يەر شارى تورى 22-مارت خەۋىرى (ئوكيان تورىدىن رومانگۈل تەرجىمىسى)

 ياپونىيە ئىقتىساد خەۋىرلىرى تورىنىڭ 22-مارتتىكى خەۋرىگە قارىغاندا، جۇڭگو ئىستېمالچىلىرىنىڭ «زور ئېھتىياجى» نى چىقىش قىلىپ، جۇڭگوغا كېلىپ ئېلېكترونلۇق سودا بىلەن شۇغۇللىنىدىغان ياپونىيە كارخانىلىرى بارغانسېرى كۆپەيگەن. ئۇلار توردا دۇكان ئېچىپلا قالماي، يەنە سېتىشتىن كېيىنكى مۇلازىمەت، سىناپ بېقىش دۇكىنى قاتارلىقلارنى بىرلەشتۈرگەن. ياپونىيەدىكى خېرىدارلارنىڭ ئېھتىياجى ئاساسىي جەھەتتىن قانغاندىن كېيىن، ياپونىيە كارخانىلىرى تور ئارقىلىق ئىستېمالچىلارنىڭ «ئېھتىياجى» دىن چىقىش يولىنى تۇتۇپ، كۈندىلىك تۇرمۇش بۇيۇملىرى، يېمەكلىك، نازۇك مېخانىزم قاتارلىق مەھسۇلاتلىرىنىڭ بازىرىنى كېڭەيتكەن.

 2015 – يىلى ياپونىيەنىڭ جۇڭگو بازىرىدىكى ئېلېكترونلۇق سودا سوممىسى 800 مىليارد (تەخمىنەن 46 مىليارد 320 مىليون يۈەنگە باراۋەر) بولۇپ، ئامېرىكا بازىرىدىكى سودا سوممىسىدىن %40 يۇقىرى بولغان. 2014 – يىلىدىن بۇيان سودا سوممىسى تەخمىنەن %30 ئاشقان بولۇپ، 2018 – يىلىغا بارغاندا بىر تىرلىيون 400 مىلياردقا يېتىشى مۆلچەرلەنگەن. بۇنىڭدىن بۇرۇن نۇرغۇن جۇڭگولۇقلار ئۆز نامىدا ياپونىيەدىن مال كىرگۈزۈپ توردا ساتقان، ئەمما ياخشى ۋە ناچار ماللار ئارىلىشىپ كەتكەن، ھەم باھاسىمۇ ناھايىتى يۇقىرى بولغان. ياپونىيە كارخانىلىرى بىۋاستە توردا دۇكان ئېچىش ئارقىلىق، جۇڭگولۇق ئىستېمالچىلارنىڭ ۋەتەنگە قايتقاندىن كېيىنمۇ ياپونىيە مەھسۇلاتلىرىنى داۋاملىق ئىشلىتىش ھەم دوستلىرىغا تەۋسىيە قىلىش ئېھتىياجىدىن ياخشى پايدىلانغان.

 خەۋەردە دېيىلىشىچە، شاڭخەيدىكى 30 ياشلىق بىر يەسلى ئوقۇتقۇچىسى ماتسۇموتو كىيوشىنىڭ تيەنماۋدىكى بايراقدار دۇكىنىدىن دائىم مال سېتىۋالىدىكەن. يېقىندا ئۇ 300 نەچچە يۈەنلىك ئورۇقلىتىش بۇيۇمى سېتىۋالغان بولۇپ، گەرچە ياپونىيەدىن ئەۋەتىلىشى ئۈچۈن 10 كۈن ئەتراپىدا ۋاقىت كەتسىمۇ، ئۇ يەنىلا رازى بولغان ھالدا:«بۇ جۇڭگودىكى باشقا تور بەتلەرنىڭكىدىن ئەرزان، ئۇنىڭ ئۈستىگە سۈپىتى ئىشەنچلىك» دېگەن.

 ماتسۇموتو كىيوشىنىڭ جۇڭگودا ئېچىلغان دۇكىنى يوق بولۇپ، تور دۇكىنى ئارقىلىقلا ئىستېمالچىلارنىڭ ئېھتىياجىنى قاندۇرىدىكەن. 2015 – يىلى بايراقدار دۇكان ئېچىلغاندا، دۇكاندا ئاران 100 نەچچە خىل مەھسۇلاتى بار بولۇپ، ھازىر مەھسۇلاتى كۆپىيىپ 300 نەچچە خىلغا يەتكەن. ئېنىقلىنىشىچە، بۇ ماتسۇموتو كىيوشىنىڭ تۇنجى قېتىم ئېلېكترونلۇق سودىنى سىناپ بېقىشى بولۇپ، سودا سوممىسى سالماق قەدەم بىلەن ئېشىپ، ئۇنىڭ مۆلچەرلىگىنىدىن يۇقىرى بولغان.

 كۈندىلىك بۇيۇم ئىشلەپچىقارغۇچىلارمۇ ئاكتىپلىق بىلەن ھەرىكەت قىلىۋاتقان بولۇپ، ياپونىيەنىڭ يېڭىدىن قوشۇلغان ئىشلەپچىقارغۇچى شىركىتى Artnature ئۈچىنچى ئاينىڭ ئاخىرىدا ئەلىبابا ۋە جىڭدۇڭدا بايراقدار تور دۇكىنى ئېچىپ، ئاق چاچنى يوشۇرغۇچ ئۇپا قاتارلىق مەھسۇلاتلارنى بازارغا سالىدىكەن.

 2015 – يىلى 12- ئايدا، ياپونىيە رايون ئىقتىسادى تەتقىقات ئورنى 422 نەپەر جۇڭگولۇقنىڭ ئالدىنقى يىلى بىر يىلدا چېگرا ھالقىغان ئېلېكترونلۇق سودا ئارقىلىق ياپونيەدىن سېتىۋالغان مەھسۇلات تۈرلىرىنى تەكشۈرگەن. بۇنىڭ ئىچىدە گىرىم-بۇيۇملىرىنى سېتىۋالغۇچىلار ئەڭ كۆپ بولۇپ، %53.6 نى ئىگىلىگەن، ياڭراتقۇ ۋە ئېلېكترونلۇق مەھسۇلاتلار %29.6 نى، يېمەكلىك (ئۇششاق-چۈششەك يېمەكلىك بۇنىڭ سىرتىدا) %28.0 نى ئىگىلىگەن. ئىستېمالچىلاردىن نېمىشقا ياپونىيەدىن مال سېتىۋالىدىغانلىقى سورالغاندا، %52.1 ئادەم «سۈپىتى ئىشەنچلىك» دەپ جاۋاب بەرگەن.