گوۋۇيۈەننىڭ زۇڭلىسى لى كېچياڭ 30-مارت چۈشتىن كېيىن ‹‹خەلق›› سارىيىدا ئامېرىكا زۇڭتۇڭىنىڭ ئالاھىدە ۋەكىلى، مالىيە مىنىستىرى جاكوب لېۋ بىلەن كۆرۈشتى
شىنخۇا تورى، بېيجىڭ، 30-مارت تېلېگراممىسى: گوۋۇيۈەننىڭ زۇڭلىسى لى كېچياڭ 30-مارت چۈشتىن كېيىن ‹‹خەلق›› سارىيىدا ئامېرىكا زۇڭتۇڭىنىڭ ئالاھىدە ۋەكىلى، مالىيە مىنىستىرى جاكوب لېۋ بىلەن كۆرۈشتى.
لى كېچياڭ مۇنۇلارنى بىلدۈردى: بىر ياخشى جۇڭگو-ئامېرىكا مۇناسىۋىتى ئىككى دۆلەتنىڭ مەنپەئەتىگە ئۇيغۇن، ئاسىيا-تىنچ ئوكيان رايونى ۋە دۇنيانىڭ تىنچلىقى، مۇقىملىقى ۋە گۈللىنىشىگە پايدىلىق. بۇ يىل 9-ئايدا رەئىس شى جىنپىڭ تەكلىپكە بىنائەن ئامېرىكىدا دۆلەت ئىشلىرى زىيارىتىدە بولۇپ، جۇڭگو-ئامېرىكا مۇناسىۋىتىنىڭ تەرەققىياتىغا كۈچلۈك تۈرتكە بولىدۇ. كېيىنكى باسقۇچتا، ئىككى تەرەپ يېڭى بىر نۆۋەتلىك ئىستراتېگىيە ۋە ئىقتىساد سۆھبىتى، ئادىمىيەت ئالماشتۇرۇشى يۇقىرى قاتلاملار سۆھبىتى قاتارلىق مېخانىزم خاراكتېرلىك پائالىيەتلەرنى ئوبدان ئۆتكۈزۈپ، ئۆزئارا ئىشىنىشنى ئىلگىرى سۈرۈپ، ھەمكارلىقنى چوڭقۇرلاشتۇرۇپ، زور خەلقئارا ۋە رايون مەسىلىلىرىدە چۈشىنىش ۋە ماسلىشىشنى قويۇقلاشتۇرۇش كېرەك. شۇنىڭ بىلەن بىرگە، ئۆزئارا ھۆرمەتلىشىپ، ئوخشاشلىقلاردا بىرلىككە كېلىپ، پەرقلەرنى ساقلاپ قېلىش پىرىنسىپى بويىچە، ئىختىلاپلارنى قۇرۇلۇش خاراكتېرلىك تىزگىنلەپ، جۇڭگو بىلەن ئامېرىكىنىڭ يېڭىچە چوڭ دۆلەتلەر مۇناسىۋىتىنىڭ توغرا يول بويىچە ئالغا قاراپ تەرەققىي قىلىشىغا تۈرتكە بولۇشى كېرەك.