ئۇنىۋېرسىتېت تاللاشتىكى 10 نۇقتا 大学の選択

1. قايسى ئۇنىۋېرسىتېتتا قايسى كەسىپنى ئۆگەنمەكچى 大学（学部）と専攻
ئۇنىۋېرسىتېت تاللاش- ئوقۇشقا كېلىشتىكى مۇھىم بىر باسقۇچ بولۇپ، ياپونىيىگە كېلىپ ئوقۇشتىكى مەقسەت، ئوقۇماقچى بولغان كەسىپ دېگەنلەرنى باشتىلا ئېنىق بېكىتىۋالمىغاندا كېيىن پۇشايمان قىلىدىغان ئىش كېلىپ چىقىدۇ.
ئۆز نىشانىڭىزنى ئايدىڭلاشتۇرۇۋالغاندىن كېيىن، ئۆزىڭىز قىزىقىدىغان كەسىپنى ئۆگەنگىلى بولىدىغان ئۇنىۋېرسىتېتنىڭ ماس كەسىپلىرىنى تاللاڭ. مەسىلەن، ئوخشاشلا ئىقتىساد كەسپى دېگەندىمۇ، ئۇنىۋېرسىتېتنىڭ ئوخشىماسلىقىغا قاراپ ئۆتۈلىدىغان دەرسلەرمۇ ئوخشىمايدۇ. شۇڭا ئۇنىۋېرسىتېتنى ئۇنىڭ داڭقى ۋە نامىغا قاراپ تاللىماستىن، كونكرېت ئوقۇتۇش مەزمۇنى قاتارلىق تۈرلەرنى تەپسىلىي تەكشۈرۈشمۇ ئىنتايىن مۇھىم.

2. ئوقۇش پۇلى قانچىلىك 授業料、学費
بۇ كۆپچىلىك ئەڭ كۆڭۈل بولىدىغان مەسىلە. چوقۇم ئۆزىڭىزنىڭ ئىقتىسادىي شارائىتىڭىزغا ئاساسەن قانداقراق ئۇنىۋېرسىتېتقا كىرىشنى بېكىتىڭ. مەسىلەن، خۇسۇسىي ئىگىلىكتىكى بەزىبىر تەبىئىي پەن- سانائەت پەنلىرى ئۇنىۋېرسىتېتى (理工科私立大学) نىڭ تۇنجى يىلىدا تاپشۇرىدىغان ئوقۇش پۇلى 200 تۈمەن يېندىن ئارتۇق، بەزىبىر ئىجتىمائىي پەن ئۇنىۋېرسىتېتلىرى (私立文科大学) نىڭ مۇنەۋۋەر ئوقۇغۇچىلارغا قارىتا ئوقۇش پۇلىنى كەچۈرۈم قىلىدىغان تۈزۈملىرى بار بولۇپ، يىلىغا تاپشۇرىدىغان پۇل 50 تۈمەن يېنغا يەتمەيدۇ. ھەر قايسى ئۇنىۋېرسىتېتلارنىڭ ئوقۇش پۇلىنى كەچۈرۈم قىلىش (授業料減免) ئۆلچەملىرى ۋە ئوقۇش مۇكاپاتىغا ئېرىشكۈچىلەر نىسبىتى قاتارلىقلار ئوخشاش بولمايدۇ. شۇڭلاشقا ئوقۇشقا كېلىشتىن بۇرۇن مۇشۇ تۈردىكى ئۇچۇرلارنى تەپسىلىي تەكشۈرۈپ بىلىۋالغان ياخشى.

3. ئۇنىۋېرسىتېتنىڭ ئورنى قەيەردە، قاتناش قۇلايلىقمۇ 大学の所在地、交通
ئۇنىۋېرسىتېت توكيو (東京) ياكى پايتەخت چەمبىرىكى (首都圏) دىمۇ، ياكى كيوتو (京都)، ئوساكا (大阪)، ناگويا (名古屋)، فۇكۇئوكا (福岡) قاتارلىق شەھەرلەردىمۇ، بۇلارنى چوقۇم ئېنىق بىلىۋېلىڭ. پايتەخت چەمبىرىكى ياپونىيىنىڭ مەركىزى بولۇپ، توكيودىن باشقا چىبا (千葉県)، سايتاما (埼玉県)، كاناگاۋا (神奈川県) قاتارلىق ناھىيىلەرنى ئۆز ئىچىگە ئالىدۇ. دائىرىسى كەڭ، نوپۇس كۆپ بولۇپ، ئوقۇش ۋە ياشاش مۇھىتىمۇ بىر قەدەر مۇرەككەپ. باشقا شەھەرلەردە پايتەخت چەمبىرىكىگە قارىغاندا تىنچ ھەم ئازادە مۇھىت بار بولغاچقا قېتىرقىنىپ ئۆگەنگىلى بولىدۇ. لېكىن مەيلى قەيەردىكى مەكتەپ بولمىسۇن، قاتناشنىڭ قۇلايلىق ياكى ئەمەسلىكى ناھايىتى مۇھىم. ئۇنى ئويلاشقاندا ئادەتتە ئەڭ يېقىن ۋوگزال (電車駅) ياكى بېكەت (バス停) قەيەردە، ئۆيدىن مەكتەپكىچە قانچىلىك ۋاقىت (通学時間) ۋە قانچىلىك كىرا (交通費) كېتىدۇ دېگەنلەرنى ئويلاشماي بولمايدۇ.

(داۋامى بار)
مەنبە: www.injp.com

تىزىملىتىش كارتىسى ئەمەلدىن قالىدۇ 登録証廃止

چەتئەللىك ئوقۇغۇچىلار گېزىتى (留学生新聞) نىڭ 1- مارتتىكى خەۋىرىدە يېزىلىشىچە، چەتئەللىك ئوقۇغۇچىلارنى ئاساس قىلغان ياپونىيىدە تۇرۇۋاتقان چەتئەللىكلەرنى باشقۇرۇش تۈزۈلمىسى چوڭ ئۆزگىرىشكە يۈزلەنمەكتە ئىكەن. قانۇن ۋازارىتى (法務省) دا نۆۋەتتە بۇ يىل ئىچىدە پارلامېنتقا سۇنۇش ئۈچۈن تەييارلىنىۋاتقان چېگرىدىن كىرىشنى باشقۇرۇش قانۇنىنىڭ ئۆزگەرتىش لايىھىسىنىڭ ئاساسلىق ھەم كونكرېت مەزمۇنلىرى ئاخىرقى تۈزىتىش- تەكشۈرۈش باسقۇچىغا كىرىپتۇ. «چەتئەللىك ئوقۇغۇچىلارنى 300 مىڭغا يەتكۈزۈش پىلانى» (留学生受け入れ３０万人計画) غا ئالاقىدار مەزمۇنلار ئىچىدە دىققەتنى تارتىدىغىنى «在留カード ياپونىيىدە تۇرۇش كارتىسى» بولۇپ، مۇناسىۋەتلىك ئەربابلارنىڭ بىلدۈرۈشىچە، قانۇن ۋازارىتىدە بۇندىن كېيىن چەتئەللىكلەرگە قارىتا باشقۇرۇشنى كارتا ئارقىلىق بىرلىككە كەلتۈرۈش پرىنسىپى يېتەكچى ئورۇنغا قويۇلىدىكەن.

بۇ كارتا قوللىنىلسا، ھازىرغىچە ئىشلىتىلىپ كەلگەن «外国人登録証 چەتئەللىكلەر تىزىملىتىش كارتىسى»، يەنى چەتئەللىك ئوقۇغۇچىلار ياپونىيىگە كەلگەندىن كېيىن ئۆزلىرى تۇرۇشلۇق ئورۇندىكى شەھەرلىك ياكى رايونلۇق ھۆكۈمەتنىڭ چەتئەللىكلەرنى باشقۇرۇش ئورگىنىغا تىزىملىتىپ تاپشۇرۇپ ئالىدىغان تىزىملىتىش كارتىسى ئەمەلدىن قالدۇرۇلۇپ، قانۇن ۋەزىرىنىڭ نامىدا تارقىتىلىدىغان ياپونىيىدە تۇرۇش كارتىسىنى ئېلىپ يۈرۈش تەلەپ قىلىنىدىكەن.

بۇنىڭدىكى ئەڭ چوڭ ئۆزگىرىش شۇ ئىكەنكى، ياپونىيىنىڭ چەتئەللىكلەرنى باشقۇرۇش تۈزۈمى ئامېرىكىنىڭكىگە يېقىنلاشتۇرۇلۇش ئارقىلىق، ھازىرغىچە تىزىملىتىش كارتىسىدا تەلەپ قىلىنماي كەلگەن خىزمەت يۆتكىلىش سەۋەبلىك خىزمەت ئورنىنىڭ ئۆزگىرىش ئۇقتۇرۇشى (勤務先変更届け) نىمۇ تاپشۇرۇش تەلەپ قىلىنىدىكەن. شۇ بويىچە بولغاندا، چەتئەللىكلەر ۋىزىنىڭ ئىناۋەتلىك ۋاقتى ئىچىدە خىزمەت يۆتكەلسىمۇ، بۇ يۆتكىلىشنى چوقۇم چېگرىدىن كىرىشنى باشقۇرۇش ئىدارىسىگە تىزىملىتىش زۆرۈرىيىتى تۇغۇلىدىكەن. بۇنىڭ چەتئەللىك ئەمگەك كۈچلىرىنىڭ خىزمەت ئەھۋالى قاتارلىق ئۇچۇرلارنى توغرا ھەم دەل ۋاقتىدا ئىگىلەپ تۇرۇشقا پايدىسى بولىدىكەن.

بۇ يىل 1- ئايدا ئېلان قىلىنغان مەلۇماتتا كۆرسىتىلىشىچە، ياپونىيىدە قانۇنسىز تۇرۇۋاتقان چەتئەللىكلەرنىڭ سانى 113 مىڭ 72 كىشى بولۇپ، 2004- يىل 1- ئايدىكىگە قارىغاندا 48.5 پىرسەنت ئازايغان. ئەينى ۋاقىتتا «قانۇنسىز تۇرۇۋاتقانلار سانىنى 5 يىلدا يېرىمىغا چۈشۈرۈش» پىلانى يولغا قويۇلغان. گەرچە سانلىق مەلۇماتلار بۇ پىلاننىڭ ئوڭۇشلۇق ئىشقا ئاشۇرۇلغانلىقىنى كۆرسىتىپ بەرسىمۇ، لېكىن چەتئەللىكلەرنى تېخىمۇ ئۈنۈملۈك باشقۇرۇش ئۈچۈن يۇقىرىقىغا ئوخشاش مۇناسىۋەتلىك سىياسەت- بەلگىلىمىلەر يىلدىن- يىلغا مۇكەممەللەشتۈرۈلۈپ مېڭىلىدىكەن.

مەنبە: چەتئەللىك ئوقۇغۇچىلار گېزىتى 留学生新聞

«ئەتىگەنلىك مەجبۇرىي گىمناستىكا» 通勤電車

ئالدىنقى ھەپتە پويىزغا ئولتۇرۇپ ئۆيگە قايتىۋېتىپ، توساتتىنلا خىيالىمغا ئىشقا چۈشۈش ئالدىدىكى ئەتىگەنلىك ئالدىراش ھەم قىستاڭچىلىق ۋاقىتتا پويىزنىڭ بىر ۋاگونىغا قانچىلىك ئادەم سىغىدىغانلىقىنى ھېسابلاپ باققۇم كېلىپ قالدى.

پويىز قاتنىشى توغرىلىق سۆزلەپ كەلسەك گەپ تولا. گەپنى سەل بۇرۇندىن باشلىساق، ياپونىيىنىڭ پويىز قاتنىشى مېيجىنىڭ 5- يىلىدىن باشلانغان بولۇپ، ئۇزۇن تارىخقا ئىگە. ھازىرغىچە 137 يىللىق تارىخىي تەرەققىياتنى باشتىن كەچۈرگەن پويىز قاتنىشىنى كۆرگەن ھەر قانداق كىشى قايىل بولماي تۇرالمايدۇ. توكيونى مىسالغا ئالساق، يەر ئاستى پويىز لىنىيىسىدىنلا 10 نەچچىسى بار. ھەر كۈنى بۇ لىنىيىدىن پايدىلىنىدىغان ئادەم سانى 6 مىليوندىن ئاشىدۇ. يەر ئۈستىدىكى پويىز بىلەن قوشۇپ ھېسابلىغاندا، ھەر كۈنى سەھەردە پويىزغا ئولتۇرىدىغان ئادەم سانى 10 مىليونغا يېتىپ بارىدۇ.



باشقا گەپنى قويۇپ تۇرۇپ، باشتا دېگەن قىستاڭچىلىقنى كۆرۈپ باقايلى.



ئەمدى مۇنداق بىر ھېسابنى ئىشلەپ باقايلى. ئادەتتىكى پويىز ۋاگونىنىڭ ئۇزۇنلۇقى 20 مېتىر، كەڭلىكى 2.5 مېتىر ئەتراپىدا. ئورۇندۇقى دېرىزىنى بويلاپ ئورۇنلاشتۇرۇلغان 4 ئىشىكلىك ۋاگوننى مىسالغا ئالساق، ئادەتتە ئۇنىڭ بەلگىلەنگەن يولۇچى سانى 140~160 ئەتراپىدا. ئىككى بېشىدا ياشانغانلار ۋە مېيىپلارنىڭ ئولتۇرۇشى ئۈچۈن 3 كىشىلىك ئالاھىدە ئورۇندىن تۆتى ئورۇنلاشتۇرۇلغان. قالغانلىرى 7 كىشىلىك تۇتاش ئورۇنلار بولۇپ، 4 ئىشىكلىك ۋاگوندا بۇنداق ئورۇندىن ئالتىسى بار. يەنى مۇنداقچە ئېيتقاندا، ئولتۇرىدىغان ئورۇندىن بىر ۋاگوندا ئاران 52 سىلا بار. ئادەتتە 120 دەك ئادەم چىقسا 100 پىرسەنت توشتى دېيىلىدۇ. لېكىن ئەتىگەندە ئىشقا ياكى ئوقۇشقا ماڭغان چاغدا 230 پىرسەنتكىچە توشۇپ كېتىشى ئادەتتىكى ئەھۋال ھېسابلىنىدۇ.



