|
iPhone 4 باتارىيە ئالماشتۇرۇش قوللانمىسى
بۈگۈن iPhone 4 نىڭ باتارىيىسىنى ئالماشتۇرۇش ئۈستىدە توختىلاي . بەلكىم دوستلار ھېس قىلغان بولۇشى مۇمكىن ، مەيلى قايسى خىلدىكى يانفونىمىز بولسۇن ، خېلى بىر مەزگىل ئىشلەتكەندىن كېيىن ، باتارىيە ئۇزاققا چىدىماس بولۇپ قالىدۇ . بۇ ئەلۋەتتە نورمال ئەھۋال ، چۈنكى باتارىيەنىڭمۇ ئۆمرى بار ، خورايدۇ . مەسىلەن iPhone 4 نى ئېلىپ ئېيتساق ، 2010 يىلىدىن تا ھازىرغا قەدەر ، ئەڭ بالدۇر ئىشلەتكۈچىلەرگىمۇ مانا 2 يىل بولۇپ قالدى ، گەرچە باتارىيە خوراش بەكمۇ ئېغىر بولمىسىمۇ ، لېكىن ئازتولا ھېس قىلالايمىز . شۇنىڭ بىلەن بىرلىكتە دۆلەت ئىچى ۋە سىرتىدا ھازىر باتارىيە ئالماشتۇرۇش بولۇپمۇ چوڭ سىغىمدىكى باتارىيەگە ئالماشتۇرۇش سەل ئەۋىجگە چىقىپ قالدى . تورلاردىن ئۇدۇللا iPhone نىڭ ھەرقايسى تىپتىكى ھەرخىل سىغىمچانلىقتىكى باتارىيىلىرىنى زاكاس قىلغىلى بولىدىغان بولدى .
مەن شەخسەن باتارىيە ئالماشتۇرۇشنى ئانچە تەكىتلەپ كەتمەيمەن ، چۈنكى بىر ھېساپتا بىز iPhone ئىشلەتكۈچىلەر بۇنىڭغىمۇ كۆنۈپ قالدۇق ، مەيلى ئىشخانا بولسۇن ، ۋە مەيلى ئۆيدىمۇ بولسۇن ، توك بىلەن زەرەتلەش ھازىر ناھايىتى قولايلىق ، كومپىيوتېردىمۇ زەرەتلىگىلى بولىدۇ ، شۇڭا باتارىيە ئالماشتۇرۇشنىڭ ئانچە ئورنى يوق دەپ ئويلايمەن ، لېكىن دوستلار دېيىشى مۇمكىن ئەمسە بۇ يازمىنى نېمىگە يازدىڭىز دەپ . ئويلاپ كۆرەيلى ، بىر قىسىم دوستلىرىمىز بار ، ئادەتتە خىزمەت سەۋەبى بولسۇن ياكى باشقا شارائىت مەسىلىسى بولسۇن ، زەرەتلەش ئانچە قولايلىق ئەمەس ، بۇلارنىڭ باتارىيەگە بولغان تايىنىشىمۇ چوڭ . يەنە بىر قىسىم دوستلىرىمىز بار ، ئويۇنغا ئامراق ، لېكىن دائىم ئويۇن ئويناپ باتارىيە يەتمەي ئاۋارە بولىدۇ . مەن ئاساسلىق مۇشۇ دوستلىرىمىزنى كۆزدە تۇتۇپ ، iPhone 4 گە باتارىيە ئالماشتۇرۇش قوللانمىسىنى ئوتتۇرىغا قويدۇم . ئەگەر يازما كۆرۈۋاتقان سىزمۇ بۇنىڭغا قىزىقسىڭىز سىزمۇ سىناپ كۆرسىڭىز بولىدۇ ...خوش ، ھەقىقىي پاراڭغا كېلەيلى ئەمسە ...
دىققەت قېلىشقا تېگىشلىك ئىشلار :
1. ئەڭ ئالدى بىلەن شۇنى تەكىتلەپ قوياي ، باتارىيە ئالماشتۇرۇش بولسا قاتتىق دېتال ئۈستىدە ئېلىپ بېرىلىدىغان بىر ئىش ، ئەگەر يانفونىڭىزنىڭ ئوڭشاش مۇددىتى (保修期) تېخى توشمىغان بولسا ، ھەرگىز بۇ ئۇسۇلنى سىنىماڭ ، باتارىيە ئالماشتۇرماڭ . چۈنكى سىز باتارىيە ئالماشتۇرىمەن دەپ يانفوننى چۇۋۇدىڭىزما ، كېيىن بىرەر مەسىلە چىقىپ قېلىپ ئالما ئورگان تەرەپكە ئاپارسىڭىز ، ئورگان تەرەپ چۇۋۇپ بېقىپسە دەپ يانفونىڭىزنى ئېتىراپ قىلمايدۇ . شۇڭا ، باتارىيە ئالماشتۇرۇشنى ئەڭ ياخشىسى iPhone نىڭ ئوڭشاش مۇددىتى ئېشىپ كەتكەن ، ياكى سۇمېلى سېتىۋالغان دوستلار سىنىسا بولىدۇ .
