[ھىلال]ھىجران [ئۇلانما كۆچۈرۈش]

ھىجرانىڭنى قالدىم ھاپاشلاپ


ئۇنتالمىدىم مېھرىڭ چوغ بولۇپ،
يۈرىكىمگە چۈشكەندىن بېرى.
چۈشلىرىمدە ھەمراسەن دائىم،
خىيالىمدىن كەتمەيسەن نېرى.

ئۇنتالمىدىم سېنى جانانىم،
كۆرگىنىمدە چېھرىڭنى بىر رەت.
قاچان قاناي ۋەسلىڭگە سېنىڭ،
يۈرىكىمنى تىلغايدۇ ھەسرەت.

چۈشلىرىمدە كەلدىڭ تېۋىشسىز،
سابالاردا پەر قانات قېقىپ.
قىلماي ماڭا بىرەر ئېغىز سۆز،
كەتتىڭغۇ ئاھ،بىر قىيا بېقىپ.

يۈرىكىمدە مىڭ دوۋزاق ئوتى،
ئارام بەرمەي كۆيدى چاراسلاپ.
كەتكەن بىلەن ئۆزۈڭ خىرامان،
ھېجرانىڭنى قالدىم ھاپاشلاپ.


يىگانىسەن كۈيلىرىم ئىچرە


يىگانىسەن كۈيلىرىم ئىچرە،
لەۋلىرىڭدە جان بېرەي مىڭ رەت.
ھاياتىمغا چېچىپ نۇر-زىيا،
يۈرىكىمدە ئىسمىڭ بار ھەيۋەت.

مەۋجۇتلۇقۇم سەندىدۇر ئەركەم،
سەنسىز خازان بوپ قالار بېغىم.
نۇردەك سۈزۈك تەبەسسۇمىڭدا،
كۆيۈشمەكتە پۈتكۈل جان،تېنىم.

كۈن-تۈن ئۆتەر سېغىنىپ سېنى،
يوللىرىڭدا سەرسانە كۆز ياش.
ھەر لەھزە جان شوراشلىرىڭغا،
مۇمكىنمىدى ئۈن-تىنسىز چىداش؟!

پايانسىز ھەسرەت




سەنمۇ ھەم قايغۇرۇپ ياشايسەن بەلكىم،
ئوخشىماس تەقدىرگە باغلىنىپ مىڭ رەت.
سارغايغان ئەسلىمە بېتىدە جىمجىت،
كۆيمەكتە بەخىتتىن مەھرۇم مۇھەببەت.



خەجلىنىپ تۈگىدى تالاي ۋەدىلەر،
كۆڭۈلنىڭ خۇش كەيىپ،شادلىقى ئۈچۈن.
بېغىمدا ئۆستۈرۈپ لالە رەيھانلار،
تىترىگەن قولۇڭدا ئۈزدۈڭسەن نىچۈن؟!



ھەسرىتىم بىمەھەل ياسىنىپ قىزدەك،
غەمكىن بىر تۇيغۇغا سالدى چىڭ گىرە.
ياشلانغان قاراقتا كۈلگەن سىمايىڭ،
كۆرۈنەر شۇ تاپتا گۈڭگا ۋە خىرە.



پايانسىز كۈلپەتلەر كەلمەكتە بېسىپ،
بەرگۈم يوق ھېچكىمگە دەردىمنى تۆكۈپ.
كېتىمەن ئاخىرى ئۈنسىز-تېۋىشسىز،
بىر لەھزە كۈلكەڭچۈن تۇپراققا چۆكۈپ

   لىرىكىلىرىڭىز  تەبى ئۇرغۇپ چىققان بۇلاقتەك كۆڭۈل زىمىنىغا سىڭىپ كەتكۇدەك.نەسىر شەكىلدە يېزىلغانلىرىمۇ نەسرى شئېىر ئىكەن. سىز دىكى شئېىرغا بولغان ساپ تۇيغۇ قەلبىڭىزدىكى ساپ تۇيغۇلىرىڭىزنى بۇلاققا ئايلاندۇرۇپتۇ...شئېىرىڭىزنىڭ  سېھرى  كۈچى كۆڭۈلنى تۇيدۇرماي  ئىگىللىۋېلىشتا بولسا كېرەك....

سەپىرىڭ ئىلاھىم بولسىكەن قۇتلۇق ،
قىلىمەن ھەر سەھەر سەن ئۈچۈن دۇئا .
كىرسە گەر قولۇڭغا زەررىچە تىكەن ،
سېزىدۇ يۈرىكىم شۇھامان ، توۋا...