ئەمدى بايىقى ھېسابنىڭ داۋامىنى چىقارساق، ئەتىگەندىكى قىستاڭچىلىقتا بىر ۋاگونغا 250 ئادەم چىقتى دېسەك، ئۇنىڭ 52 سى ئورۇندۇقتا ئولتۇرغان بولسا، قالغان 200 دەك ئادەم ئۆرە تۇرىدۇ دېگەن گەپ. ئورۇندۇقنىڭ ئىگىلەيدىغان ئورنى 15 كۋادرات مېتىر دېسەكمۇ، 200 ئادەم ئاران 35 كۋادرات مېتىر يەردە ئۆرە تۇرىدۇ دېگەن گەپ بولىدۇ. يەنى ھەر كۋادرات مېتىردا تەخمىنەن 6 ئادەم، ھەر بىر ئادەمگە تەخمىنەن 40x40 سانتىمېتىرلىق بوشلۇق توغرا كېلىدۇ. ھەر كۈنى سەھەردە مۇشۇنچىلىك بوشلۇقتا قىستىلىپ يۈرۈپ كەم دېگەندە يېرىم سائەت مېڭىشقا توغرا كېلىدۇ. بۇ توكيودا ئادەتتىكى ئىش بولۇپ ھېسابلىنىدۇ.



گەرچە ئەتىگەنلىك ئالدىراش ۋاقىتتا توكيونىڭ شەھەر مەركىزىگە ماڭغان پويىزلار مۇشۇنداق قىستاڭچىلىق بولسىمۇ، لېكىن توكيونىڭ ئىچىدىن سىرتىغا ماڭىدىغان پويىزلار ئاساسەن قۇرۇق دېگۈدەكلا ماڭىدۇ. ئەتىگەنلىك قىستاڭچىلىقنى ئويلىشىپ، ئىشقا چۈشۈش ۋاقتىنى 09:00 ئەمەس 09:30 ياكى 10:00 قىلىپ بېكىتكەن شىركەتلەرمۇ كۆپ.

ئىشقىلىپ توكيودىكى ئەتىگەنلىك پويىزدا قىستىلىش سابىق سوۋېت ئىتتىپاقىنىڭ «ئىشخانىدىكى ئىشلار» فىلىمىدىكى ئاناتولى يېفرېمىچنىڭ گېپى بويىچە «ئەتىگەنلىك مەجبۇرىي گىمناستىكا» بولۇپ ھېسابلىنىدۇ.

مەنبە: ساكۇرا بلوگى

ئوقۇشقا كېلىشنىڭ تۆت شەكلى (2) 留学のかたち

ئالدىنقى يازمىمىزدا ياپونىيىگە ئوقۇشقا كېلىشتىكى تۆت خىل شەكىلدىن ئىككىسىنى تونۇشتۇرغان ئىدۇق. بۇ يازمىمىزدا قالغان ئىككى خىل شەكلى ھەققىدە ساۋات بەرمەكچىمىز.

3. 外国政府派遣留学生 چەتئەل ھۆكۈمىتى ئەۋەتكەن ئوقۇغۇچى
يېقىنقى يىللاردىن بۇيان، ھەر قايسى دۆلەتلەر ئۆز دۆلىتىنىڭ ئىختىساسلىقلارنى يېتىشتۈرۈش ئىشلىرىنى ئىلگىرى سۈرۈش ئۈچۈن، ھۆكۈمەتنىڭ خىراجەت چىقىرىشى بىلەن ئوقۇغۇچىلارنى ياپونىيىگە ئەۋەتىپ، ياپونىيە ھۆكۈمىتىدىن ئوقۇشقا قوبۇل قىلىش قاتارلىقلار ھەققىدە ھەمكارلىشىشنى تەلەپ قىلىپ كەلمەكتە. بۇ تۈردىكى ئوقۇغۇچىلارنىڭ خىراجىتى ياپونىيە ھۆكۈمىتى تەرىپىدىن تەمىنلەنمەيدىغان بولغاچقا «私費留学生 ئۆز خىراجىتى بىلەن ئوقۇغۇچىلار» دەپ قارالسىمۇ، لېكىن ياپونىيە ھۆكۈمىتى خەلقئارالىق ھەمكارلىقنى ئاكتىپ ھالدا ئىلگىرى سۈرىدىغان مەيداندا تۇرۇپ، ھەر قايسى دۆلەتلەرنىڭ تەلىپىگە بىنائەن زۆرۈر بولغان ھەمكارلىقلارنى ئېلىپ بارماقتا.
نۆۋەتتە ياپونىيە ھۆكۈمىتى مالايشىيا ۋە ھىندونېزىيە ھۆكۈمەتلىرىنىڭ ئىختىساسلىقلارنى يېتىشتۈرۈش ئىشلىرىنى قوللاش يۈزىسىدىن بۇ دۆلەتلەرنىڭ ھۆكۈمەت خىراجىتى بىلەن ياپونىيىدە ئوقۇتۇش ئىشلىرى ئۈچۈن قەرز پۇل ياردىمى بېرىپ كەلمەكتە. بۇ دۆلەتلەردىن باشقا يەنە تايلاند، سىنگاپور، ئەرەب بىرلەشمە خەلىپىلىكى، كۇۋەيت قاتارلىق دۆلەتلەرنىڭ ھۆكۈمىتى ئەۋەتكەن ئوقۇغۇچىلارنى «外国政府派遣留学生 چەتئەل ھۆكۈمەتلىرى ئەۋەتكەن ئوقۇغۇچىلار» دەپ قاراپ، ياپون تىلى قاتارلىق تەييارلىق تەربىيىسى ۋە ئۇنىۋېرسىتېت قاتارلىقلارغا ئۆتۈشتىكى زۆرۈر ھەمكارلىقلارنى ئېلىپ بارماقتا.
بۇنىڭدىن سىرت، جۇڭگونىڭ چاڭچۈن شەھىرىدە ۋە مالايشىيادا تەييارلىق مەكتەپ تەسىس قىلىپ، ياپونىيىگە ئوقۇشقا كېلىش ئالدىدىكى ئوقۇغۇچىلارنىڭ تەييارلىق تەربىيىسى ئۈچۈن ئوقۇتقۇچىلارنى ئەۋەتىش قاتارلىق ھەمكارلىقلارنىمۇ ئېلىپ بېرىۋاتىدۇ.

4. 短期留学・交換留学 قىسقا مۇددەتلىك ئوقۇش ياكى ئالمىشىپ ئوقۇش
短期留学 يەنى قىسقا مۇددەتلىك ئوقۇش دېگەنلىك، ئاساسلىقى ئۇنىۋېرسىتېتلار ئارا ئالماشتۇرۇش كېلىشىملىرىگە ئاساسەن، ئۆز دۆلىتىدىكى ئۇنىۋېرسىتېتنىڭ ئوقۇغۇچىلىقىنى ساقلاپ قېلىپ، ئۇنۋان ئېلىش ئۈچۈن ئەمەس، بەلكى باشقا دۆلەت ياكى ئۇنىۋېرسىتېتتا ئوقۇش (学習)، يات مەدەنىيەتنى باشتىن كەچۈرۈش (異文化体験)، تىل ئۆگىنىش (語学の習得) قاتارلىق مەقسەتلەردە بىرەر يىل ياكى بىرەر مەۋسۇم ئوقۇشنى كۆرسىتىدۇ.
ئالمىشىپ ئوقۇش دېگەنلىك، يۇقىرىقىغا ئوخشاش ئۇسۇلدا ئۇنىۋېرسىتېتلار ئارا ئۆز- ئارا ئوقۇغۇچى ئەۋەتىشىپ ئوقۇتۇشنى كۆرسىتىدۇ. ئالمىشىپ كەلگەن ئۇنىۋېرسىتېتتا ئالغان ئوقۇش نومۇرى ئادەتتە ئۆز دۆلىتىدىكى ئۇنىۋېرسىتېتنىڭ ئوقۇش نومۇرىغا سۇندۇرۇلۇپ ھېسابلىنىدۇ.

يېقىنقى يىللاردىن بۇيان ئۇيغۇرلار ئىچىدە يۇقارقى تۆت خىل شەكىل ئىچىدىكى ئۆز خىراجىتى بىلەن ئوقۇشقا كەلگۈچىلەر كۆپەيمەكتە. شۇڭلاشقا بۇندىن كېيىنكى يازمىلىرىمىزدا ئاساسلىقى ئۆز خىراجىتى بىلەن ئوقۇش توغرىسىدا كۆپرەك توختىلىپ ئۆتىمىز.


مەنبە: Study Japan تورى

ئوقۇشقا كېلىشنىڭ تۆت شەكلى (1) 留学のかたち

ياپونىيىگە ئوقۇش ئۈچۈن كەلمەكچى بولغانلارغا نىسبەتەن تۆۋەندىكىدەك تۆت خىل شەكىل بار بولۇپ، ھەر بىرىنىڭ ئوقۇش خىراجىتى ۋە ئوقۇش مۇددىتى قاتارلىقلار ئۆز- ئارا پەرقلىنىدۇ.

1. (国費外国人留学生 (日本政府（文部科学省）奨学金留学生
دۆلەت خىراجىتى بىلەن ئوقۇيدىغان چەتئەللىك ئوقۇغۇچى، يەنى ياپونىيە ھۆكۈمىتى (ئىلىم-پەن- مەدەنىيەت ۋازارىتى 文部科学省) نىڭ مۇكاپاتى بىلەن ئوقۇيدىغان چەتئەللىك ئوقۇغۇچى.
1945- يىلى تۈزۈپ چىقىلغان دۆلەت خىراجىتى بىلەن ئوقۇيدىغان چەتئەللىك ئوقۇغۇچىلار تۈزۈمىگە ئاساسەن ھازىرغىچە دۇنيادىكى 160 نەچچە دۆلەت ۋە رايوندىن تەخمىنەن 65 مىڭ كىشى ياپونىيىدە ئوقۇغان ياكى ئوقۇۋاتىدۇ. بۇ خىل ئوقۇغۇچىلار تەتقىقاتچى ئوقۇغۇچى (研究留学生) قاتارلىق يەتتە تۈرگە ئايرىلغان. بۇلارنى كېيىنكى يازمىلىرىمىزدا بىر- بىرلەپ تونۇشتۇرىمىز.

2. 私費留学生 ئۆز خىراجىتى بىلەن ئوقۇيدىغان چەتئەللىك ئوقۇغۇچى.
بۇ تۈردىكى ئوقۇغۇچىلارنىڭ ئۇنىۋېرسىتېت قاتارلىقلارغا كىرىشىدە ئىككى خىل ئۇسۇل بار. بىرى، ئۆز دۆلىتىدە تۇرۇپ ياپونىيىدىكى ئوقۇشنى ئارزۇ قىلغان ئۇنىۋېرسىتېت ياكى ئاسپىرانتلار ئىنستىتۇتىنىڭ (ياپونىيىدىكى ياكى ئۆز دۆلىتىدىكى) ئىمتىھانىغا قاتنىشىپ بىۋاسىتە ئوقۇشقا كىرىش.
يەنە بىرى، ياپونىيىگە كەلگەندىن كېيىن خۇسۇسىيلار ئىگىلىكىدىكى ياپون تىلى مەكتەپلىرىگە ئوقۇشقا كىرىپ، بىرەر يىل ئەتراپىدا ياپون تىلى تەربىيىسىنى قوبۇل قىلغاندىن كېيىن، ئوقۇش ئارزۇسىدىكى ئۇنىۋېرسىتېت ياكى ئاسپىرانتلار ئىنستىتۇتىنىڭ ئىمتىھانىغا قاتنىشىپ ئوقۇشقا كىرىش.
قايسىلا شەكىلدە بولمىسۇن، ئوقۇشقا كىرىشتە يەنىلا ئۇنىۋېرسىتېت ياكى ئاسپىرانتلار ئىنستىتۇتىنىڭ ئىمتىھانىغا قاتنىشىشقا توغرا كېلىدۇ. ئىمتىھاننى ياپونىيىدە بېرىش تەلەپ قىلىنىدىغان ئەھۋاللار مۇتلەق كۆپ ساننى ئىگىلەيدۇ.

مەنبە: Study Japan تورى (داۋامى بار)

ياپونىيىدىكى ئۇنىۋېرسىتېتلارنىڭ رەت تەرتىپى

ئالدىنقى قېتىمدىكى «داڭلىق ئالىي مەكتەپلەر有名な大学» ۋە «داڭلىق ئالىي مەكتەپلەر (2) 有名な大学» دېگەن ئىككى يازمىمىزدا ياپونىيىدىكى رەت تەرتىپى 1- دىن 4- گىچە بولغان ئۇنىۋېرسىتېتلارنى تونۇشتۇرغان ئىدۇق. بۈگۈن J-RANK تەمىنلىگەن سانلىق مەلۇماتلارغا ئاساسەن دۆلەتلىك ۋە خۇسۇسىي ئىگىلىكتىكى ئۇنىۋېرسىتېتلارنىڭ ئالدىنقى 20- گىچە بولغان رەت تەرتىپى بىلەن تونۇشۇپ چىقماقچى.

