16-مارت شىنجاڭ ئاسترونومىيە ئىلمىي جەمئىيىتىنىڭ تونۇشتۇرۇشىچە، بۇ يىل يەر شارى بويىچە قۇياشنىڭ بىردىنبىر تولۇق تۇتۇلۇش ھادىسىسى 20-مارت يۈز بېرىدىكەن، تولۇق تۇتۇلۇشنىڭ ئەڭ ئۇزاق داۋاملىشىش ۋاقتى 2 مىنۇت ئەتراپىدا بولىدىكەن.
شۇ كۈنى سائەت 9:46 دە ئاي شارىنىڭ تولۇق سايىسى گىرلاندىيە ئارىلىنىڭ جەنۇبىدىكى ئاتلانتىك ئوكيان يۈزىدىن ئۆتىدىكەن، ئاندىن شەرقىي شىمال تەرەپكە يۆتكىلىپ، ئاتلانتىك ئوكياننىڭ شىمالى ۋە شىمالىي مۇز ئوكياندىن ئۆتۈپ، ئىككى مىنۇتتىن كېيىن شىمالىي قۇتۇپتا ئاخىرلىشىدىكەن.
ئەپسۇسلىنارلىقى، مەملىكىتىمىزنىڭ كۆپ قىسىم جايلىرىدا بۇ قېتىملىق قۇياشنىڭ تولۇق تۇتۇلۇش ھادىسىسىنى كۆزەتكىلى بولمايدىكەن، پەقەت شىنجاڭنىڭ شىمالىدىكى ئىلى، بورتالا، قاراماي، ئالتاي ۋە قومۇلنىڭ بارىكۆل، ئاراتۈرۈك ناھىيەسىدە قۇياشنىڭ قىسمەن تۇتۇلۇش ھادىسىسىنى كۆزەتكىلى بولىدىكەن. بۇنىڭ ئىچىدە قاناس كۆزىتىش نۇقتىسىدا ئەڭ چوڭ تۇتۇلۇش چوڭلۇقى 0.2 گە يېتىدىكەن.
ئۈرۈمچى شەھىرىدە شۇ كۈنى سائەت 18:50 ئەتراپىدا ئاي شارى قۇياشنى توسۇشقا باشلايدىكەن.
قۇياشنىڭ تۇتۇلۇشى: قۇياشنىڭ پۈتۈن تۇتۇلۇشى، قۇياشنىڭ ھالقىسىمان تۇتۇلۇشى ۋە قۇياشنىڭ قىسمەن تۇتۇلۇشىدىن ئىبارەت ئۈچكە بۆلۈنىدۇ. قۇياشنىڭ تولۇق تۇتۇلۇشى ئاي شارىنىڭ قۇياشنى پۈتۈنلەي توسۇۋېلىشىنى كۆرسىتىدۇ.