يېقىندا ، ئۈرۈمچىدە ئاممىۋى ئاپتوبۇسلارنىڭ بىخەتەرلىكىنى قوغداش ئومۇميۈزلۈك كۈچەيتىلىپ، 409 دانە BRT ( ئايلانما يول تېز ئاپتوبۇسىنىمۇ ئۆز ئىچىگە ئالىدۇ ) غا ‹‹ ئەينەك چاققۇچ ›› ئورنىتىلغان . جىددىي ئەھۋال يۈز بەرگەندە، شوپۇر ئەينەك چاققۇچنىڭ كۇنۇپكىسىنى باسسىلا ئاپتوبۇس دېرىزىسىنىڭ ئەينىكى چېقىلىپ ، يولۇچىلارنىڭ قېچىشىغا قولايلىق ئېلىپ كېلىدىكەن .

10-سېنتەبىر چۈشتىن كېيىن ئۈرۈمچى بەييۈەن يولىدىكى بىر ئاممىۋى ئاپتوبۇس توختىتىش مەيدانىدا ، بىر نەچچە خىزمەتچى خادىم BRT غا ‹‹ ئەينەك چاققۇچ ›› ئورناتتى . ‹‹ ئەينەك چاققۇچ ›› بەش سانتىمېتىر چوڭلۇقتىكى بىر قىزىل قۇتا بولۇپ ، ئاپتوبۇس دېرىزىسىنىڭ يان تەرىپىگە ئورنىتىلىدۇ .

نەق مەيداندىكى خىزمەتچى خادىملارنىڭ تونۇشتۇرۇشىچە ، ئەينەك چاققۇچ ئاساسلىقى بوشلۇق بىر قەدەر چوڭ ، قېچىشقا ماس كېلىدىغان دېرىزىگە ئورنىتىلىدىغان بولۇپ ، ئاپتوبۇس تىپىنىڭ ئوخشىماسلىقىغا ئاساسەن ، 12 مېتىر ئۇزۇنلۇقتىكى ئاپتوبۇسقا 4 ~ 5 دانە ، 18 مېتىر ئۇزۇنلۇقتىكى ئاپتوبۇسقا 6 ~ 8 دانە ئورنىتىلىدىكەن .

خىزمەتچى خادىمنىڭ مۇخبىرغا كۆرسىتىشىچە ، ‹‹ ئەينەك چاققۇچ كۇنۇپكىسى ››BRT نىڭ رولىنىڭ سول تەرىپىگە ئورنىتىلىدىكەن .

تونۇشتۇرۇلۇشىچە ، ئەينەك چاققۇچنىڭ خىزمەت پىرىنسىپى بولسا ئېلېكتىر ماگنىت ، قوزغىتىش پۇرژىنىسى ۋە تەپكە توك مەنبەسىدىن پايدىلىنىپ، ئاپتوبۇس ئەينىكىنىڭ بۇلۇڭ تەرىپىگە ئۇرۇلغاندىن كېيىن ، ئەينەك چېقىلىدىكەن. بۇنىڭدىن باشقا ، ئەينەك چاققۇچنىڭ ئۆزىنىڭ ئاككۇمۇلياتورى بولغاچقا، ئاپتوبۇس قوزغالمىغان ئەھۋالدىمۇ ئەينەكنى چاققىلى بولىدىكەن .