپ .

   
ئاڭلارغا ئاھ ،سەن يوق            

ئوقۇدۇم ناخشامنى ياڭراق ۋە جۇشقۇن ،   
ئاڭلارغا ئاھ ،سەن يوق قالدىم يىگانە .  
ئۇرۇلار ياپراققا غەمسىز ، بىئامال،         
   ئورمانلار ، يۇلتۇزلار ھەممە بىگانە .         

ئىزغىرىن كۈز پەسلى تۆكۈلدى غازاڭ ،      
ناخشامنى ئاڭلايدۇ قاخشال دەرەخلەر .      
   پەسەيدى بىر ئۈنسىز  دەرت بىلەن شۇ دەم ،   
    ناخشامنى ئاڭلار كىم ؟... چۇلغار ئەلەملەر .

ئەتىر گۈل   

تۇرار بۇندا زىلال سۇلار ئوت _ چۆپلەر ،
تۇرارسەنمۇ ئۇندا يەككە يىگانە .        
غەرب تامان سوققان شاماللار يىغلايدۇ ،  
ۋەسلىڭ ئۈچۇن بولدۇم يەنە سەرسانە .  
ياپرىقىڭنى سۆيگەن چاغنى ئەسلىسەم ،  
قەلبىم تولار دەرت _ ئەلەمگە پىنھانە .   
كېتىپ قالدىڭ ئەمدى تامام خازان بوپ ،
بولدى چۈشۈم ، بولدى تۇيغۇم ۋەيرانە .  
تەرك ئەتتىم شاتلىقىمنى ھەم بەختىمنى ،
تەرك ئېتەيمەن سەنسىز جىمى ھەممىنى .  
سەن بولمىساڭ مەنىسىزدۇر بۇدۇنيا ،      
تاشلاپ ئۆتەي ئەمدى تامام ئېسىمنى .   
تۇرار ئۇندا كۆيۈۋاتقان بىر قۇياش ،      
گۈزەل جىلۋەڭ ،شولاڭ ھەمدە ئەسلىمە .  
بىر تال بەرگەڭ ئۇچتى ئاخشام شامالدا ،
بارمىقىمغا تېگىپ ئۆتتى ھەم يەنە .
   
مېنىڭسىز شاتلىقىڭ بولسۇن دېمەيمەن

دېمەيمەن مەن سېنى بولغىن بەختىيار ،
باشقىلار بىلەنلا يۈرسەڭ شاد _ خورام .
مەن ئۇنداق بىچارە ئاقكۆڭۈل ئەمەس ،
يۈرىكىم پەقەتلا تاپمايدۇ ئارام .      

ئۆزگىلەر سۆيگەندە سېنى باغاشلاپ ،   
تىكىلسە چېھرىڭگە مەغرۇر ، شادىمان .
تىترەيمەن يانار تاغ بولۇشنى ئىزدەپ ،
ئەسەبىي يۇگرەيمەن كۆيۈپ ھەر تامان .

سۆيمىگەچ مەن سېنى ئۆزگىلەر ئۈچۈن ،
مېنىڭسىز شادلىقىڭ بولسۇن دېمەيمەن .
چېچىڭنى باشقىلار قىلمىسۇن ياستۇق ،  
مېنىڭسىز ئۆزگىنى راۋا كۆرمەيمەن .   

  ئويلاپ قال سەن مېنى مەيلى ھەسەتخور ،
چىدىماس ۋە ياكى ئىچى تار كۈچۈك .  
قار لەيلىسى بىلەر سوغۇقنى ، قىشنى ،  
باغرىغا ئۇرۇلغاچ دەھشەتلىك ئۈششۇك .   

مەن دېمەيمەن شۇ سەۋەپ بولغىن بەختلىك ،
سۆيگەچكە مەن سېنى ئۆزۈم ئۈچۈنلا .        
بولمىسا پەقەتلا ئازاب يۇتىمەن ،            
قىلماستىم سۆيمىگەن بولسام ئۇنچىلا .

تىلغا ئالما ئۆزگىلەرنى ئالدىمدا   

ئۆزگىلەر ھەققىدە سۆزلىسەڭ رەت _ رەت ،
يوقالغان ئويلايمەن ئۆزۈمنى پەقەت .   
ئۇنتۇلغان چۈشلەرگە ئوخشايمەن شۇئان ،
قەلبىمنى قاپلايدۇ گۇگۇمرەڭ ھەسرەت .  

