مېھرىئاي ئىمام
پىراقنىڭ كۈلپىتى ساقىغان نۇردا
ئىشقنىڭ لەززىتى، ئارمىنى باردۇر.
تۇياقلار كىشنىگەن ئاساۋ تۇيغۇدا
لەۋ ياققان يايلاقنىڭ ۋىسالى باردۇر.
قامچاڭدىن تۆكۈلەر تاغلىق ھاياجان،
تاغلارنى تىترىتىپ يايرىغان دەمدە.
تاشلىغان سالماڭنىڭ سەلتەنەتلىرى
چاراسلار بوشلۇقتا، ئويناق سۈبھىدە.
سەن بىلەن ئۈلپەتتۇر تىركەشكەن ئولجاڭ
دېڭىزدەك دولقۇنلاپ باقار يولۇڭغا.
ۋاقىتنىڭ نۆللىرى سۆيۈشكەن دەقىق
قەلبىڭدە تۈنەيدۇ ياپيېشىل دۇنيا.
