[ھىلال]ھىجران [ئۇلانما كۆچۈرۈش]

سۆيگۈ تىۋىشى

1


ئارىمىزدا مەۋھۇم بوشلۇقتا،
لەيلەپ يۈرەر تەنھا كەچمىشلەر.
بىز كېسىشمەس تۈز سىزىق تۇرۇپ،
ئوخشاپ قالدى بىز كۆرگەن چۈشلەر؟
ھاياتىمىز ئۆتىدۇ شۇنداق،
قۇياش چىقسا ئاي مۆككەن سىياق.
ئۆز قوينىغا ئالىدۇ بەلكىم،
پاك سۆيگۈمنى بۇ قارا تۇپراق.
شۇ چاغ ئۈنۈپ نەمخۇش قەبرىدىن،
سېنىڭ ئۈچۈن ئېيتىمەن قوشاق.

2

يېتەلمەستۇر قۇشلارمۇ ئۇچۇپ،
بۇلۇت ئارا لەيلەر سىمايىڭ.
سېنى ئويلاپ ياتقان تۈنلىرىم،
بولغانمىدۇ يۇلتۇز ھەمراھىڭ؟
يالغۇزلۇققا كۆنۈكمەن،كۆنۈك،
جىمجىتلىقنىڭ بارلىقى ئۆزۈڭ.
ئۇنتۇشنىمۇ قىلمايمەن نىيەت،
نەقىش تۇرسا يۈرەكتە سۆزۈڭ.



بۇ يازمىنى ئاخىرىدا   ھىلال تەھرىرلىگەن. ۋاقتى  2012-5-4 10:53  

سۆيگۇ  ئۇچۇن  تەۋرېگەن  قەلەملەر  توختىمېسۇن!!!!!!!!!!!!

يېڭى يازمىلىرىڭىزنى كۆرمىگىلى خېلى بوپتىكەن.كۆرۈپ خۇشال بولدۇم.لېرىك ھىسلىرىڭىزغا جىمجىتلىق يار بولماي ،يېزىلىش نىسىپ بولسۇن بۇ يازمىنى ئاخىرىدا   ئايزىت تەھرىرلىگەن. ۋاقتى  2012-5-5 05:12  

ئايزىت،دائىملا ئىلھام گۈللىرىڭىزنى سۇنۇپ كېلىۋاتىسىز ماڭا.سىزنىڭمۇ شېئىرلىرىڭىزنى كۆرۈپ تۇرساق بولاتتى.

مەن سېغىندىم سېنى شۇقەدەر


مەن سېغىندىم سېنى شۇ قەدەر،
سېغىنغاندەك چۆللەر يامغۇرنى.
تىۋىشىڭغا سالىمەن قۇلاق،
ھىجرانلىرىڭ ئۆرتەپ قەلبىمنى.

مەن سېغىندىم سېنى شۇقەدەر،
خىياللىرىم كۆيەر سەن تامان.
تىنىقىمدا كۆيدۈرۈپ تۈننى،
پىچىرلىدىم ئىسمىڭنى جانان.

مەن سېغىندىم سېنى شۇقەدەر،
چاچلىرىمنى ئاستا تاراپ قوي.
سىڭىپ كىرىپ جىسمىمغا پۈتۈن،
لەۋلىرىمگە سۆيگۈ ئوراپ قوي.

لىرىكىلار

1


سېغىنغىنىم سېنى ئەزىزىم،
چۈشلىرىڭگە بولدىمۇ ئايان؟
سېغىنىشىم قىيناپ بۇ ئاخشام،
يۈرىكىمدە كۆتۈرگەن ئىسيان.

پىچىرلىدىم شامالدەك يەڭگىل،
سۆيۈۋالدىم نۇر بوپ لىۋىڭگە.
چۈشۈڭگىلا كىرىپ ئىھتىمال،
قېنىپ كەلدىم سېنىڭ ۋەسلىڭگە...


2


گۈل بەرگىگە ئورىدى شۇ تاپ،
مىسراسىڭىز نازۇك تېنىمنى.
قايىللىقنى قىلىپسىز سىياھ،
نۇرلار بىلەن بېزەپ بېتىمنى.

