نۆۋەتتە خەلقئارادا ھەر بىر تۇڭ نېفىتنىڭ باھاسى40 -30 ئامېرىكا دوللىرى ئارىلىقىدا تەۋرىنىپ تۇرۇۋاتىدۇ، مۇشۇنداق كېتىۋېرىدىغان بولسا، نېفىت كارخانىلىرىنىڭ مەۋجۇت بولۇش بوشلۇقى تېخىمۇ كەسكىن سىناققا دۇچ كېلىدۇ. يەر شارى خام نېفىت سودىسىنىڭ تەخمىنەن يېرىمىنىڭ ئۆلچىمى بولغان برېنت خام نېفىتىنىڭ باھاسى، ھەپتىنىڭ بىرىنچى كۈنى 40 ئامېرىكا دوللىرىغا چىقىپ، 4-دېكابىردىن بۇيانقى ئەڭ يۇقىرى باھادا بازار يېپىلدى. برېنت خام نېفىتنىڭ باھاسى 1-ئايدىكى ئەڭ تۆۋەن نۇقتىدىن % 40 ئۆستى.
جۇڭگو نېفىت-تەبىئىي گاز گۇرۇھى شىركىتىنىڭ باش مۇدىرى ۋاڭ يىلىن مۇنداق دېدى: ھەر بىر تۇڭ نېفىت باھاسىنىڭ 40 - 30 دوللار ئارىلىقىدا تەۋرىنىپ تۇرۇشى ئۇزۇنغا بارمايدۇ، چۈنكى ھەر بىر تۇڭ نېفىتنىڭ باھا دائىرىسى 60 - 50 دوللار ئارىلىقىدا بولسا مۇۋاپىق بولىدۇ.
ۋاڭ يىلىن چارشەنبە كۈنى بېيجىڭدا زىيارەتنى قوبۇل قىلغاندا مۇنۇلارنى بىلدۈردى، شىركەت تەننەرخ تۆۋەنلىتىش ئارقىلىق تۆۋەن ئېنېرگىيە باھاسىغا تاقابىل تۇرىدۇ، بىرىنچى سەپتىكى نېفىت-تەبىئىي گاز ئىشچىلىرىنى قىسقارتمايدۇ.
جۇڭگو نېفىتچىلىكى بولسا جۇڭگودىكى ئەڭ چوڭ نېفىت-تەبىئىي گاز ئىشلەپچىقىرىش شىركىتى. ۋاڭ يىلىن مۇنۇلارنى بىلدۈردى، شىركەت ئىشچىلار ئۈچۈن يېڭى پۇرسەت يارىتىپ، ئۇزاق مۇددەتلىك تۆۋەن نېفىت باھاسى مۇھىتىغا قارىتا يىرىك تەرەققىيات پىلانىنى تەييارلايدۇ. ۋاڭ يىلىن مۇنداق دېدى : مەزكۇر دۆلەت كارخانىسى نۆۋەتتە پائال تۈردە چەتئەل بازارلىرىدىكى سېتىۋېلىشنى مۇھىم ئورۇنغا قويۇۋاتىدۇ، رۇسىيە بىلەن ئىراندىكى مەبلەغ سېلىشنىڭ كۆلىمىنى كېڭەيتمەكچى.
ۋاڭ يىلىن مۇنداق دېدى، شىركەت ۋە خەلقئارا نېفىت شىركەتلىرى ئوخشاش بولمايدۇ، كاپىتالىزم دۇنياسىدا، ئادەم قىسقارتىش تەننەرخىنى كېمەيتىشنىڭ ئەڭ قولايلىق بولغان ئۇسۇلى، گەرچە تۆۋەن نېفىت باھاسى خىرىس ئېلىپ كەلگەن بولسىمۇ، شىركەت كەڭ كۆلەمدە خادىم قىسقارتمايدۇ.