2. تۆۋەندە مەن تەمىنلىگەن باتارىيە ئالماشتۇرۇش ئۇسۇلى ئىشەنچىلىك ، ئۆزەممۇ نەچچە نۆۋەت سىناق قىلىپ باققان ، باتارىيە ئالماشتۇرۇپ بولۇپ ھېچقانداق مەسىلە چىقماسلىققا كاپالەت بېرەلەيمەن ، بىخەتەر ، باشتىش ئاخىرغىچە خاتىرجەم بولىسىڭىز بولىدۇ . لېكىن ، ئالماشتۇرۇش جەريانىدا مېنىڭ دېگىنىمدەك قىلماي ، ئىختىيارىڭىزچە چىقىلماسلىققا تېگىشلىك قىسىملارغا چېقىلىپ قويۇپ ، يانفونىڭىزدا كاشىلا كۆرۈنسە ئۇنىڭغا مەن ئىگە ئەمەس . شۇڭا قىزىقىشنىڭ كەينىگە كىرىپ پۇشايمان يەيدىغان ئىش بولمىسۇن .
ئىشلىتىدىغان قوراللار:
1. ھازىر بازاردا iPhone 4 نىڭ ھەرخىل تىپتىكى نۇسخىلىرى بار . ياسالغان دۆلەتنىڭ ئوخشىماسلىقى سەۋەبىدىن ، iPhone ئاستىدىكى ۋېنتىنىڭمۇ شەكلى ئوخشىمايدۇ. ( ۋېنتا دېگىنىمىز بۇرما مىخنى كۆرسىتىدۇ ) . چوڭ تۈردىن 2 خىلغا ئايرىلىدۇ ، يەنى تۆۋەندىكىدەك بەشۋار شەكىللىك بىلەن كىرىس شەكىللىك .
شۇڭا ۋېنتىنى يېشىشكە ئىشلىتىدىغان ئەتۋىركە شەكلىمۇ ئوخشىمايدۇ ، سىز ئۆزىڭىزنىڭ iPhone 4 رىڭىزنىڭ قايسى خىلدىكى ئىكەنلىكىنى جەزىملەشتۈرگەندىن كېيىن شۇنىڭغا چۈشىدىغان ئەتۋىركە سېتىۋېلىڭ ، ياكى دوستلىرىڭىزدا بار بولسا شۇنى ئىشلىتىڭ .
2. ئېكران ۋە بەزى قىسىم زاپچاسلارنى يېشىش ئۈچۈن يەنە بىر پىلاستما پىچاق ئىشلىتىمىز ، شەكلى تۆۋەندىكى رەسىمدىكىدەك ، بۇ كۆپ ئىشلىنىدۇ ، شۇڭا چوقۇم ھازىرلىشىڭىز زۆرۈردۇر . ئادەتتە بۇنداق پىلاستما پىچاق بازاردا كۆپ ، باشقا خىل شەكىلدىكى بولسىمۇ بولىۋېرىدۇ ، ئاساسىي جەھەتتىن ھەرقانداق يانفونغا چۈشۈۋېرىدۇ .
ئالماشتۇرۇش جەريانى :
1. ھەممە مەشغۇلاتتىن بۇرۇن يانفونىڭىزنى ئۆچۈرۈڭ . يانفونىڭىزنىڭ قايسى خىلدىكى ۋېنتا ئىكەنلىكىنى جەزىملەشتۈرگەندىن كېيىن شۇنىڭغا چۈشىدىغان ئەتۋېركە ئارقىلىق iPhone 4 ئاستىدىكى ئىككى ۋېنتىنى يېشىپ چۈشۈرۈڭ .
2. ۋېنتىنى يېشىپ چۈشۈرگەندىن كېيىن ، ئارقا قاپنى ئىككى قولىڭىز بىلەن تۇتۇۋېلىپ ، ئىككى تەرەپتىن ئاستا ئۈستىگە ئىتتىرىڭ . ئاندىن ئارقا قاپنىڭ ئۈستىگە تەخمىنەن 2 مىللىمېتىر سۈرۈلگەنلىكىنى بايقايسىز .
3. ئارقا قاپنى ئاستا ئېلىپ چۈشۈرۈڭ .
