مەردلەرنىڭ مېھرىدە ياشنايدۇ ئالەم
ئەركىن ئەبەيدۇللا
مۇھەببەت - سۆيگۈدىن تۆرىلەر ئالەم،
ئۈمىد ۋە ئىجادتىن كۆكلەيدۇ بەردەم.
مەردلەرنىڭ ھىممىتى چەكسىز - ساناقسىز،
مەردلەرنىڭ مېھرىدە ياشنايدۇ ئالەم.
مەردلىك، ئۇ __ ئادەمنىڭ ھۆسنىگە زىننەت،
مەردلىكتە ئۇلغىيار شاپائەت، قىممەت.
مەردلەرنىڭ ئالىقىنى كەڭرى داستىخان،
مەردلەرنىڭ قەلبىدە بولمايدۇ مىننەت.
مەردلەرنىڭ كۆكرىكى مۈشكۈلگە قالقان،
مەردلەرنىڭ كۈچىدىن تاغ بولۇر تالقان.
مەردلەرگە دوست تارتىپ بىللە ئىشلىسەڭ،
بىلىنمەس ھارغىنلىق، قاپارماس ئالىقان.
مەرد شۇكى، ئىشىدىن تاپىدۇ نۇسرەت،
كۆڭۈللۈك ئۇنىڭغا رىقابەت، پۇرسەت.
پاراسەت، ماھارەت يېقىن دوستىدۇر،
ئۇ تۇرغان يەرلەردىن يوقىلار غەم، دەرد.
يامغۇرلۇق كۈندە مەرد ئەلگە يېپىنچا،
جۇدۇنلۇق تۈنلەردە يەنە سېلىنچا.
ۋايسىماس ئىشىدىن، يېمەس پۇشايمان،
ئەل ئۈچۈن ھەرقاچان قىلار جان پىدا.
مەردنىڭ بىر قولىدا مەشئەل، يورۇقلۇق،
بىرىدە ئاجىزنىڭ قولى تۇتۇغلۇق.
بەرىكەت بەرگەچ ئەل رىغبەت، دۇئاسى،
ئۇ سالغان كۆچەتمۇ كۆكلەر ئۇتۇقلۇق.
ئىجادتا، تۆھپىدە ئۇ سەپ ئالدىدا،
شىر يۈرەك قاپلان ئۇ، تۇرماس دالدىدا.
قۇۋ تۈلكە كۆزىگە قادالغان مىخ ئۇ،
نامەردنى جېنىدىن قىلىدۇ جۇدا.
مەرد خالىي ھەرقاچان قۇرۇق، پو گەپتىن،
جاپادا ئالدىدا، تەمەسىز نەپتىن.
ناھەققە يولۇقسا بولۇر باغرى تاش،
تەڭداشسىز كۈچلىنەر قەھرى غەزەپتىن.
ئىزگۈ ئىش باشلىسا، چىقار ئۇ باشقا،
قول سوزماس ھۇرۇندەك تەييارغا، ئاشقا.
ئەل ئۈچۈن خىزمەتتە تەڭداشسىز دېسەك،
ئوخشىتىش مۇمكىندۇر ئۇنى قۇياشقا.
چۈشكۈنلۈك، بىخۇتلۇق مەردنىڭ دۈشمىنى،
نۇر بىلەن تاۋلانغان كۆڭۈل ئاسمىنى.
ئەقىدە، ئۈمىدى ئۇنى كۆكلەتكەچ،
ھەق - ناھەق ئالدىدا تاللار راستىنى.
ئەل بىلەن بىللىدۇر مەردنىڭ كۈلكىسى،
ساداقەت، ۋاپادا كۆپنىڭ ئۈلگىسى.
ئەل ھەققى كۆزىنىڭ نۇرى مەرد ئۈچۈن،
شوتا ھەم ئەل ئۈچۈن ئۇنىڭ يەلكىسى.
ئەل - ۋەتەن مەردلەرنىڭ ئالىي بايلىقى،
ئەل سۆيۈش، يۇرت گۈللەش تۇغى - بايرىقى.
ئەلنى بىز بىر دەريا ئاپئاق سۈت دېسەك،
مەرد كىشى شۇ سۈتنىڭ يېغى -قايمىقى.
مەردلەردە بولمايدۇ تەمەننا - گەدەن،
ئۇ شۇنداق گاڭ قانات، يىقىلماس بەدەن.
ئۇ ھىمات ئاجىزغا، مۇشتۇمزورغا مۇشت،
مەرد بىلەن قۇدرەتكە تولىدۇ ۋەتەن.
* * *
مەردانە - مەردلەرگە سالساممەن گىلەم،
مۇھەببەت سۈيىگە تولار پىيالەم.
مەردلىكنىڭ چېچىكى مەڭگۈ توزىماس،
مەردلەرنىڭ مېھرىدە ياشنايدۇ ئالەم.
(ئاپتور: «جۇڭگو مىللەتلىرى» ژۇرنىلى تەھرىر بۆلۈمىدە)
|
تورداشلارنىڭ مۇنازىرىلىرى:
