پەلەستىندە ئىككى دېڭىز بار. بىرسى، بېلىقلار پىلتىڭلاپ ئۈزۈپ يۈرۈيدىغان تىرىك دېڭىز. ئۇنىڭ شوخ بۇژغۇنلىرى دېڭىز قىرغىقىغا ئۇرۇلۇپ تۇرىدۇ. دېڭىز ساھىلىدا بۈك - باراقسان دەرەخلەر قەد كۆتۈرگەن. ئۇنىڭ ئۇسسىغان يىلتىزلىرى دېڭىز باغرىغا سوزۇلغان. ئۇلار دېڭىز سۈيىدىن قانغۇچە ئىچەلەيدۇ.
ئىئوردان دەرياسىنىڭ تاغلار ئارىسىدىن ئېقىپ كەلگەن زۇمرەت سۇلىرى بۇ دېڭىزغا قۇيۇلىدۇ. شۇڭلاشقا دېڭىز سۈيى قۇياش نۇرىغا چۆمۈلۈپ خۇشال ناخشا ئېيتىدۇ. كىشىلەر دېڭىز بويىغا ئۆي سالسا، قۇشلار دېڭىز بويىغا ئۇۋا سېلىشىدۇ. ئەتراپتىكى جىمى ھاياتلىق مۇشۇ دېڭىز بولغاچقىلا بەختىيار تۇرمۇش كەچۈرىدۇ.
ئىئوردان دەرياسى جەنۇبقا قاراپ ئېقىپ يەنە بىر دېڭىزغا قويۇلىدۇ.
بۇ دېڭىزدا ئۈزىدىغان بېلىق يوق، شامالدا لەرزان لەيلەپ، ئۇسسۇل ئوينايدىغان يوپۇرماقلارمۇ يوق. قۇشلارنىڭ سايراشلىرىمۇ ئاڭلانمايدۇ. بالىلارنىڭ خۇشال كۈلكە ساداسى ئەسلا ياڭراپ باقمىغان. كىشىلەر قانچە ئالدىراش ئىشى بولسىمۇ يولنى ئۆزگەرتىپ باشقا يول بىلەن ماڭىدۇ. دېڭىز ئۈستىدىكى ھاۋا دېمىق، سۈيى ئۆلۈك، ئادەم تۇرماق ئۇچار قۇش، جان - جانىۋارلارنىڭ ھېچقايسىسى بۇ سۇنى ئىچمەيدۇ.
بۇ ئىككى دېڭىزنىڭ ئارىلىقى يىراق ئەمەس، لېكىن ئۇلارنىڭ ئوتتۇرىسىدىكى پەرق نېمىشقا بۇنچىۋالا چوڭ؟ بۇ ئىشقا ئىئوردان دەرياسى سەۋەبچى ئەمەس. ئىككى دېڭىزغا ئېقىپ كىرىدىغان دەريانىڭ سۈيى ئوپمۇئوخشاش. دېڭىز تۇرغان تۇپراقنىمۇ ئەيىبلەشكە بولمايدۇ. دېڭىز بويىدىكى يېزىلارمۇ ئەيىبلىك ئەمەس.
پەرق مانا بۇ يەردە: گارىلى دېڭىزى ئېقىپ كىرگەن دەريا سۈيىنىڭ ھەممىسىنى ئۆزىنىڭ قىلىۋالمايدۇ. ئىئوردان دەرياسىدىن بىر تامچە سۇ ئېقىپ كىرسە، گارىلى دېڭىزى بىر تامچە سۇنى چىقىرىپ تۇرىدۇ. قوبۇل قىلىش بىلەن بېغىشلاش ئوخشاش سۈرئەتتە ئېلىپ بېرىلىدۇ.
يەنە بىر دېڭىز بولسا تېخىمۇ دانا. ئۇ دەريا سۈيىنى ئىنتايىن بېخىللىق بىلەن  پۈتۈنلەي ساقلىۋالىدۇ. مەيلى سىز ئۇنى قانچىلىك غىدىقلاڭ، ئۇ يەنىلا جىمجىت تۇرۇۋېرىدۇ. قىلچىمۇ مىدىرلاپ قويمايدۇ، بىر تامچا سۈيىنىمۇ سىرتقا چىقارمايدۇ.
گارىلى دېڭىزى بېغىشلاشنى بىلگەچكە، سۈيى تىرىك تۇرالىغان. يەنە بىر دېڭىز بولسا  بېغىشلاشنى قىلچە خالىمىغاچقا، كىشىلەر ئۇنى «ئۆلۈك دېڭىز» دەپ ئاتىغان.
بۇ دۇنيادا ئىككى خىل ئىنسان بار. پەلەستىندە ئىككى خىل دېڭىز بار.

(«ئوقۇرمەنلەر» ژۇرنىلىنىڭ 2004 - يىللىق 4 - سانىدىن نۇرگۈل ھېيت تەرجىمە قىلدى)
ژۇرنىلىمىز 2004.6 - سانىدىن