دۆلەتلىك ئۇنىۋېرسىتېتلاردىن:
1. توكيو ئۇنىۋېرسىتېتى 東京大学
2. كيوتو ئۇنىۋېرسىتېتى 京都大学
3. خىتوتسۇباشى ئۇنىۋېرسىتېتى 一ツ橋大学
4. توكيو سانائەت پەنلىرى ئۇنىۋېرسىتېتى 東京工業大学
5. ئوساكا ئۇنىۋېرسىتېتى 大阪大学
6. ناگويا ئۇنىۋېرسىتېتى 名古屋大学
7. توخوكۇ ئۇنىۋېرسىتېتى 東北大学
8. كيۇشيۇ ئۇنىۋېرسىتېتى 九州大学
9. خوككايدو ئۇنىۋېرسىتېتى 北海道大学
10. ئوچانومىزۇ قىزلار ئۇنىۋېرسىتېتى 御茶ノ水女子大学
11. توكيو چەتئەل تىللىرى ئۇنىۋېرسىتېتى 東京外国語大学
12. تسۇكۇبا ئۇنىۋېرسىتېتى 筑波大学
13. كوبې ئۇنىۋېرسىتېتى 神戸大学
14. يوكوخاما دۆلەتلىك ئۇنىۋېرسىتېتى 横浜国立大学
15. چىبا ئۇنىۋېرسىتېتى 千葉大学
16. خىروشىما ئۇنىۋېرسىتېتى 広島大学
17. ئوكاياما ئۇنىۋېرسىتېتى 岡山大学
18. توكيو نوكو ئۇنىۋېرسىتېتى 東京農工大学
19. توكيو پايتەخت ئۇنىۋېرسىتېتى 首都大学東京
20. كيوتو كوگېي ئۇنىۋېرسىتېتى 京都工芸繊維大学

خۇسۇسىي ئىگىلىكتىكى ئۇنىۋېرسىتېتلاردىن:
1. كېيئو گىجۇكۇ ئۇنىۋېرسىتېتى 慶応義塾大学
2. ۋاسېدا ئۇنىۋېرسىتېتى 早稲田大学
3. سوفىيا (جوچى) ئۇنىۋېرسىتېتى 上智大学
4. خەلقئارا خرىستىئان دىنى ئۇنىۋېرسىتېتى 国际基督教大学
5. توكيو تەبىئىي پەنلەر ئۇنىۋېرسىتېتى 東京理科大学
6. دوشىشا ئۇنىۋېرسىتېتى 同志社大学
7. گاكۇشۇئىن ئۇنىۋېرسىتېتى 学習院大学
8. چۈئو ئۇنىۋېرسىتېتى 中央大学
9. كانساي گاكۇئىن ئۇنىۋېرسىتېتى 関西学院大学
10. رىككيو ئۇنىۋېرسىتېتى 立教大学
11. ئائوياما گاكۇئىن ئۇنىۋېرسىتېتى 青山学院大学
12. مېيجى ئۇنىۋېرسىتېتى 明治大学
13. رىتسۇمېيكان ئۇنىۋېرسىتېتى 立命館大学
14. كانساي ئۇنىۋېرسىتېتى 関西大学
15. خوسېي ئۇنىۋېرسىتېتى 法政大学
16. سېيكېي ئۇنىۋېرسىتېتى 成蹊大学
17. سېيجو ئۇنىۋېرسىتېتى 成城大学
18. سېنشۈ ئۇنىۋېرسىتېتى 専修大学
19. مېيجى گاكۇئىن ئۇنىۋېرسىتېتى 明治学院大学
20. نانزان ئۇنىۋېرسىتېتى 南山大学

تەپسىلىي ئۇچۇرلارنى Yahoo Japan دىن ئىزدەڭ ياكى ئۇنىۋېرسىتېت باش بېتىدىن كۆرۈڭ.
مەنبە: شياۋچۈن ياپونىيىدە ئوقۇش مۇنبىرى تەمىنلىگەن ماتېرىياللارغا ئاساسەن تەييارلاندى.

داڭلىق ئالىي مەكتەپلەر (2) 有名な大学

ئالدىنقى قېتىم «داڭلىق ئالىي مەكتەپلەر 有名な大学» دېگەن يازمىمىزدا، ياپونىيىدىكى تىزىلىش تەرتىپى 1- دىن 3- گىچە بولغان ئەڭ داڭلىق ئۇنىۋېرسىتېتلارنى قىسقىچە تونۇشتۇرۇپ ئۆتكەن ئىدۇق. بۈگۈن بۇ يازمىمىزدا 4- رەتكە تىزىلغان ئۇنىۋېرسىتېتلارنى تونۇشتۇرۇپ ئۆتمەكچىمىز. ئالدىنقى قېتىم تونۇشتۇرۇلغانلارنىڭ ھەممىسى دۆلەتلىك ئۇنىۋېرسىتىتلار بولۇپ، بۈگۈن خۇسۇسىي ئىگىلىكتىكى ئۇنىۋېرسىتېتلاردىن 4- رەتكە كىرەلىگەن ئىككى ئۇنىۋېرسىتېتنى تونۇشتۇرۇپ ئۆتىمىز.

東北大学 توخوكۇ ئۇنىۋېرسىتېتى (قىسقارتىلمىسى توخوكۇداي 東北大): مىياگى ناھىيىسى (宮城県) نىڭ سېنداي (仙台) شەھىرىگە جايلاشقان دۆلەتلىك ئۇنىۋېرسىتېت بولۇپ، 1907- يىلى قۇرۇلغان. سېنداي شەھىرىنىڭ ئۆزىدىلا بەش مەكتەپ رايونى بار. نۆۋەتتە ئەدەبىيات، پېداگوگىكا، قانۇن، ئىقتىساد، مېدىتسىنا قاتارلىق 10 فاكۇلتېت ۋە ماس ھالدىكى كەسىپلەردىن باشقا يەنە ئۇچۇر ئىلمى، ھاياتلىق ئىلمى، مۇھىت ئىلمى قاتارلىق جەمئىي 17 ئاسپىرانتلار ئىنستىتۇتى تەسىس قىلىنغان. قارمىقىدا يەنە بەش تەتقىقات ئورنى بار.
تەپسىلاتىنى ئۇنىۋېرسىتېت تور بېتى http://www.tohoku.ac.jp دىن كۆرۈڭ.

筑波大学 تسۇكۇبا ئۇنىۋېرسىتېتى: ئىباراكى ناھىيىسى (茨城県) نىڭ تسۇكۇبا (筑波) شەھىرىگە جايلاشقان دۆلەتلىك ئۇنىۋېرسىتېت. 1973- يىلى قۇرۇلغان. توكيودا يەنە ئىككى مەكتەپ رايونى بار. نۆۋەتتە فىلولوگىيە، ھاياتلىق مۇھىت ئىلمى، ئۇچۇر ئىلمى قاتارلىق توققۇز فاكۇلتېت ۋە مائارىپ، مۇھىت ئىلمى، بىئولوگىيىلىك سىستېما قاتارلىق 16 ئاسپىرانتلار ئىنستىتۇتى تەسىس قىلىنغان.
تەپسىلاتىنى ئۇنىۋېرسىتېت تور بېتى http://www.tsukuba.ac.jp دىن كۆرۈڭ.

名古屋大学 ناگويا ئۇنىۋېرسىتېتى (قىسقارتىلمىسى مېيداي 名大): ئايچى ناھىيىسى (愛知県) نىڭ ناگويا (名古屋) شەھىرىگە جايلاشقان دۆلەتلىك ئۇنىۋېرسىتېت بولۇپ، 1939- يىلى قۇرۇلغان. تۆت ئورۇندا مەكتەپ رايونى بار. نۆۋەتتە ئەدەبىيات، قانۇن، ئىقتىساد، مېدىتسىنا قاتارلىق توققۇز فاكۇلتېت ۋە 13 ئاسپىرانتلار ئىنستىتۇتى تەسىس قىلىنغان.
تەپسىلاتىنى ئۇنىۋېرسىتېت تور بېتى http://www.nagoya-u.ac.jp دىن كۆرۈڭ.

神戸大学 كوبې ئۇنىۋېرسىتېتى (قىسقارتىلمىسى شىنداي 神代): خيوگو ناھىيىسى (兵庫県) نىڭ كوبې (神戸) شەھىرىگە جايلاشقان دۆلەتلىك ئۇنىۋېرسىتېت بولۇپ، 1949- يىلى قۇرۇلغان. كوبې شەھىرىدىلا تۆت ئورۇندا مەكتەپ رايونى بار. نۆۋەتتە ئەدەبىيات، خەلقئارا مەدەنىيەتشۇناسلىق، مېدىتسىنا قاتارلىق 11 فاكۇلتېت ۋە 13 ئاسپىرانتلار ئىنستىتۇتى تەسىس قىلىنغان.
تەپسىلاتىنى ئۇنىۋېرسىتېت تور بېتى http://www.kobe-u.ac.jp دىن كۆرۈڭ.

九州大学 كيۇشيۇ ئۇنىۋېرسىتېتى (قىسقارتىلمىسى كيۇداي 九大): فۇكۇئوكا ناھىيىسى (福岡県) نىڭ فۇكۇئوكا (福岡) شەھىرىگە جايلاشقان دۆلەتلىك ئۇنىۋېرسىتېت بولۇپ، 1911- يىلى قۇرۇلغان. يەتتە ئورۇندا مەكتەپ رايونى بار. نۆۋەتتە ئەدەبىيات. مائارىپ، قانۇن، ئىقتىساد قاتارلىق 11 فاكۇلتېت ۋە 18 ئاسپىرانتلار ئىنستىتۇتى تەسىس قىلىنغان.
تەپسىلاتىنى ئۇنىۋېرسىتېت تور بېتى http://www.kyushu-u.ac.jp دىن كۆرۈڭ.

早稲田大学 ۋاسېدا ئۇنىۋېرسىتېتى (قىسقارتىلمىسى سوداي 早大): توكيونىڭ شىنجۇكۇ رايونىغا جايلاشقان، خۇسۇسىي ئىگىلىكتىكى ئۇنىۋېرسىتېتلار ئىچىدە ئەڭ داڭلىق ۋە ئەڭ كونا ئۇنىۋېرسىتېت بولۇپ، 1920- يىلى ئۇنىۋېرسىتېت بولۇپ قۇرۇلغان. توكيو. سايتاما، فۇكۇئوكا قاتارلىق شەھەر- ناھىيىلەردە جەمئىي توققۇز مەكتەپ رايونى تەسىس قىلىنغان. سىياسىي ئىقتىساد، قانۇن، سودا، تەنتەربىيە قاتارلىق 13 فاكۇلتېت ۋە 21 ئاسپىرانتلار ئىنستىتۇتى تەسىس قىلىنغان. ئوقۇغۇچى سانى ياپونىيىدىكى ئۇنىۋېرسىتېتلار ئىچىدە 2- ئورۇندا تۇرىدۇ. 2- دۇنيا ئۇرۇشىدىن بۇرۇنلا «ۋاسېدانىڭ سىياسىيسى» دەپ ئاتىلىپ كەلگەن بولۇپ، سىياسىي پەنلەر بويىچە كۈچلۈك ئورۇنغا ئىگە. كۈلدۈرگە ئارتىسلىرى قاتارلىق نۇرغۇن سەنئەتكارلارمۇ مۇشۇ ئۇنىۋېرسىتېتتا يېتىشىپ چىققان.
تەپسىلاتىنى ئۇنىۋېرسىتېت تور بېتى http://www.waseda.jp دىن كۆرۈڭ.

慶応義塾大学 كېيئو گىجۇكۇ ئۇنىۋېرسىتېتى (قىسقارتىلىپ كېيئو ياكى كېيداي 慶大 دەپ ئاتىلىدۇ): توكيونىڭ مىناتو رايونىغا جايلاشقان خۇسۇسىي ئىگىلىكتىكى ئۇنىۋېرسىتېت بولۇپ، 1920- يىلى ئۇنىۋېرسىتېت بولۇپ قۇرۇلغان. ئالتە ئورۇندا مەكتەپ رايونى بار. نۆۋەتتە ئىقتىساد، قانۇن، مېدىتسىنا، سېسترالىق، دورىگەرلىك قاتارلىق 10 فاكۇلتېت ۋە 14 ئاسپىرانتلار ئىنستىتۇتى تەسىس قىلىنغان. ئىقتىساد ئىلمى بويىچە داڭلىق بولۇپ، ئوقۇش پۈتتۈرگەنلەردىن ئىگىلىك باشقۇرغۇچىلار كۆپ چىققان. بۇ ئۇنىۋېرسىتېتنى پۈتتۈرگەن سىياسەتچىلەرمۇ خېلى كۆپ. قارمىقىدىكى دوختۇرخانىمۇ داڭلىق.
تەپسىلاتىنى ئۇنىۋېرسىتېت تور بېتى http://www.keio.ac.jp دىن كۆرۈڭ.

قالغانلىرىمۇ داۋاملىق تونۇشتۇرۇلىدۇ.

مەنبە: ياپونچە ۋىكىپېدىئا دىن تەييارلاندى.
(All pictures comes from ja.wikipedia.org)

ياپونىيىدىكى بايراملار 日本の祝日

نۆۋەتتە ياپونىيە كالېندارىدا دۆلەتلىك بايرام كۈنىدىن 15 كۈن بار بولۇپ، 2- دۇنيا ئۇرۇشىدىن كېيىن، يەنى 1948- يىل 20- ئىيۇلدا ئېلان قىلىنىپ يولغا قويۇلغان «بايرام كۈنى قانۇنى» غا ئاساسەن بېكىتىلىپ، ھازىرغىچە بىر قانچە قېتىم ئۆزگەرتىلگەن.

