جۇڭگونىڭ دۆلەت رەئىسى شى جىنپىڭ 15-ئىيۇل بىرازىلىيەنىڭ فورتالېزا شەھىرىدە ‹‹ ئالتۇن كېسەك ›› دۆلەتلىرى رەھبەرلىرىنىڭ 6-قېتىملىق ئۇچرىشىشىغا قاتناشتى ھەمدە ‹‹ يېڭى باشلىنىش ، يېڭى مەنزىل ، يېڭى ھەرىكەتلەندۈرگۈچ كۈچ ›› دېگەن تېمىدا نۇتۇق سۆزلىدى

شىنخۇا تورى ، بىرازىلىيە فورتالېزا، 15-ئىيۇل تېلېگراممىسى : ‹‹ئالتۇن كېسەك ›› دۆلەتلىرى رەھبەرلىرىنىڭ 6-قېتىملىق ئۇچرىشىشى بىرازىلىيەنىڭ فورتالېزا شەھىرىدە ئۆتكۈزۈلدى . جۇڭگونىڭ دۆلەت رەئىسى شى جىنپىڭ ، بىرازىلىيە زۇڭتۇڭى روسسېف ، رۇسىيە زۇڭتۇڭى پۇتىن ، ھىندىستان زۇڭلىسى مودى ، جەنۇبىي ئافرىقا زۇڭتۇڭى زۇما قاتارلىقلار ئۇچرىشىشقا قاتناشتى . بەش دۆلەتنىڭ رەھبەرلىرى ‹‹ سىغدۇرۇشچان ئېشىشنى ئەمەلگە ئاشۇرۇشنىڭ ئىمكانىيەتلىك سىجىل ھەل قىلىش لايىھەسى ››نى چۆرىدەپ ، نۆۋەتتىكى دۇنيانىڭ ئىقتىسادىي ۋەزىيىتى ، خەلقئارا سىياسىي بىخەتەرلىك مەسىلىلىرى توغرىسىدا پىكىر ئالماشتۇرۇپ ، كەڭ دائىرىدە ئورتاق تونۇش ھاسىل قىلىپ ، مۇھىم نەتىجىلەرنى قولغا كەلتۈردى .

شى جىنپىڭ ‹‹ يېڭى باشلىنىش ، يېڭى مەنزىل ، يېڭى ھەرىكەتلەندۈرگۈچ كۈچ ›› دېگەن تېمىدا نۇتۇق سۆزلىدى . ئۇ سۆزىدە ‹‹ئالتۇن كېسەك›› دۆلەتلىرىنىڭ ھەمكارلىق تەجرىبىلىرىنى خۇلاسىلەپ ، بۇنىڭدىن كېيىنكى ھەمكارلىق يۆنىلىشىنى ئوتتۇرىغا قويدى ، جۇڭگونىڭ ‹‹ ئالتۇن كېسەك ›› دۆلەتلىرى ھەمكارلىقىغا داۋاملىق قاتنىشىپ ، دۇنيانىڭ تىنچلىقىنى قوغداش ، ئورتاق تەرەققىياتنى ئىلگىرى سۈرۈش ئۈچۈن تېخىمۇ زور تۆھپىلەرنى قوشىدىغانلىقىنى بىلدۈردى .

شى جىنپىڭ مۇنداق تەكىتلىدى : ‹‹ ئالتۇن كېسەك ›› دۆلەتلىرىنىڭ نۇرغۇنلىغان زور خەلقئارالىق ۋە رايون مەسىلىلەردە ئورتاق ئاۋاز چىقىرىپ ، كۈچ چىقىرىشى دۇنيا ئىقتىسادىنىڭ ئېشىشىنى ئىلگىرى سۈرۈش ، يەر شارى ئىقتىسادىنى باشقۇرۇشنى مۇكەممەللەشتۈرۈش ۋە خەلقئارا مۇناسىۋەتلەرنى دېموكراتىيەلەشتۈرۈشنى ئىلگىرى سۈرۈشكە پايدىلىق بولۇپ ، خەلقئارا مۇناسىۋەتلەردىكى مۇھىم كۈچ ۋە خەلقئارا سىستېمىنىڭ ئاكتىپ قۇرغۇچىلىرى ھېسابلىنىدۇ .

شى جىنپىڭ مۇنداق دەپ كۆرسەتتى : ‹‹ ئالتۇن كېسەك ›› دۆلەتلىرى ئېچىۋېتىش ، كەڭ قورساق بولۇش ، ھەمكارلىشىش، ئورتاق گۈللىنىش روھى بويىچە ، ئۆتكەن بەش يىللىق تەجرىبىلەرنى خۇلاسىلەش ئاساسىدا ، يېڭى ھەمكارلىق رامكىسىنى پىلانلاپ ، تېخىمۇ قويۇق ، تېخىمۇ ئەتراپلىق ، تېخىمۇ مۇستەھكەم بولغان شېرىكلىك مۇناسىۋەتنى تەرەققىي قىلدۇرۇشى كېرەك .