سىنا تورىنىڭ 23-مارت خەۋىرى، باغداش تورىدىن ئىرپان تەرجىمىسى:

كەلگۈسى نەچچە يىلدا، ئاسراش تەننەرخى بەك يۇقىرى بولغانلىقتىن، گوللاندىيە بەش تۈرمىنى تاقىماقچى. پەقەت تۈرمە ئۈنۈمى بەك ناچار بولغانلىقى سەۋەبلىكلا ئەمەس، گوللاندىيەگە نىسبەتەن غايەت زور خۇش خەۋەر بولسا، گوللاندىيەدە جىنايەت ئۆتكۈزۈش نىسبىتى مۇقىم قەدەمدە تۆۋەنلىگەنلىكتىن، مىڭلىغان كۆزىتىش ئۆيلىرى يىل بويى قۇرۇق قالغان.

ئەڭ بۇرۇن بۇ ئىشنى بايقىغىنى «گوللاندىيە ئېلخەت گېزىتى» بولۇپ، ئۇلار بىر قىسىم ھۆكۈمەت ھۆججەتلىرىگە ئېرىشكەندىن كېيىن، تۈرمە تاقاش پىلانىنى ئاشكارىلىغان. ھۆججەتتە يەنە تەخمىنەن 1900 تۈرمە خىزمەتچىسىنىڭ ئىشسىز قالىدىغانلىقى كۆرسىتىلگەن.

گوللاندىيە ئاخباراتلىرى خەۋەر قىلىشىچە، تۈرمىنىڭ تاقىلىشى ئاساسلىقى ئىككى جەھەتتىكى سەۋەبنى چىقىش قىلغان. گوللاندىيە بىخەتەرلىك ۋە ئەدلىيە ۋەزىرى ئارد ۋان دېر ستېئۇر (Ard van der Steur) تونۇشتۇرىشىچە، ھازىر سودىيەلەر ھۆكۈم قىلغان جازا مۇددىتى تېخىمۇ قىسقا بولۇپ، جىنايەتچىلەرنىڭ تۈرمىدە تۇرۇش ۋاقتىنىڭ ئازلىغانلىقىدىن دېرەك بېرىدىكەن، بىراق بىرلا ۋاقىتتا بۇ ھەم ئېغىر جىنايەتلەرنىڭ ئازلىغانلىقى سەۋەبلىك ئىكەن. گوللاندىيە ئاخباراتلىرىنىڭ كۆرسىتىشىچە، گوللاندىيەدە جىنايەت ئۆتكۈزۈش نىسبىتى يېقىنقى نەچچە يىلدا ھەر يىلى ئوتتۇرىچە ھېساب بىلەن %0.9 تۆۋەنلىگەن.

ئەمەلىيەتتە، بۇ بەخت گوللاندىيەگە نىسبەتەن يېڭى ئىش ئەمەس. 2009-يىلى بەك كۆپ جىنايەتچى بولمىغانلىقى ئۈچۈن، ئۇلار 8 تۈرمىنى تاقىغان، 2014-يىلى يەنە 19 تۈرمىنى تاقىغان. گوللاندىيەنىڭ ئەھۋالى ئەتراپتىكى دۆلەتلەرنىڭ دىققىتىنى تارتتى: 2015-يىلى نورۋېگىيە 1000 نەچچە نورۋېگىيەلىك مەھبۇسنى گوللاندىيە تۈرمىسىگە قامىدى، چۈنكى نورۋېگىيە تۈرمىلىرى توشۇپ كەتكەن ئىدى.

گوللاندىيە جىنايەتچى ئازلىغانلىق سەۋەبلىك تۈرمىلەرنى تاقىغان بىرىنچى دۆلەت ئەمەس. شۋېتسىيە تۈرمە سانى 2004-يىلدىن 2011-يىلغىچە يىلىغا ئوتتۇرا ھېساب بىلەن %1 ئەتراپىغا ئازلىغان. 2011-يىلى ۋە 2012-يىلى بۇ سۈرئەت %6كە يەتتى. 2014-يىلى ئۇلار 4 تۈرمە ۋە بىر ئۆزگەرتىش ئورگىنىنى تاقىغانلىقىنى جاكارلىدى. «مۇھاپىزەت گېزىتى»نىڭ قارىشىچە، شۋېتسىيە تۈرمىلىرىنىڭ ئۈزلۈكسىز ئازلىشىنىڭ ئاچقۇچلۇق سەۋەبلىرىنىڭ بىرى شۋېتسىيە ئالىي سوتىنىڭ 2011-يىلىدىكى ھۆكۈمىتى زەھەر جىنايىتىگە بېرىدىغان جازانى يېنىكلەتكەن، جىنايەتچىنىڭ جازا مۇددىتىنىمۇ قىسقارتقان.