ھىلال، بۇ مىسرالار ئېسىڭىزدىمۇ ؟ قەلىمىڭىز گە بەرىكەت تىلەيمەن !

ئېيتارسەنمۇ


ئېيتارسەنمۇ ياش تۆكمىدى دەپ مېنى،
تەنھا يۈرسەم غازاڭلارغا پىچىرلاپ.
غەم تاغلىرى  باسقان مېنىڭ قەلبىمنى،
تۇرغان بىلەن كۆلدە ئەكسىم جىمىرلاپ.

ئېيتارسەنمۇ دەردى يوقكىن دەپ مېنى،
ناخشا ئېيتسام ساھىللارنى قۇچاقلاپ.
ئېيتارسەنمۇ <بەزدىم> سەندىن دەپ ماڭا،
مەن قارىسام كۆزلىرىڭگە يېنىشلاپ.


كۆيۈپ كەتتى ئىگىز-ئىگىز بارخانلار،
مېنىڭ چەككە ئاھلىرىمنىڭ تەپتىدە.
قېتىپ قالدى جىلغىدىكى بۇلاقلار،
مېنىڭ تارتقان دەرتلىرىمنىڭ دەردىدە.

ئېيتارسەنمۇ ئوتلىرىمدا كۆيگەن دەپ،
ئۆلۈپ كەتسەم كۆزلىرىڭگە سۆيەلمەي.
قارچۇقۇڭدا قېتىپ قالسا بىر سۈرەت،
ئاھ،تۈنلىرى خىيالىڭدىن كېتەلمەي.




بۇ يازمىنى ئاخىرىدا   ھىلال تەھرىرلىگەن. ۋاقتى  2012-5-7 00:27  

خىيالىمنى بىرگە ئېلىپ كەت



ئۇچراتساملا مىڭ تەستە سېنى،
سىرلىرىمنى قىلىمەن بايان.
كۈندۈزلىرى ئۇنتالماي يۈرسەم،
چۈشلىرىمدە يەنە سەن ئايان.

ئىنتىزار بوپ كەتكەن يولۇڭغا،
پال ئاچىمەن كۈندە نەچچە رەت.
ئويلىرىمغا سىڭىۋالغۇچە،
خىيالىمنى بىرگە ئېلىپ كەت.


ئاق كېچە


ئېسىمدىدۇر بىز خوشلاشقان ئاشۇ چاغ،
قاراپ قالغان قاراڭ كۆزدىن يۈتكىچە.
‹خوش›دىگەندە قوللىرىمنى چىڭ سىقىپ،
يۈرەك تارتتى ئازابلارنى يەتكىچە.

تە نھا قالدىم خۇددى تەنھا  كەلگەندەك،
مىڭ بوغۇلدۇم ھىجرانىڭدا يانغىچە.
ھەممە جىمجىت يۈرەك يانار چوغ كەبىي،
كۆزلەر ياشلىق ياتتىم تاكى تاڭغىچە.

كەتتى ئاياز،كەتتى قىشمۇ بىرمۇ-بىر،
ئۆچمەس سۆيگۈڭ ۋۇجۇدۇمدا تېخىچە.
ئۇنتۇلسىمۇ تالاي-تالاي كەچمىشلەر،
ئۇنتۇلماسكەن بىز ئايرىلغان ئاق كېچە.

ماڭا ھېچنىمە دېمە...


چىرمالغان ئىدىڭسەن ئازاب يىپىغا،
خىيالدىن تىكىلگەن كىيىمنى كىيىپ.
ھەتتاكى بىر تىنىق جىمجىتلىقىممۇ،
قوياتتى ئاھ،سېنى ھەسرەتكە سېلىپ.

سېغىنچىڭ سۈبھىدەم ئاچقاندا پورەك،
خۇش ھېدى دىماققا كېلەتتى لەرزان.
شامالنىڭ پېيىدەك يۇمران ئاۋازىڭ،
سۆيەتتى تارتىنچاق مەڭزىمگە ھامان.

سۆيەتتىڭ سەن مېنى يۇلتۇزۇم سەن دەپ،
پايانداز بولاتتىڭ ماڭغان يولۇمغا.
مېنىڭسىز سوغ ئىدى باھارىڭ،يازىڭ،
جۇت،قىروۋ قوناتتى ياپراقلىرىڭغا.

لەۋلەردىن يۈرەككە تامغان قەسەمنىڭ،
ۋەزنىدىن چوغلۇنۇپ كۆيەتتى قۇياش.
ئوت ئىدىڭ مەن ئۈچۈن يېلىنجاپ تۇرغان،
تەس ئىدى ھارارەت،تەپتىڭگە چىداش.

