ھەر كىشىنىڭ ئۆزىگە تۇشلۇق ‹‹سىرى›› بولىدۇ. پەرزەنتلىرىمىزنىڭمۇ ھەم شۇنداق. بۇ نورمال پسىخىك ھادىسە. بۇ ‹‹سىر›› پەرزەنتلەرنىڭ ئەركىنلىك دۇنياسى، مىجەزىنىڭ مۇجەسسەملەشكەن ئىپادىسىدۇر. ئاتا – ئانىلار بۇ ‹‹سىر››نى خالىغانچە كوچىلىماسلىقى كېرەك.
بالىلارنىڭ ھەرخىل ياش باسقۇچىدا ئۆزىگە تۇشلۇق ‹‹سىر››لىرى بولىدۇ. مەسىلەن: ئوقۇش يېشىدىن ئىلگىرىكى مەزگىللىرىدە، بالىلار ئۆزى ياقتۇرىدىغان ئويۇنچۇقلىرى، كۆزىگە چىرايلىق كۆرۈنگەن نەرسىلىرىنى ئۆزى بىلىدىغان جايغا يوشۇرۇپ قويىدۇ. بۇ ئۇلارنىڭ ‹‹سىرى›› بولىدۇ. ئوقۇش يېشىنىڭ دەسلەپكى مەزگىللىرىدە، ئۇلارنىڭ ئۆزى ياسىغان، قۇراشتۇرغان، ئەمما بىروۋلارغا كۆرسەتكۈسى كەلمەيدىغان نەرسىلىرى، ساددا، كۈلكىلىك قىزىقىشلىرى ۋە ئويۇنلىرى بولىدۇ، ئۇلار بۇنى مەخپىي ساقلايدۇ، بۇ ئۇلارنىڭ ‹‹سىرى›› ھېسابلىنىدۇ. ئۆسمۈرلۈك دەۋرىگە قەدەم قويغاندا، بالىلارنىڭ كۈندىلىك خاتىرىسى، دوستلىرى، يۈكسەك غايىلىرى بولىدۇ، ئۆزىنىڭ مىجەزىگە خاس تۇرمۇش، ئۆگىنىش ئادەتلىرى، ھەتتا يات جىنىستىكى دوستلىرىمۇ بولىدۇ. پەرزەنتلەر بۇلارنىڭ ئىچىدىكى بەزىلىرىنى ئۆزىچە ‹‹سىر›› تۇتىدۇ، ئاتا – ئانىلىرىدىن يوشۇرىدۇ. بۇلارنى ئۇلار ئاتا – ئانىسىغا ئۆز ئىختىيارى بىلەن ئاشكارىلىمىغىچە، ئاتا – ئانا ئۆز مەيلىچە بۇ ‹‹سىر››نى كوچىلىسا بولمايدۇ، ئۇنىڭغا ئامال بار ئېھتىياتچانلىق بىلەن يېقىنلىشىش كېرەك. چۈنكى، بالىلار ئۆزىنىڭ سىرلىرىنى ناھايىتى مۇھىم بىلىدۇ. روسىيىنىڭ بالىلار پسىخولوگى سۇخۇملنىسكى ‹‹ئاتا – ئانىلار تەربىيەشۇناسلىقى›› دېگەن كىتابىدا:‹‹ھەرقانداق ئاتا – ئانا ھوقۇقىنى ئۆز لايىقىدا ئىشلىتىشى، ھوقۇقىنى ئىشلەتكەندە ئۇنى قايسى چەكتە توختىتىشنى بىلىشى، بالىلارنىڭ سىرلىق دۇنياسىنىڭ قاچان، قايسى جايدىن باشلانغانلىقىنى بىلىشى كېرەك. بالىلار ئۆزلىرىنىڭ بۇ سىرلىق دۇنياسىغا ئىنتايىن كۆڭۈل بۆلىدۇ. چوڭلار ئۇنىڭغا ئارىلاشماسلىقى كېرەك›› دەپ يازغانىدى. ئاتا – ئانىلار بالىلارنىڭ سىرلىرىنى بىلىش ئۈچۈن قوپاللىق قىلسا، كۆڭۈلدىكىدەك ئۈنۈمگە ئېرىشەلمەيدۇ. بالىلارنىڭ ‹‹سىر››ىغا يېقىنلىشىش ئۇلارغا قىلىنغان ھۆرمەت، يول قويۇشتۇر. بۇنىڭ بىلەن سىزمۇ پەرزەنتىڭىزنىڭ ھۆرمىتىگە ئېرىشەلەيسىز. لېكىن بۇ سىزنى بالىڭىزنىڭ سىرى بىلەن كارىڭىز بولمىسۇن، دېگەنلىك ئەمەس. زۆرۈر تېپىلغاندا، بالىڭىزنىڭ بەزى ئىشلىرىغا ئارىلاشسىڭىز بولىدۇ، ئەمما چەكتىن ئاشۇرۇۋەتمەڭ. ئاتا – ئانا پەرزەنتىنىڭ بولمىغۇر ھەۋەسلەرگە بېرىلىپ قالغانلىقىنى بايقىغاندا، بالا ئۆيگە كەچ قايتسا ياكى سىرتتا قونۇپ قالسا، مۇشۇ جەھەتتىكى سىرلىرىنى جەزمەن بىلىپ، ئۇنىڭغا توغرا يولنى كۆرسىتىپ تەربىيە بەرسە بولىدۇ.مۇھىمى، تەربىيە بېرىش پۇرسىتىنى ئوبدان ئىگىلەپ، سەۋرچانلىق بىلەن كۆيۈنۈش ئاساسىدا مەسىلىنى بىر تەرەپ قىلسىڭىز، ئاقىلانىلىك قىلغان بولىسىز. ئەگەر ئۇنىڭ ئەكسىچە پەرزەنتىڭىزنىڭ ئىشىغا قوپاللىق بىلەن ئارىلىشىپ، ئۇلارنىڭ غۇرۇرىغا تەگسىڭىز، بۇنداق تەربىيە پەرزەنتىڭىزنى يامان يولغا ئىتتىرىپ قويۇشى مۇمكىن. شۇڭا ئاتا – ئانىلار پەرزەنتلەرگە تەربىيە بەرگەندە، سەۋرچانلىق بىلەن ئاساسىي ئورۇنغا قويۇپ، ئۆزىنىڭ بالىلىق چاغلىرىدىكى ئۈلگىلىك پائالىيەتلىرىدىن ئىجابىي مىساللارنى كەلتۈرۈپ بالىلارنىڭ كۆڭلىنى ئۇتۇشقا، ئۇلارغا ئۈلگە بولۇشقا ماھىر بولۇشى كېرەك.
پەرزەنت تەربىيىسى بىر مۇرەككەپ جەريان، بۇ جەرياننى توغرا يۆنىلىشتە تاماملاش ئاتا – ئانىنىڭ بۇرچى. شۇنداق ئىكەن، بۇنىڭغا ئالدىراقسانلىق بىلەن قوپاللىق قىلىشقا بولمايدۇ. بولمىسا ‹‹شېخىنى ئىگىمەن دەپ، سۇندۇرۇپ قويغان››غا ئوخشاش ئىش بولىدۇ.يېتەكلەشنى