ئويلايتتىم ئۆزۈمنى سېنىڭ ئويلىرىڭ ،   
سۆيگۈچۈن گۈل تېرىپ ماڭغان يوللىرىڭ .
ئۆزگىلەر ھەققىدە سۈرمەيدۇ خىيال ،   
بىر مېنى ئىزدەيدۇ سېنىڭ قوللىرىڭ .   

ئككىمىز بەزىدە بىرگە تۇرغاندا ،      
ئۆزگىلەر ئىسمىنى تىلغا ئالىسەن .     
غەرەزسىز ھالىتىڭ ئەكىس ئەتسىمۇ ،  
بۇ ئاشىق قەلبىمگە دەرتلەر سالىسەن .  

ئۆزۈمنى بەزلەيمەن شۇ چاغ سۈكۈتتە ،
شۇندىمۇ ياش قاپلار نۇرلۇق كۆزۈمنى .
«تەمكىن بول!» دېسەممۇ قەلبىمنى شۇ پەيت ،
ئازابلىق جىلۋىلەر چۇلغار يۈزۈمنى .      

چىدىماي قالىمەن قىلساممۇ بۇيرۇق ،  
دىلىمنى ئۆرتىگەچ ھەسرەتلىك تۇترۇق .
ئايلىنىپ قالارمەن بەلكىم تەلۋىگە ،   
بىلسەڭدىڭ سەن ماڭا چاچىسەن يورۇق .

شۇلارنى ئۇنتۇما گۈزىلىم پەقەت ،      
ئىككىمىز يۈرىكى ئويناپ تۇرغاندا .     
ئۆزگىلەر ئىسمىنى تىلغا ئالمىغىن ،      
جۇپ كۆزۇم كۆزۈڭگە تەشنا باققاندا .

ھەسرەت كۈيى         

كەلمەسكە كېتىپتۇ ئۆتكەنكى شۇ كۈز ،
ئاڭلانماس بوپ قاپتۇ ئۆتكەنكى ناخشا .
كۆرۈنمەس ئۆتكەنكى سېھىرلىك كۈلكەڭ ،
قارىشىڭ ئوخشىماس-ئۆتكەندىن باشقا .

ئېچىلغان گۈللەرمۇ ئۆتكەنكى ئەمەس ،  
سايرىماس بوپ قاپتۇ ئۆتكەنكى تورغاي .
پۇرىغان پۇراقلار ئۆتكەنكى ئەمەس ،     
ئۆتكەنكى نۇرلارنى چاچماس تولۇن ئاي .

مەن شۇمۇ بىلمەيمەن ئۆتكەنكى ئادەم ،
سەن شۇمۇ ئۆتكەنكى نازىنىن گۈزەل .
كۆرگىنىم ئەمەسكەن ئۆتكەنكى ھايات ،
ھېچ نەرسە قالماپتۇ ئۆتكەندىن تۈگەل .

تۇغۇلدۇق بىز نېمىشقا         

تۇغۇلدۇم دۇنياغا سەنمۇ تۇغۇلدۇڭ ،         
مەن بولغاچ دۇنيادا تۇغۇلدۇڭ شۇڭا .      
« نېمىشقا كەلدىڭ » دەپ سورىما مەندىن ،
بىلىپ قال : تەقدىر جۇپ بولمىقىم ساڭا !   

مەن كەلمەس بولغاندا دۇنياغا ئەگەر ،
سېنىڭمۇ كېلىشىڭ مۇمكىن ئەمەستى .
ئەسلىدە سەن مېنىڭ بىر تال قوۋۇرغام ،
بەك گۈزەل ھاياتنىڭ تەقدىر قىسمىتى .

ئىككىمىز بىر بولساق دۇنيا گۈزەلدۇر  ،
بولمىسا ئىككىمىز تۇغۇلماس ئىدۇق .   
ئىشەنگىن ئىككىمىز كۆيۈشىمىز ،        
چۈشەنسەڭ سەن بۇنى يىغلىماس ئىدۇق .

