ئابدۇرېھىم زۇنۇن:كۈندە بىر رۇبائىي   [ئۇلانما كۆچۈرۈش]

كۈندە بىر رۇبائىي

مۇنبەرداشلارنىڭ سەمىگە شۇنى سالىمەنكى، جېنىم تېنىمدىلا بولسا، كۈندە بىر روبائىي يوللاپ بەھرىلەندۈرۈشنى قارار قىلدىم. كەڭ تورداشلارنىڭ پىكىر -تەكلىپلىرىنى ئايىماسلىقىنى ئۈمىد قىلىمەن!






1

ئۆچۈپ كەتكەي ساماننىڭ چوغىدەك تاشقى جۇلا - زىننەت،
كۆچۈپ كەتكەي بولۇپ كارۋان جاھان شاھ مۈلكى ــ دۇر قىممەت.
ئېتەر ئىنسان نامايان قىممىتىنى ھەر قاچان كۈندەك،
چېچىپ زەر نۇر - زىياسىنى، مۇجەسسەم بولسا گەر خىسلەت.
2
يېقىن تۇرساڭ زەكىيلەرگە ئەقىل قۇببەڭگە نۇر قونغاي،
سۈمۈرسەڭ بال ـــ بىلىم ھەردەم ھۇما تۇتقاي بېشىڭنى جاي.
چېكەڭدىن ئاقسا ئۈزلۈكسىز كۈمۈش تەرىڭ بولۇپ دەريا،
ھوسۇلۇڭ مول، يولۇڭ تۈز، بەختۇ ئىقبالىڭ گۈزەل بولغاي.
3
ھۇرۇن- يالقاۋغا قۇت - ئىقبال قىزى ھەرگىز كۈلۈپ باقماس،
سۇباتسىز، لايغەزەللەر ھېچ كىشىنىڭ كۆڭلىگە ياقماس.
ياتار ئۇ: «ئۈجمە پىش، ئاغزىمغا چۈش» دەپ ھەر قاچان ئۇخلاپ،
شۇڭا مەڭگۈ پۈتۈنلەنمەس نېنى، ھېچ بىر ئىشى ئاقماس.
4

«پۇچەك دان» دەيدۇ: خىللانغان بىرى مەن چىن، يېڭى سورتنىڭ،
شۇنى ئېيتىدۇ خائىنمۇ: ۋاپادار ئوغلىمەن يۇرتنىڭ.
سۆڭەك يوق تىلدا، سۆزلەر ھەر كىشى ئاغزىغا كەلگەننى،
ئىشىغا باق، ئىشەنمە كۆپ ۋالاقلاپ سۆزلىگەن «قۇرت»نىڭ.

5
بۇ ھاياتلىق سەھنىسىدە رول ئالار ھەر بىر كىشى،
ئوخشىمايدۇ بىر - بىرىگە ئوينىغان رول ـــ كەچمىشى.
باقىۋەندە بولمىغاي باش رول ئېلىش بىر كىشىگە،
چۈنكى جىم تۇرمايدۇ بىر ئىزدا پەلەكنىڭ گەردىشى.