شىنخۇا ئاگېنتلىقى، ئۈرۈمچى، 14 - سېنتەبىر تېلېگراممىسى. جۇڭگو سۇڭ چىڭلىڭ فوندى جەمئىيىتى 14 - سېنتەبىر ئاپتونوم رايونلۇق تەنتەربىيە ئىدارىسى بىلەن شىنجاڭ سۇڭ چىڭلىڭ پۇتبول مەكتىپى(3 - قارارلىق)نى ئورتاق باشقۇرۇش كېلىشىمى ئىمزالىدى، سۇڭ چىڭلىڭ فوندى جەمئىيىتى كېلىشىمگە ئاساسەن پۇتبولچىلارنى تەربىيەلەش، مەشىقلەندۈرۈش ۋە مۇسابىقە ئىشلىرى ئۈچۈن كەلگۈسىدىكى ئۈچ يىلدا شىنجاڭ سۇڭ چىڭلىڭ پۇتبول مەكتىپىنى ھەر يىلى 1 مىليون يۈەن مەبلەغ بىلەن تەمىنلەيدۇ.

    مۇخبىرنىڭ كېلىشىم ئىمزالاش مۇراسىمىدىن ئىگىلىشىچە، جۇڭگو سۇڭ چىڭلىڭ فوندى جەمئىيىتى شىنجاڭ پۇتبولچىلىقىنى يەنىمۇ تېز تەرەققىي قىلدۇرۇش ئۈچۈن، 2 - قارارلىق ياردەم بېرىش مەزگىلى (2009 - يىلىدىن 2013 - يىلىغىچە) ئاخىرلاشقاندىن كېيىن، شىنجاڭ تەنتەربىيە تارماقلىرى بىلەن داۋاملىق ھەمكارلىشىپ، شىنجاڭ سۇڭ چىڭلىڭ پۇتبول مەكتىپىنى داۋاملىق ئورتاق باشقۇرىدىكەن.