ئوخشايسەن ئەي قىزچاق يارىمغا بىر ئاز         

ئوخشايسەن ئەي قىزچاق يارىمغا بىر ئاز ،      
كۆزلىرىڭ ، لەۋلىرىڭ ، بوستان چاچلىرىڭ .   
مېڭىشىڭ بەئەينى _ باشقىچە ئەمەس ،      
ئوخشايدۇ قارىشىڭ ، كۈلكە ، نازلىرىڭ .     

بىر دېمە قوللىرىڭ تېخى ئۆزىكەن ،           
ئالغان قەدىمىڭ باشقىچە ئەمەس .           
شۇ ئىكەن دەپتىمەن كەينىڭدىن قاراپ ،      
ئاۋازىڭ ياڭرىسابولۇپ مەست-ئەلەس.        

ئۇنتۇيمەن ھەممىنى سېنى كۆرگەندە ،        
مەن سېنى ئاشىقىم ھېس قىلدىم قىزچاق .     
تەمتىرەپ قالىمەن ئۇچراتسام سېنى ،                          
ھەسرىتىم _ قارىماي ئۆتىسەن بىراق .                     

ئوخشىماس يېرىڭمۇ بار ئىكەن مانا  ،         
كۆزۈمگە قارايتتى گۈزىلىم مېنىڭ .              
قارىماي ئۆتىسەن دائىم ئالدىمدىن ،            
سۆيگۈمنى تونىماس يۈرىكىڭ ، جېنىڭ .         

تىلىگىم شۇ جانان ئالدىمدىن ئۆتسەڭ ،        
توختىغىن بىر پەس قاراپ قوي كۆزۈمگە .      
شۇ چاغدا سەنمۇ ھەم مېنى تونۇيسەن ،      
ئىشەن ئەمدى سەن ، ئىشەن سۆزۈمگە .      

ئوخشايدۇ كۆزلىرىڭ ، لالە لەۋلىرىڭ ،         
سېنى كۆرسەملا قىزىيدۇ قېنىم .               
بىلسەڭچۇ سەن ئۈچۈن توختىدىم بۇندا ،         
شۇ سۆزنى ئېيتىپلا ئوخشىغىن جېنىم !  

يالغۇزلۇق            

ئۆتۈپ كەتتى شامال ئاۋازى ،         
تۆكۈلدى ھەم چېچەكلەر بىردىن .      
گۈگۈمدىكى يالغۇز بىر چىراغ ،        
نۇر چاچار غەمكىن دېرىزىدىن .        

ئىشىك ئالدى چىغىر يول بىلەن ،      
ماڭماقتا ئۇ دەسسەلدى گىياھ .         
يالقۇن كۆيەر شۇنداق جىمجىتلا ،      
زۇلمەت ئارا سىڭەر نۇر _ زىيا .         

ئاي نۇرىدا تەۋرەر كۆلەڭگە ،         
قۇشلار كەتكەن يوقتۇر ھېچ سادا .     
نىگاھ سىرغىپ چەكسىز تۈنلەرگە ،      
يوقاپ كېتەر تىترىگى ئارا .            

ئۇچراپ يولدا يېقىلغان دەرەخ ،         
پۇتلىشىپ ئاھ ، تىتىردى زېمىن .      
ئەتراپ جىمجىت ، يۇلتۇزلار خىرە ،      
بولدى كۆڭلى تاپقاندەك ئەمىن .

مۇھەببەت بىر پىچاق         

مۇھەببەت بىر پىچاق ئۆزىمىز سالغان ،   
ئىلاج يوق سالماسقا جىمغۇر يۈرەككە .   
سالىمىز ، توختىماي ھەر چاغ سالىمىز ،   
شۇ پىچاق يەتكۈچە ئاخىرقى چەككە .     

سانچىلغان مۇھەببەت تىكەن _ مىخ بولۇپ ،
يۇلماققا نە ئىلاج يۈرىكىم تۇرسا .         
قىينىلار ۋۇجۇدۇم ئېغىر ئازابتىن ،         
سانچىلغان پىچاقلار دىرىلدەپ تۇرسا .      

ئازابلار ۋە ياكى شاتلىق بولسىمۇ ،         
سانچىمىز پىچاقنى ئەبەدىل ئەبەت .        
مۇھەببەت ئاھ شۇنداق بىر ئالتۇن پىچاق ،  
تەشنا بىز ئۇنىڭغا مەڭگۈگە پەقەت .         

