قارا نوپۇس مەسىلىسىنىڭ ساقلانغىنىغا ئۇزۇن بولۇپ، ئېلىمىزنىڭ جەمئىيەتنى تۈزەشتىكى ئاجىز نۇقتىسىغا ئايلانغان ئىدى. گوۋۇيۈەن ئىشخانىسى 14-يانۋار چىقارغان «نوپۇسى يوق كىشىلەرنى تىزىملاپ، نوپۇسقا ئېلىش مەسىلىسىنى ھەل قىلىش ھەققىدىكى پىكىر»دە، نوپۇس تىزىملاش بەلگىلىمىسىگە ئۇيغۇن بولمىغان ھەر قانداق ئالدىنقى شەرت قويۇشنى چەكلەپ، نوپۇسى يوق كىشىلەرنى تىزىملاپ، نوپۇسقا ئېلىش مەسىلىسىنى ئومۇميۈزلۈك ھەل قىلىش ئېنىق ئوتتۇرىغا قويۇلدى.

     6-قېتىملىق ئومۇميۈزلۈك نوپۇس تەكشۈرۈشكە قارىغاندا، ئېلىمىزدە 13 مىليونچە ئادەمنىڭ نوپۇسى يوق بولۇپ، «قارا نوپۇس» دەپ ئاتالغان. پىكىردە، نوپۇسى يوق كىشىلەرنىڭ ئوخشىمىغان ئەھۋالىغا ئاساسەن، مۇنداق نوپۇسقا ئېلىش لايىھەسى ئايرىم-ئايرىم ئوتتۇرىغا قويۇلدى: پىلانلىق تۇغۇت سىياسىتىگە ئۇيغۇن كەلمىگەن نوپۇسى يوق كىشىلەر، پىلاندىن ئارتۇق تۇغۇلغانلار، نىكاھسىز تۇغۇلغانلار «دوختۇرخانا تۇغۇلۇش ئىسپاتى» ۋە ئاتا-ئانىسىدىن بىر تەرەپنىڭ نوپۇس دەپتىرى، توي خېتى ياكى نىكاھسىز تۇغۇلۇش ئىسپاتىنى ئېلىپ، ئۆز ئىختىيارلىقى بىلەن دادىسى ياكى ئانىسىنىڭ نوپۇسىنى تاللاپ، نوپۇسقا ئالدۇرسا بولىدۇ. دادىسىنىڭ نوپۇسىغا ئالدۇرۇشنى ئىلتىماس قىلغانلار يەنە ئاتا-بالىلىق مۇناسىۋىتىنى دەلىللەش ئىسپاتىنى كۆرسىتىشى كېرەك.

      «دوختۇرخانا تۇغۇلۇش ئىسپاتى»نى بېجىرمىگەن نوپۇسى يوق كىشىلەر «دوختۇرخانا تۇغۇلۇش ئىسپاتى»نى ئالغاندىن كېيىن، يەنە ئاتا-ئانىسىدىن بىر تەرەپنىڭ نوپۇس دەپتىرى، توي خېتى ياكى نىكاھسىز تۇغۇلۇش ئىسپاتى بىلەن تەمىنلەپ، نوپۇسقا ئېلىشنى ئىلتىماس قىلسا بولىدۇ.

      بۇندىن باشقا، پىكىردە يەنە بېقىۋېلىش رەسمىيىتى بېجىرمەي بېقىۋېلىنغان نوپۇسى يوق كىشىلەر، يېزىلاردىكى توي قىلىش سەۋەبىدىن تۇغۇلغان يۇرتى رويخەتتىن ئۆچۈرۈلگەنلەر، نوپۇسىنى يۆتكەش گۇۋاھنامىسى يوقاپ كەتكەنلەر ياكى كۈچكە ئىگە مۇددىتى ئېشىپ كەتكەنلىكتىن نوپۇسسىز قالغانلار ھەم ئېلىمىز پۇقرالىرى بىلەن چەتئەللىكلەردىن نىكاھسىز تۇغۇلغان نوپۇسى يوق كىشىلەر ھەققىدە تەپسىلىي نوپۇسقا ئېلىش سىياسىتى بەلگىلەندى. بۇ-ئومۇمەن نوپۇسى يوق كىشىلەرنىڭ قانداق ۋاقىتتا قانداق سەۋەب بولۇشىدىن قەتئىينەزەر، ئۇلارغا ۋاقتىدا قانۇن بويىچە نوپۇسقا ئېلىش رەسمىيىتى بېجىرىلىدىغانلىقىدىن دېرەك بېرىدۇ.

     مائارىپ مىنىستىرلىقى ئاساسىي مائارىپ 1-مەھكىمىسىنىڭ مۇئاۋىن باشلىقى دۇ كېۋېي مۇنداق دېدى: نوپۇسى يوق كىشىلەر نوپۇسقا ئېلىنغاندىن كېيىن، ئۆز جايىدا مەكتەپكە كىرىش تەلىپىگە ئاساسەن، ئۇلار مەكتەپكە ئورۇنلاشتۇرۇلىدۇ، ئۇلارغا ئوقۇش تەۋەلىكى بېكىتىلىدۇ.