‹‹ نيۇيورك ۋاقىت گېزىتى ›› خەۋىرىگە قارىغاندا ، كىشىلەر زىچ توپلاشقان مانخاتتان ۋاقىت گېزىتى مەيدانى بولسا ئەزەلدىن چاشقان بىلەن ئۆردەك ، دەرىجىدىن تاشقىرى قەھرىمان ۋە باشقا قورچاق ئوبرازىدىكى ئادەملەر يىغىلىپ تىلەمچىلىك قىلىدىغان سورۇن ئىكەن . ھازىر يەنە زور بىر تۈركۈم ئاپېلسىن رەڭ ، قوڭۇر رەڭ ۋە كۈل رەڭدە جۇببە كىيىۋالغان راھىبلارمۇ قوشۇلغان بولۇپ ، كۆپ قىسمى تاقىرباشلىق جۇڭگولۇق ئەرلەر ئىكەن ، يەنە بىر قىسىم ئوخشاش كىيىنىۋالغان راھىبەلەرمۇ بار ئىكەن . بۇ راھىب ۋە راھىبەلەرنىڭ بىر ئۆلچىمى بولۇپ ، يەنى كېتىۋاتقانلارغا كۈلۈمسىرەپ ، ئۇلارغا بەخت تىلەش ، شۇنداقلا تۇمار بېرىپ ئۇلارغا بەخت تىلەش ئارقىلىق ، كىشلەردىن ئىئانە بېرىشىنى تەلەپ قىلىش ئىكەن . ئۇلار دائىم بۇتخانا رەسىملىرىنى كۆرسىتىپ ، ئۆزلىرىنىڭ بۇتخانا ئۈچۈن ئىسسىرىق پۇلى يىغىۋاتقانلىقىنى ئۇقتۇرىدىكەن . كەينىدىن ئۇلار پۇل ئىئانە قىلىش تىزىملىكى دەپتىرىنى ئېچىپ ، قانچىلىك ئادەمنىڭ نەچچە پۇل ئىئانە قىلغانلىقىنى كۆرسىتىدىكەن .

خەۋەر قىلىنىشىچە ، بۇ ئەر كىشىلەر قارىماققا بۇددا دىنى راھىبلىرىغا ئوخشايدىكەن ، يەنە ئوخشاش ياسىنىۋالغان ئاياللارمۇ بار بولۇپ ، ئۇلار ئۆزىنى راھىبە ياكى داۋجياۋ راھىبەسى دەپ ئاتىۋالغان . ھېچكىممۇ ئۇلارنىڭ ھەقىقىي سالاھىيىتىنى ياكى نەدىن كەلگەنلىكىنى بىلمەيدىكەن . ساقچىلار ئادەتتە ئۇلارغا دەخلى قىلمايدىكەن ، پەقەت ئۇلار باشقىلارنى بەكرەك زورلىغاندا ئاندىن ئوتتۇرىغا چىقىپ ئارىلىشىدىكەن . بىر قىسىم ھەقىقىي بۇددا دىنى مۇرىتلىرى ئۇلارنىڭ قايسى مەزھەپكە تەۋە ئىكەنلىكىنى سورىغاندا ، ئۇلار ئادەتتە جاۋاب بەرمەيدىكەن ياكى كېتىپ قالىدىكەن .

بۇ راھىبلار ھەممە جايدا بار ئىكەن ، ئەگەر ئىئانە قىلغۇچى ئازراق بەرگەن بولسا ، ئۇلار قىلچىمۇ ئىككىلەنمەي يەنە جىقراق بېرىشنى تەلەپ قىلىدىكەن .
نيۇيوركتا تىلەمچىلىك قىلىش گەرچە قانۇنسىزلىق بولمىسىمۇ ، ساقچىلار بۇ يىل ئاز دېگەندە 9 ‹‹ راھىب ›› نى قولغا ئالغان ، ئۇلارنىڭ كۆپ قىسمى تىلەمچىلىك قىلغاندا باشقىلارنى مەجبۇرلاش ياكى كىنىشكىسىز بۇيۇملارنى بازارغا سېلىش جىنايىتى بىلەن ئەرز قىلىنغان .