1. 1- يانۋار: 元日 يېڭى يىل كۈنى. تېمىسى: «يېڭى يىلنىڭ باشلانغانلىقىنى تەبرىكلەيلى».
2. يانۋارنىڭ 2- دۈشەنبىسى: 成人の日 قۇرامىغا يەتكەنلەر كۈنى. تېمىسى: «قۇرامىغا يەتكەنلىكىنى تونۇپ يېتىپ، ئۆز كۈچىگە تايىنىپ ياشاش يولىغا ماڭغان ياشلارنى تەبرىكلەپ ئىلھاملاندۇرايلى».
بۇ كۈن توغرىلىق ئالدىنقى يازمىمىزدا تونۇشتۇرۇپ ئۆتتۇق.
3. 11- فېۋرال: 建国記念の日 دۆلەت قۇرۇلغان خاتىرە كۈن. تېمىسى: «دۆلەتنىڭ قۇرۇلغانلىقىنى خاتىرىلەپ، ۋەتەننى سويىدىغان قەلب يېتىشتۈرەيلى».
تارىخىي خاتىرىلەردىكى ئەڭ بۇرۇنقى ساماۋى شاھ جىنمۇ (神武天皇) نىڭ تەختكە ئولتۇرغان كۈنىنى مىلادىيە بويىچە ھېسابلاپ بېكىتكەن كۈن. جىنمۇ خان مىلادىدىن بۇرۇنقى 668- يىلى كيۇشيۇدىن شەرققە يۈرۈش قىلىپ 5 يىلدىن كېيىن ياماتو (大和، ھازىرقى نارا ناھىيىسى) غا بېسىپ كىرگەن، شۇنىڭدىن 3 يىل كېيىن شاھلىق تەختىگە ئولتۇرغان.
4. 21- مارت: 春分の日 ئەتىيازلىق كۈن- تۈن تەڭلىشىش كۈنى. تېمىسى: «تەبىئەتنى مەدھىيىلەپ، جانلىقلارنى قەدىرلەيلى».
5. 29- ئاپرېل: 昭和の日 شوۋانىڭ كۈنى. تېمىسى: «ھاياجانلىق كۈنلەرنى باشتىن كەچۈرۈپ، گۈللىنىشكە ئېرىشكەن شوۋا دەۋرىنى ياد ئېتىپ، دۆلەتنىڭ كەلگۈسى ئۈچۈن ئويلىنايلى».
تارىختا ئەڭ ئۇزۇن، يەنى 64 يىل تەختتە ئولتۇرغان ساماۋى شاھ شوۋانىڭ تۇغۇلغان كۈنى.2005- يىلى «يېشىللىق كۈنى» دىن ئۆزگەرتىلگەن.
6. 3- ماي: 憲法記念日 ئاساسىي قانۇن خاتىرە كۈنى. تېمىسى: «ياپونىيىنىڭ ئاساسىي قانۇنى يۈرگۈزۈلگەنلىكىنى خاتىرىلەپ، دۆلەتنىڭ روناق تېپىشىنى تىلەيلى».
ھازىرقى ئاساسىي قانۇن 1946- يىل 3- نويابىردا ئېلان قىلىنغان. كېيىنكى يىلى مۇشۇ كۈندىن باشلاپ يولغا قويۇلغان.
7. 4- ماي: みどりの日 يېشىللىق كۈنى. تېمىسى: «تەبىئەتكە يېقىن تۇرۇپ ھەم تەشەككۈر ئېيتىپ، روھىمىزنى بېيىتايلى.».
بۇ كۈن 2005- يىلدىن باشلاپ 29- ئاپرېلدىن مۇشۇ كۈنگە ئۆزگەرتىلگەن.
8. 5- ماي: こどもの日 بالىلار بايرىمى. تېمىسى: «بالىلارنىڭ ئابرۇيىغا ھۆرمەت قىلىپ، بەختىيار تۇرمۇشقا ئېرىشتۈرۈش بىلەن بىرگە، ئانىلارغا رەھمەت ئېيتايلى».
ئادەتتە ئوغۇللارنىڭ بايرىمى. قىزلارنىڭ بايرىمى بولغان 3- مارت قانۇندا بايرام قىلىپ بەلگىلەنمىگەن.
9. ئىيۇلنىڭ 3- دۈشەنبىسى: 海の日 دېڭىز كۈنى. تېمىسى: «دېڭىزنىڭ ھىممىتىگە رەھمەت ئېيتىش بىلەن بىرگە، دېڭىز- ئوكيان دۆلىتى بولغان ياپونىيىنىڭ گۈللىنىشىنى تىلەيلى».
1995- يىلى 20- ئىيۇل قىلىپ بەلگىلەنگەن. 2003- يىلدىن باشلاپ 3- دۈشەنبىگە ئۆزگەرتىلگەن. بۇ كۈندە ساماۋى شاھ مېيجى شەرقىي شىمالنى كۆزدىن كەچۈرۈپ، ئائومورى (青森) دىن كېمىگە ئولتۇرۇپ، خاكوداتى ئارقىلىق يوكوخاما (横浜) پورتىغا كەلگەن دېيىلىدۇ.
10. سېنتەبىرنىڭ 3- دۈشەنبىسى: 尊老の日 ياشانغانلارنى ھۆرمەتلەش كۈنى. تېمىسى: «كۆپ يىللىق قان- تەرى بەدىلىگە جەمئىيىتىمىزنى قۇرۇپ چىققان پېشقەدەملەرگە ھۆرمەت بىلدۈرۈپ، ئۇلارغا ئۇزۇن ئۆمۈر تىلەيلى».
1963- يىلى «ياشانغانلار كۈنى» قىلىپ بەلگىلەنگەن 15- سېنتەبىر 1966- يىلىغا كەلگەندە دۆلەتلىك دەم ئېلىش كۈنى قىلىپ بەلگىلەنگەن. 2003- يىلدىن باشلاپ 3- دۈشەنبىگە ئۆزگەرتىلگەن.
11. 23- سېنتەبىر: 秋分の日 كۈزلۈك كۈن- تۈن تەڭلىشىش كۈنى. تېمىسى: «ئەجدادلارنى مەدھىيىلەپ، ئۆلۈپ كەتكەنلەرنى ئەسلەيلى».
جىنمۇ شاھ دەۋرىدىن تارتىپ داۋاملىشىپ كەلگەن ئەرۋاھلارغا ئاتاپ نەزىر- چىراغ قىلىدىغان پائالىيەتتىن كەلگەن.
12. ئۆكتەبىرنىڭ 2- دۈشەنبىسى: 体育の日 تەنتەربىيە كۈنى. تېمىسى: «تەنتەربىيىنى دوست تۇتۇپ، ساغلام تەن ۋە روھ يېتىلدۈرەيلى».
1961- يىلىدىكى قانۇندا 2- شەنبە تەنتەربىيە كۈنى قىلىنغان. 1964- يىلى 10- ئۆكتەبىردە توكيودا ئولىمپىك تەنھەرىكەت يىغىنىنىڭ باشلىنىش مۇراسىمى ئۆتكۈزۈلگەن. بۇ كۈن 1966- يىلدىن باشلاپ دۆلەتلىك دەم ئېلىش كۈنى قىلىنغان. 2000- يىلدىن باشلاپ 2- دۈشەنبىگە ئۆزگەرتىلگەن.
13. 3- نويابىر: 文化の日 مەدەنىيەت كۈنى. تېمىسى: «ئەركىنلىك ۋە تىنچلىقنى سۆيۈپ، مەدەنىيەتنى راۋاجلاندۇرايلى».
بۇ كۈن يەنە ئاساسىي قانۇن ئېلان قىلىنغان كۈن بولغاچقا، ئەركىنلىك ۋە تىنچلىقمۇ تېما قىلىنغان.
14. 23- نويابىر: 勤労感謝の日 ئەمگەكچىلەرگە رەھمەت ئېيتىش كۈنى. تېمىسى: «ئەمگەكچىلەرنى ھۆرمەتلەپ، ئىشلەپچىقىرىشنى تەبرىكلەپ، پۇقرالار ئۆز ئارا رەھمەت ئېيتىشايلى».
بۇ كۈن 1873- يىلى بايرام كۈنى قىلىپ بېكىتىلگەن.
15. 23- دېكابىر: 天皇誕生日 ساماۋى شاھنىڭ تۇغۇلغان كۈنى. تېمىسى: «ساماۋى شاھنىڭ تۇغۇلغان كۈنىنى تەبرىكلەيلى».
شوۋانىڭ 64- يىلى (1988- يىل) 7- يانۋاردا، ساماۋى شاھ شوۋا 87 ياشتا ۋاپات بولغان. شۇ چاغدا 55 ياشقا كىرگەن شاھزادە ئاكىخىتو ياپونىيىنىڭ ساماۋى شاھ جىنمۇدىن كېيىنكى 125- ساماۋى شاھى بولۇپ تەختكە ئولتۇرۇپ، يىلنامىنى خېيسېيغا ئۆزگەرتكەن. ساماۋى شاھ ئاكىخىتو 1933- يىلى مۇشۇ كۈندە دۇنياغا كەلگەن.

يۇقارقى بايرام كۈنلىرىنىڭ ھەممىسى كالېنداردا قىزىل رەڭدە ئىپادىلەنگەچكە، ياپونىيىدە تۇرۇۋاتقان ئۇيغۇرلار بۇ كۈنلەرنى «قىزىل كۈن» دەپ ئاتاپ ئادەتلەنگەن ھەم ئادەتتە بۇ كۈنلەردە شىركەت ۋە مەكتەپلەر دەم ئالىدىغان بولغاچقا، بىرەر ئولتۇرۇش ياكى چاقىرىشلارنى مۇشۇنداق كۈنلەرگە ئورۇنلاشتۇرىدىغان بولغان.

مەنبە: ئاي نۇرى رەسەتخانىسى
http://www.gekkou.or.jp

داڭلىق ئالىي مەكتەپلەر 有名な大学

ئالدىنقى يازمىمىزدا تونۇشتۇرغاندەك، ياپونىيىدە 765 مۇنتىزىم ئۇنىۋېرسىتېت بار بولۇپ، بۇلارنى دەرىجىگە ئايرىپ رەتكە تىزىپ چىقىشنىڭ ئۆزى بىر مۈشكۈل ئىش، ئۇلارنى بىر- بىرلەپ تونۇشتۇرۇپ چىقىشمۇ ھەم شۇنداق. لېكىن قۇدرىتىمىز يار بەرگەن دائىرىدە، باشقىلار رەتلەپ چىققان نەتىجىلەرگە ئاساسەن ئەڭ داڭلىق ئۇنىۋېرسىتېتلاردىن باشلاپ تونۇشتۇرۇپ چىقىشنى لايىق تاپتۇق.

ھازىرچە بۇ يازمىدا ياپونىيىدىكى ئەڭ داڭلىق ئالىي بىلىم يۇرتى بولغان 5 ئۇنىۋېرسىتېت تونۇشتۇرۇلدى («تونۇشتۇرۇلدى» دېگۈدەك دەرىجىدە تەپسىلىي بولمىسىمۇ). بۇلارنىڭ ھەممىسى دۆلەتلىك ئۇنىۋېرسىتېتلار بولۇپ، تارىخىمۇ ئۇزۇن، تەسىر دائىرىسىمۇ، جەمئىيەتتىكى ئورنىمۇ باشقا ئۇنىۋېرسىتېتلاردىن كۆرۈنەرلىك دەرىجىدە پەرقلىنىدۇ. بۇلاردىن 3- دىن 5- گىچە بولغانلىرىنىڭ تىزىلىش تەرتىپى ئوخشاش. مۇنداقچە ئېيتقاندا، بۇ بەش ئۇنىۋېرسىتېت دەل ياپونىيىدىكى تىزىلىش تەرتىپى 1- دىن 3- گىچە بولغان بىلىم يۇرتىدىن ئىبارەت.

1.　東京大学 توكيو ئۇنىۋېرسىتېتى (قىسقارتىلمىسى توداي 東大): ياپونىيىدىكى تارىخى ئەڭ ئۇزۇن ئۇنىۋېرسىتېت بولۇپ، مېيجىنىڭ 10- يىلى (1877- يىل) قۇرۇلغان. ئاساسىي مەكتەپ رايونى توكيونىڭ بۇنكيو رايونىدىكى خونگو دېگەن يەرگە جايلاشقان. ئۇندىن باشقا يەنە تۆت يەردە مەكتەپ رايونى بار. نۆۋەتتە قانۇن، مېدىتسىنا، سانائەت پەنلىرى، ئەدەبىيات، تەبىئىي پەنلەر، يېزا ئىگىلىك، ئىقتىساد، مائارىپ، دورىگەرلىك قاتارلىق 10 فاكۇلتېت ۋە مائارىپ ئىلمى، سانائەت پەنلىرى قاتارلىق 15 ئاسپىرانتلار ئىنستىتۇتى تەسىس قىلىنغان. قارمىقىدا يەنە 11 تەتقىقات ئورنى بار.
تەپسىلىي ئۇچۇرلىرىنى ئۇنىۋېرسىتېت تور بېتى http://www.u-tokyo.ac.jp دىن كۆرۈڭ.

2. 京都大学 كيوتو ئۇنىۋېرسىتېتى (قىسقارتىلمىسى كيوداي 京大): غەربىي ياپونىيىدىكى ئەڭ چوڭ ئۇنىۋېرسىتېت بولۇپ، مېيجىنىڭ 30- يىلى (1897- يىل) قۇرۇلغان. كيوتو شەھىرىگە جايلاشقان، ئۈچ ئورۇندا مەكتەپ رايونى بار. نۆۋەتتە ئۇنىۋېرسال ئىنسانشۇناسلىق، ئىقتىساد قاتارلىق 10 فاكۇلتېت، ئەدەبىيات، قانۇن، مېدىتسىنا قاتارلىق 17 ئاسپىرانتلار ئىنستىتۇتى ۋە 13 تەتقىقات ئورنى تەسىس قىلىنغان. تەبىئىي پەنلەر بويىچە نوبېل مۇكاپاتىغا ئېرىشكەن ياپونىيىلىكلەرنىڭ كۆپ قىسمى مۇشۇ ئۇنىۋېرسىتېتتىن چىققان.
تەپسىلىي ئۇچۇرلىرىنى ئۇنىۋېرسىتېت تور بېتى http://www.kyoto-u.ac.jp دىن كۆرۈڭ.

3- رەتكە تىزىلغان ئۇنىۋېرسىتېتلار

一ツ橋大学 خىتوتسۇباشى ئۇنىۋېرسىتېتى (قىسقارتىلمىسى خىتوتسۇباشىداي一橋大): توكيونىڭ كۇنىتاچى شەھىرىگە جايلاشقان. كۇنىتاچى، كاندا، كودايرادىن ئىبارەت 3 مەكتەپ رايونى بار. 1949- يىلى ئۇنىۋېرسىتېت بولۇپ قۇرۇلغان. ئىقتىساد پەنلىرىدە كۈچلۈك ئورۇنغا ئىگە. ھازىر تولۇق كۇرس بويىچە سودا، ئىقتىساد، قانۇن، جەمئىيەتشۇناسلىق كەسىپلىرى، ئاسپىرانتلار ئىنستىتۇتى بويىچە سودا، ئىقتىساد، قانۇن، جەمئىيەتشۇناسلىق، تىل جەمئىيەتشۇناسلىقى ۋە خەلقئارا شىركەت ئىستراتېگىيىسى كەسىپلىرى تەسىس قىلىنغان. قارمىقىدا يەنە بىر قانچە تەتقىقات ئورنى ۋە مەركەزلىرى بار.
تەپسىلىي ئۇچۇرلىرىنى ئۇنىۋېرسىتېت تور بېتى http://hit-u.ac.jp دىن كۆرۈڭ.

東京工業大学 توكيو سانائەت پەنلىرى ئۇنىۋېرسىتېتى (قىسقارتىلمىسى توكوداي 東工大): شوۋانىڭ 4- يىلى (1929- يىلى) قۇرۇلغان، توكيونىڭ مېگۇرو رايونىغا جايلاشقان بولۇپ، ئۈچ ئورۇندا مەكتەپ رايونى بار. تەبىئىي پەن، سانائەت پەنلىرى ۋە ھاياتلىق ئىلمى بويىچە ئۈچ فاكۇلتېت، ھاياتلىق ئىلمى قاتارلىق ئالتە ئاسپىرانتلار ئىنستىتۇتى تەسىس قىلىنغان.
تەپسىلىي ئۇچۇرلىرىنى ئۇنىۋېرسىتېت تور بېتى http://www.titech.ac.jp دىن كۆرۈڭ.