قارىساق ئاخىرى پۈتمەس جاراھەت ،        
بويىغان ئۆمۈرنى قىپقىزىل قانغا .           
مۇھەببەت بىر پىچاق بولسىمۇ ئاخىر ،      
يەتكەندەك بولىمىز گۈزەل ئارمانغا .
   ناخشا تېكىستى قىلىدىغانغا مۇۋاپىق كېلەمدۇ-يوق،كۆرۈپ باقارسىز.

كۆڭلۈم

ئىشىق سەۋداسىدىن چايدەك پۇرۇقلاپ قاينىغان كۆڭلۈم،
ھىجىرنىڭ زارىنى بال دەپ تۇلۇقلاپ چاينىغان كۆڭلۈم.

جۇنۇنلۇق قىسمىتى زاھىر قاراقلار تەكتىگە چۆكسەم،
مۇشەققەت تاڭلىرى ئۆزرە بۇقۇلداپ سايرىغان كۆڭلۈم.

كۆيۈكنىڭ ۋەجىدىن كۈن-تۈن نىگار دەپ كىرپىكىن قاقماي،
پىچاق سالغاندا يار قەھرى لوقۇلداپ ئاغرىغان كۆڭلۈم.

سۈرۈپ كۆزگە نۇرىنى ھەم چۆلى دەشتلەردە مەشرەپنىڭ،
بۇ يەڭلىغ رەنجى كۈلپەتنى ئۇلۇغلاپ يايرىغان كۆڭلۈم.

يۇتالماي قەترە مەي چەرخىڭ ئۇرۇپ چاققاندا جامىڭنى،
پىراقتىن ئۆرتىنىپ ئاچچىق لاۋۇلداپ ئاينىغان كۆڭلۈم.

جېنىنى قاقشىتىپ ئاندىن يۈرەكنى ئۆتكۈزۈپ زىخقا،
كۆزىن ياشلاپ بۇ ئەھمەدنى ئاۋايلاپ داغلىغان كۆڭلۈم.

2011.8.18

قالدى

تەرك ئەتتىڭ بۇ دۇنيانى بېغىڭدا تاللىرىڭ قالدى،
ياقا يىرتىپ ھازا ئاچقان كۆزى ياش باللىرىڭ قالدى.

چېچىڭدا چۇقچىلاپ چوغنى، يىراققا قوغلىغان سوغنى،
سويۇپ ئۈلگۈرمىگەن ئەپسۇس تونۇردا نانلىرىڭ قالدى.

توخۇ-كەپتەرلىرىڭ دانسىز ئىزىڭنى ئاختۇرار غەمكىن،
سۆزۈڭنى ئەسلىتىپ ھەربىر قولۇڭدا دانلىرىڭ قالدى.

ھىدىڭنى سېغىنىپ ھەر تاڭ بوسۇغاڭنى تاۋاپ ئەتسەم،
ئۆزۈڭ يوق ئۈشبۇ سەينادا، سۈپۈرگەن قارلىرىڭ قالدى.

خىيال ئىچرە كۆيۈپ چىقتىم جېنىڭ كۆيگەن ئوچاقلاردا،
قولۇڭ بىرلە سوزۇپ سالغان چىنەمدە تارلىرىڭ قالدى.

پۇراپ قانماي ئانا بەلكى باھار كۈلگەن قۇچاغىڭنى،
قارا قىشتىن ئامان چىققان بېنەمدە① يازلىرىڭ قالدى.

①بېنەم-يېڭى ئاچقان يەر
2011.9.3

بارمۇ

باغلىغىلى چېچىدا، چاچ يۇلغۇدەك يار بارمۇ؟
قېچىپ چىقتىم ئىچىمدىن ئېسىلغۇدەك دار بارمۇ؟

مۇقام ياتار يېنىمدا، مەشرەپ ئۆلمەس جېنىمدا،
ئەجەم ئاقار قېنىمدا، توختاتقۇدەك زار بارمۇ؟

ساتارىمغا تار نەدە؟ تار ئېشەرگە جان نەدە؟
چالسام يارنىڭ تېنىنى سايراتقۇدەك تار بارمۇ؟

چۆللەر چىقتى ئالدىمغا، ئاھىم يەتمەي يارىمغا،
داغى-ھىجران بارىمغا بويلاشقۇدەك ئار بارمۇ؟

خۇرجۇنىدا قىسمەتنىڭ قۇياش تېخى مەست-ئەلەس،
يار چىقمايدۇ ئايدىڭغا ئۆگزىسىدە قار بارمۇ؟

2012.4.5

يوق دەڭلار

مېنى سورار كىشىم بولسا،كۆڭۈل ئىزھاردا يوق دەڭلار،
ياتار جايىم كۆيۈك تاغدۇر، گۈلى-گۈلزاردا يوق دەڭلار.

