|
iPhone نى رېمونت قىلدۇرۇش ھەققىدە چۈشەنچە
بۈگۈن iPhone نى رېمونت قىلدۇرۇش ھەققىدە قىسقىغىنە توختىلىپ ئۆتەي ، كەڭ تورداشلارغا ياردىمىم تېگىپ قالسا ئەجەپ ئەمەس .
iPhone نى رىمونت قىلدۇرۇش ھەققىدە توختالساق ، چوقۇم iPhone نىڭ نەشىرىنى تىلغا ئېلىشقا توغرا كېلىدۇ ، يەنى قولىڭىزدىكى iPhone قايسى دۆلەتنىڭ مېلى ، قايسى دۆلەتتە سېتىلغان دېگەندەك . ئادەتتە ئالما شىركىتىنىڭ مۇتلەق كۆپ قىسىم مەھسۇلاتلىرىنىڭ 1 يىل ئىچىدە خەلقئارا تەۋەلىكىدە ھەقسىز رېمونت قىلدۇرۇش مۇلازىمېتى بار ، بۇنداق ئەۋزەللىككە گەپ كەتمەيدۇ . بىراق ، ھەرقايسى دۆلەتنىڭ ئۇچۇر ئالاقە خەۋەرلىشىش ئۆلچىمى ئوخشىماسلىق سەۋەبىدىن ، iPhone غا كەلگەندە باشقا مەھسۇلاتقا ئوخشاش ھەممە دۆلەتتە ھەقسىز رېمونت قىلدۇرغىلى بولمايدۇ . شۇڭلاشقا بىز iPhone نى رېمونت قىلدۇرماقچى بولساق چوقۇم ئۇنىڭ ئوخشىمىغان نەشىرىگە قاراپ ئوخشىمىغان رېمونت قىلدۇرۇش ئۇسۇلىنى تاللايمىز . مانا بۇ مۇشۇ يازمامنىڭ مەركىزى ئىددىيەسى بولىدۇ .
كەڭ تورداشلارغا ئايان ، قولىمىزدىكى iPhone نى ئومۇميۈزلۈك چوڭ ئۈچ تۈرگە بۆلسەك بولىدۇ :
(1) چوڭ قۇرۇقلۇق مېلى (2) خوڭكوڭ مېلى (3) سۇ مېلى (ياۋرو-ئامېرىكا مېلى)
مۇشۇ ئۈچ تۈرنى ئاساس قىلىپ تۇرۇپ ئايرىم چۈشەندۈرۈپ ئۆتەي :
1. چوڭ قۇرۇقلۇق مېلى
چوڭ قۇرۇقلۇق نەشىردىكى iPhone بىز يەنە ئىچىدىن ئىككى تۈرگە بۆلىمىز ، بىرى قۇلۇپسىز چوڭ قۇرۇقلۇق iPhone تىپىنى ، يەنە بىرى بولسا ئالما شىركىتىنىڭ بىرلەشمە خەۋەرلىشىش شىركىتى بىلەن توختاملاشقان زاكاز iPhone تىپىنى كۆرسىتىدۇ . ئادەتتە بۇ ئىككىلى خىل iPhone نەشىرىنىڭ رېمونت قىلدۇرۇش ئۇسۇلى ئوخشاش بولىدۇ . يەنى سىز يېڭى iPhone سېتىۋېلىپ 90 كۈن ئىچىدە ھەقسىز تېخنىكا ياردىمى ۋە 1 يىل ھەقسىز رېمونت قىلدۇرۇش مۇلازىمېتىدىن بەھرىمان بولالايسىز . يانفونىڭىزدىن كاشىلا چىقىپ رېمونت قىلدۇرغىلى ئاپارسىڭىز ئادەتتە ئىككى خىل ئەھۋالغا قاراپ رېمونت قىلىدۇ . يەنى كۆرۈلگەن مەسىلە سىز ئۆزىڭىز سەۋەبلىكمۇ ياكى يانفون ئۆزى سەۋەبلىكمۇ . بەلكىم بەزى تورداشلىرىمىز سورىشى مۇمكىن ، بۇنى قانداق پەرق ئېتىمىز دەپ ، بۇ ئاسان ، يەنى ئەگەر iPhone رىڭىزنىڭ باتارىيەسى كونىراپ ئۇزۇنغا چىدىماس بولۇپ قالسا ، Home كۇنۇپكىسى ئىشلىمەس بولۇپ قالسا ، سېگنال ئاجىز بولسا بۇلار يانفون ئۆزى سەۋەبلىك بولىدۇ ، بۇنداق ئەھۋال ئاستىدا سىز iPhone رىڭىزنى دۆلىتىمىزنىڭ ھەرقايسى جايلىرىدىكى خالىغان بىر ئالما شىركىتىنىڭ ئورگان تەرەپ سېتىشتىن كېيىنكى مۇلازىمەت مەركىزىگە ئاپارسىڭىز سىزگە ھەقسىز رېمونت مۇلازىمېتى قىلىپ بېرەلەيدۇ . ئەگەر كۆرۈلگەن مەسىلە سەل ئېغىر بولسا سىزگە بىراقلا يېڭىنى ئالماشتۇرۇپ بېرىدۇ .