نۇر تارايدۇ ساداقىتىمدىن،
نۇر ئىچىدە كۆيەر لىرىكا.
شېئىر ماڭا نوتىسى تولۇق،
يېزىلغان بىر گۈزەل مۇزىكا.

3

ئاڭلىيالامسەن،ئۇچماقتا بىر ئوت،
ئوت ئىچىدە كۆيمەكتە يۈرەك.
تەنلىرىم تىترەر بۇندا بىتىنىم،
قەلبىمدە يېلىنجار غۇۋا بىر تىلەك.

ئاڭلىيالىدىڭ،پىچىرلاشلىرىمنى،
تۈن نىسپىدە رۈجەكتىن ماراپ.
ئېسىپ قويدى يىپىغا مېنى،
چېچەكلىگەن تاتلىق بىر ئازاب.

ئازابقا ياندىشىپ يىغلىدىم بىر رەت




چىرمىشىپ ئۆزۈمگە ئۈنسىز،ئۈمۈدسىز،
ئازابقا ياندىشىپ يىغلىدىم بىر رەت.
روھىمنىڭ چېقىلغان ئەينەكلىرىدە،
چايقىلار ئەسلىمەم ئارا بىر سۈرەت.

كۆيۈكنىڭ دەردىنى تونىسام سەندە،
بىر ئېغىر ئازابتىن ياساپ بەردىڭ دار.
پارچىلاپ تاشلانغان جىسمىم ئۈستىگە،
ھەسرەتكە چىلىشىپ ياغدى ئاپئاق قار.

تاۋۇتقا تىرىكلا  كىردىم بىمەھەل،
چاقىردىم ئۆلۈمنىڭ ئىسمىنى ئاتاپ.
بىر تامچە زەھەرنى تۇرساڭمۇ سۇنۇپ،
كىردىممەن تۇپراققا ئىسمىڭنى يادلاپ.




بولالمىدىم بۈگۈن يېنىڭدا




ئۇيقۇم قاچتى كېچىدىن خويمۇ،
ئۇخلاي دېسەم ئۇيقۇ يوق زىنھار..
يەنە شۇ كۆز،يەنە شۇ ئاۋاز،
چايقىلىدۇ باغرىمدا نىگار.


دەرىزەمدىن تۆكۈلدى شولا،
ماڭا مەڭگۈ بولماققا سىرداش.
كېچە ئۆتسە يەنە بىر سەھەر،
كېلەر تالاي كۈنلەرگە ئوخشاش.


ئولتۇرىمەن ھوجرامدا يالغۇز،
بوران ئۇچار رۈجەك غىچىرلاپ.
بولالمىدىم بۈگۈن يېنىڭدا،
قۇلىغىڭغا تاتلىق پىچىرلاپ.


يۈرىكىڭنى تىڭشاپ جىمغىنا،
قۇچىقىڭدا ياتسام-ھە جانان؟
گويا چۈشتەك ئۇنتۇلسا بىر پەس،
قەلبلەردىن جۇدالىق،پىغان.


ئۇپۇق لىۋى قىزىرىپ چوغدەك،
ئارتار ماڭا ھىجراندىن لىچەك.
بۈگۈن كېچە ئاتمىسىكەن تاڭ،
سىڭسەم سېنىڭ باغرىڭغا نۇردەك.


بولالمىدىم بۈگۈن يېنىڭدا،
ئاق سەبدەردەك جىلۋىلىك بېقىپ.
شۇ تاپ ئوتتەك تەلۋە سېغىنىش،
تەنلىرىمگە كىرمەكتە ئېقىپ...

