مەملىكەتلىك 13-نۆۋەتلىك قىشلىق تەنھەرىكەت مۇسابىقىسى غەلىبىلىك باشلاندى. ماھىرلار، تىرېنېرلار، تاراتقۇ خادىملىرى، تەشكىلىي كومىتېتنىڭ خادىملىرىغا ئوخشاشلا مەملىكەتلىك 13-نۆۋەتلىك قىشلىق تەنھەرىكەت مۇسابىقىسى ئۈچۈن پايپېتەك بولۇۋاتقانلار ئارىسىدا يەنە بىر تۈركۈم كىشىلىرىمىز بار. ئۇلار دەل پىدائىيلار. ئۇلارنى مۇسابىقە مەزگىلىدىكى «ئەڭ سۆيۈملۈك كىشىلەر» دەپ تەرىپلىسەك ھەرگىزمۇ ئارتۇقلۇق قىلماس.

مۇخبىرىمىز پولات ئاماننۇرى پىدائىيلار بىلەن.

      مەملىكەتلىك 13-نۆۋەتلىك قىشلىق تەنھەرىكەت مۇسابىقىسى تەشكىلىي كومىتېتىنىڭ ئورۇنلاشتۇرۇشىغا ئاساسەن، شىنجاڭ ئۇيغۇر ئاپتونوم رايونلۇق ئىتتىپاق كومىتېتى مەملىكەتلىك 13-نۆۋەتلىك قىشلىق تەنھەرىكەت مۇسابىقىسىگە پىدائىي قوبۇل قىلىش، تەربىيەلەش، ئەۋەتىش، باشقۇرۇش ۋە مۇلازىمەت قىلىش خىزمىتىگە مەسئۇل بولغانىدى. 2015-يىلى 6-ئايدا پىدائىي قوبۇل قىلىش خىزمىتى قانات يايدۇرۇلغاندىن بۇيان، توردا تىزىملىتىش ۋە پوچتا يوللانمىسى ئارقىلىق مەسلىھەت سوراش شەكلىدە جەمئىي 5000 دىن ئارتۇق كىشى ئۆزىنى پىدائىيلىققا تىزىملاتقانىدى. قاتلاممۇ قاتلام تاللاش ئارقىلىق، 1400 كىشى مەملىكەتلىك 13-نۆۋەتلىك قىشلىق تەنھەرىكەت مۇسابىقىسىنىڭ پىدائىيلىقىغا بېكىتىلگەنىدى. ئۇلار مەملىكىتىمىزدىكى 29 ئۆلكە، ئاپتونوم رايون، بىۋاسىتە قاراشلىق شەھەردىن كەلگەن بولۇپ، خەنزۇ، ئۇيغۇر، قازاق، خۇيزۇ، موڭغۇل قاتارلىق 17 مىللەت كىشىلىرىدىن تەشكىللەنگەن. ئۇلارنىڭ ئەڭ چوڭى 52 ياش، كىچىكى 16 ياش بولۇپ، ئوتتۇرىچە يېشى 21 ياش.

     شىنجاڭ مائارىپ ئىنستىتۇتىدىن 97 نەپەر ئىستۇدېنت مەملىكەتلىك 13-نۆۋەتلىك قىشلىق تەنھەرىكەت مۇسابىقىسىنىڭ پىدائىيلىقىغا تاللانغان بولۇپ، بۇ ئىستۇدېنتلار ھاۋانىڭ سوغۇق بولۇشىغا قارىماي، ئاللىقاچان خىزمەتلىرىنى باشلىۋەتكەنىدى. شىنجاڭ مائارىپ ئىنستىتۇتى ئىتتىپاق كومىتېتىدىن ئابدۇغېنى ئابدۇۋەلى پىدائىيلار يېتەكچىسى بولۇپ ئىشلەپ كەلمەكتە.

مۇخبىرىمىز پولات ئاماننۇرى شىنجاڭ مائارىپ ئىنستىتۇتى ئىتتىپاق كومىتېتىنىڭ پىدائىيلار يېتەكچىسى ئابدۇغېنى ئابدۇۋەلىنى زىيارەت قىلماقتا.

مۇخبىرىمىز پولات ئاماننۇرى پىدائىي ئابدۇرېھىم ئەمەرنى زىيارەت قىلماقتا.

ئابدۇرېھىم ئەمەر قەشقەر ۋىلايىتىنىڭ مارالبېشى ناھىيەسىدە تۇغۇلغان بولۇپ، 2014-يىلى شىنجاڭ مائارىپ ئىنستىتۇتىنىڭ چەت ئەل تىللىرىغا فاكۇلتېتىغا قوبۇل قىلىنغانىدى. پىدائىيلىققا تاللىنىش ئابدۇرېھىم ئەمەرنىڭ ئەڭ چوڭ ئارزۇسى ئىدى.

مۇخبىرىمىز پولات ئاماننۇرى پىدائىي مۇبارەك غېنىنى زىيارەت قىلماقتا.

مۇبارەك غېنى ئۈرۈمچى شەھىرىدە تۇغۇلغان بولۇپ، 2014-يىلى شىنجاڭ مائارىپ ئىنستىتۇتىنىڭ ئۇچۇر فاكۇلتېتىغا قوبۇل قىلىنغانىدى. شوخ، كۈلگۈنچەك بۇ قىز ھاردىم-تالدىم دېمەي، پىدائىيلىق خىزمىتىنى يۈرۈشتۈرمەكتە.

ئىشىنىمىزكى، تولۇپ-تاشقان قىزغىنلىق، كۆتۈرەڭگۈ روھقا ئىگە پىدائىيلىرىمىز مەملىكەتلىك 13-نۆۋەتلىك قىشلىق تەنھەرىكەت مۇسابىقىسىنى تېخىمۇ يۇقىرى پەللىگە كۆتۈرەلەيدۇ.