ئامېرىكا تېكساس شتاتى دالاس شەھىرىدىكى بىر دوختۇرخانا 8-ئۆكتەبىر ئامېرىكىدا بايقالغان تۇنجى ئېبولا يۇقۇمى بىمارىنىڭ شۇ يەر ۋاقتى 8-ئۆكتەبىر چۈشتىن بۇرۇن داۋالاش ئۈنۈم بەرمەي قازا قىلغانلىقىنى جاكارلىدى.

بۇ دوختۇرخانا بايانات ئېلان قىلىپ مۇنداق دېدى: 42 ياشلىق توماس ئېرىك دانكېن شۇ يەر ۋاقتى چۈشتىن بۇرۇن سائەت 7:51 ئۆتكەندە ئېبورا يۇقۇمى سەۋەبىدىن دوختۇرخانىدا قازا قىلدى، ئۇنىڭ كېسەل بىلەن باتۇرانە ئېلىشتى، قۇتقۇزۇشقا قاتناشقان بارلىق كەسپىي خادىملار، دوختۇر، سېستىرا ۋە دوختۇرخانىدىكى بارلىق خادىملار ئۇنىڭ ۋاپاتىدىن ئازابلاندى.

دانكېن 20-سىنتەبىر غەربىي ئافرىقا دۆلىتى لىۋىيەدىن ئامېرىكىغا تۇققان يوقلاپ كەلگەن، 24-سىنتەبىردىن باشلاپ ئۇنىڭدا ئېبولا يۇقۇمى ئالامەتلىرى كۆرۈلگەن، 26-سىنتەبىر دوختۇرخانىدا كېسەللىك ئەھۋالىغا ۋاقتىدا دېئاگنوز قويۇلمىغان. 28-سىنتەبىر كېسىلى ئېغىرلىشىپ قۇتقۇزۇش ماشىنىسى بىلەن دوختۇرخانىغا ئېلىپ بېرىلغان، 30-سىنتەبىر ئامېرىكىدىكى تۇنجى ئېبولا يۇقۇمى بىمارى دەپ دېئاگنوز قويۇلغان. بۇ ئافرىقا سىرتىدىكى تۇنجى ئېبولا يۇقۇمى بىمارى.

ئېبولا يۇقۇمى ۋىرۇسى 1976-يىلى بايقالغان، قان ۋە شۆلگەي قاتارلىق بەدەن سۇيۇقلۇقى ئارقىلىق تارقىلىدۇ، يوشۇرۇن مەزگىلى سەككىزدىن ئون كۈنگىچە، ئەڭ ئۇزۇن بولغاندا 21 كۈن بولۇپ، كېسەللىك ئالامىتى كۆرۈلگەن ۋىرۇس بىلەن يۇقۇملانغۇچىلا يۇقۇملاندۇرالايدۇ. خەۋەرگە قارىغاندا، دانكېندا 24-سىنتەبىر كېسەللىك ئالامىتى كۆرۈلگەن، شۇنىڭ ئۈچۈن بۇندىن كېيىن نەچچە كۈن يۇقۇملىنىش ئەھۋالىنىڭ كېڭىيىش-كېڭەيمەسلىكىدىكى ئاچقۇچلۇق مەزگىل ئىكەن.

دۇنيا سەھىيە تەشكىلاتىنىڭ ئەڭ يېڭى يۇقۇم ئەھۋالى سانلىق مەلۇماتىدا كۆرسىتىلىشىچە، سىنتەبىرنىڭ ئاخىرىغىچە، غەربىي ئافرىقىدىكى قاتتىق ئاپەت رايونى گۋىنىيە، لىبىرىيە ۋە سېررالېئوندا ئېبولا يۇقۇمى ۋىرۇسى دەپ دېئاگنوز قويۇلغان، گۇمانلانغان ۋە يۇقۇملىنىش مۇمكىنچىلىك بولغان بىمار 7470 كە، قازا قىلغانلار 3431 گە يەتكەن.