سەئۇدى ئەرەبىستان قاتارلىق دۆلەتلەر شۇ يەر ۋاقتى 1-ئاپرېل قوزغىغان ھاۋا ھۇجۇمىدا يەمەننىڭ ئەل خۇدەيداھ شەھىرىدىكى بىر سۈت زاۋۇتىغا بومبا چۈشۈپ 37 ئادەم قازا قىلغان، 80 ئادەم يارىلانغان
جۇڭگو ئاخبارات تورى، 8-ئاپرېل تېلېگراممىسى: ب د ت تورىنىڭ 7-ئاپرېلدىكى خەۋىرىگە قارىغاندا، يەمەندىكى توقۇنۇش بارغانچە كەسكىنلىشىۋاتقان بولۇپ، مارتنىڭ ئاخىرىدىن ھازىرغا قەدەر 600 گە يېقىن ئادەم قازا قىلغان، 1700دىن كۆپ ئادەم يارىلانغان. ب د ت سىستېمىسىدىكى ياردەم بېرىش ئاپپاراتلىرى ئۇرۇشنىڭ تەسىرىگە ئۇچرىغان ئاممىغا بولغان ياردەم سالمىقىنى بىخەتەرلىك شارائىتى يار بەرگەن ئەھۋال ئاستىدا داۋاملىق ئاشۇرغان.
ب د ت بالىلار فوندىنىڭ 7-ئاپرېل بىلدۈرۈشىچە، يەمەندىكى قوراللىق توقۇنۇشتا 19-مارتتىن بۇيان 74 كىچىك بالىنى ئۆز ئىچىگە ئالغان 560 تىن ئارتۇق ئادەم قازا قىلغان، 1700 دىن كۆپ ئادەم يارىلانغان، بۇنىڭدىن باشقا 44 بالا مەجرۇھ بولۇپ قالغان. بىراق، ئالدىنقى ھەپتە ئۇرۇش تېخىمۇ كەسكىنلەشكەنلىكتىن قازا قىلغان، يارىلانغان بالىلارنىڭ سانى يەنىمۇ ئېشىشى مۇمكىن ئىكەن.
ب د ت بالىلار فوندىنى تېخىمۇ ئەندىشىگە سالغىنى شۇكى، يەمەندە نۆۋەتتە تەخمىنەن بىر مىليونغا يېقىن بالا ئوقۇشسىز قالغان، دوختۇرخانىلارمۇ مەبلەغ يېتىشمەسلىك ۋە يارىدار زىيادە كۆپ بولۇپ كەتكەنلىكتىن نورمال ئىشلىيەلمەي قالغان.
ب د ت ئىنسانپەرۋەرلىك ئىشلىرىنى ماسلاشتۇرۇش نازارىتىنىڭ 7-ئاپرېل بىلدۈرۈشىچە، بۇ نازارەتنىڭ خىزمەتچىلىرى ئولتۇرغان بىر ئايروپىلان 6-ئاپرېل يەمەننىڭ ئەڭ چوڭ شەھىرى سانائاغا يېتىپ كەلگەن بولۇپ، مۇشۇ ھەپتە داۋالاش ماددىي ئەشيالىرى قاچىلىغان يەنە ئىككى ئايروپىلان كېلىدىكەن، بۇنىڭدىن باشقا، يەنە بىر تاشقى كېسەللىكلەر ئوپېراتسىيە ئەترىتىمۇ دېڭىز يولى ئارقىلىق يەمەننىڭ جەنۇبىدىكى ئادېنغا بېرىش ئۈچۈن جىبۇتتىن يولغا چىقىشقا تەييارلىنىپ بولغان.
يۇقىرىقىلاردىن باشقا، يېقىندا 12 توننا داۋالاش ماددىي ئەشيالىرى بىر كۈن ئىچىدە ئادېنغا يەتكۈزۈلۈپ، داۋالاش مەركىزى ۋە دوختۇرخانىلارغا تەقسىملەنگەن، يەنە توپىلاڭ مەركىزى ۋە غەربىي شىمالدىكى سادا ئۆلكىسىمۇ بىر قىسىم داۋالاش ماددىي ئەشيالىرىغا ئېرىشكەن، سادانىڭ جەنۇبىغا جايلاشقان ھەجە ئۆلكىسىدىكى خانىۋەيران بولغان 300 نەچچە ئائىلىمۇ يېمەكلىك ياردىمىگە ئېرىشكەن.
بۇنىڭ بىلەن بىر ۋاقىتتا، يەمەندە قاپسىلىپ قالغان ياكى يەمەنگە كېتىۋاتقان 159 نەپەر ئېفىئوپىيەلىك كۆچمەن جىبۇت ئارقىلىق يۇرتلىرىغا قايتقان.