4. قاپنى ئېلىپ بولغاندىن كېيىن ، باتارىيە سول تەرەپ ئاستىغا قارىسىڭىز بىر كىچىك 2.5 مىللىمېتىرلىق ۋېنتىنى كۆرىسىز ، بۇ باتارىيە بىلەن ئاساسىي توك يولىنى ئۇلايدىغان قىسىم ، شۇ ۋېنتىنى يېشىپ چۈشۈرۈڭ . ( رەسىمدىكى قىزىل يۇمىلاق ئىچىگە ئېلىپ قويغان قىسىم )
5. ۋېنتىنى ئېلىپ چۈشۈرگەندىن كېيىن ، رەسىمدىكى ئورۇنغا قاراڭ ، يەنى ۋېنتىنى چۈشۈرگەن مېتال قىسىم ، ئەمدى ھېلىقى پىلاستما پىچاق ئارقىلىق ئاۋايلاپ بىر چېتىدىن يېشىڭ ، بۇ قىسىم باتارىيە بىلەن ئۇلاقلىق بولىدۇ ، شۇڭا بەك كۈچىمەي ، ئاستا ئاستا بوشاتسىڭىز ئۆزلىكىدىن چۈشىدۇ ، ھەرگىزمۇ بىر قېتىمدىلا چىڭ كۈچەپ تارتىپ چىقىرىۋەتمەڭ .
6. مېتال قىسىمنى بوشىتىپ بولغاندىن كېيىن ، ئەمدى باتارىيە يېشىمىز . دىققەت قىلغان بولىشىڭىز مۇمكىن ، ئوتتۇرىدا بىر ئەسكەرتىش خېتى يېزىلغان پىلاستما بار ، بىز مۇشۇ پىلاستما ئارقىلىق باتارىيىنى تارتىپ يېشىپ چىقىرىمىز . تارتقاندا بەك دىققەت قىلىڭ ، ئاۋايلاپ تارتىڭ ، بەك كۈچىۋەتمەڭ ، بەلكىم باتارىيە بىلەن ئارقا ئاساسىي تاختا ئوتتۇرىسىدا شىلىم بىلەن چاپلانغان بولىشى مۇمكىن ، شۇڭا ، ئاۋايلاپ كۆپ قېتىم تارتسىڭىز ئالدىرماي بوشايدۇ . ( ئەگەر يەنە چىقمىسا ھېلىقى پىلاستما پىچاقنىڭ ياردىمى بىلەن تەڭ تارتىپ چىقارسىڭىز بولىدۇ )
7. خوش ، باتارىيەنى يېشىپ چۈشۈردۇق ، ئەمدى يېڭى باتارىيەنى سالغاندىمۇ بىرقانچە نۇقتىغا دىققەت قىلىش كېرەك ، ئالدى بىلەن چوقۇم باتارىيە سالىدىغان مېتال رايوننىڭ پاكىز ھەم ھېچقانداق توپا-چاڭ بولماسلىقىغا كاپالەتلىك قىلىڭ ، بۇ رايون بەك مۇھىم ، ھەمدە باتارىيە ئالماشتۇرۇش پۈتۈش جەريانىدا قولىڭىز چوقۇم پاكىز بولسۇن ، ئەڭ ياخشىسى پەلەي كىيىۋېلىڭ ، چۈنكى ، قولدىكى بىر قىسىملار مايلار مېتال رايونلارغا يۇقۇپ قالسا كېيىن سىمسىز تور ئىشلىتىشىڭىزغا تەسىر كۆرسىتىپ قېلىشى مۇمكىن . شۇڭا بولۇپمۇ تۆۋەندىكى رەسىم كۆرسىتىلگەن قىزىل رايونغا بەك دىققەت قىلىڭ ، بۇ رايون چوقۇم پاكىز بولسۇن ، ھەمدە يېڭى باتارىيەنى ئورۇنلاشتۇرغاندا ھەرقايسى تېگىشىش نۇقتىلىرى چوقۇم تولۇق جايىدا تېگىشسۇن .
ئاساسىي جەھەتتىن پۈتۈن باتارىيە ئالماشتۇرۇش جەريانى مۇشۇنىڭ بىلەن تۈگىدى ، تەمتىرمىسىڭىز بىرلا قېتىمدا چوقۇم مۇۋاپىقىيەتلىك ئالماشتۇرالايسىز . ئاخىرىدا بۇ يازمامنىڭ دوستلارغا ئازتولا ياردىمى تېگىپ قېلىشىنى ئۈمۈد قىلىمەن .
تامام! بۇ يازمىنى ئاخىرىدا بەھرام تەھرىرلىگەن. ۋاقتى 2012-3-18 13:05
| 
قۇربان ھېيت ئۆتۈپ كەتتى .. 
ئەمەلنىڭ ساۋابى تەڭداشسىز بولغان تەشرىق كۈنلىرى يەنە بىر يىللىق مۇساپە [em:26: ...
يوللىغان ۋاقتى 2012-3-18 12:17:14
يوللىغان ۋاقتى 2012-3-18 13:56:24