گۆرۈستان جىملىقى قەلبىم، يەنە يەكتا قەلەندەر مەن،
كۇلاھۇ-جەندىگە رازى، تاۋا، زۇنناردا يوق دەڭلار.

ناۋا ئەيلەپ دۇتار-تەمبۇر، ساتار جانلارنى خۇن قىلسا،
يۈرەكتە ناخشىسى ئۆلگەن، دىلى كۈيزاردا يوق دەڭلار.

پەلەك چەرخىگە ئىمكانسىز، تىكەن پاتقاندا دات سالماي،
ئۆزىگە چىن پۈتۈپ كەلدى، ھىلە –سەرۋازدا يوق دەڭلار.

ئىشىق ھارۋىسىن ھەيدەپ، كېزىپ دەشتۇ-باياۋاننى،
ياتار ئاپتاپقا تەن قاقلاپ، ئېگىز پەرۋازدا يوق دەڭلار.

لەھەتكە ئىختيار ئەتتى، يېقىپ مەڭزىن خەستە تۇپراققا،
ئۇنى قەبرىدە ئوت ئەمما كۈللى غەم-زاردا يوق دەڭلار.


2011.1.20

رەنجىدىم

ئەي پەلەك قەھرىڭگە دات! قايغانلىرىڭدىن رەنجىدىم،
قان ئارا جان سايرىغان ۋايجانلىرىڭدىن رەنجىدىم.

نە چىمەن ياتسام تېنىمگە پاتسا تاش، ئاز دەپ ئۇنى
بۇ ئەزىز باشىمنى سوققان بازغانلىرىڭدىن رەنجىدىم.

ئىتلىرىڭ چىققاندا قوغلاپ، قاچسام بەدەر جاننى ئېلىپ،
يول توسۇپ ياتقان يەنە تايغانلىرىڭدىن رەنجىدىم.

سۈيى يوق ئېرىقلىرىڭدىن زورلاپ بېلىق تۇتقازغىلى،
ئەقلى كورنىڭ شەھرى ئارا چالغانلىرىڭدىن رەنجىدىم.

باغرىمنى خۇن ئەيلەپ قەدەمدە شۇنچە ئۇز سەرۋازلىرىڭ،
تەندە جان ئۆچمەيلا گۆر قازغانلىرىڭدىن رەنجىدىم.

ۋادەرىخ! بارچە گۇناھ سەن بىلەن تولغان تۇرۇپ،
بۇ پەقىر دەپتىرىگە يازغانلىرىڭدىن رەنجىدىم.

2009.7.28

ئاشناجان

سۇدەك سۈزۈك خىياللىرىمدا،
چېچەكلەيسەن ئالما گۈلىدەك.
ئىشىكىڭدىن ئۆتۈپ بولغۇچە،
كۆيۈپ-كۆيۈپ كۈل بولدى يۈرەك.

چىقار بولساڭ تۈن كېچىدە چىق،
توقۇپ قويدۇم ئاق بوز ئېتىمنى.
قامچا قىلىپ چېچىڭنى، ئاندىن
ئېلىپ قاچاي جىممىدە سېنى.

سۈكۈتۈڭگە جان بەردى ناخشام،
قېيدىشىڭدىن باغرىم لەختە قان.
سېنى دىدىم، چىدىيالمىدىم،
ئوتى يامان جېنىم ئاشناجان...!

