ئاسىيا ياۋروپا كۆرگەزمىسىدە، يىپەك يولى ئىقتىسادىي بەلۋېغىدىكى چېگرا ئېغىزلىرى ئۆز كۈچىنى نامايەن قىلىپ، شىنجاڭنىڭ «يىپەك يولى ئىقتىسادىي بەلۋېغى يادرولۇق رايونى» نىڭ چەكسىز سېھرى كۈچىنى يارىتىشقا كۈچ قوشتى.

ئالاتاغ ئېغىزى نۆۋەتتە ئېلىمىزنىڭ غەربى رايونىدىكى بىردىن بىر تۆمۈر يول، تاشيول تۇتاشقان دۆلەت 1-دەرىجىلىك چېگرا ئېغىزى. ئالاتاغ شەھىرىنىڭ دائىمىي مۇئاۋىن شەھەر باشلىقى گېڭ يۇڭجياڭ ئىنتايىن ئىپتىخارلانغان ھالدا: 18-ئىيۇن، ئالاتاغ ئۇنىۋېرسال باجدىن خالىي رايونى رەسمى تاموژنىنى ئېتىپ تىجارەت باشلىدى، ئىسكىلاتتا زاپاس ساقلاش ئەشيا ئوبوروتى، ئاشلىق ماي پىششىقلاپ ئىشلەش، خام نېفىت ئىسكىلاتى پىششىقلاپ ئىشلەش قاتارلىق 12 كارخانا كىرىپ ئورۇنلاشتى؛ ئىيۇلدا، ئالاتاغ ئېغىزىغا ئاپتوموبىل ئىمپورت قىلىش چېگرا ئېغىزى تۈرى تەستىقلاندى. گۇاڭدۇڭلۇق سودىگەر ۋۇ دىشيۇڭ بىر قېتىمدىلا ئۇنىۋېرسال باجدىن خالى رايوندىكى 3 تۈرگە كېلىشىم ئىمزالاپ، جەمئىي 780 مىليون يۈەن مەبلەغ سالدى، دېدى.

يېقىنقى يىللاردىن بۇيان، قورغاس چېگرا ئېغىزىنىڭ نامى چىقىشقا باشلىدى. جېجياڭلىق سودىگەر جىن شىڭجۇڭنىڭ كۆزى بۇ يەرگە چۈشتى، 1 مىليارد 800 مىليون يۈەن مەبلەغ سېلىپ جۇڭگو قازاقىستان قورغاس خەلقئارا چېگرا ھەمكارلىق مەركىزىدە «يىۋۇ خەلقئارا سودا شەھەرچىسى» قۇردى.

قورغاس ئىقتىسادىي تەرەققىيات رايونلۇق پارتىيە خىزمىتى كومىتېتىنىڭ ئەزاسى ساۋ جيەن مۇخبىرغا مۇنداق بىر ھىساۋاتنى قىلىپ بەردى: كەلگۈسى ئۈچ يىلدىن بەش يىلغىچە، جۇڭگو بىلەن قازاقىستان جۇڭگو قازاقىستان قورغاس خەلقئارا چېگرا ھەمكارلىق مەركىزىدە 40 نەچچە تۈرنى كەينى كەينىدىن ئىشقا كىرىشتۈرىدۇ، دەسىلەپكى مۆلچەرگە قارىغاندا ھەر كۈنى كىرىپ چىقىدىغان ئادەم 300 مىڭ ئادەم قېتىمغا يېتىدىكەن، ئىككى دۆلەتنى 70 مىڭدىن ئارتۇق ئىش ئورنى بىلەن تەمىنلەيدىكەن.

بۇنىڭدىن باشقا، 250 يىللىق سودا تارىخىغا ئىگە باقتۇ ئېغىزى ئۈچ نۆۋەت «باقتۇ مۈنبىرى» نى مۇۋەپپەقىيەتلىك ئۆتكۈزۈپ، نامى بارغانسېرى چىقىشقا باشلىدى. تارباغاتاي ۋىلايەتلىك مەمۇرىي مەھكىمىنىڭ ۋالىسى سارقىت مۇنداق دېدى: مۈنبەردىكى ئىدىيىۋى قاراشلار شىنجاڭنىڭ چېگرا رايونىنى ئېچىشنى ئىلگىرى سۈرۈشتىكى ئەمەلىي ھەرىكەتكە ئايلاندى.

2012-يىلى دېكابىردا باقتۇ ئېغىزى دۆلەت تەرىپىدىن جۇڭگو قازاقىستان يېزا ئىگىلىك مەھسۇلاتلىرىنى تاموژنىدىن تېز ئۆتكۈزۈش «يېشىل كارىدورى» دىكى بىردىن بىر سىناق قىلىنىدىغان چېگرا ئېغىزى قىلىپ بېكىتىلدى؛ شۇ يىلى ئىيۇلدا شىنجاڭدىكى تۇنجى «ئۈچ كۈن ۋىزىسىز چېگرا رايوندىكى ئاممىنىڭ ئۆز ئارا سودا قىلىشى سىناق رايونى» رەسمى ئىشقا كىرىشتۈرۈلدى. بۈگۈنكى باقتۇ دۇنياغا يۈزلەنمەكتە.