تۈرك مېدىيەلىرى 7-ئاينىڭ 31-كۈنى خەۋەر قىلىدۇ: تۈركىيە تۈركمەنلەرنى ئاساس قىلغان يۇرت-ماكانلىرىدىن قېچىپ چىقىشقا مەجبۇر بولغان ئىراقلىقلارغا داۋاملىق ياردەم بېرىدۇ. تۈركىيە قىزىل ھىلال ئاي جەمئىيىتىنىڭ ماسلاشتۇرۇشىدا توشۇلغان ياردەم ئەشيالىرى كىركۇك، سانجار، ئېربىل، دۇخوك ۋە تۇز خۇرمارتۇ قاتارلىق رايونلاردىكى ئائىلىلەر ۋە مۇساپىرلار لاگىرىغا يېتىپ باردى.

خەۋەرلەرگە ئاساسلانغاندا، ئىراق ۋە شام ئىسلام دۆلىتى تەشكىلاتىنىڭ قوراللىق ئۇنسۇرلىرى ھۇجۇم قوزغىغاندىن بۇيان، نۇرغۇن تۈركمەنلەر يۇرت-ماكانلىرىدىن قېچىشقا مەجبۇر بولغان. تۈركمەنلەر تۇز خۇرمارتۇ، دۇخوك، سانجار ۋە ئېربىل قاتارلىق جايلارغا قېچىپ كېلىپ پاناھلانغان. تۈركىيە قىزىل ھىلال ئاي جەمئىيىتى 6-ئاينىڭ 20-كۈنىدىن بۈگۈنگىچە ئىزچىل بۇ رايونغا ياردەم بېرىپ كەلمەكتە.

ياردەم ئەشيالىرى يېمەكلىك، كىيىم، تازىلىق ۋە سەھىيە بۇيۇملىرىنى ئۆز ئىچىگە ئالىدۇ. روزى ھېيت مەزگىلىدىمۇ خادىملار داۋاملىق ياردەم ئەشيالىرىنى تارقىتىش خىزمىتىنى ئۆتىدى. قىزىل ھىلال ئاي جەمئىيىتى تۈركىيە باش مىنىستىر جىددىي ئاپەتتىن قۇتقۇزۇش مەھكىمىسى تەمىنلىگە ياردەم ئەشيالىرىنى مۇساپىرلارنىڭ قولىغا يەتكۈزۈپ بېرىش ۋەزىپىسىنى ئۈستىگە ئالغان. ئۆي-ماكانسىز قالغان تۈركمەنلەر تۈركىيە ھۆكۈمىتىنىڭ ياردىمىدىن چەكسىز مىننەتدار بولدى.