ئاسىيادىكى تۇنجى ئېبولا ۋىرۇسى بىلەن يۇقۇملانغۇچى ھىندىستاندا پەيدا بولدى، «ھىندىستان ۋاقىت گېزىتى»نىڭ خەۋىرىگە قارىغاندا، ھىندىستان سەھىيە تارماقلىرى 18-نويابىر لىبېرىيەدە ئىشلىگەن 26 ياشلىق بىر ھىندىستانلىق ئەر دۆلىتىگە قايتقاندىن كېيىن، بەدىنىدىن ئېبولا ۋىرۇسى تەكشۈرۈپ چىقىلغانلىقىنى ئىسپاتلىغان. گەرچە بۇ ئاسىيادا پەيدا بولغان تۇنجى ئېبولا كېسىلى بولسىمۇ، لېكىن جۇڭگو كېسەللىكتىن ساقلىنىش، تىزگىنلەش مەركىزى ۋىرۇس تەتقىقاتخانىسىنىڭ تەتقىقاتچىسى لى دېشىن 19-نويابىر «يەر شارى ۋاقىت گېزىتى» مۇخبىرىغا، ئېلىمىزنىڭ ئېبولا يۇقۇمىدىن ساقلىنىش، تىزگىنلەش خىزمىتى تەدبىرلىرى چىڭ بولماقتا، بۇ ئىشنىڭ تەسىرىگە قىلچە ئۇچرىمايدۇ دېدى.

خەۋەرگە قارىغاندا، بۇ ئەر 10-نويابىر لىبېرىيەدىن يېڭى دېھلىغا قايتقان، ئايرودۇرۇمدا مەجبۇرىي تەكشۈرۈشتىن كېيىن، بەدىنىدىن ئېبولا ۋىرۇسى تەكشۈرۈپ چىقىلغان. بۇ ئەر زىيارەتنى قوبۇل قىلغاندا، 11-سېنتەبىردىن 30-سېنتەبىرگىچە، ئۆزىنىڭ غەربىي ئافرىقا دۆلىتىدە قىزىتما خاراكتېرلىك كېسەل بىلەن داۋالانغانلىقى ھەم لىبېرىيە سەھىيە تارمىقى تارقاتقان «ئېبولا ۋىرۇسى كىلىنىكىلىق ئالامىتى يوق» دېگەن ئىسپاتنى ئالغاندىن كېيىن دوختۇرخانىدىن چىققانلىقىنى ئېتىراپ قىلغان. نۆۋەتتە، بۇ ئەر يەنىلا ھىندىستان سەھىيە تارمىقى تەرىپىدىن ئايرودۇرۇمدىكى كېسەللىكتىن ساقلىنىش، تىزگىنلەش مەركىزىدە ئايرىپ تۇرۇلماقتا.

ھىندىستان سەھىيە تارمىقى گەرچە دۇنيا سەھىيە تەشكىلاتى بىلەن ئامېرىكا كېسەللىكتىن ساقلىنىش، تىزگىنلەش مەركىزىنىڭ ئالاقىدار ئۆلچىمىگە ئاساسەن، بۇ ئەرنىڭ قان ئەۋرىشكىسىنى تەكشۈرگەندە ئېبولا ۋىرۇسى مەنپىي چىققان بولسىمۇ، لېكىن خىزمەتچىلەر يەنىلا ئۇنىڭ قان ئەۋرىشكىسىدىن ئېبولا ۋىرۇسىنى تەكشۈرۈپ چىقتى دېدى. ھىندىستان سەھىيە تارمىقى بۇ ئەرنى 90 كۈن ئايرىپ كۆزەتمەكچى بولدى، لېكىن ھازىرچە ھېچقانداق ئاگاھلاندۇرۇش ئېلان قىلمىدى.

خەلقئارا جەمئىيەت ھىندىستاندا تۇنجى ئېبولا كېسىلى پەيدا بولغانلىقىنى ئۇققاندىن كېيىن بۇنىڭدىن ئومۇميۈزلۈك ئەندىشە قىلىدىغانلىقىنى بىلدۈردى. رېيتېر ئاگېنتلىقى 18-نويابىر ئوبزور ئېلان قىلىپ، ھىندىستان سەھىيە تارمىقىنىڭ خىزمىتىنى يۈرۈشتۈرۈشى زىيادە ئېغىر، يېزىلاردىكى ئاممىنى ئاساسىي سەھىيە مۇلازىمىتىگە ئىگە قىلىش بىر مەسىلىگە ئايلانغان دېدى. دۇنيا سەھىيە تەشكىلاتىنىڭ سابىق ئەمەلدارى پېتىر 18-نويابىر «ھىندىستان ۋاقىت گېزىتى»گە، نۆۋەتتە غەربىي ئافرىقىدا 45 مىڭ ھىندىستانلىق بار، شۇڭا يۇقۇمنىڭ تېخىمۇ كېڭىيىشىدىن ئەندىشە قىلىمىز دېدى.

ئاسىيادا تۇنجى ئېبولا ۋىرۇسى بىلەن يۇقۇملانغۇچىنىڭ پەيدا بولغانلىقى-جۇڭگونىڭ ئېبولا ۋىرۇسىدىن ساقلىنىش، تىزگىنلەش ۋەزىيىتىنىڭ تېخىمۇ كەسكىنلىشىشىدىن دېرەك بېرەمدۇ-يوق دېگەن مەسىلە ھەققىدە، جۇڭگو كېسەللىكتىن ساقلىنىش، تىزگىنلەش مەركىزى ۋىرۇس تەتقىقاتخانىسىنىڭ تەتقىقاتچىسى لى دېشىن 19-نويابىر «يەر شارى ۋاقىت گېزىتى»گە، بۇنىڭ ئېلىمىز بىلەن بىرئازمۇ مۇناسىۋىتى يوق، بۇ ئەر ھىندىستاندا ئەمەس، بەلكى ئافرىقىدا ئېبولا ۋىرۇسى بىلەن يۇقۇملانغان. كەسكىن قىلىپ ئېيتقاندا، بۇ پەقەت ئاسىيادا پەيدا بولغان تۇنجى ئېبولا كېسىلى دېدى.