ئەگەر iPhone رىڭىزدىكى كاشىلا ئۆزىڭىز سەۋەپلىك كېلىپ چىققان بولسا ، مەسىلەن iPhone قولىڭىزدىن چۈشۈپ كېتىپ ئېكران چېقىلىپ كەتسە ، بۇنداق ئەھۋال ئاستىدا ھەممىمىزگە ئېنىق ، مۇلازىمەت مەركىزى سىزدىن ھەق ئېلىپ رېمونت قىلىدۇ . iPhone رىڭىز كەينىدىكى ئەينەك ۋە باتارىيە زەخمىگە ئۇچرىمىغان ئەھۋال ئاستىدا ، iPhone رىڭىزنىڭ ئالدىدىكى ئېكران مەيلى چېقىلسۇن ياكى كىچىككىنە سۇ تامچىسى كىرىپ كەتسۇن ، مۇلازىمەت مەركىزى Home كۇنۇپكىسىنى ، ئېكراننى ، ئالدى ئەينەكنى ۋە ئاساسىي تاختا ھەممىسىنى بىر قېتىمدىلا ئالماشتۇرۇۋېتىدۇ ھەمدە بەلگىلىك رېمونت قىلىش ھەققى ئالىدۇ .
iPhone 4S نىڭ رېمونت قىلىش ھەققى 1598 يۈەن ، iPhone 4 ، iPhone 3GS ، iPhone 3G لارنىڭ بولسا 1198 يۈەن . باتارىيەمۇ ئۆزىڭىز سەۋەبلىك بۇزۇلغان بولسا ، يېڭىغا ئالماشتۇرۇش ھەققى 588 يۈەن بولىدۇ . كەينى ئەينەك قىسىمنى ئالماشتۇرۇش ھەققى بولسا بۇزۇلغان دەرىجىسىگە قاراپ ئوخشىمىغان ھەقتە بولىدۇ ، ئادەتتە 250 يۈەن ئەتراپىدا بولىدۇ .
2. خوڭكوڭ مېلى
ئىسمىغا قاراپلا بىلىمىز ، بۇ نەشىردىكى iPhone لار خوڭكوڭدا سېتىلغان iPhone لارنى كۆرسىتىدۇ . بۇ خىلدىكى iPhone لارنىمۇ چوڭ قۇرۇقلۇقتا رېمونت قىلدۇرغىلى بولىدۇ . تەپسىلىي رېمونت قىلدۇرۇش ئۇچۇرلىرىمۇ يۇقارىدا دەپ ئۆتۈلگەن چوڭ قۇرۇقلۇق مېلىنىڭكىگە ئوخشاش بولىدۇ . لېكىن بىردۆلەتتە ئىككى سىياسەتنىڭ سەۋەبىدىن ، خوڭكوڭ مېلىنى ئورگان تەرەپ رېمونت قىلدۇرۇش پەقەت بېيجىڭ ۋە شاڭخەيدىكى سېتىشتىن كېيىنكى مۇلازىمەت مەركىزىنىلا قوللايدۇ . رېمونت قىلدۇرۇش ئاساسىي باسقۇچى مۇنداق :
(1) ئالدى بىلەن ئالما شىركىتى ئورگان تەرەپ خېرىدارلار مۇلازىمەت لىنىيەسىگە تېلفون قىلىپ ئەھۋالنى چۈشەندۈرۈپ IMEI نومۇرىڭىزنى تەمىنلەيسىز ، ئاندىن سىزگە بىر ھەل قىلىش نومۇرى بېرىدۇ ، ياخشى ساقلاڭ .