大阪大学 ئوساكا ئۇنىۋېرسىتېتى (قىسقارتىلمىسى خانداي 阪大): شوۋانىڭ 6- يىلى (1931- يىلى) قۇرۇلغان. ئوساكانىڭ سۇيتا شەھىرىگە جايلاشقان بولۇپ، تۆت ئورۇندا مەكتەپ رايونى بار. نۆۋەتتە ئەدەبىيات، ئىنسانشۇناسلىق، چەتئەل تىللىرى قاتارلىق 11 فاكۇلتېت، ئىنسانشۇناسلىق، قانۇن، ئىقتىساد قاتارلىق 15 ئاسپىرانتلار ئىنستىتۇتى ۋە بىر قانچە تەتقىقات ئورۇنلىرى بار.
تەپسىلىي ئۇچۇرلىرىنى ئۇنىۋېرسىتېت تور بېتى http://www.osaka-u.ac.jp دىن كۆرۈڭ.

قالغانلىرىمۇ داۋاملىق تونۇشتۇرۇلىدۇ.

مەنبە: ياپونچە ۋىكىپېدىئا دىن تەييارلاندى.
(All pictures comes from ja.wikipedia.org)

ئوقۇشقا كېلىشتىكى ئۈچ ئاتالغۇ

بۇ يەردە ياپونىيىدە ئوقۇش ئۈچۈن يول ماڭغاندا ئۇچرايدىغان ھەم ئاسانلا ئارىلىشىپ كېتىدىغان ئۈچ ئاتالغۇ ھەققىدە توختىلىپ ئۆتىمىز.

1. ئوقۇشقا كىرىش ئۇقتۇرۇشى 入学通知書
ياپونىيىگە ئوقۇشقا كېلىش ئۈچۈن ماڭىدىغان يول ئادەتتە ئوقۇماقچى بولغان كەسىپتىكى ئوقۇتقۇچىنى ئىزدەشتىن باشلىنىدۇ. ئادەتتە يۈز- تۇرانە ياكى ئېلخەت ئارقىلىق ئالاقىلىشىپ، ئوقۇتقۇچىنىڭ قوشۇلۇشىغا ئېرىشكەندىن كېيىن ئوقۇشقا كىرىش ئىلتىماسى ۋە باشقا مۇناسىۋەتلىك ماتېرىياللارنى مەكتەپكە تاپشۇرىدىغان گەپ. بۇلارنى ياپونىيىدىكى ئۇرۇق- تۇغقان ياكى دوستلىرىڭىزدىن بىرەرى سىزگە بېجىرىپ بەرسە بولىدۇ.

مەكتەپ ئىلتىماس ماتېرىياللىرىڭىزنى قوبۇل قىلغاندىن كېيىن پروفېسسورلارنىڭ قەرەللىك يىغىندا مۇزاكىرە قىلىپ سىزنى ئوقۇشقا ئېلىش- ئالماسلىقنى بېكىتىدۇ. بۇنىڭغا يىغىننىڭ ۋاقتى ۋە ھەر قايسى مەكتەپلەرنىڭ ئەمەلىي ئەھۋالىغا قاراپ بىرەر ئايچە ۋاقىت كېتىدۇ. يىغىندا سىزنى قوبۇل قىلىش قارارى چىقىرىلغاندىن كېيىن مەكتەپتىن 入学通知書، يەنى «ئوقۇشقا كىرىش ئۇقتۇرۇشى» چىقىرىپ بېرىلىدۇ. بۇنىڭدا سىزنىڭ قايسى ۋاقىتتىن قايسى ۋاقىتقىچە قايسى تېمىدا قايسى پروفېسسورنىڭ يېتەكلىشىدە ئوقۇيدىغانلىقىڭىز ئېنىق يېزىلىدۇ. بۇنى مەكتەپنىڭ چاقىرىق قەغىزى دېسەكمۇ بولىدۇ. ئوقۇشقا كەلگۈچى بۇ چاقىرىققا ئاساسەن ئۆزى تۇرۇشلۇق جايدىكى ساقچىخانا ياكى ج خ ئىدارىسىگە بېرىپ پاسپورت ئىلتىماس قىلغاچ تۇرسا بولىدۇ.

2. ياپونىيىدە تۇرۇش سالاھىيىتىنى بېكىتىش ئىسپاتنامىسى 在留資格認定証明書
مەكتەپنىڭ چاقىرىق قەغىزىنى تاپشۇرۇپ ئالغاندىن كېيىن، بۇنىڭغا قوشۇپ ئىلتىماس جەدۋىلى ۋە سىزنىڭ ئىقتىسادىي كاپالەتچىڭىزنىڭ ئىسپاتى دېگەندەك باشقا مۇناسىۋەتلىك ئىسپاتلارنى ئىلتىماس قىلغۇچى ئۆزى تەۋە بولغان ناھىيە ياكى شەھەردىكى چېگرىدىن كىرىشنى باشقۇرۇش ئىدارىسى (入国管理局، قىسقارتىپ 入管局) غا تاپشۇرىدۇ. بۇرۇن بۇنى ئوقۇشقا كەلگۈچىنىڭ بىرەر تۇغقىنى ياكى تونۇشىدىن بىرەرى ۋاكالىتەن ئىلتىماس قىلالايتتى. ھازىر بولسا چوقۇم سىز ئوقۇشقا كىرمەكچى بولغان مەكتەپنىڭ رەسمىي خىزمەتچىسى ئىلتىماس قىلىشى كېرەك دەپ تەلەپ قىلىنماقتا.

بۇ يەردە سىزنىڭ ياپونىيىدە ئوقۇش جەريانىدىكى ئوقۇش ۋە تۇرمۇش چىقىملىرىنى قانداق ھەل قىلىدىغانلىقىڭىز نۇقتىلىق تەكشۈرۈلىدۇ. مۇنداقچە ئېيتقاندا سىزنى بۇ دۆلەتكە كىرىشكە لايىقمۇ- ئەمەسمۇ دېگەن نۇقتىدا تۇرۇپ تەپسىلىي تەكشۈرىدۇ. بۇ جەريانغىمۇ ئىلتىماس قىلىنغان ۋاقىتتا تاپشۇرغان ماتېرىياللار، شۇ ۋاقىتتىكى ئىلتىماس قىلغۇچىلارنىڭ ئاز- كۆپلۈكى دېگەندەك ئەھۋاللارغا قاراپ بىرەر ئايدىن ئۈچ ئايلارغىچە ۋاقىت كېتىدۇ (تۆت ئايدىن ئاشقاندا خەۋەر كەلگەن ئەھۋاللارنىمۇ ئاڭلىغان).

ئەگەر شەرتلەرنىڭ ھەممىسىگە ئۇيغۇن كېلىپ ياپونىيىگە ئوقۇشقا كېلىش سالاھىيىتىگە ئېرىشەلىسىڭىز، چېگرىدىن كىرىشنى باشقۇرۇش ئىدارىسىدىن 在留資格認定証明書، يەنى ياپونىيىدە تۇرۇش سالاھىيىتىنى بېكىتىش ئىسپاتنامىسى چىقىرىپ بېرىلىدۇ ھەم ئىلتىماس قىلغۇچىنىڭ ئادرېسىغا ئەۋەتىپ بېرىلىدۇ. بۇنى بىز قىسقارتىپ 在留資格証 دەپ ئاتايمىز. بۇنىڭدا سىزنىڭ ياپونىيىدە قانداق سالاھىيەتتە تۇرىدىغانلىقىڭىز يېزىلىدۇ. بۇ تۆۋەندە تونۇشتۇرۇلغان ۋىزا بىلەن پەرقلىنىدۇ.

3. ۋىزا 査証
ئوقۇشقا كېلىش سالاھىيىتىنى بېكىتىش ئىسپاتنامىسىنى تاپشۇرۇپ ئالغاندىن كېيىن، ئوقۇشقا كەلگۈچى بۇ ئىسپاتنامىغا قوشۇپ پاسپورت ۋە باشقا كېرەكلىك ماتېرىياللارنى ۋاكالەتچى شىركەتلەرنىڭ ۋاكالەتچىلىكىدە ياپونىيىنىڭ جۇڭگودا تۇرۇشلۇق ئەلچىخانىسىغا تاپشۇرۇپ ۋىزا ئىلتىماس قىلسا بولىدۇ. ئەلچىخانا ئادەتتە شەخسنىڭ ئىلتىماسىنى قوبۇل قىلمايدۇ. ۋاكالەتچى شىركەتلەر ئۈچۈن ئادەتتە 中国国际旅行社总社 دېگەندەك شىركەتلەرنى تاللىسىڭىز بولىدۇ. ئۇلار 400 يۈەن ئەتراپىدا ۋاكالەت ھەققى ئالىدۇ. تاپشۇرغان ماتېرىياللىرىڭىزدا مەسىلە بولمىسا، ئادەتتە 6 ئىش كۈنىدە ۋىزا چىقىدۇ. ئۇنى ئۆزىڭىز ۋاكالەتچى شىركەت تۇرۇشلۇق جايغا بېرىپ ئېلىۋالسىڭىز ياكى پوچتىدىن ئەۋەتكۈزسىڭىز بولىدۇ.

ۋىزا- بىر دۆلەتنىڭ شۇ دۆلەتكە كىرمەكچى بولغان چەتئەللىكلەرگە قارىتا تارقىتىدىغان تۇرۇش ئىجازەتنامىسى بولۇپ، ئۇنىڭدا سىزنىڭ شۇ دۆلەتتە قانداق سالاھىيەتتە قانچە ئۇزۇن تۇرالايدىغانلىقىڭىز ئېنىق يېزىلىدۇ. ياپونىيىگە ئوقۇشقا كېلىشتە چىقىدىغان ۋىزا ئادەتتە «ئوقۇش» ۋىزىسى بولۇپ، مۇددىتى بىر يىل بولىدۇ. ياپونىيىگە كەلگەندىن كېيىن ئەھۋالغا قاراپ ئۇنىڭ مۇددىتىنى ئىلتىماس ئارقىلىق ئۇزارتىشقا بولىدۇ.

ئەسكەرتىپ ئۆتۈشكە تېگىشلىكى شۇكى، ئوقۇش سالاھىيىتى ئىسپاتى پەقەت ئۈچ ئايلا ئىناۋەتلىك. شۇ ئۈچ ئاي ئىچىدە چوقۇم ۋىزا ئىلتىماس قىلىش كېرەك. شۇڭا پاسپورت ۋە باشقا ۋىزا ئىلتىماسىغا كېرەكلىك ئىسپات- ماتېرىياللارنى بالدۇرراق تەييارلاپ ياكى تەييارلىقىنى قىلىپ قويغىنىڭىز ياخشى.ئىناۋەتلىك ۋاقىتتىن ئېشىپ كەتسە پۈتۈن يولنى قايتا مېڭىشقا توغرا كېلىشى مۇمكىن.

يويوگى كارتون ئىنستىتۇتى 代代木卡通片学院

代代木卡通片学院

ياپونىيىنىڭ كارتون فىلىم (卡通片) ۋە كومپيۇتېر ئويۇنلىرى (游戏) دۇنياغا داڭلىق. بىزمۇ چوڭ- كىچىك ھەممەيلەن ياپونىيىنىڭ كارتون فىلىملىرىگە ئامراق كېلىمىز. بىزدىكى سانسىز چۆچەك ۋە مەسەللەرنى كارتون فىلىم (卡通片) قىلىپ ئىشلەشنى ئارزۇ قىلىدىغانلارمۇ كۆپ. ياپونىيىنىڭ كارتون تېخنىكىلىرىنى ئۆگىنىش ئىستىكىدە يۈرۈۋاتقانلارمۇ ئاز ئەمەس. ئەنە شۇنداق قېرىنداشلىرىمىز ئۈچۈن بۈگۈن ياپونىيىدىكى بىر كەسپىي مەكتەپنى تونۇشتۇرۇپ ئۆتمەكچىمىز.

يويوگى كارتون ئىنىستىتۇتى (代代木卡通片学院，代々木アニメーション学院) توكيونىڭ شىبۇيا رايونىغا جايلاشقان كەسپىي مەكتەپ بولۇپ، 1978- يىل 25- مايدا قۇرۇلغان. پۈتۈن ياپونىيىدە 12 ئورۇندا تارمىقى بار. پۈتۈن كۈنلۈك، كەچلىك، شەنبىلىك ۋە بىر يىللىق تېز يېتىشتۈرۈش سىنىپلىرى تەسىس قىلىنغان.

1. ئاساسلىق كەسىپلىرى
پۈتۈن كۈنلۈك سىنىپلار ئۈچۈن كارتون فاكۇلتېتى (卡通片系) دا جانلاندۇرۇم (卡通绘制)، كارتون رەڭگى (卡通彩色)، كارتون ئارقا كۆرۈنۈش تېخنىكىسى (卡通背景美术)، كارتون ياساش (卡通制作) كەسىپلىرى، سەنئەت فاكۇلتېتى (艺术) دا ئاۋاز ئارتىسلىقى (配音演员)، ئاۋاز رېژىسسورلۇقى (声音监督) كەسىپلىرى، كومپيۇتېر ئويۇنى فاكۇلتېتى (游戏) دا قونچاق لايىھىلەش (卡通设计师)، كومپيۇتېر گىرافىكىسىدا لايىھىلەش (CG设计师)، سېنارىستلىق (计划者/剧本作家)، پروگرامما تۈزۈش (程序员) كەسىپلىرى، نەشرىيات- شەكىل ياساش فاكۇلتېتى (出版/造型) دا كارتون رەسىم- ژۇرنالچىلىقى (卡通画)، رومان (小说)، ئالاھىدە ئىشلەش (特殊制造) كەسىپلىرى تەسىس قىلىنغان. كەچلىك سىنىپلىرىدا بولسا بۇ كەسىپلەرنىڭ خېلى كۆپ قىسمىنى تاللاپ ئوقۇشقا بولىدۇ.