سۆيەتتىڭ سەن مېنى،سۆيەتتىڭ شۇنداق،
تىلىڭدىن بال ھەسەل سۆزلەر تامدۇرۇپ.
سۆزلەيتىڭ ئىلاھىي سۆيگۈ ھەققىدە،
گۈللەرنىڭ تىلىدا شىۋىرلاپ تۇرۇپ.

ئوتقا ئوت،دەرتكە دەرت قوشۇپ ئېيتقىنا-
قايسى گۈل ياسىدى سەندە ئۆزگۈرۈش؟
چىنلىققا دىۋانە قەلبىڭدە ياكى،
بىردەملىك ھەۋەسمۇ سۆيۈش،سۆيۈلۈش؟

كەتسەڭ كەت،سەن ماڭا دېمە ھېچنىمە،
ئارقاڭغا قايرىلما، كەلمە ھەم قايتىپ.
ۋەلىكىن يادىڭدىن كەتمىسۇن زىنھار،
سۆيگۈنۈم بىر سېنى چەكسىز ئىنتىلىپ...

ئۇزۇتۇش   



ئۇزاپ ماڭدىڭ بەلكىم يېنىمدىن،
سەۋدالىقنى قالدۇرۇپ ئارتتا.
ئېقىن سۇدەك مەسۇم سېغىنىش،
سىڭىپ كەتتى تۈننىڭ قوينىغا.

قېنى تەلۋە ،تىلسىم سېغىنىش؟
قېنى ماڭا ئەسرار كۆڭۈللەر؟
قېنى قايغۇ،ھىجراندىن يېراق،
شىۋىرلىشىپ ئاتقۇزغان تاڭلار؟

يېڭى بىر كۈي،يېڭى بىر ئاھاڭ،
دىل تارىڭغا ئۇرغاندا زەخمەك.
ئۇزاتقاندەك باھارنى قۇشلار،
ئاھ،ئۇزاتتى شادلىقنى يۈرەك.

قۇلىقىمدا يۇمشاق ئاۋازىڭ،
ھەسرىتىمنمى تۇرار ۋاراقلاپ.
دىمىسەڭمۇ‹خەير-خوش،گۈلۈم!›،
شادلىقىمدەك كەتتىڭ يېراقلاپ...

لىرىكىلار


1

يانساممۇ ۋەلىكىن ھىجران تۈنىدە،
ساڭا ئەھۋالىمنى قىلمىدىم بايان.
جىجىت كېچىلىرى كۆزۈم ئالدىدا،
تونۇش قاراشلىرىڭ بولدى نامايان.

نە سەۋەب بولىمەن شۈنچىلىك غەمكىن،
مىسكىنلىك ئەيلىدى يۈرەكنى ماكان.
شادلىقىم  ئۆتمۈشكە ئايلاندى بەلكىم،
ئازابلىق تۈنلەرنى ئۆتكۈزۈپ ھامان...


2

شادلىقىم يوقاپتۇ جىسمىمدىن تامام،
مېنىڭمۇ سېنىڭدەك دەرتلىك يۈرىكىم.
قالدۇرۇپ ھەسرەتنى كەتكەندۇ ئۇچۇپ،
شادلىقىم ‹خوش› دىگەن سۆزۈڭدىن بەلكىم.

ياپراققا شىۋىرلاپ تۆكۈمەن نىچۈن؟
قەلبىمنى ئۆرتىگەن ئىزگۈ سىرلارنى.
يىگانە كېزىمەن خىياللاردا مەست،
بىز يانداش يۈرۈشكەن ئاشۇ چاغلارنى.

كېزىمەن سەن بىلەن ئۇچراشقان جاينى،
نەقىشتەك ئويۇلدى تۇپراققا ئىزىم.
بىمەھەل يوقاتقان ئاشۇ شادلىقنى،
ئىزدەيمەن ئىزىڭدىن كۈندە مىڭ قېتىم.


3

خىيالىمغا كەلمىسەڭ دەيمەن،
چۈشلىرىمگە كىرمىسەڭ دەيمەن.
ھىجرانلاردا قىيناپ ھەر كۈنى،
يۈرىكىمنى تىلمىساڭ دەيمەن.

قىلىۋالساڭ سۆزۈڭنى تولۇق،
كۆڭۈل قويۇپ ئاڭلىسام دەيمەن.
سازىڭ بولۇپ قولۇڭدا سېنىڭ،
شوخ كۈيلەردە ياڭرىسام دەيمەن.

