تېڭشۈن تورىنىڭ 3-ئاينىڭ 30-كۈنىدىكى تېلېگراممىسى ( مۇخبىر ساۋ جى خېڭ)، ئۈرۈمچى شەھەرلىك ئوتتۇرا خەلق سوت مەھكىمىسى مۇشۇ ئاينىڭ 29 -كۈنى قەشقەر ۋىلايەتلىك خەلق قۇرۇلتىيى كومىتېتىنىڭ ھەيئەت ئەزاسى (مۇئاۋىن نازىر دەرىجىلىك)، مارالبېشى ناھىيەلىك پارتكومنىڭ شۇجىسى لىيۇ كا شېڭ (刘喀生) بىلەن ئۇنىڭ ئايالى چىيۇ شىياۋ مېي (邱小梅) نىڭ پارا ئېلىش دېلوسىغا بىرىنچى سوتتا ھۆكۈم چىقاردى. پارا ئېلىش جىنايىتىنى سادىر قىلغان لىيۇ كا شىڭغا مۇددەتسىز قاماق جازاسى بېرىلدى ھەمدە سىياسىي ھوقۇقىدىن ئۆمۈرۋايەت مەھرۇم قىلىنىپ، ئۇنىڭ بارلىق مال مۈلكى مۇسادىرە قىلىندى. پارا ئېلىش جىنايىتىنى سادىر قىلغان لىيۇ شىياۋ مىيغا 15 يىللىق مۇددەتلىك قاماق جازاسى بېرىلىپ، ئۈچ يىل سىياسىي ھوقۇقىدىن مەھرۇم قىلىندى.
سوت مەھكىمىسىنىڭ تەكشۈرۈش ئارقىلىق، جاۋابكار لىيۇ كا شېڭنىڭ 2002-يىلىدىن 2010-يىلى چاغاننىڭ ئالدىن كەينىگىچە بولغان ئارىلىقتا قاغىلىق ناھىيەلىك پارتكومنىڭ سېكرېتارلىقى، قەشقەر ۋىلايەتلىك خەلق قۇرۇلتىيى كومىتېتىنىڭ مۇئاۋىن رەئىسى ھەمدە مارالبېشى ناھىيەلىك پارتكومنىڭ سېكرېتارلىقى قاتارلىق ۋەزىپىلەرنى ئۆتىگەنلىكى؛ بۇ جەرياندا خىزمىتىدىكى ئەۋزەللىكلەردىن پايدىلىنىپ،  ئايالى لىيۇ شىياۋ مېي بىلەن نۇرغۇن قېتىم قانۇنغا خىلاپ ھالدا پارا ئالغانلىقىنى ئېنىقلاپ چىققان. ئۇنىڭ قانۇنسىز پارا ئېلىش، قانۇنغا خىلاپ ھالدا مال-مۈلۈك ئۈندۈرۈۋېلىش ئۇسۇلى بىلەن مال-مۈلكىنىڭ ئومۇمىي قىممىتى 5  مىليون 677 مىڭ 800 يۈەن بولۇپ، بۇنىڭ قىممىتى 1 مىليون 860 مىڭ دانە خاتىرە كومپيۇتېر بىلەن تەڭ ئىكەن.
ئۇنىڭدىن باشقا، سوت مەھكىمىسى تەكشۈرۈش ئارقىلىق لىيۇ كا شېڭنىڭ بەش ئادەمدىن بىر مىليون 85 مىڭ يۈەن پارا ئېلىشتەك قانۇنسىز قىلمىشىنىمۇ ئېنىقلاپ چىققان.
ئۈرۈمچى شەھەرلىك ئوتتۇرا خەلق سوت مەھكىمىسى مۇنداق قارار قىلدى:«جاۋابكار لىيۇ كا شېڭ دۆلەت ئورگىنىنىڭ خادىمى تۇرۇپ، ئۆزىنىڭ خىزمەت ئەۋزەللىكىدىن پايدىلىنىپ، خىزمەتچى -خادىملارنى ئۆستۈرۈش، يەرلىك ئىقتىسادىنىڭ تەرەققىياتىغا مەسئۇل بولۇش قاتارلىق خىزمەتلەردە ئايالى لىيۇ شىياۋ مېي بىلەن كۆپ ھالدا پارا ئېلىش، باشقىلاردىن مال-مۈلۈك ئۈندۈرۈۋېلىش ھەمدە ئۆز نەپسىگە چوغ تارتىشتەك جىنايى قىلمىشلارنى سادىر قىلغان. جاۋابكار لىيۇ كا شېڭ ۋە چىيۇ شىياۋ مېينىڭ بۇ قىلمىشى پارا ئېلىش جىنايىتىنى شەكىللەندۈرىدۇ، ئۇنىڭ ئۈستىگە پارا ئالغان سومما ناھايىتى چوڭ بولغاچقا، قانۇن بويىچە جازا بېرىلدى».
دېلو يۈز بەرگەندىن كېيىن، ئەدلىيە تارماقلىرى جاۋابكار لىيۇ كا شېڭ ۋە چىيۇ شىياۋ مېيلاردىن 6 مىليون 781 مىڭ 400 يۈەن خەلق پۇلىنى تۆلىتىپ، دۆلەت خەزىنىسىگە تاپشۇرغان.