بېيجىڭ ۋاقتى 4-ئاينىڭ 9-كۈنى 2:45 مىنۇت ئۆتكەندە 2013-2014 پەسىللىك ياۋروپا ئۇزغۇنلۇقىنى تالىشىش پۇتبول مۇسابىقىسىنىڭ تۆت كۈچلۈككە كىرىش ھەل قىلغۇچ مۇسابىقىسى ئىككىنچى قېتىملىق ئۇچرىشىش ئېلىپ بېرىلدى. بۇ مەيدان مۇسابىقە گېرمانىيە دورتمۇند كوماندىسىنىڭ ئۆز مەيدانى ۋېستىفارن پۇتبول مەيدانىدا خان مادرىد كوماندىسى بىلەن ئېلىپ بېرىلدى. ئىككى تەرەپنىڭ بىرىنچى قېتىملىق ئۇچرىشىشىدا خان مادرىد كوماندىسى ئۆز مەيدانىدا 3-0 نەتىجە بىلەن دورتمۇند كوماندىسىنى مەغلۇپ قىلغانىدى. بۇ مەيدان مۇسابىقىدە دورتمۇند كوماندىسى روئىسنىڭ ئىككى توپ كىرگۈزۈشى بىلەن خان مادرىد كۇلۇبىنى يەڭدى. بىراق ئىككى قېتىملىق ئۇچرىشىشتىكى ئومۇمىي نومۇر 3-2 بولغاچقا دورتمۇند كوماندىسى بۇ مەيدان غەلبىنى قولغا كەلتۈرگەن بولسىمۇ خان مادرىد تەرىپىدىن شاللىۋېتىلدى شۇڭا تۆت كۈچلۈك قاتارىغا كىرەلمىدى.

مۇسابىقە باشلىنىپ 16 مىنۇت بولغاندا خان مادرىد كوماندىسىنىڭ ئارقا بېكى كونتېرىۋا سول يولدىن ئوتتۇرغا پاس تاشلىغانىدى بىراق توپ چەكلەنگەن رايۇن ئىچىدە سەكرەپ توپنى توسماقچى بولغان دورتمۇند كوماندىسىنىڭ ئارقا بېكى پىشچېكنىڭ قولىغا تېگىپ كەتتى. خان مادرىد كۇلۇبى نۇقتا توپقا ئېرىشتى. كىرىستىيانو رونالدو بۇ مەيدان مۇسابىقىدە مەيدانغا چىقمىغاچقا نۇقتا توپنى دىمارىيا تەپتى.بىراق توپ دورتمۇند قاپقاۋۇلى ۋېيدىنفېللېر تەرىپىدىن قاڭقىپ چىقىرىۋېتىلدى. خان مادرىد كوماندىسى ياخشى پۇرسەتتىن بىرنى كەتكۈزۈپ قويدى.

24 مىنۇت بولغاندا دورتمۇند كوماندىسى ئۈستۈنلۈكنى ئىگەللىدى. دورتمۇند ئارقا مەيداندىن ئۇزۇن پاس تاشلىدى. پې پې كاللا توپ ئۈسۈپ خاتالىق سادىر قىلىپ قويدى.روئىس ئۇستىلىق بىلەن توپنى يەر بويلىتىپ كونتىروللىقىغا ئالغاندىن كېيىن بىۋاستە ۋاراتارغا ئۇردى. توپ كىردى! دورتمۇند كوماندىسى 1-0 نەتىجە بىلەن ئۈستۈنلۈككە ئېرىشتى. 32 مىنۇت بولغاندا دورتمۇند كوماندىسى ئورنى ناھايىتى ياخشى بولغان ئىختىيارى توپتىن بىرگە ئېرىشتى. روئىس پاس بەردى، كەينىدىن قىسىلىپ كىرگەن دورتمۇند توپچىسى خۇمېرس باش توپ ئۇردى. بىراق توپ كاسىللاس تەرىپىدىن قاڭقىپ چىقىرىۋېتىلدى.

37 مىنۇت بولغاندا دورتمۇند كوماندىسى نۇمۇر پەرقىنى چوڭايتتى. خان مادرىد ئوتتۇرا مەيدان ئەزاسى ئىللارامىندى قايتۇرۇپ پاس بەرگەندە خاتالىق سادىر قىلدى.دورتمۇند ئالدى مەيداندىن توپنى ئۈزۈۋېلىپلا ھۇجۇم قوزغىدى. روئىس توپنى سول تەرەپتىكى لېۋېندوفۇسكىغا تاشلىدى. لېۋېندېفۇسكى چەكلەنگەن رايۇننىڭ سول تەرىپىدىن ۋاراتارغا تەپتى. توپ كاسىللاس تەرىپىدىن ئازراقلا قاڭقىپ چىقىرىۋېتىلىپ ۋاراتارنىڭ تۆمۈرىگە تېگىپ كېتىپ يەنە يېنىپ كەلدى.ئەگىشىپ كەلگەن روئىس ئەپچىللىك بىلەن توپنى ئۆرلىتىپ ۋاراتارغا تەپتى. توپ كىردى! دورتمۇند كوماندىسى 2-0 نەتىجە بىلەن خان مادرىد كۇلۇبىنىڭ ئالدىغا ئۆتتى. بىراق ئومۇمىي نومۇرنى تەڭلەشتۈرۈش ئۈچۈن دورتمۇند كوماندىسى يەنە بىر توپ كىرگۈزۈشى كېرەك.

كېيىنكى يېرىم مەيداندا ھەر ئىككى كوماندا تىرىشقان بولسىمۇ بىرەر توپ كىرمىدى. ئاخىرىدا خان مادرىد كۇلۇبى ئومۇمىي نومۇر 3-2 نەتىجە بىلەن ئۈستۈنلۈكنى ئىگەللەپ بۇ مەيدان مۇسابىقىدە مەغلۇپ بولغان بولسىمۇ يەنىلا تۆت كۈچلۈككە كىردى. دورتمۇند كوماندىسى بۇ يىللىق تۆت كۈچلۈكتىن خوشلاشتى.

دورتمۇند كوماندىسىدىن ئىككى توپ كىرگۈزگەن روئىس پۈتۈن مەيدان مۇسابىقىدىكى ئەڭ يۇقىرى نومۇر 9.5 كە ئېرىشتى.ئىپادىسى ئالاھىدە ياخشى بولغان ۋېيدىنفىللىرمۇ يۇقىرى بولغان 8.6 نومۇرغا ئېرىشتى. خان مادرىد تەرەپتىن بۈگۈنكى مۇداپىئە ئىپادىسى تېخىمۇ ياخشى بولغان ئوتتۇرا مەيدان ئەزاسى مودرىچ 8.1 نومۇرغا ئېرىشتى.

پۇتبول تورى خەۋىرى، لەگلەك تورى تەرجىمىسى

لەگلەك تورى ئۈندىدار سالونىنى قوشىۋېلىڭ——ئىزدەش نامى LEGLEK