ئامېرىكىنىڭ ‹‹ساغلاملىق كۈنى›› تورىنىڭ خەۋرىگە ئاساسلانغاندا، ئەيۋا ئۇنىۋېرسىتى، جەنۇبىي كارولىنا ئۇنىۋېرسىتى ۋە لويىزاننا ئىشتاتى پېننىتۇن جانلىقلار مېدىتسىنا مەركىزى قاتارلىق ئورۇنلارنىڭ بىرلىكتە ئېلىپ بارغان ئەڭ يېڭى ھەرىكەت ۋە ئۆلۈمگە ئالاقىدار چوڭ كۆلەملىك تەتقىقاتىدا كۆرسىتىلىشىچە، ھەر كۈنى پەقەت بەش مىنۇتلا يۈگۈرۈپ بەرسە، كىشىلەرنىڭ بالدۇر ئۆلۈپ كېتىش خەۋپىنى زور دەرىجىدە تۆۋەنلەتكىلى بولىدىكەن.

بۇ يېڭى تەتقىقاتنىڭ سانلىق مەلۇماتلىرى دالاسكۇپ ئامبۇلاتورىيەسى ۋە ئۇنىڭ تەتقىقات ئورنىدىكى كۆلىمى ناھايىتى زور بولغان ئۇچۇر ئامبىرىدىن كەلگەن. تەتقىقاتچى خادىملار بۇ ئۇچۇر ئامبىرىدىن 18 ياشتىن 100 ياشقىچە بولغان 55 مىڭدىن ئارتۇق ساغلاملىق پىدائىيلىرىنى تاللىۋالغان بولۇپ، ئۇلارنىڭ بۇ ئامبۇلاتورىيەدە ھازىرغىچە تەكشۈرۈلۈۋاتقان ۋاقتى 15 يىلدىن ئاشىدىكەن.

‹‹ئامېرىكا يۈرەك كېسىلى ئىلمى جەمئىيىتى ژۇرنىلى››دا ئېلان قىلىنغان تەتقىقات نەتىجىسىدە كۆرسىتىلىشىچە، يۈگۈرۈش ئادىتى بارلارنىڭ كېسەلگە گىرىپتار بولۇش ئېھتىماللىقى يۈگۈرمەيدىغان كىشلەرنىڭكىدىن كۆپ تۆۋەن بولىدىكەن. تەتقىقاتچى خادىملار ئېغىرلىقى ئېشىپ كېتىش ياكى تاماكا چېكىش قاتارلىق ئامىللارنى ئويلاشقاندىمۇ، يۈگۈرەيدىغانلارنىڭ ئومۇمىي ئۆلۈش خەۋپى يۈگۈرمەيدىغانلارغا قارىغاندا %30 تۆۋەن، يۈرەك كېسىلىدە ئۆلۈپ كېتىش خەۋپىمۇ يۈگۈرمەيدىغانلارغا قارىغاندا %45 تۆۋەن بولىدىغانلىقىنى ئىسپاتلىغان. ئومۇمەن ئېيتقاندا، يۈگۈرەيدىغانلارنىڭ ئۆمرى يۈگۈرمەيدىغانلارغا قارىغاندا ئۈچ يىل ئەتراپىدا ئۇزاق بولىدىكەن.