ئىنسانىيەت تارىخىنى ۋاراقلايدىغان بولساق، ئىجتىمائىي ۋە تەبىئىي ئامىللار سەۋەبىدىن پەيدا بولغان ئەڭ جاپالىق، قىيىن، قاباھەتلىك چاغلاردا «مېھىر - مۇھەببەت»نىڭ ھەممە نەرسىدىن ئۈستۈن ئورۇندا تۇرۇپ، ئۆزىدىكى «ئىتتىپاقلىق، ھەمكارلىق، دوستلۇق» سېھرىي كۈچى بىلەن ئىنسانىيەتنى قىيىن ئەھۋاللاردىن قۇتۇلدۇرۇپ كەلگەنلىكىنى كۆرەلەيمىز. مەسىلەن، 20  -ئەسىرنىڭ ئوتتۇرىلىرىدا ناتسىستلارنىڭ قاباھەتلىك تۆمۈر تاپىنى پۈتۈن دۇنيا خەلقىنى يەنچىش ئۈچۈن خىرىس قىلغاندا، دۇنيادىكى ئادالەتپەرۋەر ئەل ھۆكۈمەتلىرى، خەلقلىرى بىر ياقىدىن باش چىقىرىپ، كۈچلۈك ھەيۋە بىلەن باستۇرۇپ كېلىۋاتقان ناتسىست ئارمىيىسىنى بويسۇندۇرۇپ، دۇنيانى بىر قېتىملىق قورقۇنچلۇق چۈشتىن قۇتۇلدۇرۇپ قالدى؛ ئەمگەكچان، تىرىشچان جۇڭگو خەلقى ياپون جاھانگىرلىكى بىلەن قانلىق كۈرەش قىلغان يىللاردا ھەق - ئادالەتنى ياقلىغۇچىلار جۇڭگو خەلقى بىلەن بىر سەپتە تۇردى؛ كانادالىق ئىنتېرناتسىئونالىزم جەڭچىسى، دوختۇر بېتيۇن قاتارلىق كىشىلەر ھاياتىنىڭ خەۋپكە ئۇچرىشىغا قارىماي جۇڭگوغا كېلىپ، جۇڭگو خەلقىنىڭ ئازادلىق ئىشلىرى ئۈچۈن ئەڭ قىممەتلىك ھاياتىنى تەقدىم قىلدى. ئەسلىدە، يۈكسەك دەرىجىدىكى ئىنسانپەرۋەرلىك ۋە مېھىر - مۇھەببەت كۈچى بېتيۇن قاتارلىق كىشىلەرنى جۇڭگوغا ئېلىپ كەلگەنىدى؛ 2008 - يىل 5 - ئاينىڭ باشلىرىدا  ئىسسىق بەلۋاغ بورىنىنىڭ بېرما دۆلىتىگە ھۇجۇم قىلىشى بىلەن، ئىنتايىن ئېچىنىشلىق ئۆلۈم  - يېتىم ئەھۋالى كۆرۈلۈپ، نۇرغۇن مال  - مۈلۈك زىيانغا ئۇچراپ، بېرما ھۆكۈمىتى ۋە خەلقى ئېغىر كۈنگە قالغاندا، جۇڭگونى ئۆز ئىچىگە ئالغان دۇنيا خەلقى مېھىرلىك ياردەم قولىنى سۇنۇپ، بېرما خەلقىنىڭ بۇ قېتىملىق  ئاپەت ۋە قىيىنچىلىقتىن ئوڭۇشلۇق ئۆتۈۋېلىشىغا زور دەرىجىدە ھەمدەمدە بولدى؛ يەنە بۇ يىل 5 - ئايدا سىچۇەن ئۆلكىسىنىڭ ۋېنچۇەن قاتارلىق جايلىرىدا يۈزبەرگەن پەۋقۇلئاددە زور يەر تەۋرەش ئاپىتىدە ئېغىر ئۆلۈم  - يېتىم ئەھۋالى كۆرۈلدى، مال  -مۈلۈك ئىنتايىن زور دەرىجىدە زىيانغا ئۇچرىدى. پارتىيە مەركىزىي كومىتېتى پۈتۈن مەملىكەت خەلقىنى ئەڭ زور دەرىجىدە سەپەرۋەرلىككە كەلتۈرۈپ، ئاپەت رايونىغا ياردەم بېرىشكە تەشكىللىدى. ھەرقايسى ئۆلكە، شەھەردىكى ھەر مىللەت خەلقى