[ھىلال]ھىجران [ئۇلانما كۆچۈرۈش]

ھىجران

سەن يۈرگەن باغلارنى كەزدىم يىگانە،
سەن ماڭغان يوللاردا ماڭدىم خىيالچان.
ھىدىڭنى سورىدىم ئەركە شامالدىن،
ۋەسلىڭگە تە قەززا بولۇپ ئېھ،جانان!

شاماللار ھەسرەتنى كېلىدۇ ئېلىپ.
چوغسىمان يۈرەككە ئۇرۇپ مىڭ خەنجەر.
شاۋقۇنسىز دۇنياغا بولىمەن مەھكۇم،
ھىجراننىڭ پەردىسى يېيىلسە ئەگەر.

تاڭ سەھەر بەرگىڭگە قونسا سوغ شەبنەم،
ئۇ بەلكىم كۆزۈمدىن سىرغىغان تامچە.
ئازابىڭ ئاھ، گويا بولدى سىرتماق،دار،
بىلمەيمەن بۇ دارغا ئېسىلدىم قانچە...

2- مىسرانى مۇشۇنداق ئۆزگەر تىپ باقتىم.


ھەتتا شاماللارمۇ پۇرايدۇ ھەسرەت،
دەرتلىك قەلبىم  تۇرىدۇ بۇقۇلداپ.
تاملار كېلىدۇ قورشاپ  بېتىنىم،
ھېجراننىڭ  بورىنى تۇرار ھۇۋۇلداپ.

بىلمەيمەن بۇ دارغا ئىسىلدىم قانچە ،
ئويلايمەن جىنىمنى جىنىڭغا قويۇپ ،
كىرپىكلەر بەرگىدە يالتىرار شەبنەم ،
يىغلايدۇ بۇ يۈرەك ھەسرەتنى تۇيۇپ ..


شاماللار كەچمىشى سۆزلەر ھەممىنى ،
ياپراقلار كۈيۈڭگە ئوقۇيدۇ ئەپسۇن ،
شاھىدى بوپ قالسۇن سۈزۈك ھىسلارنىڭ ،
ھىدلىرىم ھىدىڭغا بولغاندەك مەپتۇن ...



ۋە لىكىن يىشىمنى سۈرۈتمۈدۈم نىگار ،
تۈنلەردىن يىراقلاپ كەتمەكتە ئاھىم ،
سۇئالغا بوغۇلۇپ يۈرەرمەن ئاخىر ،
بىلمەيمەن سۈيۈشلا ئىكەن  گۇناھىم ..


ئۇزۇن بوپتىكەن سۈزۈك مىسرالىرىڭىزنى كۆرمىگىلى جور بولغۇم كەلدى
بۇ يازمىنى ئاخىرىدا   سىرىنگۈل تەھرىرلىگەن. ۋاقتى  2012-4-19 00:55  

نەچچە رەت ئوقۇدۇم.قات- قېتىدىن  ھېجىران تۆكۈلۈپ تۇرىدىكەن.قوللىرىڭىز ھارمىغاي.

ھىجراننىڭ كەينىدىن ۋىسالنىمۇ يېزىپ قۇيلى مانداق .
ياقتۇردۇم . داۋاملىق يوللاپ تۇرۇڭ !

ئاينۇرى،سىزنى بۇ يەردە ئۇچراتقىنىمدىن خۇشال بولدۇم.شېئىرلىرىمىزدا ئۇچرىشايلى...
پىنھانە،ھىجراننىڭ كەينىدىكى ۋىسالنىڭ پىنھان شەپىسىنى يازماي قويمايمەن.ياقتۇرغىنىڭىزغا رەخمەت،ئەزىزىم!

يىغلىدىم، يېشىمنى سۈرۈتمىدىم جېنىم،
سۈرتكىدەك ھەم يەنە ياغلىقىممۇ يوق.
كۆز ياشتا يۇيۇنۇپ،بوزلىسام تۈندە،
چىقارغا ئالدىمغا غەمخانەممۇ يوق.

كۆزلىرىم تىكىلگەن شۇ ئۇزاق يولغا،
كۈتمىدىم تەلمۈرۈپ ھېچكىمنى بىراق.
تەنھالىق سىن ئالغان روھىمدا بەلكىم،
شېخىدىن ئۈزۈلۈپ ئۇچماقتا ياپراق...
















بۇ يازمىنى ئاخىرىدا   ھىلال تەھرىرلىگەن. ۋاقتى  2012-4-19 23:41  

سىرىنگۈل،يانداشما شېئىرىڭىزدىن شۈنچىلىك سۆيۈندۈم،دوستۇم!سىز ئۈچۈن تەۋرەتكەن يۇقارقى قەلىمىمنى قوبۇل قىلىڭ!

