جۇڭگو شىنخۇا تورى 14-مارت خەۋىرى: :
شىنخۇا ئاگېنتلىقىنىڭ 14-مارت ئەنقەرەدىن ئەۋەتكەن تېلېگراممىسى، تۈركىيە قوراللىق قىسىم باش شتابى 14-مارت بايانات ئېلان قىلىپ: تۈركىيە شۇ كۈنى ئەتىگەن سەھەردە ئۇرۇش ئايروپىلانى ئەۋەتىپ ئىراقنىڭ شىمالى قىسمىغا جايلاشقان كۇرد ئىشچىلار پارتىيەسى قوراللىق تەشكىلاتىنىڭ نىشانلىرىنى بومباردىمان قىلىپ، ئەنقەرە تېررورلۇق ھۇجۇمى ئۈچۈن ئۆچ ئالدى، دېدى، چۈنكى كۇرد ئىشچىلار پارتىيەسى قوراللىق تەشكىلاتى ئالدىنقى كۈنى يۈز بەرگەن تۈركىيەنىڭ ئەنقەرەدىكى پارتلىتىپ ھۇجۇم قىلىش ۋەقەسى بىلەن مۇناسىۋەتلىك بولۇشى مۇمكىن دەپ قارالغان.
باياناتتا مۇنداق دېيىلدى: تۈركىيە ھاۋا ئارمىيەسى 10 نەچچە دانە ئۇرۇش ئايروپىلانى ئەۋەتىپ، ئىراقنىڭ شىمالى قىسمىدىكى كۇرد ئىشچىلار پارتىيەسى قوراللىق تەشكىلاتىنىڭ 18 دانە نىشانىنى بومباردىمان قىلدى. لېكىن باياناتتا كونكرېت ئۆلۈم-يېتىم ئەھۋالى ئاشكارىلانمىغان.
تۈركىيە سەھىيە مىنىستىرلىكىنىڭ مىنىستىرى شۇ كۈنى مۇنۇلارنى بىلدۈرۈشىچە، ئەنقەرە شەھەر مەركىزى 13-مارت كەچتە ماشىنا بومبا ھۇجۇمىغا ئۇچراپ، ئاز دېگەندىمۇ 37 ئادەمنىڭ قازا قىلىشىنى كەلتۈرۈپ چىقارغان.
يېرىم يىلغا يەتمىگەن ۋاقىت ئىچىدە ئەنقەرە ئارقا-ئارقا ئۈچ قېتىم تېررورلۇق ھۇجۇمىغا ئۇچرىغان، ئۇنىڭ ئالدىدا ئۆتكەن يىلى 10-ئاينىڭ 10-كۈنى ئەنقەرە پويىز ئىستانسىسىنىڭ ئەتراپىدا ئىككى قېتىملىق ئۆزىنى ئۆلتۈرۈۋېلىش خاراكتېردىكى پارلىتىپ ھۇجۇم قىلىش ۋەقەسى يۈز يۈز بەرگەن بولۇپ، ئاز دېگەندىمۇ 102 نەپەر ئادەمنىڭ ئۆلۈپ كېتىشىنى ۋە 200 دىن ئارتۇق ئادەمنىڭ يارىلىنىشىنى كەلتۈرۈپ چىقارغان، تۈركىيە بۇنى رادىكال تەشكىلات «ئىسلام دۆلىتى» پىلانلىغان دەپ جاكارلىغان. بۇ يىل 2-ئاينىڭ 17-كۈنى ئەنقەرە شەھەر مەركىزىدىكى بىر ھەربىي ئىشلار رايونىدا ماشىنا بومبا بىلەن ھۇجۇم قىلىش ۋەقەسى يۈز بېرىپ، ئاز دېگەندىمۇ 28 نەپەر ئادەمنىڭ ئۆلۈپ كېتىشى ۋە 61 ئادەمنىڭ يارىلىنىشىنى كەلتۈرۈپ چىقارغان، تۈركىيە كۇرد ئىشچىلار پارتىيەسى بىلەن مۇناسىۋىتى بار بولغان «كۇرد ئەركىنلىك بۈركۈتى» تەشكىلاتى بۇ ئىشقا مەسئۇل بولىدىغانلىقىنى جاكارلىغان.
كۇرد ئىشچىلار پارتىيەسى 1979-يىلى قۇرۇلغان بولۇپ، بۇ تەشكىلات قۇرال كۈچى ئارقىلىق، تۈركىيە، ئىراق، ئىران ۋە سۇرىيە قاتارلىق دۆلەتلەر تۇتىشىدىغان چېگىر رايونىدا كۇردلار توپلىشىپ ئولتۇراقلاشقان بىر مۇستەقىل دۆلەت قۇرۇپ چىقماقچى بولغان، بۇ تەشكىلات تۈركىيە، ئامېرىكا ۋە ياۋروپا ئىتتىپاقى تەرىپىدىن تېررورلۇق تەشكىلات دەپ ئېتىراپ قىلىنغان.ئۆتكەن يىلى 7-ئايدىن بويان، كۇرد ئىشچىلار پارتىيەسى توختىماستىن تۈركىيە ساقچى ئوفىتسېرلارغا ھۇجۇم قىلىش ۋەقەلىرىنى سادىر قىلغان، تۈركىيە ئارمىيەسى بولسا بۇ تەشكىلاتقا قارشى تازىلاش ھەرىكەتلىرىنى ئېلىپ بارغان.