سېنىڭ كۈلكەڭ


كۈلگىنە ئامرىقىم،كۈلگىن تېلىقىپ،
زەر نۇرلار تۆكۈلسۇن ئۈنچە چىشىڭدىن.
شۇ تاتلىق كۈلكەڭدىن ھوزۇر ئالسۇن تەن،
قىل ئاگاھ جىسمىمنى قەھرى-غەزەپتىن.

غەم باسسا ئەگەردە چېھرىڭنى نىگار،
بىلىنەر زىمىستان كەبىي بۇ ھايات.
ئۆچمىسۇن سېنىڭ لىۋىڭدىن كۈلكە،
كۈلۈشىڭ بىلەنلا تاپاي مەن نىجات.

ئۇنتالمايمەن شۇ كۈننى پەقەت


ئۇنتۇشۇم  مۇمكىنسىز شۇ كۈننى پەقەت،
جۈپلەشكەن بىزدىكى ئىناق تۇيغۇلار.
يۈرىكىم ئوت بولۇپ ياناتتى  مېنىڭ،
شۇ ئوتتىن ئۆزگىدە كۆيمىگەن زىنھار.

بىلدىڭمۇ زادى،سۆيدۈم دەپ مېنى،
ئېيتقاندىن بېرى قەلبىڭنى ئېچىپ.
ئازاب-كۈلپەتتىن كۆردۈم مىڭ بىرنى،
قايغۇ ئوتىدا يۈرىكىم يېنىپ.

نىشانسىز سۆيگۈ ھەققىدە ئىھ،يار،
ئويلاشتىن كۆرە شۇمۇ ياخشى ھەم.
بەختنىڭ قۇشى يوقالسا ئەگەر،
شۇ ئىكەن جانغا پاتقان قايغۇ-غەم.





بۇ يازمىنى ئاخىرىدا   ھىلال تەھرىرلىگەن. ۋاقتى  2012-5-14 23:17  

ئايغا قاراپ


ئەسلەيمەن دائىم چىقماس ئېسىمدىن،
ئاي  غۇۋا نۇر چاچقان باھار كېچىسى.
سەن شۇ چاغ شىۋىرلاپ دىگەنتىڭ ماڭا،
ئاشۇ ئاي قەلبىمنىڭ سۆيگۈ ئەلچىسى.

بۈگۈن مەن خىيالدا تۇرىمەن يالغۇز،
كۆرۈنمەس نە يۇلتۇز،نە ئاي ئاسماندا.
بىلمىدىم خۇلقۇڭنى بىلگەن ئاشۇ ئاي،
خىجىل بوپ ئالغانمۇ ئۆزىنى دالدىغا؟

سۆيگۈنۈمگە سۆز


ئامرىقىم ئاتقاندا ۋىسال تاڭلىرى،
ئىچەرمەن لەۋلىرىم جامىدىن شاراب.
قالىدۇ ئاشۇ چاغ چاناقلىرىمدا،
قالىدۇ مەرۋايىت ئۈنچىلەر ماراپ.

كەلگەندە جۇدالىق تۈنلىرى بىر چاغ،
باغرىڭغا باسىسەن چىدىمەي ئۇزاق.
بىلىمەن شۇ چاغمۇ بولىدۇ پەيدا،
تاتارغان مەڭزىمدە مەرۋايىت مۇنچاق.

بىلەمسەن،ئامرىقىم ئاشۇ ياشلىرىم،
ياشنىتار دىلدىكى سۆيگۈ ئەھدىنى.
دىمىگىن سەن ئۇنى ئاددىغىنا ياش،
سۆيگۈنىڭ ئۇ ساڭا قەسەم بەرگىنى.

تەنھالىق تەزكىرىسى

بىر ئاچچىق ھەسرەتنى يۇتقاچقىمۇ تۈن،
ئا،ئېغىر سۈكۈتتە تىنىپتۇ ئۇزاق.
چۇلغىدى خىيالىم تەنھا يۇلتۇزنى،
ھىسلىرىم جىسمىڭنى چۇلغىغان سىياق.

مەن تەنھا،يۇلتۇز ھەم تەنھا بۇ سەھەر،
تەنھالىق قەلبىمگە سالدى مىڭ ئازاب.
نە سەۋەب روي بەردى مەندە بۇ ھالەت؟
چېچەكلەر تۇيغۇمدا چەكسىز ئىزتىراپ.

...


سەن مېنىڭ قەلبىمدە ئېيتقان ناخشىنى،
ئېيتىمەن ھازىرمۇ يېنىش-يېنىشلاپ.
نەقەدەر گۈزەل-ھە ئاي تۇغقان كېچە،
سەن يۈرەك سۆزۈڭنى دىگەن پىچىرلاپ.