ئاپتونوم رايونىمىزنىڭ بۇ يىللىق ئادەتتىكى ئالىي مەكتەپلەرگە ئوقۇغۇچى قوبۇل قىلىش خىزمىتى بويىچە ئورۇنلاشتۇرۇشىغا ئاساسەن، ئاز سانلىق مىللەتلەر تىلى(ئۇيغۇرچە، قازاقچە، قىرغىزچە)دا ئىمتىھان بەرگەن ئوقۇغۇچىلار، ‹‹قوش تىل›› سىنىپىدا ئوقۇغانلار ۋە خەنزۇ تىلىدا ئىمتىھان بەرگەن ئاز سانلىق مىللەت ئوقۇغۇچىلىرىدىن تېخى ئالىي مەكتەپكە قوبۇل قىلىنمىغانلار 15-ئاۋغۇست ئۈرۈمچى ۋاقتى سائەت 6دىن سائەت 18گىچە شىنجاڭ ئوقۇغۇچى قوبۇل قىلىش تورى (www.xjzs.edu.cn)دا تولۇق كۇرس تۈركۈمى بويىچە قايتا ئارزۇ تولدۇرسا بولىدۇ، قايتا تولدۇرۇلغان ئارزۇغا 16-، 17-ئاۋغۇست ئارخىپ چىقىرىلىپ، ئوقۇغۇچى قوبۇل قىلىنىدۇ.ئوقۇغۇچىلار قايتا ئارزۇ تولدۇرۇشتىن ئىلگىرى شىنجاڭ ئوقۇغۇچى قوبۇل قىلىش تورىدىن قوبۇل قىلىنىش ئەھۋالىنى تەكشۈرسە، ئوقۇغۇچى قوبۇل قىلىش پىلانى ئورۇندالمىغان ئالىي مەكتەپ ۋە كەسىپلەرنىڭ ئەھۋالى بىلەن تونۇشسا بولىدۇ.

ئاپتونوم رايونلۇق ئوقۇغۇچى قوبۇل قىلىش كومىتېتى ئىشخانىسىدىن ئۇقۇشىمچە، نامرات رايونلاردىن مەخسۇس تۈر پىلانى بويىچە مەخسۇس كۇرس تۈركۈمىدە، مەخسۇس كۇرس ئالدىنقى تۈركۈمىدە ۋە كېيىنكى تۈركۈملەردە ئاز سانلىق مىللەت تىلى (ئۇيغۇرچە، قازاقچە، قىرغىزچە)دا ئىمتىھان بەرگەنلەردىن ئوقۇغۇچى قوبۇل قىلىش ئەسلىي پىلاندىكى ۋاقىتتىن كېچىكتۈرۈلگەن.خەنزۇ تىلىدا ئىمتىھان بەرگەن ئوقۇغۇچىلاردىن مەخسۇس كۇرس 1-تۈركۈمىدە ئوقۇغۇچى قوبۇل قىلىش پىلان بويىچە 15-ئاۋغۇست باشلىنىدىكەن، بۇ تۈركۈمدە ئاپتونوم رايونىمىز ئىچى-سىرتىدىكى 150نەچچە ئالىي مەكتەپ ئاپتونوم رايونىمىزدىن 36مىڭ 465ئوقۇغۇچى قوبۇل قىلىدىكەن.