جاۋ چۈنخۇا خەۋەر قىلىدۇ: ئۈرۈمچى شەھەرلىك رېلىسلىق قاتناش تۈر قۇرۇلۇشىنى ئىجرا قىلىش ئىشخانىسىدىن ئىگىلىشىمچە، مېترو 1-لىنىيەسىنىڭ ئەتىيازلىق قۇرۇلۇشىدا ئومۇميۈزلۈك ئىش باشلىنىپتۇ.

　　 مېترو 1-لىنىيىسىنىڭ تۈگۈن قۇرۇلۇشى، جۇڭگو تۆمۈريول 2-ئىدارىسى پاي چەكلىك شىركىتى ئۈرۈمچى شەھىرى رېلىسلىق قاتناش 1-لىنيەسى قۇرۇلۇشى 05 بۆلىكىنىڭ تۆگەدەڭ-شىنشىڭگەي بېكىتى ئارىلىقىدىكى تىك قۇدۇق قۇرۇلۇش رايونىدا، 16-مارت 1-، 2-تىك قۇدۇقتا قۇرۇلۇش قىلىنىۋاتقانلىقىنى، 1-تىك قۇدۇقنىڭ 36.7 مېتىر چوڭقۇرلۇقتا كولانغانلىقىنى، توغرا لەخمە ئىككى قەۋەتكە ئايرىلغان بولۇپ، بىرىنچى قەۋەتتىكى ئۆتۈشمە يول قۇرۇلۇشىنىڭ تاماملانغانلىقىنى، ئىككىنچى قەۋەتتىكى ئۆتۈشمە يولنىڭ داۋاملىق كولىنىۋاتقانلىقىنى كۆردۈم.

　　 ئۇقۇشۇمچە، مېترو 1-لىنىيىسىدە 21 بېكەت (يەتتە بېكەتتە ئالمىشىپ ئولتۇرغىلى بولىدۇ) تەسىس قىلىنىدىكەن. قۇرۇلۇش تەڭرىتاغ رايونى، بۇلاقتاغ رايونى، سايباغ رايونى، يېڭىشەھەر رايونى قاتارلىق تۆت مەمۇرىي رايونغا چېتىلىدىغان بولۇپ، لىنىيە جەنۇپتىن شىمالغا قاراپ مەركىزىي شەھەر رايونىنى كېسىپ ئۆتىدىكەن، جەنۇپتا ئۈچتاشتىن باشلىنىپ شىنجاڭ ئونۋېرسىتېتى، دۆڭكۆۋرۈك، ئاققۇۋۇق، تۆگەدەڭ، تۆمۈريول ئىدارىسى، ئايروپورت قاتارلىق ئادەم نىسبەتەن زىچ رايوندىن ئۆتىدىكەن، ئومۇمىي مۇساپىسى 27.6 كىلومېتىر ئىكەن، 2014-يىلى قۇرۇلۇش باشلانغان 1-لىنىيىنىڭ شىمالىي بۆلىكىدە شىنشىڭگەي، شىمالىي يىكەنكۆل يولى، ۋاڭجيالياڭ، سەككىز قەۋەت، سۇساي، جۇڭيىڭگوڭ، شياۋشىگو، تۆمۈريول ئىدارىسى، تەنتەربىيە مەركىزى، ئۆسۈملۈكلەر باغچىسى، مەرھابا يولى ئېغىزى، سەنگوڭ، شەھەردۆڭ، چوڭ قۇمۇشكۆل، خەلقئارا ئايروپورت قاتارلىق 15 بېكەت بار ئىكەن. پۈتۈن لىنىيىدە ئاققۇۋۇق، سەككىز قەۋەت، ۋاڭجيالياڭ بېكەتلىرىدە ئاستىدىن قېزىش ئۇسۇلى بىلەن قۇرۇلۇش قىلىنغاندىن باشقا، قالغان بېكەتلەردە ئۈستىدىن قېزىش ئۇسۇلى بويىچە قۇرۇلۇش قىلىنىدىكەن.