                                                                   يۈرەكتىن تامچە



مەن سېنى بىردەممۇ نېرى قىلماي ھەمىشە ئۆزۈم بىلەن بىللە ئېلىپ يۈرۈيمەن،پىكىر-خىيالىم،ھەركىتىم سەن بىلەن
باشلىنىدۇ.سەن مېنىڭ يۈرەك باغرىمنى ماكان ئەيلەپ،ئۇنىڭدىكى خىلمۇ-خىل پىكىر ئىستەكلەرنى تىنىمسىز قوغلاپ
يۈرۈيسەن.يۇمران ھېس-تۇيغۇلىرىمنى غىدىقلاپ،تومۇرلىرىمدىكى قانلىرىمنى ئۆركەشلىتىسەن.بۇنىڭ بىلەن ئىختىيارسىز
ھەر-بىر تىنىقلىرىمدىن سېنىڭ ئىسمىڭ ساما ئۆزرە قانات قاقىدۇ.مەن شۇ قاناتلىرىڭغا مىنگىشىۋالىمەن-دە،ئۆزۈمگىلا
خاس گۈزەل خىيالىي دۇنياغا غەرق بولىمەن.شۇ يەردىلا مەن سېنىڭ قۇدرەتلىك،سەلتەنەتلىك ئورداڭنىڭ خانىشى بولالايمەن...
شۇ يەردىلا قايغۇ ياكى شادلىق ئاراچلىرىدىن دەخلىسىز شۇڭغۇپ،ۋىسالنىمۇ،ھېجراننىمۇ يۈكسەكلىككە كۆتۈرەلەيمەن...

                                                                    ئىرىش



مەن سېنى بىردەممۇ نېرى قىلماي ھەمىشە ئۆزۈم بىلەن بىللە ئېلىپ يۈرۈيمەن،پىكىر-خىيالىم،ھەركىتىم سەن بىلەن
باشلىنىدۇ.سەن مېنىڭ يۈرەك باغرىمنى ماكان ئەيلەپ،ئۇنىڭدىكى خىلمۇ-خىل پىكىر ئىستەكلەرنى تىنىمسىز قوغلاپ
يۈرۈيسەن.يۇمران ھېس-تۇيغۇلىرىمنى غىدىقلاپ،تومۇرلىرىمدىكى قانلىرىمنى ئۆركەشلىتىسەن.بۇنىڭ بىلەن ئىختىيارسىز
ھەر-بىر تىنىقلىرىمدىن سېنىڭ ئىسمىڭ ساما ئۆزرە قانات قاقىدۇ.مەن شۇ قاناتلىرىڭغا مىنگىشىۋالىمەن-دە،ئۆزۈمگىلا
خاس گۈزەل خىيالىي دۇنياغا غەرق بولىمەن.شۇ يەردىلا مەن سېنىڭ قۇدرەتلىك،سەلتەنەتلىك ئورداڭنىڭ خانىشى بولالايمەن...
شۇ يەردىلا قايغۇ ياكى شادلىق ئاراچلىرىدىن دەخلىسىز شۇڭغۇپ،ۋىسالنىمۇ،ھېجراننىمۇ يۈكسەكلىككە كۆتۈرەلەيمەن...