2. ئوقۇشقا ئىلتىماس كىرىش سالاھىيىتى
پۈتۈن كۈنلۈك سىنىپلارغا ئوقۇشقا كىرىش ئۈچۈن تۆۋەندىكى شەرتنىڭ بىرىنى ھازىرلاش كېرەك:
1) ياپونىيىدىكى 9 يىللىق مەجبۇرى مائارىپنى تۈگەتكەنلەر
2) چەتئەلدە باشلانغۇچ مائارىپتىن باشلاپ 10 يىلدىن ئارتۇق مۇنتىزىم مائارىپ تەربىيىسىنى ئالغانلاردىن ياپون تىلىنى چۈشىنەلەيدىغانلار
ئوقۇشقا كىرگۈچىلەر ئوقۇشقا كىرىش ئىلتىماس جەدۋىلىنى توشقۇزۇپ، بىۋاسىتە مەكتەپكە تاپشۇرسا ياكى پوچتىدىن ئەۋەتسە بولىدۇ. ئوقۇشقا كىرىش ئىمتىھانى ئېلىنمايدۇ.
تېز يېتىشتۈرۈش سىنىپىغا مۇشۇ مەكتەپنىڭ 2 يىللىق ئوقۇشىنى تاماملىغانلار ياكى شۇنىڭغا ماس ھالدىكى ئەمەلىي ئىقتىدارغا ئېگە بولغانلاردىن مەكتەپ ئېتىراپ قىلغانلار ئىلتىماس قىلسا بولىدۇ.
كەچلىك سىنىپلارغا ياپونچىنى چۈشىنەلەيدىغانلا بولسا، تولۇقسىز ئوتتۇرا مەكتەپ ئوقۇغۇچىلىرىدىن چوڭ بولغان ھەر قانداق ئادەم ئىلتىماس قىلالايدۇ.

3. ئوقۇش پۇلى
پۈتۈن كۈنلۈك سىنىپلارنىڭ تۇنجى يىلىدا رەسمىيەت ھەققى ئۈچۈن 2 تۈمەن يېن(万日元)، ئوقۇشقا كىرىش پۇلى ئۈچۈن 13 تۈمەن يېن(万日元)، يىللىق ئوقۇش خىراجىتى ئۈچۈن 70 تۈمەن يېن(万日元)، ماتېرىيال پۇلى ئۈچۈن 20 تۈمەن يېن(万日元)، مەكتەپداشلار ئۇيۇشمىسىنىڭ ئەزالىق پۇلى ئۈچۈن 2 تۈمەن يېن(万日元) بولۇپ جەمئىي 107 تۈمەن يېن كېتىدۇ. 2- يىلى يىللىق ئوقۇش خىراجىتى ئۈچۈن 70 تۈمەن يېن(万日元)، ماتېرىيال ھەققى ئۈچۈن 20 تۈمەن يېن(万日元) بولۇپ، 2 يىلدا جەمئىي 197 تۈمەن يېن(万日元) كېتىدۇ.
بۇنىڭ ئىچىدىكى ئالدىنقى 2 تۈرلۈك خىراجەت، يەنى 15 تۈمەن يېننى ئوقۇشقا ئىلتىماس قىلىپ 2 ھەپتە ئىچىدە، قالغانلىرىنى يىلدا 2 قېتىمغا بۆلۈپ تۆلەشكە توغرا كېلىدۇ.
تېز يېتىشتۈرۈش سىنىپىنىڭ بىر يىللىق ئوقۇش ۋە ماتېرىيال ھەققى ئۈچۈن 90 تۈمەن يېن كېتىدۇ. ئۇنى بىرلا قېتىمدا تاپشۇرۇش تەلەپ قىلىنىدۇ.
كەچلىك سىنىپلارنىڭ رەسمىيەت ھەققى، ئوقۇشقا كىرىش پۇلى ۋە يىللىق ئوقۇش پۇلى بولۇپ جەمئىي 27 تۈمەن يېننى بىراقلا ياكى ھەر ئايدا بۆلۈپ تۆلەشكە بولىدۇ.
شەنبىلىك سىنىپلارنىڭ يىللىق ئوقۇش خىراجىتى 38 تۈمەن يېن.
بىرلا قېتىمدا 2 كەسىپكە كىرىپ ئوقۇشقا بولىدىغان سىنىپلارمۇ تەسىس قىلىنغان. قوشۇمچە تاللىغان كەسىپنىڭ ئوقۇش پۇلى يىلىغا 30 تۈمەن يېن.
مەكتەپتە ئوقۇغۇچىلارغا ئوقۇش مۇكاپاتى، ياتاق ۋە باشقا دۆلەتلىك سالاھىيەت ئىمتىھانلىرى ئۈچۈن ھەر خىل ياردەم ۋە ئۇچۇرلار تەمىنلىنىدۇ.

تۆۋەندىكىسى ناگويادىكى مەكتەپنىڭ كارتون ئارقا كۆرۈنۈش (卡通背景美术) كەسپىدىكى شىمادا مۇئەللىم تارتىلغان سۈرەتكە ئاساسەن 15 خىلدەك رەڭدە سىزىپ چىققان رەسىم.


بۇ مەكتەپ توغرىلىق تېخىمۇ تەپسىلىي ئۇچۇرلارنى بىلمەكچى بولسىڭىز، مەكتەپنىڭ تور بېتىنى زىيارەت قىلىڭ.
http://yoani.jp

ياپونىيىدىكى مەكتەپلەر 日本的学校

ياپونىيىدىكى بالىلار باغچىسىدىن تارتىپ ئۇنىۋېرسىتېتلارغىچە ھەممىسى 国立 دۆلەت ئىگىلىكىدىكى (تۆۋەندە دۆلەتلىك دەپ ئېلىنىدۇ)،公立 يەرلىك ھۆكۈمەت ئىگىلىكىدىكى (تۆۋەندە يەرلىك دەپ ئېلىنىدۇ) ۋە 私立 خۇسۇسىي ئىگىلىكتىكى (تۆۋەندە خۇسۇسىي دەپ ئېلىنىدۇ) مەكتەپلەر دەپ ئايرىلىدۇ.
ياپونىيە ئىلىم-پەن- مەدەنىيەت ۋازارىتى (文部科学省) نىڭ 2008- يىللىق ستاتىستىكىسى بويىچە پۈتۈن ياپونىيىدە 60 مىڭغا يېقىن مەكتەپ بار بولۇپ، قىسقىچە ستاتىستىكىسى تۆۋەندىكىچە:
1. 幼儿园بالىلار باغچىسى: دۆلەتلىك 49، يەرلىك 5,301، خۇسۇسىي 8,276، جەمئىي 13,589، ئوقۇغۇچى سانى 1,674,172
2. 小学 باشلانغۇچ مەكتەپ: دۆلەتلىك 73، يەرلىك 22,197، خۇسۇسىي 206، جەمئىي 22,476، ئوقۇغۇچى سانى 7,121,761
3. 初中 تولۇقسىز ئوتتۇرا مەكتەپ: دۆلەتلىك 76، يەرلىك 10,104، خۇسۇسىي 735، جەمئىي 10,915، ئوقۇغۇچى سانى 3,592,406
4. 高中 تولۇق ئوتتۇرا مەكتەپ: دۆلەتلىك 15، يەرلىك 3,906، خۇسۇسىي 1,321، جەمئىي 5,242، ئوقۇغۇچى سانى 3,366,460
5. 高专 ئالىي تېخنىكوم: دۆلەتلىك 55، يەرلىك 6، خۇسۇسىي 3، جەمئىي 64، ئوقۇغۇچى سانى 59,446
6. 短期大学 قىسقا مۇددەتلىك ئۇنىۋېرسىتېتلار: دۆلەتلىك 2، يەرلىك 29، خۇسۇسىي 386، جەمئىي 417، ئوقۇغۇچى سانى 172,726
7. 大学 مۇنتىزىم ئۇنىۋېرسىتېتلار: دۆلەتلىك 86، يەرلىك 90، خۇسۇسىي 589، جەمئىي 765، ئوقۇغۇچى سانى 2,835,242
8. باشقىلار: دۆلەتلىك 103، يەرلىك 1,203، خۇسۇسىي 4,858، جەمئىي 6,128، ئوقۇغۇچى سانى 924,870

مۇنتىزىم ئۇنىۋېرسىتېتلارنىڭ ئىچىدە ئاسپرانتلار ئىنىستىتۇتى (研究生院) تەسىس قىلىنغانلىرى 604 بولۇپ، بۇنىڭ 85 ى دۆلەتلىك، 76 سى يەرلىك، 443 ى خۇسۇسىي ئىگىلىكتىكى مەكتەپتىن ئىبارەت.
ماگىستېر ئاسپرانتلىرى 165,423، دوكتور ئاسپرانتلىرى 74,231، تېخنىكىلىق ئۇنۋان ئاسپرانتلىرى 23,033 نەپەر.
2008- يىل 3- ئايدا، 555,408 نەپەر باكلاۋېر، 73,839 نەپەر ماگېستىر، 16,257 نەپەر دوكتور ئوقۇش پۈتتۈرۈپ ئۇنۋان ئالغان.
توكيونىڭ ئۆزىدىلا 134 ئۇنىۋېرسىتېت بار بولۇپ، ئوقۇغۇچى سانى 710,656. بۇئۇنىۋېرسىتېتلاردىن 117 سى خۇسۇسىي ئىگىلىكتە، ئوقۇۋاتقان ئوقۇغۇچى سانى ئومۇمىي ساننىڭ 87.7 پىرسەنتنى تەشكىل قىلىدۇ.

2007- يىلدىكى ستاتىستىكىغا ئاساسلانغاندا، ئۇنىۋېرسىتېتتا ئوقۇۋاتقانلار ئىچىدە 103,661 نەپەر چەتئەللىك بولۇپ، بۇنىڭ ئىچىدىكى 93,212 نەپىرى ئوقۇش ۋىزىسى بىلەن تۇرۇۋاتقانلار. ماگىستېر ئاسپرانتلىرى 32,895 نەپەر، دوكتور ئاسپرانتلىرى 2,503 نەپەر. ماگېستىر ئاسپرانتلىرىدىن 19,903 نەپىرى دۆلەتلىك، 1,377 نەپىرى يەرلىك، 11,615 نەپىرى خۇسۇسىي ئىگىلىكتىكى ئۇنىۋېرسىتېتتا. دوكتور ئاسپرانتلىرىدىن 21 نەپىرى يەرلىك ھۆكۈمەت ئىگىلىكىدىكى ئۇنىۋېرسىتېتتا ئوقۇۋاتقاندىن باشقا، قالغان ھەممىسى خۇسۇسىي ئىگىلىكتىكى ئۇنىۋېرسىتېتلاردا ئوقۇۋاتقانلاردۇر.

تولۇق كۇرس ۋە ماگىستېرلىقتا ئوقۇۋاتقان چەتئەللىك قىز- ئوغۇل (ئەر- ئايال) لارنىڭ نىسبىتى ئاساسەن تەڭ بولسىمۇ، دوكتۇرلۇقتا ئوقۇۋاتقان ئەرلەر (1,561 نەپەر) ئاياللار (942 نەپەر) دىن بىر ھەسسىگە يېقىن كۆپ.
بۇ ئۇنىۋېرسىتېتلار توغرىسىدىكى تەپسىلىي ئۇچۇرلار بۇندىن كېيىن رەتلەپ ئېلان قىلىنىدۇ.

ئوقۇۋېتىپ تۇرۇپ قوشۇمچە ئىشلەش 临时工作

ياپونىيىدە گەرچە مال باھاسى قىممەت، ئوقۇش پۇلى يۇقىرى، ئايلىق چىقىممۇ كۆپ بولسىمۇ، لېكىن ئوقۇشتىن سىرت ئىشلەش پۇرسىتىمۇ ئوخشاشلا كۆپ. ئوقۇغۇچىلار ئادەتتە «ئوقۇشتىن سىرتقى پائالىيەتلەر بىلەن شۇغۇللىنىش رۇخسەتنامىسى (资格外活动许可证（資格外活動許可証）)» نى ئىلتىماس قىلىپ ئالغاندىن كېيىن قوشۇمچە ئىشلىسە بولىدۇ. ئادەتتە قوشۇمچە ئىشلىگۈچىلەر ئۈچۈن نۇرغۇن ھەقسىز ژورناللار تارقىتىلىدۇ. مەخسۇس ئىشقا تونۇشتۇرۇش شىركەتلىرىمۇ كۆپ. ئىنتېرنېت تورىدىمۇ نۇرغۇن ئىش ئۇچۇرلىرى بار. ئىشقا كىرىش ئۈچۈن ھەممىسىدىلا ئاۋال تېلېفوندا ياپونچە ئالاقىلىشىش، مۇۋاپىق دەپ قارىغان نامزاتلاردىن يۈز- تۇرانە ئىمتىھان (面试) ئېلىش ئۇسۇلى قوللىنىلىدۇ. شۇڭا بۇ جەھەتتىكى ياپون تىلىنىمۇ بىلمەي بولمايدۇ.

ئادەتتە بۇنداق ئىشلارنىڭ كۆپىنچىسىدە سائەت بويىچە ھەق ھېسابلاش (時給) ئۇسۇلى قوللىنىلىدۇ. كۈندۈزدىكى ئىشلارنىڭ سائەتلىك ئىش ھەققى 800~ 1000 يېن ئەتراپىدا، كېچىنىڭ ئىشى (سىمېنا ئالمىشىپ ئىشلەيدىغان زاۋۇتلار، پوچتىخانىنىڭ خەت- چەك ئايرىش ئىشلىرى دېگەندەك) ئۈچۈن بولسا 1000~ 1200 يېن ئەتراپىدا ھەق بېرىلىدۇ. شۇنداق بولغاندا، ھەر كۈنى 4 سائەت ئىشلىيەلەيدىغان ئادەم بىر ئايدا تەخمىنەن 10 تۈمەن يېنغا ئىشلىيەلەيدۇ. لېكىن ئادەتتە مەكتەپنىڭ دەرسلىرىگە قاتنىشىدىغان ئىش بولغاچقا، بىرلا ئورۇندا ھەر كۈنى ئىشلەشكە مۇمكىن بولمايدۇ. كۆپىنچە ئوقۇغۇچىلار ھەپتە ئارىلىقىدا مەكتەپكە بېرىپ، ھەپتە ئاخىرىدا ئەڭ كامىدا 2 ئورۇندا ئىشلەشكە ئادەتلەنگەن.

