11 يىل بۇرۇن، 23 ياشلىق لۇجياڭلىق پۇلسىز يىگىت شاۋگاۋ باشقىلار بىلەن شېرىكلىشىپ 2000 يۈەن بۇلاپ، شېرىكلىرى ئارقا-ئارقىدىن تۈرمىگە كىرىپ كەتكەندىن كېيىن بەختكە يارىشا «قانۇن تورى» دىن ۋاقىتلىق قېچىپ قۇتۇلۇپ، قولىغا تەگكەن 300 يۈەن پۇل بىلەن تەدرىجىي تەرەققىي قىلىپ، مىليونىرغا ئايلانغان. نەتىجىدە شاۋگاۋنىڭ ئويلىمىغان يېرىدىن ئۇ يەنىلا قانۇن تورىدىن قېچىپ قۇتۇلالماي، 11 يىلدىن كېيىن قولغا ئېلىندى.

    شاۋگاۋ 1982-يىلى تۇغۇلغان بولۇپ، كىچىكىدىن ئاتا-ئانىسى ئالەمدىن ئۆتكەن، 17 يېشىدىلا جېنىنى بېقىش ئۈچۈن خېفېيغا كەلگەن بولسىمۇ خىزمەت تاپالماي جەمئىيەت ئويناپ يۈرگەن. 2005-يىلى شاۋگاۋ شاۋليۇ شاۋيۈ ئىككەيلەن بىلەن جاڭجيا يولىدىكى مېھمانخانىدا قونماقچى بولغاندا شاۋليۇنىڭ مۇھەببەت رىقابەتچىسى شاۋجياڭنى ئۇچرىتىپ قالغان.

شاۋليۇ ئىككى ئاغىنىسى بىلەن شاۋجياڭنى ئۇرغاندىن كېيىن يېنىدىكى 2000 يۈەننى بۇلاپ كەتكەن. ئارقىدىنلا ئۈچەيلەن تاكسىغا ئولتۇرۇپ پىيادىلەر كوچىسىغا كېلىپ بۇلاپ كەلگەن پۇلنى خەجلىگەندىن كېيىن ئېشىپ قالغان پۇلنى تەڭ بۆلۈشۈپ بىرەيلەنگە 300 يۈەندىن تەگكەندىن كېيىن كېتىپ قېلىشقان.

    ۋەقەدىن كېيىن شاۋجياڭ دېلو مەلۇم قىلغان، ساقچى تەرەپ تېزدىنلا شاۋليۇ بىلەن شاۋيۈنى قولغا ئالغان، بىراق بۇ ئىككەيلەن شاۋگاۋ بىلەن تونۇشۇپ كەتمەيدىغان بولۇپ، ئادەتتە لەقىمىنىلا ئاتايدىغان بولۇپ ھەقىقىي ئىسمىنىمۇ بىلمەيدىكەن، شۇ سەۋەبلىك ساقچىلار شاۋگاۋنىڭ سالاھىيىتىنى ئېنىقلىيالمىغانلىقتىن، شاۋليۇ بىلەن شاۋيۈ بۇلاڭچىلىق جىنايىتى بىلەن يەتتە يىل قاماق جازاسىغا ھۆكۈم قىلىنغان، شاۋگاۋ بولسا قانۇن تورىدىن قېچىپ يۈرگەن.

   ئۆتكەن يىلنىڭ ئاخىرى، ساقچى تەرەپ قاراپ چىقىلغان دېلولارنى رەتلەش جەريانىدا شۇ يىلى 3-ئايدا «زەھەر چەككۈچىنى ئۆيىدە ساقلاش جىنايىتى»  بىلەن بەيخۇ باقمىچىلىق مەيدانى تۈرمىسىگە قامالغان، بۇ ئەرنىڭ لەقىمى دەل نەچچە يىل بۇرۇن شاۋليۇ بىلەن شاۋيۈ ئاشكارىلىغان ئىسىمغا ئوخشاش چىقىپ قالغانلىقىنى بايقىغاندىن كېيىن، بۇ ئەرنىڭ دەل ئەينى ۋاقىتتا بۇلاڭچىلىق جىنايىتىن كېيىن قېچىپ يۈرگەن شاۋگاۋ ئىكەنلىكىنى جەزملەشتۈرگەن.

     بۇ يىل 20-يانۋار، شاۋگاۋنىڭ مۇددىتى توشۇپ تۈرمىدىن چىققان كۈنى بىر قانچە دوستى ھەشەمەتلىك ئاپتوموبىللىرىنى ھەيدەپ تۈرمە ئالدىدا شاۋگاۋنى كۈتۈۋالغان، بىراق ئويلىمىغان يەردىن ساقچى خادىملىرىمۇ ئۇنى ساقچى ماشىنىسى بىلەن «كۈتۈۋاتقانىدى».

شاۋگاۋنىڭ دېيىشىچە ئۇ ئەينى ۋاقىتتا بۆلۈشكەن 300 يۈەننى ئېلىپ، كاللىسىدا ھەمىشە بۇنداق لاغايلاپ يۈرسە بولمايدىغانلىقىنى، ياخشىراق تۇرمۇش كەچۈرۈش كېرەكلىكىنى ئويلىغاندىن كېيىن 300 يۈەنگە ئۈچ چاقلىق ۋېلسىپىت ئېلىپ ھەر قايسى كەچلىك بازارلارغا پىۋە يەتكۈزۈپ بېرىپ كىرىم قىلغان. ئارقىدىن ئۇ مۇلازىمەت، ئۆي-زېمىن قاتارلىق كۆپ كەسىپلەر بىلەن شۇغۇللانغان.

قولغا ئېلىنىشتىن بۇرۇن ئۇ مېڭچېڭ يولىدىكى مەلۇم سودا سارىيىدىن ئوندىن ئارتۇق دۇكان ئۆي سېتىۋالغان بولۇپ، ئون مىليوندىن ئارتۇق پۇل توپلىغان. پۇل تاپقاندىن كېيىن ئۇ يەنە ئۆزىنى ئۇنتۇپ زەھەر چېكىشنى باشلىغان، ھەم باشقىلار بىلەن بىرگە ئۆيىدە زەھەر چېكىپ تۇتۇلۇپ قالغان، ئاقىۋەتتە شۇ سەۋەبلىك 11 يىل بۇرۇنقى بۇلاڭچىلىق جىنايىتىمۇ پاش بولۇپ يەنە بىر قېتىم قولغا ئېلىنغان، ھازىر مەزكۇر دېلو ئىچكىرىلەپ تەكشۈرۈلىۋېتىپتۇ.