ئامېرىكا «ۋاشىنگىتون كۈندىلىك پوچتا گېزىتى» نىڭ 28-چېسلا خەۋەر قىلىشىچە، ئادەتتىكى نورمال ئادەملەرنىڭ 10 قول بارمىقى ۋە 10 پۇت بارمىقى، شۇنداق بولغاندا جەمئىي 20 دانە بارمىقى بولىدۇ، بىراق ھىندىستانلىق 43 ياشلىق بىر ئەرنىڭ پۇت-قولىنىڭ جەمئىي 28 بارمىقى بار بولۇپ، دەل مۇشۇ سەۋەبلىك ئۇ يەنە تېخى دۇنيا جېننىس رىكوردى قامۇسىغا كىرگۈزۈلگەن. گەرچە ئۇنىڭ بارماقلىرى شۇنچە كۆپ بولسىمۇ، بىراق بۇ كىشى يەنىلا كەسپى سەۋەبىدىن بارمىقىغا زىيان يېتىپ قېلىشىدىن ئەنسىرەيدىكەن.

      ھىندىستاننىڭ شەربىدىكى خىماتناگار (Himatnagar) رايونىدىكى 43 ياشلىق دېۋېندىرا (Devendra) بىر ياغاچچى بولۇپ، تۇغۇلىشىدىنلا كۆپ بارماقلىق بولۇش غەلىتە كېسىلىگە گىرىپتار بولۇپ قالغاچقا، ئۇنىڭ قولى ۋە پۇتىنىڭ بارماقلىرى نورمال ئادەمنىڭكىدىن سەككىزى ئارتۇق بولۇپ قالغان. بىراق بۇ غەلىتە ئىش ئويلىمىغان يەردىن ئۇنىڭغا ئامەت ئېلىپ كەلگەن، يەنى ئۇ دۇنيا جېننىس رىكورتى قامۇسى تەرىپىدىن «دۇنيادىكى بارمىقى ئەڭ كۆپ ئادەم» دەپ تىزىملانغان ۋە ئۆزى تۇرۇشلۇق جايدا خېلىلا داڭق چىقىرىپمۇ قالغان. ئۇ مۇنداق دېدى:«مېنىڭ 28 بارمىقىم بارلىقىنى ئاڭلىغان ئادەم دەرھاللا كېلىپ راست-يالغانلىقىنى ئۇقۇپ باققۇسى كېلىدۇ، ئىشقىلىپ مەن بۇ جايدا داڭلىق چولپانغىلا ئوخشايمەن».

      بىراق دېۋېندىرانىڭ كەسپى ياغاچچى بولغاچقا، ئۇ ھەر كۈنى رەندە، چوت، پىچاق، ھەرە قاتارلىقلار بىلەن ھەپىلىشىدۇ، شۇڭلاشقا ئۇ ئېھتىياتسىزلىقتىن بارمىقىغا زىيان يېتىپ قېلىشىنى، ھەتتا بارمىقىدىن ئايرىلىپ قېلىشتىن بەكمۇ ئەنسىرەيدۇ، ئۇ مۇنداق دېدى:«مېنىڭچە بارماقلىرىمنىڭ كۆپ بولۇشى بەخىتنىڭ سىمۋولىدۇر، شۇڭلاشقا مەن ئۇلارغا زىيان يېتىپ قېلىشنى، ئۇلاردىن ئايرىلىپ قېلىشنى خالىمايمەن. دەل مۇشۇ سەۋەبتىن مەن ھۈنەر قىلغاندا تولىمۇ ئىھتىياتچان مۇئامىلە قىلىمەن».