يېقىندا خوندا ياپونىيە بازىرىدا Clarity Fuel Cell ھىدروگېننى يېقىلغۇ قىلغان باتارېيەلىك ئاپتوموبىلنى رەسمىي بازارغا سالىدىغانلىقىنى ئېلان قىلغان بولۇپ، باھاسى 7.66 مىليون ياپونىيە يېنى (تەخمىنەن 430 مىڭ يۈەن) ئەتراپىدا ئىكەن.
خوندا Clarity Fuel Cell دۇنيادىكى تۇنجى نۇسخىدىكى ھىدروگېن گازىنى يېقىلغۇ قىلغان تۈركۈملەپ ئىشلەپچىقىرىلغان بەش كىشىلىك ئاپتوموبىل بولۇپ، خوندا شىركىتى بىرىنچى يىلىدا 200 دانە سېتىشنى ئۈمىد قىلغان. بۇ ئاپتوموبىلنىڭ خېرىدارلىرى ئاساسەن ئاپتوموبىل ئىجارىگە بېرىش كارخانىلىرى ۋە ھۆكۈمەت ئورگانلىرى ئىكەن.
تېخنىكىلىق ئۆلچەم جەھەتتىن، Clarity Fuel Cell نىڭ ئومۇمىي ئېغىرلىقى 1890 كىلوگىرام، ئۇزۇنلۇق، كەڭلىك ۋە ئېگىزلىكى ئايرىم-ئايرىم ھالدا 4895×1875×1475mm، ھەرىكەت سىستېمىسى %33 كىچىكلىتىلگەن بولۇپ، ئادەتتىكى 3.5 لىتىرلىق V6 ماتور بىلەن تەڭ چوڭلۇقتىكى يېقىلغۇ باتارېيە ھەرىكەت كۈچى بۆلىكى سەپلەنگەن.
ھىدروگېن يېقىلغۇ باتارېيەسىنىڭ ئەڭ يۇقىرى قۇۋۋىتى 136 ئات كۈچى بولۇپ، لىتىي باتارېيەسىنىڭ ياردىمىدە. ئېلېكتىر ماتورنىڭ ئەڭ يۇقىرى قۇۋۋىتى 176 ئات كۈچىگە يېتىدىكەن.
ئەگەر ھىدروگېن يېقىلغۇسى تۈگەپ كەتسە، Clarity Fuel Cell ئۈچ مىنۇتتىلا 70Mpa لىق يۇقىرى بېسىمدىكى ھىدروگېن باكىنى تولدۇرالايدىغان بولۇپ، بۇ يېقىلغۇ بىلەن ئۇدا 482 كىلومېتىر يول يۈرەلەيدىكەن.
خوندا شىركىتى ياپونىيەدە Clarity Fuel Cell ئاپتوموبىلىنى بازارغا سېلىش بىلەن بىر ۋاقىتتا، يەنە ئېلىپ يۈرۈشكە بولىدىغان Power Exporter 9000 ھىدروگېن گازى توك مەنبەسىنىمۇ سېتىشقا باشلىغان. باھاسى 1.18 مىليون ياپونىيە يېنى (تەخمىنەن 67 مىڭ يۈەن) بولۇپ، ئاپتوموبىلغا ‹‹ھەرىكەتچان باتارېيە›› قىلىپ ئىشلەتكىلى بولىدىكەن.