2009.7.3

ئەھمەد يۈسۈپ سەرداھى

ئاقسۇ كەلپىن ناھىيە چىلان يېزا مەركىزى مەكتەپ

18997665818

15609975818

بۇ يازمىنى ئاخىرىدا   سەرداھى تەھرىرلىگەن. ۋاقتى  2012-6-29 00:42  

ئەسەرلىرىڭلارنى يوللىغاندا ئالاقىلىشىشى ئادىرىسىڭلارنى يوللاپ قويساڭلار ، تېكىسىتلەرنى ئىشلىتىشكە تاللاشتا ئالاقىلىشىش ئادىرىسى بولمىسا بولمايدۇ . ئايقۇت ھەدەمنىڭ › ئەركەك ‹، سەرداھى ئاكىمىزنىڭ › دۇنيا كۈلەر بالىلار كۈلسە ‹ قاتارلىق تېكىسىتلىرىنى مەشرەپ پىروگىراممىسى ۋە بالىلار مەشرىپى پىروگىراممىسىدىكىلەرگە بىرىپ قويدۇم . ئىشلىتىپ قالسا ،سىلەر بىلەن ئالاقىلىشىمىز . خەۋەردار بولغايسىلەر ....

ئېسىل گەپ . ئالاقە نۇمۇرى بولماي قالسا بىز ئىشلىتىپ قالساق خەۋەر قىلىش قىين بۇلىدىكەن . توردىكى خەنجەر ئېسىملىك تورداش ئۈزىنى مەلۇم قىلغاي .

رەھمەت ، كېرەك بولۇپ قالسا چچ دا دەپ بېرەيلى، ئەمدى يوللاپ بوپتىمىز. بۇ يازمىنى ئاخىرىدا   ئايقۇت تەھرىرلىگەن. ۋاقتى  2012-6-28 21:33  

بۇلىدۇ . ئەزىزى قىرىنداشلارنىڭ ياخشى ئەسەرلىرى بولسا ئايىماي داستىخانغا تاشلېىشىنى ئۈمىت قىلىمەن . ئەجىر يەردە قالمايدۇ .  

ئەلۋىدا سۆيگۈ

سىنڭ تويوڭ بولدى بۈگۈن ماڭا ماتەم
ئاق كۆينىگىڭ سۇيگىمىزگە بولدى كىپەن
سىخى بەخىت باغرىنى كەڭ ئاچتى ساڭا
ئەبەدىلىك دەرىتكە ۋەتەن بولدى بۈ تەن

ناغرا-سۈناي ئاۋازلىرى كۆككە يەتتى
بەربات بولغان مۇھەببتىم تەبىركلەپ
مەن كوچاڭدىن دىۋانىدەك نەچچە ئۆتتۈم
سىنىڭ يىڭى ھاياتىڭغا بەخىت تىلەپ

يۈرىگىمگە سىغمىدى دەرىت تۈكۈلدى ياش
تەقدىر سىنى ئىلىپ كەتكەچ مەندىن بۈلاپ
قىيامەتنىڭ قىياپىتى ئايان بۈلۈپ
سۈندى غۈرۈر ئۆلگەن روھقا ئۈنسىز غۈلاپ

پەلەك سىنى كۆرمىگەچكە ساڭا راۋا
يارغا مۈھتاج باغرىم ھىجران بىلەن تولدى
سۆيگۈ ئۆلگەن بۈ دۈنيادا قانداق ياشاي
ئۈمۈد كۈتۈپ يۈرگەن گۈلۈم خازان بولدى

ساۋاغداشلىق مھىرى

قالغىنى ئىللىق ياتاق سىنىپلار
بىز بىلەن كەتكىنى بىر قۇچاق ئازاپ
چەكسىز ئاسماندىكى بىر توپ بۇلۇتتەك
كەلگەن شۇ تۇپىراققا كىتەرمىز ئۇزاپ

سۇكۇتكە باش ئىگىپ خوشلاشماقتىمىز
ئۆكسۇيدۇ يۇرەكلەر ئىغىر قەدەملەر
تار كەبى ئۇزۇلگەن قەلىپ رىشتمىز
بوپ قالار كەلگۇسى بىزگە ئەسلىمە

يامغۇردەك كۇكسمىزگە تامچىلايدۇ ياش
ئايىرىلىش ئەزمەكتە دىلنى قاماللاپ
كەتسەكمۇ ھەممىز باشقا جايلارغا
سىغىنىش روھىمىزنى تۇرىدۇ ئوراپ


خەيىر خوش مۇئەللىم خەيىر خوش دوسلار
بىزگە ئەقىل بەرگەن مۇقەددەس ماكان
خەيىر خوش چىملىقلار خەيىر خوش دوسلار
يەنە بىر كۇرۇشكىچە بۇلايلى ئامان