ئامېرىكا بىرلەشمە ئاخبارات ئاگېنتلىقىنىڭ 11-ئاينىڭ 29-كۈنى خەۋەر قىلىشىچە، ئامېرىكا فېرگۇسوندىكى نېگىر ياشنى ئېتىپ ئۆلتۈرگەن ئاق تەنلىك ساقچى-داررېن.ۋېلسون (Darren Wilson) شۇ يەر ۋاقتى 29-چېسلا كۈنى خىزمىتىدىن ئىستېپا بەرگەنلىكىنى جاكارلىغان بولۇپ، ئۇنىڭ ئادۋۇكاتىنىڭ تونۇشتۇرۇشىچە، ۋېلسون ئىسىملىك بۇ ئاق تەنلىك ساقچى بۇ يىل 8-ئاينىڭ 9-كۈنىدىن باشلاپلا مەمۇرىي دەم ئېلىش ئېلىۋاتقان بولۇپ، ئۇنىڭ ئىستېپانامىسى پات ئارىدا كۈچكە ئىگە بولىدىكەن.

ۋېلسون ‹سان لۇيىس پوچتا گېزىتى› گە ئىپادە بىلدۈرۈپ، ئۆزى ئىشلەيدىغان ساقچى ئىدارىسىنىڭ ئۆزى تۈپەيلىدىن زوراۋانلىق تەھدىتىگە ئۇچرىغانلىقىنى، ساقچى ئىدارىسى تەرەپ ئۇنىڭغا بۇ ئەھۋالنى ئۇقتۇرغاندىن كېيىن ئۆزى خالاپ خىزمىتىدىن ئىستېپا بەرگەنلىكىنى ئېيتقان، ۋېلسون مۇنداق دېگەن:‹ مەن ھېچقانداق ئادەمنىڭ مېنىڭ سەۋەبىمدىن زىيانغا ئۇچرىشىنى خالىمايمەن›.

ئاق تەنلىك ساقچىنىڭ نېگىر ياشنى ئېتىپ تاشلىغانلىق ۋەقەسى يۈز بەرگەندىن كېيىن ئۈچ ئايغا يېقىن ۋاقىتتا مەزكۇر دېلوغا قارىتا ئىسپاتلاش ۋە كېڭەش ئېلىپ بېرىلغان بولۇپ، زاسېداتىللار ئۆمىكى مۇشۇ ئاينىڭ 24-كۈنى ۋېلسون ئۈستىدىن ئەرز قىلمايدىغانلىقىنى جاكارلىغان. لېكىن ئامېرىكا ئەدلىيە تارماقلىرى نۆۋەتتە مەزكۇر دېلوغا قارىتا خەلق ھوقۇقى تەكشۈرۈشى ئېلىپ بېرىۋاتقان بولۇپ، ئەدلىيە تارماقلىرى يەنە ساقچى ئىدارىسىنىڭ كۈندىلىك ھەرىكەتلىرىگە قارىتا تەكشۈرۈشمۇ ئېلىپ بېرىۋاتقانىكەن.

ۋېلسوننىڭ خىزمىتىدىن ئىستېپا بېرىشى ساقچى ئىدارىسى ئالدىدا نامايىش قىلىۋاتقان نامايىشچىلارغا قارىتا ھېچقانداق تەسىر كۆرسەتمىگەن بولۇپ، بۇنىڭ ئىچىدىكى بىر نەپەر نامايىشچى ئىپادە بىلدۈرۈپ، ئۆزىنىڭ ۋېلسون ئىسىملىك بۇ ساقچىنىڭ خىزمىتىدىن ئىستېپا بەرگەنلىك ئىشىغا قارىتا ھېچقانچە كۆڭۈل بۆلمەيدىغانلىقىنى ئېيتقان.