بۇرۇتلىرىم ياسار ئىستىھكام
ئا. مۇھەممەت باغۋەن
چاسا قۇياش سالماقتا ئوكۇل ،
زىمىن زوكاممىكىن بىلمىدۇق .
بەلبىغىمنى چىشلىگەن، تەشكەن ،
بۇدۇشقاققا قاپاق تۈرمىدۇق.
دىكابىردا تومۇزنى ساقلاپ،
كەڭ قورسىقىم ساڭگىلاپ كېتەر .
شەبنەم بىلەن قىلغان ۋەدىلەر ،
بەدبۇي تەملىك داڭگالنى كۈتەر .
ئىمىر -چىمىر يۇلتۇز يېزىقى ،
ئۆتمۈشلەرنى كۆرسىتەر غۇۋا .
ئەۋلاتلارنىڭ ئەبجەش دىلىنى،
داۋالايدۇ كىرىستال ھاۋا .
چارچىمايدۇ تۇغۇتلۇق دوقمۇش ،
ئىمىتىدۇ لايغەزەل گۈلنى .
رىئاللىققا ئۈمچىيىپ قويۇپ ،
يالىمايلى قولنىڭ كىرىنى .
پەسىللەرنىڭ ھۆل – يېغىنى كۆپ،
تەرلىمەيدۇ دادام كۆڭلىكى .
سۆكۈلمەكتە سېيرىتمىسىدىن ،
ئائىلىنىڭ ساددا بىرلىكى .
تاپانلاردا بولمىغاچ ماركا،
قىيساپ يۈرۈپ داۋان ئۆرۈلدى .
سەمىيمىيەت بولغاچقا شاكال،
قان – تومۇردا ئاپەت كۆرۈلدى .
ئوسۇرۇڭلار يىغلاڭغۇ يىللار ،
ئاشقازاندىن چىقمىسۇن چاتاق .
مىليۇن بامدات جان ئۈزۈپ كەتتى ،
دەرۋازامنىڭ كۆزلىرى چاپاق .
جاۋاپلاردا تىلەمچى بولۇپ ،
سوئاللارغا ئېسىلىپ ئۆلەي.
قارا ماركا قىلماي ئەخلاقنى
ئەقىدىنى بۆشۈككە بۆلەي .
تاپاۋىتىم ئەمەس سوغۇق سۇ .
مەنمۇ يىغىپ قوياي غەزىنە .
رەستىلەردە كۈلەيلى ئەركىن ،
سوغۇق دۇنيا قىلمىسۇن تەنە.
جىن چىراققا چاتتىم تورىمنى ،
لېنىيەگە ئۇلاندىم بۈگۈن .
چېقىر خىيال يالغان سۆزلىمە ،
خۇمدانلارغا سولاندىم بۈگۈن.
ھاسىلاردىن كۆك باش چىقرىپ ،
كۈز پەسلىدە بولدۇم يىڭناغۇچ .
سول قولۇمدا يازسام شەجەرە ،
چىن ۋەدىلەر كۆرىنەر سارغۇچ .
بۈرگىلەرگە بەرمەي تەسەللىي ،
ئۆلتۈرىمەن يۇمشاقلىقىمنى .
بۇرتىمدا ياساپ ئىستېھكام ،
تىرىلدۈرۈپ تۇرىمەن مىڭنى .
يازما ھوقۇقى: لوندون ئۇيغۇر ئانسامبىلى توربېكىتى
يازما ئادىرىسى: بۇرۇتلىرىم ياسار ئىستىھكام
