يەر شارى خەۋەر تورى 3-ئاپرېل خەۋىرى؛ لەگلەك تورى تەرجىمىسى: ئامېرىكىدا ئېلىپ بېرىلغان بىر تەكشۈرۈشتە، مۇسۇلمانلارنىڭ نۇپۇسىنىڭ باشقا دىندىكىلەرگە قارىغاندا تېز سۈرئەتتە كۆپىيۋاتقانلىقى، 2050-يىلىدا خىرىستىئان نۇپۇسىنىڭ سانىغا يېقىنلىشىدىغانلىقى ئوتتۇرغا قويۇلدى. ئامېرىكىدىكى «پېۋ تەكشۈرۈش مەركىزى» نىڭ تۇغۇلۇش نىسبىتى ۋە دىن ئۆزگەرتىش ئەھۋاللىرىغا قاراپ ئىستاستىكا قىلىپ چىققان تەكشۈرۈش دوكلاتىغا ئاساسلانغاندا، دۇنيادا ئەڭ تېز سۈرئەتتە تارقىلىۋاتقان ۋە كۆپىيۋاتقان دىن ئىسلام دىنى ئىكەن. دۇنيا مىقياسىدا 2010-يىلىدىكى ئېلىپ بېرىلغان ئىستاستىكىلارغا ئاساسلانغاندا، 2.2 مىليارد كىشى بىلەن دۇنيا نۇپۇسىنىڭ يۈزدە 31% نى خىرىستىئانلار تەشكىل قىلغان بولۇپ، مۇسۇلمانلارنىڭ سانى بولسا 1.6 مىليارد بولۇپ دۇنيا نۇپۇسىنىڭ يۈزدە 23% نى تەشكىل قىلغان ئىدى.
پېۋ تەكشۈرۈش ئورنىنىڭ مۆلچەرلىشىگە ئاساسلانغاندا، 2050-يىلىدا دۇنيادىكى مۇسۇلمان نۇپۇسى، خىرىستىئان نۇپۇسىنىڭ سانى بىلەن يېقىنلىشىدۇ. بۇنىڭغا قارىغاندا يېڭى ئۆزگىرىشلەر داۋاملاشقان ئەھۋالدا 2050-يىلىدا دۇنيا نۇپۇسى 9.3 مىليارد بولۇپ، مۇسۇلمانلارنىڭ نۇپۇسى 2.8 مىليارد، خىرىستىئانلارنىڭ نۇپۇسى 2.9 مىلياردقا يىتىشى مۆلچەرلەنمەكتە. بۇ ئەھۋالدا مۇسۇلمانلارنىڭ نۇپۇسى دۇنيا نۇپۇسىنىڭ يۈزدە 30% نى تەشكىل قىلىدۇ، خىرىستىئانلارنىڭ نۇپۇسى بولسا 2010-يىلىدىكى ھالىتىنى ساقلاپ يۈزدە 31% دە تۇرۇشى تەخمىن قىلىنماقتا.
2010-يىلىدىكى 13 مىليون 680 مىڭ يەھۇدىي نۇپۇسىنىڭ 2050-يىلىدا 16 مىليون 90 مىڭغا يىتىشى مۆلچەرلەنمەكتە.
تەكشۈرۈشتە مۇسۇلمانلار نۇپۇسىنىڭ كۆپىيشىدىكى ئەڭ مۇھىم ئامىل بولسا ياشلار نۇپۇسى ۋە تۇغۇلۇش نىسبىتىنىڭ يۇقىرى بولۇشى دەپ كۆرسىتىلگەن، بۇنىڭغا قارىغاندا مۇسۇلمان ئاياللارنىڭ تۇغۇش نىسبىتى 3.1 نىسبەتتە، خىرىستىئانلاردا 2.7 نىسبەتتە، ھىندىيلاردا 2.4 نىسبەتتە، يەھۇدىيلاردا 2.3 نىسبەتتە ئىكەن.
ئ‍امېرىكىدا 2010-يىلىدا نۇپۇسنىڭ يۈزدە 78.3 % نى تەشكىل قىلىغان خىرىستىئانلارنىڭ ، 2050-يىلىدا يۈزدە 66.4% كە چۈشۈشى، ھېچقانداق ئېتىقادقا تەۋە ئەمەسلەرنىڭ نىسبىتىنىڭ يۈزدە 16.4% تىن يۈزدە 25.6% گە چىقىشى مۆلچەرلەنمەكتە. يەھۇدىيلارنىڭ يۈزدە 1.8% دىن يۈزدە 1.4% كە چۈشىدىغانلىقى، مۇسۇلمانلارنىڭ نۇپۇسىنىڭ يۈزدە 0.9% دىن يۈزدە 2.1% گە چىقىدىغانلىقى مۆلچەرلەنمەكتە.