ياخشى يېزىلغان يەنە بىر پارچە شېئىرىڭىزدىن ھوزۇرلانغىنىمدىن خۇشالمەن.
داۋاملىق ھوزۇرلاندۇرۇپ تۇرغايسىز.قەلىمىڭىزگە دەرد كەلمىسۇن.

لىرىكا ياخشى چىقىپتۇ.يەنە تۇيغۇ خاسلىقىمۇ ئىپادىلىنىپتۇ.كۆڭللەرنى بەھىرگە چۈمۈلدۈرگۈدەك .ئارام بەخش چاغلاردا مۇزىكا ياكى ناخشا ئاڭلاش دىلنى ھوزۇرلاندۇرىدۇ. يېقىملىق لىرىك شئېىرنى ئوقۇشمۇ شۇنداق تەسىراتقا چۈمدۈرىدۇ.بۇمۇ شئېىرنىڭ سېھرى كۈچىدۇر.ئاپتورنىڭ يەرتېگىدىن ئېتىلىپ چىققان بۇلاقتەك مۇشۇ خىل سۈزۈك شئېىرلارنى روياپقا چىقىرىشىغا تىلەكداشمەن.

كونا مۇنبەردىكى ئەسەرلىرىمنى ساقلىۋىلىش ئويى بىلەن، ئىنكاس شەكلىدە يوللاپ قويۇشنى لايىق تاپتىم.


چېقىلغان كۆڭۈل



ئىزغىرىن شامالدەك كېلىدۇ ھۇۋلاپ.

ھىجراننىڭ تۇنجۇققان پىنھان شەپىسى.

ئۇزىغان باھارنىڭ ئاچچىق يېشىدا،

كۆرۈنەر ھاياتنىڭ ئەسلى مەنىسى.



بىر دېڭىز ئازابقا ئايلاندىم بەلكىم،

ئۇرۇلدۇم ئۇندىكى تاشلارغا پىنھان.

بىچارە ئاۋازدا يېيىلار ئاستا،

قەلبىمگە ئۆكۈنۈش،جۇدالىق،پىغان.



كۆڭۈلنىڭ چېقىلغان خىلۋەتلىرىدە،

ئەلەملەر مەڭگۈگە قالسۇن سىر بولۇپ.

جۇدالىق بېتىگە يازاي ئىسمىڭنى،

قانىغان روھىمنى تىتىپ ئولتۇرۇپ.



بىلمىدىم...






بىلمىدىم قاچاندا ئۇچراتتىم سېنى،

باش باھار ياكى گۈل تۆكەندە ياپراق؟

گاھ باھار گۈلىدەك كىرسەڭ چۈشۈمگە،

گاھ كەچكۈز تۈنىدەك قىينايدۇ پىراق.



بىلمىدىم مېھرىڭگە زار قىلدىڭ قاچان،

كۆيەرمەن بىر چوغدەك ئارمان ئىلكىدە.

چايقىلىپ ئۆتمەكتە ئالدىمدىن شۇ تاپ،

غېرىبلىق روھىمغا سېلىپ ۋەھىمە.



قاچاندا ھەسرەتكە يار قىلدىڭ مېنى،

ساناقسىز سۇئالغا كۆمۈلدى قەدەم.

ئاھ،ئاچچىق سۇئاللار تۇرسىمۇ بوغۇپ،

سۆيىمەن  نە ئۈچۈن مەن سېنى ئەركەم؟...












بۇ يازمىنى ئاخىرىدا   ھىلال تەھرىرلىگەن. ۋاقتى  2012-5-4 01:55  

تۈن تىۋىشلىرى


1



بەخت ئۇ ئېھتىمال تەسەۋۋۇرۇمدا،

كۆزلەردىن سىرغىغان ئاچچىق كۆز يېشى.

ۋە ياكى گاھ ئۆچۈپ،گاھى پارلىغان،

سۈپ-سۈزۈك تاڭدىكى چولپاننىڭ ئۆزى.

تۈگەركەن ئاخىرى كۈلكە ۋە شادلىق،

بىر سىرلىق گۈل كەبى خازان بوپ قۇرۇپ.

تۈگەركەن ۋە يەنە قايغۇ،كۆز يېشى،

يۈرەكنى لەختە قان،زۇلمەككە قويۇپ.

يوقىلار خىياللار سىڭىپ زۇلمەتكە،

يوقۇلار خۇش ھىدى باھارنىڭ ئاخىر.

شۇندىمۇ شىرىن چۈش،شىرىن ئەسلىمە،

ياشلانغان كۆزۈمدە بولماقتا زاھىر.

2

ئەمدى نە ھاجىتى ساڭا سۆيگۈمنىڭ،

تۇرغاندا بىر گۈزەل يارنى قۇچاقلاپ.

ئازابلىق سەكراتقا چۈشتۈق ئېھتىمال،

ئاقماقتا كۆز يېشىم مەڭزىمنى بويلاپ.

