كىرپىكىم جۈپلەشمەس، جۈپلىشەلمەس ھەم
ساداقەتجان ھاجى
تۈنلىرى خىيالەن سېغىنسام سېنى،
كىرپىكىم جۈپلەشمەس، جۈپلىشەلمەس ھەم.
قەدەھتە چاقنىغان سۈزۈك مەي كەبى
كۆزۈمدە يالتىراپ تۇرىدۇ شەبنەم.
كۆزۈمدە سۆيگۈنىڭ سۈزۈك شارابى،
ۋىسالمۇ ئەمەس ھەم ھىجرانمۇ ئەمەس.
تۈنلىرى خىيالەن سېغىنسام سېنى،
سۈزۈك مەي سېھرىدىن كىرپىكلىرىم مەس.
تۈنلىرى خىيالەن سېغىنسام سېنى،
كىرپىكىم جۈپلەشمەس، جۈپلىشەلمەس ھەم.
سەن ئۈچۈن ساقلىدىم ئارىسىدا مەي،
ئىنتىزار قەلبىڭگە بولسۇن دەپ مەلھەم.
كىرپىكىم جۈپلەشمەس، جۈپلىشەلمەس ھەم.
سەن ئۈچۈن ساقلىدىم ئارىسىدا مەي.
كىرپىكىم جۈپلەشمەس، جۈپلىشەلمەس ھەم،
جانانىم شۇ مەينى ساڭا ئىچۈرمەي.
