ئالدىنقى ئايدا، مىكروسوفت Lumia 650 نى ياۋروپادىكى قىسمەن دۆلەتلەردە رەسمىي ئېلان قىلغان، ئامېرىكىدىكى نۇرغۇنلىغان ئابونتلار بولسا بۇ يانفوننىڭ ئامېرىكا بازىرىغا كىرىش ۋاقتىنى بىلىشكە تەقەززا بولغان. مىكروسوفت شىركىتى يېقىندا بۇ ھەقتە ئىپادە بىلدۈرۈپ، Lumia 650 يانفونىنىڭ ئۇزۇنغا قالماي ئامېرىكا بازىرىغا كىرىدىغانلىقىنى بىلدۈرگەن.
Lumia 650 يانفونىنىڭ ئامېرىكا بازىرىغا كىرىش ۋاقتى ئالدىن مۆلچەرلەنگەن ۋاقىتتىن بالدۇر بولۇپ، ئالدىن زاكاز قوبۇل قىلىش ئاللىقاچان باشلىنىپ بولغان. قىزىقىدىغان دوستلار ھازىردىن باشلاپ مىكروسوفت ئورگان تورى ئارقىلىق زاكاز قىلسا بولىدىكەن، سېتىلىش باھاسى 200 دوللار (خەلق پۇلىغا سۇندۇرغاندا 1300 يۈەن) ئىكەن.
مىكروسوفت تور بېكىتىدىكى ئۇچۇرلارغا قارىغاندا، بۇ يانفوننىڭ مال ئەۋەتىش ۋاقتى 4-ئاينىڭ 1-كۈنى بولۇپ، ئەگەر سىز ھازىرلا مال زاكاز قىلسىڭىز، ئۇنداقتا يەنە ئىككى ھەپتىدىن كۆپرەك ۋاقىتتا مالنى قولىڭىزغا ئالالايسىز دېگەن گەپ.
سەپلىمىسىگە كەلسەك، بۇ يانفونغا HD ئېنىقلىقىدىكى 5.0 دىيۇملۇق ئېكران، سنەپدىراگون 212 تىپلىق بىر تەرەپ قىلغۇچ، سەككىز ۋە بەش مىليون پىكسېللىق كامېرا قاتارلىقلار ئىشلىتىلگەن، Windows 10 Mobile سىستېمىسى ئالدىن قاچىلانغان. قاتتىق دېتال سەپلىمىسىگە قاراپلا Lumia 650 نىڭ يۇقىرى دەرىجىلىك مەھسۇلات ئەمەسلىكىنى بىلىۋالغىلى بولىدۇ، بىراق، ئۇ مىكروسوفتنىڭ ئەڭ ئاخىرقى Lumia يانفونى بولۇپ قېلىشى مۇمكىن، چۈنكى، مىكروسوفت كەلگۈسىدە Surface Phone تۈرىدىكى يېڭى يانفونلىرىنى Lumia نىڭ ئورنىغا دەسسىتىشنى پىلانلاۋاتىدۇ.