                                                                 ئۇياتچان  خىياللار



                                                                             ﻧﻪﺳﯩﺮ



ﺋﯘﻳﺎﺗﭽﺎﻥ ﺧﯩﻴﺎﻟﯩﺮﯨﻤﻨﯩﯔ ﺋﺎﺭﺍﭼﻠﯩﺮﯨﺪﯨﻦ ﻧﯩﮕﺎﮬﯩﯖﻐﺎ ﻧﻪﺯﻩﺭ ﺗﺎﺷﻠﯩﻐﺎﻥ ﭼﯧﻐﯩﻤﺪﺍ،ﻗﯩﺰﺍﺭﻏﺎﻥ ﮬﯧﺴﻠﯩﺮﯨﻢ ﺗﺎﺗﻠﯩﻖ ﺳﯧﻐﯩﻨﯩﺶ ﻗﻮﻳﻨﯩﺪﺍ
ﺋﯚﺯﯨﻨﯩﯔ ﻣﻪﯕﮕﯜﻟﯜﻙ ﻣﯘﮬﻪﺑﺒﻪﺕ ﻧﺎﺧﺸﯩﺴﯩﻨﻰ ﺋﯧﻴﺘﯩﭗ، ﺳﺎﻣﺎ ﺋﯚﺯﺭﻩ ﺑﯘﻟﯘﺗﻼﺭﻏﺎ ﻗﻮﺷﯘﻟﯘﭖ ﻛﯧﺘﯩﺪﯗ.ﺑﯘﻟﯘﺗﻼﺭﻏﺎ ﻗﻮﺷﯘﻟﯘﭖ ﻛﻪﺗﻜﻪﻥ
ﺋﯩﻨﺘﯩﺰﺍﺭﻟﯩﻖ ﮬﯧﺴﻠﯩﺮﯨﻤﺪﺍ ﺟﯘﻻﻟﯩﻨﯩﭗ ﺗﯘﺭﻏﯩﻨﻰ ﺳﯧﻨﯩﯔ ﺳﯘﺭﯨﺘﯩﯔ...
ﺳﯜﺯﯛﻙ ﺗﻪﺑﻪﺳﺴﯘﻣﻠﯩﺮﯨﻤﺪﺍ ﭼﺎﻗﻨﯩﻐﯩﻨﯩﻤﯘ ﺳﯧﻨﯩﯔ ﺳﯜﺭﯨﺘﯩﯔ.ﺋﺎﺭﯨﻤﯩﺰﺩﺍ ﭼﯧﭽﯩﻠﯩﭗ ﻳﺎﺗﻘﺎﻥ ﮬﯩﺠﺮﺍﻥ،ﺋﺎﺭﯨﻤﯩﺰﺩﺍ ﺗﯩﯖﯩﺮﻗﺎﭖ ﺗﯘﺭﻏﺎﻥ
ﺭﯦﺌﺎﻟﻠﯩﻖ ﻳﯜﺭﯨﻜﯩﻤﻨﻰ ﺭﻩﮬﯩﻤﺴﯩﺰﻟﻪﺭﭼﻪ ﺗﯩﻠﻐﺎﭖ،ﺋﺎﺯﺍﺏ ﻗﻪﺩﻩﮬﻠﯩﺮﯨﺪﻩ ﻟﯩﻘﻘﯩﺪﻩ ﺗﻮﻟﺪﯗﺭﯗﭖ ﺷﺎﺭﺍﭖ ﺗﯘﺗﻘﺎﻥ ﭼﺎﻏﻼﺭﺩﯨﻤﯘ ﻛﯚﺯ ﺋﺎﻟﺪﯨﻤﺪﺍ
ﻳﻪﻧﯩﻼ ﺳﯧﻨﯩﯔ ﺳﯜﺭﯨﺘﯩﯔ......

ﻣﻪﻥ ﮬﺎﻳﺎﺗﻨﯩﯔ ﺋﺎﭼﭽﺎﻕ ﭼﯜﭼﯜﻛﻠﯩﺮﯨﻨﻰ ﺷﺎﺩﻟﯩﻖ ﺑﯩﻠﻪﻥ ﺗﯧﺘﯩﭗ ﭼﯩﻘﻤﺎﻗﭽﻰ ﺑﻮﻟﯩﻤﻪﻥ،ﭼﯜﻧﻜﻰ ﺳﻪﻥ ﺑﻮﻟﻐﺎﭼﻘﯩﻼ ﮬﺎﻳﺎﺗﯩﻤﻨﯩﯔ
ﻗﺎﻳﻐﯘ-ﺷﺎﺩﻟﯩﻘﻠﯩﺮﻯ ﺋﯚﺯ ﻣﻪﻧﺎﺳﯩﻨﻰ ﺗﺎﭘﻘﺎﻥ....ﺑﯩﻠﻪﻣﺴﻪﻥ،ﺋﺎﻣﺮﯨﻘﯩﻢ؟!ﺷﺎﻣﺎﻟﻼﺭﻧﯩﯔ ﺋﯜﻧﺴﯩﺰ ﺷﯩﯟﯨﺮﻻﺷﻠﯩﺮﯨﺪﺍ ﻣﯧﻨﯩﯔ ﺳﯩﺮﻟﯩﺮﯨﻢ
ﻳﻮﺷﯘﺭﯗﻧﻐﺎﻥ،ﺳﯧﻨﻰ ﺳﯧﻐﯩﻨﯩﭗ،ﺳﯧﻨﻰ ﻳﺎﺩ ﺋﯧﺘﯩﭗ ﺋﯘﻳﻘﯘﺩﯨﻦ ﺑﯩﺪﺍﺭ ﺑﻮﻟﻐﺎﻥ ﺟﯩﻤﺠﯩﺖ ﺗﯜﻧﻠﻪﺭﺩﻩ ﻣﻪﻥ ﺋﯘﻻﺭغا ﻳﯜﺭﻩﻙ ﺳﯩﺮﻟﯩﺮﯨﻤﻨﻰ ﺳﯚﺯﻟﻪﭖ ﺑﻪﺭﮔﻪﻥ.ﺳﯜﺑﮭﯩﺪﯨﻜﻰ ﭼﻮﻟﭙﺎﻧﻨﯩﯔ ﭼﺎﻗﻨﺎﺷﻠﯩﺮﯨﺪﯨﻦ ﮬﻪﻳﺮﺍﻥ ﻗﺎﻟﻤﯩﻐﯩﻦ،ﺋﯘﻻﺭ ﻣﯧﻨﯩﯔ ﻛﯚﺯﻟﯩﺮﯨﻢ...

