Salam URUMQI :: سالام ئۈرۈمچى :: 乌鲁木齐综合娱乐网 :: 维吾尔综合门户网:: 新疆维吾尔文化::

ئادەتتە ئولتۇرۇپ خىزمەت قىلىدىغانلاردا ئومۇرتقىغا مۇناسىۋەتلىك كېسەللەرنىڭ پەيدا بولۇش نىسبىتى بىر قەدەر يۇقىرى بولىدۇ. شۇڭا، ئولتۇرۇپ خىزمەت قىلىدىغانلار ئومۇرتقىسىنى ئاسراشتا تۆۋەندىكى بىر قانچە نۇقتىغا دىققەت قىلىشى كېرەك:

1.ھەر سائەتتە بىر قېتىم ياكى 2 سائەتتە بىر قېتىم ئومۇرتقىنى يېنىك ئۇۋۇلاش، پۇت – قوللارنى ھەرىكەتلەندۈرۈش كېرەك. بۇنداق قىلغاندا قان ئايلىنىش راۋانلىشىپ، مۇسكۇللار جانلىنىپ، مېڭە سەگەكلىشىپ، ئومۇرتقىنى ئاسراش مەقسىتىگە يەتكىلى بولىدۇ.

2.ئومۇرتقىنى ئىسسىق ساقلاشقا ئەھمىيەت بېرىش كېرەك. ھاۋا رايى ئەھۋالىغا ئاساسەن مۇۋاپىق كىيىنىش، بەلنى ئىسسىق ساقلاپ، ئومۇرتقىغا سوغۇق ئۆتۈپ قېلىشنىڭ ئالدىنى ئېلىش كېرەك.

3.چۈشتە ئوڭدا يېتىپ ئارام ئېلىش كېرەك. يېرىم كۈن خىزمەت قىلغاندىن كېيىن، چۈشلۈك ئارام ئېلىشتا يېرىم سائەت ئوڭدا يېتىپ ئارام ئالسا، ئومۇرتقىنى ئاسراش ئۈنۈمى كۆرۈنەرلىك بولىدۇ.

4.ياخشى كەيپىياتنى ساقلاش كېرەك. ئۇزۇن مۇددەت روھى چۈشكۈن بولسا، نېرۋا ئىقتىدارى ئاجىزلاپ، سۆڭەك بوغۇمى ۋە مۇسكۇللار بوشىشىپ، ئومۇرتقا ئىقتىدارىغا زىيان يەتكۈزىدۇ.

5.بەدەن چېنىقتۇرۇش كېرەك. بەدەن چېنىقتۇرۇشنى ئىزچىل داۋاملاشتۇرۇش، بولۇپمۇ بويۇن، مۈرە، بەل قىسمىنىڭ مۇسكۇللىرىنى ھەرىكەتلەندۈرىدىغان تەنھەرىكەت تۈرلىرىنى تاللاش كېرەك.

مەنبە : شىنجاڭ پەن-تېخنىكا گېزىتى