تېڭشۈن تورىنىڭ 21-مارتتىكى خەۋىرى، باغداش تورىدىن ئەكبەر تەرجىمىسى:

توكلۇق ئاپتوموبىل يېڭى بازارغا چىققان چاغدا، دەسلەپكى ئابۇنتلار ئەسلىھەلىرى تولۇق ئەمەس دەپ ئاغرىنغان ئىدى. ئەمما بۈگۈنكى كۈندە، بۇ مەھسۇلاتنىڭ كۈنسېرى ئومۇملىشىشىغا ئەگىشىپ، نيۇيورك مانخاتتوندا توك قاچىلاش تۈۋرۈكىنىڭ سانى ماي قاچىلاش پونكىتىدىن ئېشىپ كەتتى.

«نيۇيورك ۋاقىت گېزىتى»نىڭ خەۋىرىگە ئاساسلانغاندا، تېسلا بۇ ئاينىڭ ئاخىرىدا مانخاتتوندىكى توك قاچىلاش تۈۋرۈكىنىڭ سانىنى 105كە يەتكۈزۈشنى پىلانلىغان، ماي قاچىلاش پونكىتى بولسا پەقەت 40، يۇقىرى پەللە ۋاقتىدا 40 مىنۇت ئۆچرەتتە تۇرۇشقا توغرا كېلىدۇ.

ئەمەلىيەتتە، «نيۇيورك ۋاقىت گېزىتى»نىڭ كۆرسىتىشىچە، بۇ ھەپتىگىچە مانخاتتوندا 68 ماشىنا ئامبىرىدا تېسلانىڭ توك قاچىلاش تۈۋرۈكى سەپلەنگەن، شۇڭا بۇ يەردىكى توك قاچىلاش تۈۋرۈكىنىڭ سانى ئاللىقاچان ماي قاچىلاش پونكىتىدىن ئېشىپ كەتتى. بىراق، ھازىرغا قەدەر كۆپ ساندىكى توك قاچىلاش تۈۋرۈكلىرى مېھمانخانا قاتارلىق جايلارغا ئورنىتىلغان، شۇڭا مەزكۇر شىركەت ئاكتىپلىق بىلەن ماشىنا توختىتىش ئورنىغا توك قاچىلاش تۈۋرۈكى ئورنىتىش قۇرۇلىشىنى ئىلگىرى سۈرمەكتە.

تېسلا شىركىتىنىڭ يېڭى بىر ئەۋلاد ئەرزان باھادىكى Model 3 توك ئاپتوموبىلىنى بازارغا سالىدىغانلىقىنى ئويلاشقاندا، بۇ تەدبىر دەل پەيتىگە كەلدى دېيىشكە بولىدۇ.

ئەمما كىشىنى ئەپسۇسلاندۇرىدىغىنى، يېڭى ئورنىتىلغان بۇ توك قاچىلاش تۈۋرۈكلىرى دەرىجىدىن تاشقىرى تېز سۈرئەتتىكى توك قاچىلاش تۈۋرۈكلىرى ئەمەس. توك قاچىلاش سۈرئىتى نىسبەتەن ئاستا، ھەر 1 سائەت توك قاچىلىغاندا تەخمىنەن 97 كىلومېتىر يول يۈرەلەيدۇ. ئەمما كۆپ قىسىم توك قاچىلاش تۈۋرۈكى تېسلا ئابۇنتلىرىغا ھەقسىز ئېچىۋېتىلگەن.