ﺳﻪﻥ ﻣﯧﻨﯩﯔ ﺑﺎﺭﻟﯩﻘﯩﻢ ﺋﯩﺪﯨﯔ،ﺋﻪﺯﯨﺰﯨﻢ!ﺳﻪﻥ ﻳﯧﻨﯩﻤﺪﯨﻦ ﺟﯩﻤﺠﯩﺖ ﻳﻮﻗﺎﻟﻤﺎﻗﭽﻰ ﺑﻮﻟﻐﺎﻥ ﺩﻩﻗﯩﻘﯩﻠﻪﺭﺩﻩ،ﻣﻪﻥ ﮬﺎﻳﺎﺗﺘﯩﻦ ﺗﻮﻟﯩﻤﯘ
ﺑﯩﺰﺍﺭ ﺑﻮﻟﺪﯗﻡ.ﺳﯧﻨﻰ ﺳﯧﻐﯩﻨﺪﯨﻢ،ﺳﻪﻧﺴﯩﺰ ﺑﯩﺮ ﻛﯜﻧﻤﯘ ﻳﺎﺷﯩﻴﺎﻟﻤﺎﻳﺪﯨﻐﺎﻧﻠﯩﻘﯩﻤﻨﻰ ﮬﻪﻗﯩﻘﯩﻲ ﺗﯜﺭﺩﻩ ﮬﯧﺲ ﻗﯩﻠﺪﯨﻢ.<ﺳﻪﻥ ﺗﯧﻨﭻ
ﺋﯚﺗﺴﻪﯕﻼ مەيلى ﺩﯦﺪﯨﻢ-ﻳﯘ،ﺳﯧﻨﯩﯖﻤﯘ ﻣﻪﻧﺴﯩﺰ ﺋﺎﺯﺍﺑﺘﺎ ﺋﯚﺗﯜﺷﯜﯕﻨﻰ،ﻣﻪﻧﺴﯩﺰ ﺑﯩﺮ ﻛﯜﻧﯜﯕﻨﯩﯖﻤﯘ ﺑﻪﺧﯩﺘﺘﯩﻦ ﻳﯧﺮﺍﻕ ﺋﯩﻜﻪﻧﻠﯩﻜﯩﻨﻰ
ﮬﯧﺲ ﻗﯩﻠﯩﺸﯩﯖﻨﻰ ﺗﯩﻠﯩﺪﯨﻢ...ﻣﻪﻥ ﺷﻪﺧﺴﯩﻴﻪﺗﭽﯩﻤﯩﻜﻪﻧﻤﻪﻥ؟ﺳﻪﻥ ﻣﯧﻨﯩﯔ ﺑﺎﺭﻟﯩﻘﯩﻤﻐﺎ ﺋﺎﻳﻠﯩﻨﯩﭗ ﻛﻪﺗﻜﻪﻥ ﻣﯘﺷﯘ ﺩﻩﻗﯩﻠﻪﺭﺩﻩ،
ﺳﯧﻐﯩﻨﯩﺸﺘﯩﻦ ﻗﺎﻧﺴﺮﺍﭖ ﺗﯘﺭﻏﺎﻥ ﻳﯜﺭﯨﻜﯩﻢ ﺑﯩﻠﻪﻥ ﻗﯧﭙﻘﯩﺰﯨﻞ ﮔﯜﻟﺪﻩﺳﺘﯩﻠﻪﺭﻧﻰ ﻳﺎﺳﯩﺪﯨﻢ...ﺋﯜﻧﺴﯩﺰ ﻧﯩﺪﺍﻟﯩﺮﯨﻢ ﻳﻮﻟﻼﺭﺩﺍ،ﮬﺎﯞﺍﺩﺍ،
ﺗﺎﻏﻼﺭﺩﺍ ﻳﻪﻧﻪ ﻗﯘﺷﻼﺭﻧﯩﯔ ﻳﯧﻘﯩﻤﻠﯩﻖ ﺳﺎﻳﺮﺍﺷﻠﯩﺮﯨﺪﺍ ﻗﯧﺘﯩﭗ ﻗﺎﻟﺪﻯ...