كىشنىگەن ئاھلىرىم سىڭدى ئۇپۇققا،

باغرىمدا سەن ئۈچۈن چېچەكلىدى قان.

ھەسرەتكە چىلىشىپ تۇرغان يۈرەكتىن،

كەلمەكتە جۇدالىق،سېغىنىش،پىغان.

سېنى دەپ دوزاخقا كىردىم نەچچە رەت،

ئۆرۈلگەن چېچىمنى قىلىپ دار،سىرتماق.

چېچىمدەك سىرغىغان روھىمنى تۇتۇپ،

مەن يەنە كۆزۈڭگە تامچىدىم بېراق.

3

يۇلتۇزلار چاقنىغان جىمجىت كېچىدە،

گەر كىرسەم چۈشۈڭگە كەتمە ئويغۇنۇپ.

ئۇرۇلاي شامالدەك يۈزۈڭگە لەرزان،

قەلبىڭدە ئەڭ شىرىن تۇيغۇ ئويغۇتۇپ.

تۇمانلار ئىچىدە تەنھا غۇنچىدەك،

ئېسىڭگە چۈشىمەن رېئاللىقىڭدا.

چۈشۈڭدە قۇچاقلاپ،ئاستا پىچىرلاپ،

قالىمەن ئېھتىمال سېنىڭ يېنىڭدا.

سەن سۇنغان بەختكە قونالمىدىم بىر،

ئاھ،مۇڭلۇق كۆزۈڭدىن سىرغىغان نۇر بوپ.

تۈنجى رەت ئۆزۈمنى كۆردۈم بەك خىرە،

قانىغان روھىمنى تۇتۇپ ئولتۇرۇپ...

4

بىر تامچە زەھەرنى يۇتۇپ ئولتۇرۇپ،

يېزىلدىم ئازابنىڭ قان رەڭ بېتىگە.

قىرىق تال چېچىمدەك كۆرۈندى دۇنيا،

قارا تون كىيگەندەك گويا ئۈستىگە.

سەن كەتتىڭ،مەن كەتتىم ھەممە بەرىبىر،

ئاخىرقى نەتىجە ئىكەن ئايرىلىش.

مەن ئاسىي بولدۇممۇ ۋە ياكى ئۆزۈڭ؟

كۆچتىمۇ قەلبتىن سۆيگۈ،ئىشىنىش؟

سۇئالغا بوغۇلۇپ يۈرمەيلى ئەمدى،

ياشلانغان كۆزلەردە تىكىلىپ ئاستا.

ئاخشامقى لەۋ يېقىپ بەرگەن ۋەدىلەر،

ئاھ،ئەمدى تارىخ بوپ قېپ قالسۇن ئارتتا...

قىرىق تال چېچمدەك يېيىلماقتا تۈن






ھەر تىنىق،نەپسىمگە قالدى چىرمىشىپ،

يۈرەكنىڭ تەكتىدە كۆكلىگەن يارا.

ئەڭ ئېغىر ئازابنى قۇچاقلاپ تۇرۇپ،

قاقلاندىم سەن ماڭا قالدۇرغان ئوتقا.



قىرىق تال چېچىمدەك يېيىلماقتا تۈن،

يۇلتۇزلار يوقالدى تامام تۆكۈلۈپ.

ئاھ، سېنى بەك ئۇزۇن قىلدىممەن خىيال،

كېچەمنىڭ كۆزىدە يالغۇز ئولتۇرۇپ.



تەسەللىي بەرمەكنى قىلغاندەك نىيەت،

شاماللار يۈزۈمگە ئۇرۇلار لەرزان.

ئاھلىرىم سۆزلەرگە ئايلانسا شۇ تاپ،

ۋەزنىدىن زۇۋانغا كېلەرمۇ جاھان؟!...

قويالمىدىم ياستۇقۇڭغا گۈل






شىرىن چۈشۈڭ يىغقاندا ئېتەك،

قويالمىدىم ياستۇقىڭغا گۈل.

سېنىڭ ئۈچۈن يۇيۇپ تاڭلارنى،

تۆكۈلمەكتە يامغۇر بوپ كۆڭۈل.



بارلىقىڭغا بولۇپ خېرىدار،

سالالمىدىم بوينىڭغا گىرە.

پەقەت يادلاپ ئىسمىڭنى جېنىم،

ياش ئاققۇزدۇم  ئۈنسىز، جىممىدە.



كۆز ئالدىمدا ئۇچقۇر خىيالىم،

شۇڭغۇماقتا نىگاھىڭ ئۆزرە.

لېۋىمدىكى تاتلىق بىر سۆيۈش،

قېتىپ قالدى تاڭنىڭ بەرقىدە.



قويالمىدىم ياستۇقىڭغا گۈل،

بىر تال گۈلگە ئوراپ يۈرەكنى.

ئوتقا تاشلاپ ئۆتتۈم ئىھتىمال،

بارچە ئارمان،ئىستەكلىرىمنى...