جاھان ئاگېنتلىقى 22-مارت خەۋىرى؛ لەگلەك تورى تەرجىمىسى: يەمەن پرېزىدېنتى ئابدۇرەببۇ مەنسۇر ئەل ھادىنىڭ بىرلەشكەن دۆلەتلەر تەشكىلاتى خەۋىپسىزلىك كېڭىشىگە مەكتۇب يوللىغان بولۇپ، خەۋىپسىزلىك كېڭىشى بۇ مەكتۇپ سەۋەبىدىن يەكشەنبە كۈنى يىغىن ئېچىشنى قارار قىلدى. ھادىينىڭ چاقىرىقىنى ئامېرىكا قوللىدى.
يەمەن پرېزىدېنتى مەنسۇر ھادىينىڭ «جىددى مۇداخىلە» چاقىرىقى ھەققىدە، بىرلەشكەن دۆلەتلەر تەشكىلاتى خەۋىپسىزلىك كېڭىشى يەكشەنبە كۈنى توپلىنىپ يەمەندىكى يېقىنقى ۋەزىيەت ھەققىدە سۆھبەتتە بولىدىغانلىقىنى قارار قىلدى. پرېزىدېنت ھادى، ب د ت خەۋىپسىزلىك كېڭىشىگە يازغان مەكتۇبىدا، پايتەخت سەنئانى كونتروللىقى ئاستىدا تۇتۇۋاتقان شىئە ھۇسىي قۇراللىقلىرىنىڭ «قانۇنلۇق ھۆكۈمەتنى ۋە دۆلەتتىكى تىنچ ۋە خاتىرجەم ۋەزىيەتنى زىيانغا ئۇچرىتىپ يەمەننى پارچىلايدىغانلىقىنى» تىلغا ئالغان.
مەنسۇر ھادى، ب د ت خەۋىپسىزلىك كېڭىشىگە ئەزا دۆلەتلەرگە «بارچە ئىمكانىيەت بىلەن بۇ ھۇجۇملارنىڭ توختىتىلىشى ئۈچۈن جىددى مۇداخىلە قىلىش چاقىرىقى» قىلدى.
ھادىي، ھۇسىي شىئەلىرىنىڭ ھەربىي ئۆزگىرىشنىڭ چەكلىنىشى كىرەكلىكىنى تىلغا ئ‍ېلىپ، «ھۇسىيلەرنىڭ كونتروللىقىدىكى رايۇنلاردا قايتىدىن يەمەن دۆلەت بايرىقىنى لەپىلدىتىشنى خالايمەن» دېدى.
ھادىي، ب د ت خەۋىپسىزلىك كېڭىشىنىڭ قارارى بىلەن ھۇسىيلەرنىڭ كېڭىيىشىنىڭ چەكلىنىشى ۋە خۇسۇسەن ئەدەن شەھىرىگە قارىتا ھۇجۇملارنىڭ توختىتىلىشىنى خالايدىغانلىقىنى بىلدۈرۈپ، «خەۋىپسىزلىك كېڭىشىنى مەسئۇلىيتىنى ئورۇندىشى ۋە دۆلەتنىڭ تىنچلىقىنى ساقلاپ قانۇنلۇق ھۆكۈمەتنى قوللاشقا چاقىرىق قىلىمەن» دېدى.
يەكشەنبە كۈنىدىكى ئۇچرىشىشتا ب د ت يەمەن ۋەكىلى جەمال بەنومار ب د ت خەۋىپسىزلىك كېڭىشى ۋە قولتۇق ھەمكارلىق تەشكىلاتىغا يەمەن ۋەزىيتى ھەققىدە مەلۇمات بېرىدۇ.
ئامېرىكا تەرەپ پرېزىدېنت ھادىينىڭ يەمەننىڭ قانۇنلۇق پرېزىدېنتى ئىكەنلىكىنى تەكىتلەپ ھادىينى قوللايدىغانلىقىنى بىلدۈردى، ۋە ھۇسىيلەرنى زوراۋانلىق ھەرىكىتىنى توختىتىشقا چاقىرىق قىلدى. ئامېرىكىنىڭ يەمەندىكى ئەل قائىدە «بازا» تەشكىلاتىغا قارشى كۈرەش قىلىۋاتقان 100 گە يېقىن ئالاھىدە ھەرىكەت خادىمى بىخەتەرلىك ئەندىشىسى سەۋەبىدىن يەمەندىن چېكىندۈرۈلدى.