                                                                 تەنھا تىۋىشلار
   

                                                                       نەسىر



                                                                          1



سېنىڭ مەۋجۇتلۇقۇڭ غېرىبان كۈلبەمنىڭ دەرىزىلىرىدىن ئېقىپ كىرگەندە،مەن ھەممىنى ئۇنتۇپ نۇر تامچىلىرىڭدىن چىرايلىق
لىباس ئارتىۋالدىم.ئۇنىڭ جۇلاسى ئېرىنچەك دېڭىز دولقۇنلىرىنىڭ ئاراچلىرىدىن نىگاھىڭغا شۇڭغۇدى.كۆڭۈل بوستانىمدىكى
گۈل-غۇنچىلىرىم ئەڭ خۇشپۇراق رەڭلەردە ئېچىلدى.مېنى ئەڭ يارقىن ھايات كارتىنىسى ئۈستىگە نەقىشلىدى.تۈنلىرىم سېنىڭ
تىنىقلىرىڭدا شىرىن ھېسلارغا تويۇندى  .         



                                                                               2


                                                                  


            سۈزۈك تۈمان چايقالغان سەھەر پەيتىدە سېنىڭ ئىسمىڭنى ئەمدىلا بىخ چىقارغان ياپراقلارغا،قىزارغان ئۇپۇقنىڭ

گىرۋەكلىرىگە،شاماللارنىڭ يۇمران پەيلىرىگە،ناز بىلەن ئېقىۋاتقان سۈزۈك سۇلارغا،كوچىلارغا.....يەنە نۇرغۇن يەرلەرگە يېزىپ قويدۇم.
چۈنكى دۇنيادىكى بارلىق ناملار ئىچىدە سېنىڭ ئىسمىڭلا ماڭا تەڭدېشى يوق خۇشاللىقلارنى ئاتا قىلالايدۇ.ئۇ مېنى گۈزەل
خىيالىي دۇنياغا باشلاپ بارالايدۇ،قەھرىتان قىشتا ماڭا ئىللىقلىق بېغىشلىيالايدۇ،سەن بولغاچقىلا لەۋلىرىم شىرىن بەخىت پەيزىدە
تاتلىق تامشىيالايدۇ.سەن بولغاچقىلا گۈللىرىم خۇشپۇراقلىقتا ئىپار-ئەمبەر بىلەن بەسلىشەلەيدۇ.سەن بولغاچقا ئىجاد دەرىخىم
مۇنچاق-مۇنچاق مىۋىلەرنى ئاسالايدۇ.سەن بولغاچقىلا دۇنيانىڭ غەم-قايغۇلىرى مېنىڭ ئالدىمدا ئۆز مەۋجۇتلىقىنى يوقۇتىدۇ.
                                                         پەقەت سەن بولغاچقىلا...