ئاكتىپلىق بىلەن پۇل، ماددىي بۇيۇم ئىئانە قىلىپ، ئاپەت رايونىدىكىلەرگە بولغان كۆڭلىنى ئىپادىلىدى. ئېلىمىزنىڭ تەيۋەن ئۆلكىسىدىن ئالاھىدە تەشكىللەنگەن تېخنىكىلىق قۇتقۇزۇش ئەترىتى سىچۈەنگە كېلىپ، قۇتقۇزۇش خىزمىتىگە قاتناشتى؛ ياپونىيە، كورىيە، سىنگاپور، روسىيە فېدراتسىيىلىرىدىن ياردەم بېرىش، قۇتقۇزۇش - داۋالاش ئەترەتلىرى كەلدى. ئامېرىكا، سەئۇدى ئەرەبىستانى، پاكىستان قاتارلىق نۇرغۇنلىغان چەت ئەل ھۆكۈمەتلىرى جۇڭگو خەلقىنىڭ ئاپەتتىن قۇتقۇزۇش، ئاپەتتىن كېيىن يۇرت  -ماكانىنى قايتا قۇرۇش ئىشلىرىغا ئوخشاشمىغان دەرىجىدە ماددىي، مەنىۋى ياردەملەرنى بەردى. دېمەك، بۇ يەردە مېھىر  -مۇھەببەت دۆلەت، مىللەت چېگرىسىدىن زور دەرىجىدە ھالقىپ كەتتى. ئاپەتتىن قۇتقۇزۇش، داۋالاش، كېسەللىكنىڭ ئالدىنى ئېلىش، ئىگە - چاقىسىز قالغانلارغا ئىگىدارلىق قىلىش، ماددىي بۇيۇملارنى ۋاقتىدا توشۇش، ئاممىغا تارقىتىش... جەھەتلەردە كىشىنى چوڭقۇر تەسىرلەندۈرىدىغان نەمۇنىلىك ئىشلار، كىشىگە يۈكسەك دەرىجىدە ئىلھام -مەدەت  بېرىدىغان ھېكايىلەر بارلىققا كەلدى. يۈكسەك دەرىجىدىكى ئىنسانپەرۋەرلىك، ئالىيجانابلىق، مېھىر - مۇھەببەت ئۆزىنىڭ كارامىتىنى نامايان قىلىپ، پۈتۈن دۇنيا خەلقىنى تەسىرلەندۈردى...
       شۇنداق، ئەمەلىيەتتە ئىنسانلار ئارىسىدىكى مېھىر  -مۇھەببەت چېگرىسز بولۇپ، ئو ئورتاق بىرلىك ئىچىدە ئىنسانىيەتنى بىر رىشتىگە باغلايدۇ. ئۆزئارا خالىس نىيەت ۋە سەمىمىيەت سۇنۇق كۆڭۈللەرگە تەسەللىي ئاتا قىلىپ، تەمتىرىگەنلەرگە ئۈمىدۋارلىق ۋە ھاياتىي كۈچ بەخش ئېتىدۇ. ئۇ ھەربىر ئېرق، مىللەت ياكى خەلقنىڭ دىلىغا ئالەمچە ھېكمەت ۋە سۆيۈنۈش تۇيغۇسى بېغىشلىيالايدۇ. دۇنيا ئەنە شۇ مېھىر  -مۇھەببەتنىڭ كارامىتى بىلەن تېخىمۇ گۈزەللىشىپ - ئاۋاتلىشىپ بارىدۇ. گەرچە، ئاپەت قانچە رەھىمسىز بولسىمۇ، ئۇنى بويسۇندۇرالايدىغان مېھرىبانلىقنىڭ كۈچ  - قۇدرىتى تەڭداشسىز ھەم چەكسىزدۇر!
       بىز بىر - بىرىمىزدىن مېھىر - مۇھەببىتىمىزنى ئايىمايلى، ئىنسانىيەت ئالىمىنى، تەبىئەتنى چىن قەلبىمىز بىلەن سۆيۈپ، ھاياتىمىزنى تېخىمۇ مەنىلىك ئۆتكۈزۈشكە تىرىشايلى. چۈنكى، بىز تەقدىم قىلغان ئاشۇ بىر ئۈلۈش مېھىر - مۇھەببەت بىزنى ھەسسىلەنگەن مېھىر - مۇھەببەتكە نائىل قىلىدۇ!