ئەمدى مۇنداق بىر ھېسابنى ئىشلەپ باقايلى. بىر كىشىنىڭ ئايلىق ئۆي ئىجارىسى ۋە گاز- سۇ- توك پۇللىرى 4 تۈمەن يېن بولسا، يېمەك- ئىچمەك ئۈچۈن 1.5 تۈمەن يېن كەتسە، قاتناش پۇلىغا 5 مىڭ يېن كەتسە، سۇغۇرتا، ئالاقىلىشىش قاتارلىق چىقىملار جەمئىي 1 تۈمەن يېن بولسا، يىللىق ئوقۇش پۇلى 72 تۈمەن يېن بولسا، ئۇ ھالدا بۇ كىشىنىڭ ئوتتۇرىچە ئايلىق چىقىمى 13 تۈمەن يېن بولىدۇ. بۇ پۇلنى تېپىش ئۈچۈن بۇ كىشىنىڭ سائىتىگە 900 يېندىن ھەق بېرىدىغان ئىشتىن بىر ئايدا 145 سائەت ئىشلىشىگە توغرا كېلىدۇ. بۇ ھەر كۈنىگە تەخمىنەن 5 سائەتتىن توغرا كېلىدۇ. مۇنداقچە ئېيتقاندا، مەيلى يامغۇر ياغسۇن، ياكى تەيفېڭ بورىنى (台风) كەلسۇن، ۋە ياكى سالامەتلىكى ناچار بولسۇن، نېمىلا قىلىپ بولمىسۇن ھەر كۈنى 5 سائەت ئىشلىمىسە، ئوقۇش پۇلى ۋە باشقا چىقىملارغا يېتەرلىك پۇلنى تاپقىلى بولمايدۇ. ئۇنىڭ ئۈستىگە بۇنداق ئىشلارنىڭ كۆپىنچىسى جىسمانىي ئەمگەك بولىدۇ. شۇڭا ياپونىيىگە ئوقۇشقا چىققۇچىلارنىڭ بۇ يەرگە كەلگەندىن كېيىن بىرەر يىلدىلا 15~ 20 كىلوگرام ئورۇقلاپ كېتىشىدىن ئەجەبلىنىش ھاجەتسىز.

ياپونىيە ھۆكۈمىتىنىڭ ئوقۇشقا چىقىشنى ئىلتىماس قىلغۇچىنىڭ ئوقۇش جەريانىدىكى پۈتۈن چىقىملىرىنى ئىقتىسادىي كاپالەتچى (经费支付人（経費支弁者）) نىڭ پۈتۈنلەي ئۆز ئۈستىگە ئالالايدىغان- ئالالمايدىغانلىقىنى قاتتىق تەكشۈرۈشىنىڭ مۇھىم بىر سەۋەبىمۇ دەل مۇشۇ.

لېكىن ئوقۇشقا چىققاندىن كېيىن تەلىيىڭىز كېلىپ ئېيىغا 7~ 16 تۈمەن يېنغىچە بېرىدىغان ئوقۇش مۇكاپات پۇلى (奖学金（奨学金）) دىن بىرەرسى چىقىپ قالسا بۇنچىۋالا جاپا تارتىپ ئىشلىشىڭىز ھاجەتسىز. پەقەت ئوقۇشنى ياخشى ئوقۇسىڭىزلا بولىدۇ.

قىستۇرۇپ ئۆتۈپ كېتىشكە تېگىشلىكى شۇكى، قوشۇمچە ئىشلارنىڭ ئىچىدە ئىنگلىز تىلى ياكى كومپيۇتېردا پروگرامما تۈزۈشتىن نوپۇزلۇق بىرەر لاياقەتلىك كىنىشكىسى ياكى مول ئەمەلىي تەجرىبىسى بارلار بىر قەدەر ئاسان ھەم سائەتلىك ئىش ھەققى يۇقىرى ئىشلارنى تاپالايدۇ. ئادەتتە پروگراممېرلارنىڭ سائەتلىك ئىش ھەققى 1200~ 2000 يېنلارغىچە بولىدۇ. ئىنگلىز تىلى تەرجىمانلىرى، ئىنگلىز تىلى كاتىباتلىقى قاتارلىقلارنىڭ سائەتلىك ئىش ھەققىمۇ باشقىلاردىن كۆرۈنەرلىك يۇقىرى بولىدۇ. شۇڭا ئوقۇشقا ئىنگلىز تىلى ۋە كومپيۇتېر بىلىملىرىنىمۇ پۇختا ئۆگىنىپ كەلگەن ياخشى.

مەنبە: ساكۇرا ئۇيغۇر بلوگى

ياپونىيىدە ئوقۇش جەريانىدىكى چىقىملار

1. ئوقۇشقا كىرىش پۇلى (入学費): مەكتەپلەرگە قاراپ ئوخشاش بولمايدۇ، ئادەتتە 30- 15 تۈمەن ياپونىيە يېنى ئەتراپىدا بولىدۇ.

2. يىللىق ئوقۇش پۇلى (年間学費/授業料): ئادەتتە ئاسپىرانتلىق ئۈچۈن 45- 15 تۈمەن ياپونىيە يېنى، ئاسپىرانتلار ئىنستىتۇتى ئۈچۈن 90- 40 تۈمەن ياپونىيە يېنى، ياپون تىلى مەكتەپلىرى ئۈچۈن 90- 50 تۈمەن ياپونىيە يېنى ئەتراپىدا پۇل كېتىدۇ.

3. تۇرالغۇ ئۆي (家賃): شەھەر مەركەزلىرىدىكى تۇرالغۇ ئۆيلەرنىڭ ئىجارە ھەققى قىممەترەك، شەھەر سىرتىدىكى ئۆيلەرنىڭ بولسا ئەرزانراق بولىدۇ. ئادەتتە تۇرالغۇ ئۆي ئۈچۈن 8- 3 تۈمەن ياپونىيە يېنى ئەتراپىدا پۇل كېتىدۇ.

4. تۇرمۇش ئەسلىھەلىرى (光熱費など生活費): گاز، سۇ، توك، ئىسسىنىش قاتارلىقلارغا ئوتتۇرا ھېساب بىلەن ئېيىغا 2- 1 تۈمەن ياپونىيە يېنى ئەتراپىدا پۇل كېتىدۇ.

5. يېمەك- ئىچمەك (食事代): ئادەتتە تاماقنى ئۆزى ئېتىپ يەيدىغانلارنىڭ ئېيىغا 2- 1 تۈمەن يېن ئەتراپىدا، سىرتتىن يەيدىغانلارنىڭ بۇنىڭدىن كۆپ بولىدۇ.

مىسال ئۈچۈن ئالساق، ئادەتتىكى بىر ۋاق تاماق ئۈچۈن تەخمىنەن 500 يېن ئەتراپىدا پۇل كېتىدۇ، شۇنداق بولغاندا، كۈندە ئىككى ۋاق تاماقنى سىرتتىن يېگەندە، بىر ئايلىق تاماق پۇلىلا 3 تۈمەن يېنغا بارىدۇ. بىر بوتۇلكا سوغۇق ئىچىملىك ئادەتتە 150 يېن ئەتراپىدا بولىدۇ. ئەتىگەنلىك ناشتىنىمۇ قوشۇپ ھېسابلىغاندا ، ئومۇمىي يېمەك- ئىچمەك چىقىمى 4 تۈمەندىنمۇ ئېشىپ كېتىشى مۇمكىن. شۇڭا كۆپ قىسىم ئوقۇغۇچىلار ئادەتتە شارائىت يار بەرسىلا تاماقنى ئۆزى ئېتىپ يەيدۇ.

6. قاتناش (交通費): شەھەر مەركىزى بەكلا قىستاڭچىلىق ھەم ئۆيلەر خېلىلا قىممەت بولغاچقا، كۆپىنچە كىشىلەر شەھەرگە يىراق يەرلەردە ئولتۇرىدۇ. ئادەتتە توكيودا پويىزدا بىرەر سائەت مېڭىپ ئىش ئورنى ياكى مەكتەپكە كېلىش نورمال ئەھۋال ھېسابلىنىدۇ. شۇڭا ئايلىق بېلەت ئىشلىتىش تېجەشلىك ھەم ئۈنۈملۈك ئۇسۇل بولۇپ ھېسابلىنىدۇ. ئوقۇغۇچىلارنىڭ ئايلىق بېلىتى ئادەتتە 5000 يېندىن 15000 يېن ئەتراپىدا بولىدۇ، ئۆيى بىلەن مەكتىپى يېقىن بولغانلارمۇ ئايدا ئوتتۇرا ھېساب بىلەن بىر نەچچە مىڭ يېن ئەتراپىدا چىقىم قىلىدۇ.

7. ئالاقىلىشىش (電話): ياپونىيىدە خەۋەرلىشىش ئىشلىرى تولىمۇ تەرەققىي قىلغان، يانفوننىڭ ئومۇملىشىشىمۇ دۇنيا بويىچە ئالدىنقى قاتاردا تۇرىدۇ. يانفون شىركەتلىرىمۇ كۆپ. بۇ يەردە يانفون ياكى باشقا تېلېفون بولمىسا نۇرغۇن ئىشلاردا تولىمۇ ئاۋارىچىلىك. ئادەتتە ياپونىيىدە ئوقۇيدىغانلار يانفون ئالاقىسى ئۈچۈن ئېيىغا 10000 - 5000 يېن ئەتراپىدا چىقىم قىلىدۇ. ئۇندىن باشقا يەنە خەلقئارا ئۇزۇن يوللۇق خەۋەرلىشىش ئۈچۈنمۇ ئايدا بىر نەچچە مىڭ يېن ئەتراپىدا چىقىم بولىدۇ.

8. سۇغۇرتا (保険): ياپونىيىدە داۋالىنىش ھەققىمۇ ئوخشاشلا يۇقىرى بولغاچقا، داۋالىنىش سۇغۇرتىسىغا قاتنىشىپ قويۇش داۋالىنىشتىكى ئەڭ ئاقىلانە ئىش بولىدۇ. ئادەتتە ياپونىيە پۇقرالىرىنىڭ ھەممىسى پۇقرالار ساغلاملىق سۇغۇرتىسىغا قاتنىشىدۇ. بۇ سۇغۇرتىغا قاتناشقانلارنىڭ داۋالىنىش چىقىمىنىڭ %70 ىنى ياپونىيە ھۆكۈمىتى ئۈستىگە ئالىدۇ (ياشانغانلار ۋە 2 ياشقا توشمىغان بوۋاقلارنىڭ %80).
بۇ سۇغۇرتا ئۈچۈن ھەر ئايدا 2000- 4000 يېن ئەتراپىدا پۇل تۆلەشكە توغرا كېلىدۇ. يىللىق كىرىمى تولىمۇ تۆۋەن بولغانلارغا ئازراق ئېتىبار قىلىنىدۇ.

9. باشقا چىقىملار (その他): كونا يىلنى ئۇزىتىش ئولتۇرۇشى (忘年会―ياپونىيىدىكى ئومۇميۈزلۈك ئۆتكۈزۈلىدىغان ئولتۇرۇش، 4 خادىمى بار شىركەتتىن تارتىپ چوڭ شىركەتلەرگىچە، ھەرخىل كۇلۇبلاردىن تارتىپ مەكتەپ، ئىدارە- ئورگانلارغىچە ھەممەيلەن يىل ئاخىرىدا يىغىلىپ زىياپەت ئۆتكۈزۈپ، بىر يىللىق ئىشلىرىدىن قىسقىچە خۇلاسە قىلىدۇ)، دوستلار بىلەن يىغىلىش، ھەرخىل تەبرىكلەش ئولتۇرۇشلىرى، يىغىن- يىغىلىشلارغا قاتنىشىش قاتارلىقلار ئۈچۈنمۇ ھەر قېتىمدا 4000- 1500 يېن ئەتراپىدا چىقىم قىلىشقا توغرا كېلىدۇ. (ياپونىيىدە ھەممەيلەن چىقىمنى بۆلۈشۈپ تۆلەيدۇ، ھەتتا بىرەيلەن سىزنى مېھمان قىلغان تەقدىردىمۇ ئۆز چىقىمىڭىزنى ئۆزىڭىز تۆلىشىڭىز كېرەك، ناھايىتى ئاز بىر قىسىم ئەھۋاللار بۇنىڭ سىرتىدا.)

ئۇندىن باشقا، كىيىم- كېچەك قاتارلىقلارنى سېتىۋېلىش، داۋالىنىش، خەت- چەك ئەۋەتىش، تاماكا قاتارلىقلارغىمۇ بەلگىلىك ئىقتىساد كېتىدۇ.
مىسال ئۈچۈن ئالساق، ياپونىيىدە ئەڭ ئەرزان تاماكىنىڭ بىر قېپى 300 يېن (يېقىندا باھاسى ئۆستى)، خەلق پۇلىغا تەخمىنەن 20 يۈەن. شۇنداقتا كۈندە بىر قاپ تاماكا چېكىدىغانلارنىڭ ئايلىق چىقىمىغا يەنە 1 تۈمەن يېن قوشۇلىدۇ.

مەنبە: ساكۇرا ئۇيغۇر بلوگى

ئوقۇشقا كىرىشتە ھازىرلاشقا تېگىشلىك زۆرۈر شەرتلەر

1. ئوقۇشقا ئىلتىماس قىلىش سالاھىيىتى

1) 12 يىللىق ياكى ئۇنىڭدىن يۇقىرى ئوقۇش تارىخىغا ئىگە بولغانلار ياكى ئۇنىۋېرسىتېتنى پۈتتۈرگىنىگە 5 يىل بولمىغانلاردىن ياپون تىلى سەۋىيە سىناش ئىمتىھانىنىڭ 4- دەرىجىسىدىن ئۆتكەنلەر (ياكى كەم دېگەندە 3 ئاي ئەتراپىدا ياپون تىلى ئۆگەنگەنلەر) ياپونىيىدىكى تولۇق كۇرس، قىسقا مۇددەتلىك ئۇنىۋېرسىتېتلار، ياپون تىلى مەكتەپلىرى ۋە كەسپىي مەكتەپلەردە ئوقۇشقا ئىلتىماس قىلسا بولىدۇ.