                                                              سۈكۈتتىكى روھ
                     

                                                                     نەسىر

پىغانلىرىم ئۈركىگەن قۇشتەك تەن دەرىخىمدىن ئاجراپ چۈشتى،ئۇنى شالماللار ئويناتتى،تەنھالىق ئەركىلىتى سۆيدى...
ئۇلار شۇ تاپتا چەكسىز خۇشاللىق ئىلكىدە يۈرىكىڭدىن يۈرىكىمگە تۇتاش يوللاردىن خۇشاللىق ئىزداۋاتىدۇ.خىياللىرىم توزىغان
قۇش پەيلىرىدەك خىرامان باغرىڭغا باغرىنى يېقىۋاتىدۇ.ئاڭلاۋاتامسەن؟تىنىقىم ئاجىزلىماقتا،نىمجان تېنىم ئايىغىڭدا چىرايلىق ھەسرەتلىرىدىن چوغلۇق گۈللىرىنى ئۆستۈرمەكتە...توزۇش ئالدىدا تۇرغان گۈللىرىمغا قاراپ سۈكۈتكە چۆمدۈم.يۈرىكىمدىن
تەكتىدىن بىر يىغا ئوخچۇپ چىقماقتا...

سېنىڭ قىلغان ھېلىقى سۆزۈڭ


سېنىڭ قىلغان ھېلىقى سۆزۈڭ،
يۈرىكىمگە سانجىدى ئوقيا.
قۇرۇپ كەتتى سۆيگۈ گۈللىرىم،
ئاھ!باغرىڭغا تۇتاش يوللاردا.

پىچىرلاشماس يۈرەك بىر تىلدا،
سۆزلەر ئارا تۈنەر غېرىبلىق.
شەكىل ئۈچۈن كۆتۈردۈڭ بەلكىم،
مەشئىلىنى غۇۋا يېنىقلىق.

تېلېفون سىمى كۆيدۈرەر ھەرۋاخ،
تالايلىغان ۋەدەڭنى جېنىم.
ۋۇجۇدۇمغا ئازابىڭ بىر ئوت،
كۆيدۈرىدۇ كۈندە مىڭ قېتىم.

ھەسرىتىمنىڭ تۈنجى بېتىگە،
يېزىپ قويدۇڭ ئىسمىڭنى قايتا.
لېكىن شۇنى بىلدىم ئاقىۋەت،
ئىشىق باشقا مۇھەببەت باشقا.


خىياللار ئورمانلىقى



باراقسان خىياللار ئورمانلىقىدا،
چېچىمدەك سوزۇلۇپ ياتماقتا گۈگۈم.
شىرىلداپ تېنىمگە تۆكۈلگەن ھىجران،
يەپ كېتەر يۈرەكنى ئەتە يا ئۆگۈن.

ھېس قىلىپ ياشىدىم سېنى يېنىمدا،
سەن بىلەن ھاياتىم،كۈلكەمنى رەڭلەپ.
روھىمدا تۆرەلگەن تىنىقىڭ ھەتتا،
بېرەتتى ئەڭ شىرىن سۆزلەرنى سۆزلەپ.


ئۇزارغان يوللاردا مېنىڭ ئىزلىرىم،
بىر تامچە ياش بولۇپ سىڭدى تۇپراققا.
ئۇ شۈنچە بىغۇبار،شۈنچىلىك مەسۇم،
رىۋايەت سۆزلەيدۇ پۈتكۈل جاھانغا.


كۈتىمەن،كۈتۈشكە قالمىسا تاقەت،
بارىمەن يېنىڭغا جاندىن بوپ جۇدا.
چىقىمەن شۇ چاغدا ئۆزۈمدىن بەلكىم،
چېقىلسا ھايات دەپ ئاتالغان رامكا...

