ئۈرۈمچى كەچلىك گېزىتى خەۋىرى:
ئىزھار قىلىنغان مۇھەببەت رەت قىلىنغاندا مۇھەببەتنى كۈچ ئىشلىتىپ مەجبۇرىي قولغا كەلتۈرمەكچى بولغان ئاشىق ئاشىق ئەمەس، بەلكى پاسىقتۇر.
مۇھەببەت ئائىلىدىكى گۈل ئەمەس، يازدا ئېچىلىپ قىشتا خازان بولىدىغان. مۇھەببەت ئادەتتىكى بۇلبۇل ئەمەس، باھاردا سايراپ كۈزدە غايىب بولىدىغان. مۇھەببەت مەشۇقنىڭ قەلبىدە ھامان ئېچىلىپ تۇرىدىغان ئەبەدىي توزىماس گۈل، ئاشىقنىڭ تىلىدا ئەبەدىي سايراپ تۇرغان ۋاپادار بۇلبۇل.
چىن مۇھەببەت ئۆزىنى تەشۋىق قىلىش بىلەنلا قولغا كەلمەيدۇ، مۇھەببەتنىڭ ئەڭ ئەشەددىي دۈشمىنى ئۈجمە كۆڭۈللۈكتۇر.
سەن سۆيگۈنىڭنىڭ گۈزەللىكىنى ئۇنىڭ سۇمبۇل چېچىدىن، قەلەم قېشىدىن، ئاي يۈزىدىن، شەھلا كۆزىدىن، غۇنچە لېۋىدىن، مەرۋايىت چىشىدىن، زىلۋا قامىتىدىن، ئومۇمەن زاھىرى ھۆسىن جامالىدىن ئىزدىمەي، بەلكى ئۇنىڭ گۈزەللىكىنى قەلبىدىن ئىزدىگىن.
سەن بىرنى سۆيدۈم دېدىڭ، شۇنىڭ بىلەن مۇھەببەت تىكلەندىمۇ؟ ياق! سەن ئۇنى سەمىمىي ھېسسىياتىڭ، ۋاپادارلىقىڭ، پىداكارلىق ۋە ۋىجدانىڭ بىلەن سۆيگىن، ئاندىن ئۇ مۇھەببەت بولىدۇ.
ئەگەر مۇھەببەتكە تەبىر بېرىشكە توغرا كەلسە، چىن مۇھەببەت ئىلىم، پەلسەپە، سەنئەت، ۋاپا، ساداقەت ۋە پىداكارلىقنىڭ يىغىندىسى دېيىلسە يەنىمۇ ئازلىق قىلىدۇ.