ياپون تىلى مەكتەپلىرىنىڭ ئەڭ قىسقا ئوقۇش مۇددىتى ئادەتتە بىر يىل بولىدۇ. مۇتلەق كۆپ قىسىم ياپون تىلى مەكتەپلىرى ئوقۇشقا كىرىش رەسمىيەت ھەققى ۋە ئوقۇش پۇلىنى دەسلەپ ئوقۇشقا كىرگەندە بىرلا قېتىمدا تۆلەشنى تەلەپ قىلىدۇ، لېكىن ئۈچ ئاي ياكى ئالتە ئايغىچە بولغان ئارىلىقتا بىرەر يېتەكچى ئوقۇتقۇچى بىلەن ئالاقىلىشىپ، ئاسپىرانتلار ئىنستىتۇتىغا ئوقۇشقا كىرەلىسە، دەسلەپتە تاپشۇرغان ئوقۇش پۇلىنىڭ ئاشقان قىسمى قايتۇرۇپ بېرىلىدۇ.

2) 16 يىللىق ياكى ئۇنىڭدىن يۇقىرى ئوقۇش تارىخىغا ئىگە ھەم باكلاۋېرلىق ئۇنۋانىغا ئېرىشكەنلەردىن ياپون تىلى سەۋىيە ئىمتىھانىنىڭ 2- دەرىجىسىدىن ئۆتكەنلەر ياپونىيىدىكى ئۇنىۋېرسىتېتلارنىڭ ئاسپىرانتلار ئىنستىتۇتىدا ئوقۇشقا ئىلتىماس قىلسا بولىدۇ.

ئاسپىرانتلار ئىنستىتۇتىدا ئوقۇش ئۈچۈن چوقۇم يېتەكچى ئوقۇتقۇچى تېپىش كېرەك. ئوقۇشنى ئىلتىماس قىلىشتىمۇ رەسمىيەتلەر ئەڭ ئاۋۋال ئوقۇماقچى بولغان كەسىپ تۈرىدىكى ئاسپىرانتلارغا يېتەكچىلىك قىلىش سالاھىيىتىگە ئىگە يېتەكچى ئوقۇتقۇچىنى ئىزدەشتىن باشلىنىدۇ. يېتەكچى ئوقۇتقۇچى تېپىلسىلا، كېيىنكى رەسمىيەتلەرنى بىر قەدەر ئاسان ھەم تېز بېجىرىشكە بولىدۇ.

ئاسپىرانتلار ئىنستىتۇتىدا ئوقۇش ئۈچۈن ياپون تىلىدىن باشقا يەنە ئىنگلىز تىلىدىمۇ بەلگىلىك ئاساس بولۇشى تەلەپ قىلىنىدۇ. ئادەتتە دۆلەت ئىگىلىكىدىكى ئالىي مەكتەپلەرنىڭ ئاسپىرانتلار ئىنستىتۇتىغا ئوقۇشقا كىرىشتە ئىنگلىز تىلىدىنمۇ ئىمتىھان ئېلىنىدۇ.

ئادەتتە ئالدى بىلەن ئاسپىرانت( تەتقىقاتچى ئوقۇغۇچى) بولۇپ 6 ئايدىن 1 يىلغىچە تۇرغاندىن كېيىن ئوقۇشقا كىرىش ئىمتىھانىغا قاتنىشىپ لاياقەتلىك بولغانلار ئاسپىرانتلار ئىنستىتۇتىنىڭ ماگىستىرلىق ياكى دوكتورلۇق پروگراممىسى بويىچە رەسمىي ئوقۇشقا كىرىدۇ. ئىمتىھاندىن ئۆتەلمىگەنلەر ئاسپىرانتلىق ۋاقتىنى يەنە 1 يىلغىچە ئۇزارتالايدۇ.

2. ئىقتىسادىي شەرتلەر

رەسمىيەت بېجىرىش ھالقىسىدا، ياپونىيىنىڭ چېگرىدىن كىرىشنى باشقۇرۇش ئىدارىسى ياپونىيىدىكى ئالىي مەكتەپلەردە ئوقۇشنى ئىلتىماس قىلغۇچىنىڭ ئىقتىسادىي ئەھۋالىغا قارىتا باھالاش ئېلىپ بارغاندا، ئىلتىماس قىلغۇچىنىڭ تۆۋەندىكى بىر نەچچە مۇھىم ئىسپات بىلەن تەمىنلىشىنى تەلەپ قىلىدۇ:

1) ئىقتىسادىي كاپالەتچىنىڭ يېقىنقى 3 يىللىق كىرىم- چىقىم ئىسپاتى. بۇنىڭغا ئىقتىسادىي كاپالەتچىنىڭ نامىدىكى بانكا ئامانەت دەپتىرىنىڭ كۆپەيتىلمىسى بولسا ئەڭ ياخشى. بۇ تەلەپ 2004- يىلى 4- ئايدىن باشلاپ يولغا قويۇلغان يېڭى سىياسەت بويىچە قوشۇلغان بولۇپ، باشقا ھەرقانداق تەلەپتىن قىيىنغا توختايدۇ. مۇمكىن بولسا، ياپونىيىگە ئوقۇشقا چىقىش ئارزۇسىدا بولۇۋاتقانلار مۇشۇ ئىسپاتنىڭ تەييارلىقىنى بالدۇرراق قىلىپ قويغىنى ياخشى.

2) ئىقتىسادىي كاپالەتچىنىڭ بانكىغا قويغان ئامانەت پۇلى ئىسپاتى. بۇ، ئوقۇشنى ئىلتىماس قىلغۇچىنىڭ ياپونىيىدە ئوقۇش جەريانىدىكى پۈتۈن چىقىملىرىنى ئىقتىسادىي كاپالەتچىنىڭ ئۆز ئۈستىگە ئالالايدىغانلىقىنىڭ ئىسپاتى بولۇپ، ئادەتتە 3- 2 يۈز تۈمەن ياپونىيە يېنى (خەلق پۇلىغا تەخمىنەن 200- 150 مىڭ يۈەن. ياپونىيىدە ئادەتتە ئون مىڭ ياپونىيە يېنى بىر تۈمەن يېن دېيىلىدۇ، خەلق پۇلىغا تەخمىنەن 630~610 يۈەن ئەتراپىدا بولۇپ، بازار ئەھۋالىغا قاراپ قىممىتى ئۆزگىرىپ تۇرىدۇ.) پۇلنى جۇڭگو بانكىسى قاتارلىق بانكىلارنىڭ بىرىگە ئامېرىكا دوللىرى، ياپونىيە يېنى ياكى خەلق پۇلى شەكلىدە ئامانەت قويۇپ، پۇل چېكىنى جامائەت گۇۋاھلىقىدىن ئۆتكۈزۈشنى كۆرسىتىدۇ.

3) ئىقتىسادىي كاپالەتچىنىڭ خىزمەت ئىسپاتى. بۇ، ئىقتىسادىي كاپالەتچىنىڭ قانداق ئىش بىلەن شۇغۇللىنىدىغانلىق ئىسپاتىنى كۆرسىتىدۇ.

4) ئىقتىسادىي كاپالەتچىنىڭ يىللىق كىرىم ئىسپاتى. ئىقتىسادىي كاپالەتچىنىڭ بىر يىلدا قانچىلىك كىرىم قىلالايدىغانلىق ئىسپاتىنى كۆرسىتىدۇ.

بۇ ئىسپاتلارنىڭ ھەممىسىنى جامائەت گۇۋاھلىقىدىن ئۆتكۈزۈش تەلەپ قىلىنىدۇ. بۇلاردىن باشقا ماتېرىياللار ھەققىدە بۇ يەردە تەپسىلىي توختالمىدۇق.

3. باشقىلار

يۇقىرىقىلاردىن باشقا، ياپونىيىدە ئوقۇشنى ئىلتىماس قىلغۇچىلار يەنە تۆۋەندىكىدەك شەرتلەرنى ھازىرلىشى كېرەك:

1) ھەر قانداق جاپا- مۇشەققەتتىن قورقمايدىغان، ھەر قانداق قىيىنچىلىققا باش ئەگمەيدىغان قەيسەر روھقا ئىگە بولۇشى كېرەك. ياپونىيىدە ئوقۇش جەريانىدا خىلمۇ- خىل جاپالار، ھەر تۈرلۈك قىيىنچىلىقلارغا دۇچ كېلىپ تۇرىدىغان گەپ. بۇلارنى يېڭەلىگۈدەك ئىرادە ۋە غەيرەت بولمايدىكەن، ئوقۇشنى مۇۋەپپەقىيەتلىك تاماملاش مۇمكىن ئەمەس.

2) ياخشى ئەخلاقىي- پەزىلەت يېتىلدۈرگەن بولۇشى كېرەك. ئوقۇشقا ئىلتىماس قىلغۇچى مەيلى كىم ياكى قايسى مىللەت بولۇشىدىن قەتئىينەزەر، ياپونىيىدە ئوقۇش جەريانىدا ياپونىيىنىڭ قانۇن ۋە ئەمىر- پەرمانلىرىغا ئاڭلىق بويسۇنۇشى، ئۆز قەدىر- قىممىتىنى ساقلىشى، ئۆز مىللىتى بىلەن ياپونىيە خەلقى ئوتتۇرىسىدىكى چۈشىنىشنى چوڭقۇرلاشتۇرۇش ۋە دوستلۇق ۋە مەدەنىيەت ئالماشتۇرۇشنى ئىلگىرى سۈرۈش جەھەتلەردە ئىجابىي رول ئوينىشى كېرەك.

3) مۇستەقىل تۇرمۇش كەچۈرۈش ئىقتىدارىغا ئىگە بولغان بولۇشى كېرەك. ياپونىيىدە ھەممەيلەن ئۆز ئىشىنىڭ ھۆددىسىدىن ئۆزى چىقىدۇ. تۇرمۇش رىتىمى تولىمۇ تېز بولغاچقا ھەممەيلەن ئالدىراشلىق ئىچىدە ياشايدۇ. باشقىلارنىڭ پۈتۈن ئىشىغا ياردەم قىلىپ، ئۇجۇر- بۇجۇرىغىچە يول كۆرسىتىپ ئۆگىتىپ ئولتۇرۇشقا ئاساسەن ۋاقتى چىقمايدۇ. شۇڭا ئوقۇشقا كەلگۈچىلەرنىڭ نۇرغۇن ئىشلارنى ئۆز كۈچىگە تايىنىپ مۇستەقىل قىلىشنى ئۆگىنىۋېلىشىغا توغرا كېلىدۇ. بولۇپمۇ ئاتا- ئانىسىنىڭ ھىمايىسىدە چوڭ بولغانلار تېخىمۇ شۇنداق.

4) ئىجتىمائىي ئالاقىگە ماھىر، كىشىلەر بىلەن چىقىشىپ يېقىن ئۆتەلەيدىغان، مەسىلىلەرنى سوغۇققانلىق بىلەن تەھلىل قىلىپ توغرا يەكۈن چىقىرالايدىغان، ۋاقىتنى، تەسلىكتە قولغا كەلگەن ئوقۇش پۇرسىتىنى قەدىرلەپ تىرىشىپ ياخشى ئوقۇيدىغان، ئالغا ئىنتىلىش روھىغا ئىگە، ئۆز مىللىتى ۋە خەلقى ئۈچۈن تۆھپە يارىتىش نىيىتىدە بولغان بولۇشى كېرەك.

مەنبە: ساكۇرا ئۇيغۇر بلوگى

ياپونىيە مائارىپى (日本の教育)

ياپونىيە مائارىپى
日本の教育

ياپونىيىدىمۇ ئوخشاشلا 6-3-3-4 يىللىق ئوقۇش تۈزۈمى يولغا قويۇلغان. بۇنىڭدىكى 6 يىللىق تۈزۈمدىكى باشلانغۇچ مەكتەپ ۋە 3 يىللىق تۈزۈمدىكى تولۇقسىز ئوتتۇرا مەكتەپ مائارىپى ئوقۇش پۇلى ئېلىنمايدىغان مەجبۇرىي مائارىپ قىلىپ بەلگىلەنگەن. تولۇق ئوتتۇرا 3 يىللىق، ئادەتتىكى ئالىي مەكتەپلەر 4 يىللىق تۈزۈمدە بولۇپ، سىنىپ ئاتلاش قاتارلىق تۈزۈملەرمۇ يولغا قويۇلغان.

ئالىي مەكتەپلەرنىڭ تۈرلىرى
日本の大学の種類

ياپونىيىدىكى ئالىي مەكتەپلەرنى مۇنتىزىم ئۇنىۋېرسىتېتلار(大学)، قىسقا مۇددەتلىك ئۇنىۋېرسىتېتلار (短期大学)، ياپون تىلى مەكتەپلىرى (日本語学校)، كەسپىي تېخنىكوملار (高等専門学校) قاتارلىق تۈرلەرگە ئايرىشقا بولىدۇ. مۇنتىزىم ئۇنىۋېرسىتېتلار دېگىنىمىز ئادەتتە تولۇق كۇرس سىنىپلىرى (学部فاكۇلتېتلار)، قىسقا مۇددەتلىك ئۇنىۋېرسىتېت (短期大学) ۋە ئاسپىرانتلار ئىنستىتۇتى (大学院)نى ئۆز ئىچىگە ئالغان ئالىي مەكتەپلەرنى كۆرسىتىدۇ.

ئوقۇش مۇددىتى

تولۇق كۇرسنىڭ ئوقۇش مۇددىتى 4 يىل، ئاسپىرانتلار ئىنستىتۇتىدا ماگىستىر ئاسپىرانتلىقىنىڭ 2 يىل (مېدىتسىنا كەسىپلىرىنىڭ ماگىستىر ئاسپىرانتلىقى يوق، تولۇق كۇرستىن كېيىن بىۋاسىتە دوكتور ئاسپىرانتلىقىغا ئىمتىھان بېرىشكە بولىدۇ)، دوكتور ئاسپىرانتلىقىنىڭ 3 يىلدىن 5 يىلغىچە (مېدىتسىنا كەسىپلىرىنىڭ 4 يىل) ، قىسقا مۇددەتلىك ئۇنىۋېرسىتېتلارنىڭ 2 يىل، ياپون تىلى مەكتەپلىرىنىڭ 6 ئايدىن 2 يىلغىچە ، كەسپىي تېخنىكوم مەكتەپلىرىنىڭ ئادەتتە 2 يىل بولىدۇ.

مەنبە: ساكۇرا ئۇيغۇر بلوگى