                                                             كۆيۈك تەبەسسۇم



                                                                  (نەسىر)


بۈگۈن ھېيت...........
ئاداققى قۇياشنىڭ غېرىبان كۈلۈمسىرىشىدە قېتىپ قالغان تەبەسسۇمىمنىڭ قاخشال شاخلىرىدىن قىزغۇچ يوپۇرماقلار
شىلدىرلاپ تۆكۈلمەكتە...شۇ تاپتا ۋۇجۇد قەسىرىمدە تۆرەلگەن يىغلاڭغۇ ئاۋازىم مۇزدەك شاماللارغا يۆگۈشۈپ تېنىمنىڭ
ئەڭ يوچۇن يەرلىرىدىن چىقىپ پىرىلداپ ئۇچماقتا...
گۈگۈمگە يۆلەنگەن سەرسان خىياللىرىم ئىچىدىن  سېنىڭ ئاشۇ كىشى قەلبىنى لەرزىگە سالىدىغان نۇرانە نىگاھىڭ قالدۇرغان
ئەستىلىكلەرنى تاپماقچى بولىۋاتىمەن.ئەستىلىكلەر ئىچىدىكى سېنى تىترىگەن بارماقلىرىمدا سىيلاپ،قۇرۇغان ئاۋازىمدا چاقىرىپ
چىقماقچى بولىۋاتىمەن.تولىمۇ يېراقلاپ كېتىۋاتقان ئاۋازىمنىڭ قاراڭغۇلىقىغا جىممىدە چۆككەن ۋاختىمدا  ئەتراپىمدىكى بارچە
نەرسە بىراقلا سېنىڭ رەڭگىڭگە كىرگەندەك ئەتراپىم قىزىللىققا ئايلاندى.چۈنكى سەن بىر چوغ ئىدىڭ،ئەزىزىم!
      ئادەملەرلا ئەمەس،جىمى جان -جانىۋارلار جۈپ-جۈپى بىلەن شادلىق بەزمىسى قۇرۇۋاتقان ئايەم كۈنىدە مەن سېنىڭدىن
تولىمۇ يېراقتا چاك-چاك يېرىلغان يۈرىكىمنى گويا سېنىڭ چاچلىرىڭنى سىيلىغاندەك ئاچچىق ئىزتىراپتا سىيلاپ
ئولتۇرماقتىمەن؛ئۆلۈك ھىجراننىڭ كۈللىرى يۈز-كۆزۈمگە ئۇرۇلۇپ نىگاھىم داغلار بىلەن قاپلانماقتا...
سېنى شۇقەدەر سېغىنماقتىمەن.ئاھلىرىمدىن يۇلتۇزلار چاراقلاپ يېرىلغان مۇشۇ كېچىدە  سەن نەدە ؟ نېمە ئىشلارنى
قىلىۋاتىسەن؟نېمە ئويلاردا بولىۋاتىسەن؟...مۇشۇنىڭغا ئوخشاش يۈرىكىمنى تىنىمسىز قىيناپ ئارام بەرمەيۋاتقان
سۇئاللىرىمغا جاۋاب تاپماقچى بولىۋاتىمەن.
   سېنىڭ تامان سوزۇلۇۋاتقان كۆيۈك خىياللىرىم ،خىياللىرىڭ بىلەن ئۇچراشقان بولسىدى-ھە!؟

سەن ھىدىمنى ئىزدىگەن شۇ دەقىقە



سەن ھىدىمنى ئىزدىگەن شۇ دەقىقە،
چىكەلمىدىم شامال بولۇپ ئىشكىڭنى.
قايتىشقىمۇ تاپالمىدىم بىر سەۋەب،
چەگكەنمىدىڭ شۈنچە مەھكەم رىشتىڭنى؟


قۇرۇۋاپسەن تۇيدۇرماستىن تىۋىشسىز،
قەلبىم ئارا زەپمۇ كۆركەن ئۇز ماكان.
سۆيگۈڭ بىلەن بىزەك بېرىپ بېغىمغا،
بولىۋالدىڭ قاچانلاردا سەن خاقان؟

ئۆز ئەركىممۇ ئەمەس ئىكەن ئۆزۈمدە،
سېلىۋاپسەن ئىشقىڭ بىلەن تىزگىنەك.
بولغان چېغى زىبالىقىم مۇشۇ تاپ،
سېنىڭ ئۇزلۇق خىسلىتىڭگە جۈپ-گېزەك.


بۇ يازمىنى ئاخىرىدا   ھىلال تەھرىرلىگەن. ۋاقتى  2012-5-6 01:55