(2) ئاندىن بېيجىڭ ۋە شاڭخەيدىكى ئالما مەھسۇلاتلىرى سېتىش دۇككىنى بىلەن ئالاقىلىشىپ ئاندىن رويخەتكە ئالدۇرۇپ قويىسىز .
(3) ئاخىرىدا iPhone سېتىۋالغان تالون ياكى ھۆججەت قەغىزىنى ھەمدە ھەل قىلىش نومۇرىنى ئېلىپ بېيجىڭ ۋە شاڭخەيدىكى ئالما مەھسۇلاتلىرى سېتىش دۇككىنىغا بارسىڭىز iPhone رىڭىزنى ئوخشاشلا ھەقسىز رېمونت قىلىپ بېرىدۇ .
3. سۇ مېلى (ياۋرو-ئامېرىكا مېلى)
سۇ مېلى دېگەن بۇ خىل ئاتىلىش خەنزۇ يولداشلارنىڭ 水货 دېگەن نامدىن كەلگەن بولۇپ ، دېڭىز ئاتلاپ يۆتكەلگەن ماللارنىڭ ئومۇمىي ئاتىلىشى بولىدۇ . ھازىر بازاردا سۇ مېلىنىڭ ئامېرىكا نەشىرى ، ئەنگىلىيە نەشىرى ، سىنگاپور نەشىرى ، كورىيە نەشىرى ، ياپونىيە نەشىرى ئەڭ كۆپ ئۇچرايدۇ . ئۇنداقتا قولىمىزدىكى بۇ خىل دېڭىز ئاتلاپ كەلگەن iPhone لارنى چوڭ قۇرۇقلۇقتا ھەقسىز رېمونت قىلغىلى بولامدۇ ؟ ئالما شىركىتىنىڭ بۇنىڭغا بەرگەن جاۋابى بولسا : كەچۈرۈڭ ، بۇنىڭغا رۇخسەت يوق ! چۈنكى ئۇ قانۇنسىز يولدا چوڭ قۇرۇقلۇققا ئېلىپ كىرگەن ھېسابلىنىدۇ ، بىرەر دوستىڭىز چەتئەلدىن ئېلىپ كەلگەن ھەمدە ھەممە تالون ھۆججەت تولۇق بولسىمۇ بۇنىڭغا ئامال يوق . لېكىن ئاڭلاشلارغا قارىغاندا ، خوڭكوڭ رايونىدا سۇ مېلى iPhone لىرىنى ئورگان تەرەپ سېتىشتىن كېيىنكى مۇلازىمەت مەركىزىگە ئاپارسىڭىز سىزگە ھەقسىز رېمونت مۇلازىمېتى قىلىپ بېرەلەيدىكەن .
تامام بۇ يازمىنى ئاخىرىدا بەھرام تەھرىرلىگەن. ۋاقتى 2012-8-26 21:59
| 
قۇربان ھېيت ئۆتۈپ كەتتى .. 
ئەمەلنىڭ ساۋابى تەڭداشسىز بولغان تەشرىق كۈنلىرى يەنە بىر يىللىق مۇساپە [em:26: ...
يوللىغان ۋاقتى 2012-8-26 21:43:30
يوللىغان ۋاقتى 2012-8-26 21:58:13
سەل جاھىلراق، لېكىن پىكرىڭىزگە ھۆرمەت قىلىمەن، ياخشى يازما! 
